Ayɛ Babaoo Feemɔ Daa Nɛɛ
1 Yehowa webii bɛ deka. Wɔ weku lɛ, nitsumɔ, kɛ skul he gbɛnaa nii pii ka wɔ nɔ. Nɔ ni fe fɛɛ hu lɛ, “ayɛ babaoo feemɔ yɛ Nuntsɔ lɛ nitsumɔ lɛ mli” daa nɛɛ. (1 Kor. 15:58, NW) Esa akɛ wɔsaa wɔhe kɛha daa otsi asafoŋ kpeei lɛ, ni wɔya hu. Awoɔ wɔ hewalɛ ni wɔkaha otsi ko miiho wɔhe ni wɔyaaa shiɛmɔ. Esa akɛ ato be ni fa ama shi daa kɛha teemɔŋ nikasemɔ kɛ weku Biblia mli nikasemɔ. Onukpai kɛ asafoŋ sɔɔlɔi yɛ nitsumɔi pii yɛ asafo lɛ mli. Yɛ bei komɛi amli lɛ abiɔ ni wɔye wɔbua mɛi ni sa ni ehia amɛ lɛ.
2 Yɛ bei komɛi amli lɛ, babaoo ni wɔyɔɔ feemɔ lɛ baanyɛ aha wɔteŋ mɛi komɛi anu he akɛ efa tsɔ. Kɛlɛ, gbɔmɛi ni bɛ deka kwraa lɛ baanyɛ afee mɛi ni fata mɛi ni yɔɔ miishɛɛ fe fɛɛ lɛ ahe, kɛ aha nibii ŋmɛ pɛpɛɛpɛ ní akwɛ nibii yɛ gbɛ ni ja nɔ.—Jaj. 3:12, 13.
3 Bɔfo Paulo ji mɔ ni yɔɔ babaoo feemɔ. Yɛ be mli ni etsuɔ lɛ diɛŋtsɛ ehiamɔ nii ahe nii akɛ buu feelɔ lɛ, etsu nii waa diɛŋtsɛ fe bɔfoi krokomɛi lɛ. Etsu nii akɛ sanekpakpa shiɛlɔ ni etɔɔɔ lɛ, ni eshiɛ yɛ faŋŋ kɛ shia kɛ shia, yɛ be mli ni ekuuu ehiɛ eshwieee egbɛnaa nii akɛ too kuu lɛ nɔkwɛlɔ lɛ nɔ. (Bɔf. 20:20, 21, 31, 34, 35) Yɛ deka ni ebɛ lɛ fɛɛ sɛɛ lɛ, Paulo miisumɔ ni etsu nii babaoo yɛ Yehowa sɔɔmɔ mli, be fɛɛ be.—Okɛto Romabii 1:13-15 he.
4 Paulo tee nɔ ehiɛ pɛpɛɛpɛ ni eŋmɛɔ kɛ miishɛɛ tsui mli, kɛtsɔ ehe ni ekɛfɔ Yehowa nɔ kɛha hewalɛwoo lɛ nɔ. Ena akɛ nyɔmɔwoo kɛ tsui ni nyɔɔ mɔ mli yɛ esɔɔmɔ lɛ mli. (Fil. 4:13) Ele akɛ Nyɔŋmɔ hiɛ kpaŋ enitsumɔ lɛ nɔ. (Heb. 6:10) Miishɛɛ ni eyɔɔ akɛ eeeye ebua mɛi krokomɛi ni amɛle Yehowa lɛ wo lɛ hewalɛ. (1 Tes. 2:19, 20) Nɔmimaa ni ena akɛ enine aaashɛ ehiɛnɔkamɔ ni damɔ Biblia nɔ lɛ kanya lɛ koni eya nɔ etsu nii waa.—Heb. 6:11.
5 Esa akɛ wɔsusu nibii kpakpai ni jɛɔ wɔ deŋmegbomɔi lɛ amli baa lɛ hu he. Kpeei ni wɔyaa daa otsi, ni wɔkɛ wɔhe woɔ mli hu lɛ tswaa mɛi krokomɛi emaa shi ni ewoɔ amɛ hewalɛ. (Heb. 10:24, 25) Mɔdɛŋ ni wɔbɔɔ koni wɔkɛ sanekpakpa lɛ ayaha mɛi fɛɛ lɛ haa asafo lɛ yaa hiɛ, beni ateeɔ miishɛɛ shi, ni mɛi heei kɛ wɔ bɔɔ lɛ. (Yoh. 15:8) Mɛi krokomɛi ni ehia amɛ lɛ ni ayeɔ abuaa amɛ lɛ haa ekomefeemɔ mumɔ ni tamɔ weku kome hiɔ asafo lɛ mli. (Yak. 1:27) Kɛfata he lɛ, taakɛ Paulo ji lɛ, esaaa akɛ wɔhiɛ kpaa nɔ kɔkɔɔkɔ akɛ deka ni wɔnaaa kwraa yɛ nitsumɔi ni sɛɛnamɔ yɔɔ he lɛ amli lɛ saa Yehowa Nyɔŋmɔ hiɛ. Wɔbuɔ enɛ akɛ hegbɛ kpele ni wɔna ni wɔkɛaasɔmɔ lɛ. Kɛha wɔ lɛ, shihilɛ gbɛ ko kwraa bɛ ni hi fe enɛ!
6 Sɛɛnamɔ babaoo yɛ ni abaana yɛ nibii pii ahe nitsumɔ mli. Kɛ wɔkɛ wɔhe ewo mumɔŋ nitsumɔ kpakpa mli lɛ, efeɔ tamɔ nɔ ni be lɛ hoɔ kɛ foi. Kɛ wɔyoo akɛ gbi fɛɛ gbi ni hoɔ eyaa lɛ kɛ wɔ bɛŋkɛɔ jeŋ hee lɛ he kpaakpa lɛ, wɔkɛ miishɛɛ kpɛlɛɔ wala shihilɛ nitsumɔ ni fa ni wɔnaa mli ŋɔɔmɔ bianɛ lɛ nɔ. Wɔyoɔ nilee ni yɔɔ babaoo tsumɔ mli hu lɛ, ejaakɛ wɔnaaa bei babaoo ni aaaha wɔkɛ wɔhe awo je lɛŋ nibii ni adiɔ sɛɛ lɛ amli.—Efes. 5:15, 16.
7 Yɛ anɔkwale mli lɛ, babaoo yɛ ni wɔbaatsu yɛ Nuntsɔ lɛ nitsumɔ lɛ mli. Shi wɔmii baanyɛ ashɛ wɔhe daa, kɛ wɔtee nɔ wɔkɛ wɔhe fɔ Yehowa Nyɔŋmɔ kɛ Yesu Kristo, ni haa wɔsɔɔmɔ lɛ feɔ nɔ ni yɔɔ miishɛɛ ni sɛɛnamɔ yɔɔ he lɛ anɔ lɛ.—Mat. 11:28-30; 1 Yoh. 5:3.