Teemɔŋ Nikasemɔ—Sane ni Esa akɛ Asusu He
1 Mɛɛ saji haa wɔkɛ hiɛdɔɔ susuɔ nii ahe? Esa akɛ wɔsusu wɔkɛ Yehowa teŋ wekukpaa ni bɛŋkɛ kpaakpa ni wɔɔtswa wɔma shi ni wɔhiɛ mli lɛ he waa diɛŋtsɛ. Teemɔŋ nikasemɔ tsuɔ babaoo yɛ wekukpaa ni bɛŋkɛ kpaakpa ni tamɔ nɛkɛ ni aaana lɛ he. Ŋmɛnɛ, wɔteŋ mɛi fioo ko pɛ amɛ shihilɛi ŋmɛɔ amɛ gbɛ ni amɛkɛ be babaoo jwɛŋɔ saji anɔ ni amɛfeɔ teemɔŋ nikasemɔ hu. Kɛlɛ, kɛ wɔkaneee Nyɔŋmɔ Wiemɔ lɛ daa lɛ, wɔbaanyɛ wɔgbɔjɔ kɛyashɛ he ni wɔnaŋ hewalɛ ni wɔkɛaate shi wɔwo je lɛŋ mumɔ lɛ kɛ eheloonaa akɔnɔi lɛ.
2 Ha Wiemɔ lɛ Aba Otsine: Beni wɔkase Nyɔŋmɔ yiŋtoi ahe nii klɛŋklɛŋ lɛ, no mli lɛ etamɔ nɔ ni wɔmiishwe ni wɔna nilee babaoo. Shi, yɛ be kpalaŋŋ sɛɛ lɛ, ekolɛ mumɔŋ niyenii he hɔmɔ ni yeɔ wɔ lɛ eba shi. Ekolɛ ehe baahia ni wɔha mumɔŋ niyenii lɛ ‘aba wɔ tsine.’ (1 Pet. 2:2) Te wɔbaafee tɛŋŋ ni wɔtee akɔnɔ ni tamɔ nɛkɛ shi?
3 Niyenii ko ni osumɔɔ waa lɛ ŋma baanyɛ atee okɔnɔ shi yɛ bɔ ni osusuɔ eŋɔɔmɔ he yɛ oyiŋ lɛ hewɔ. Nakai nɔŋŋ teemɔŋ nikasemɔ ni aaafee lɛ kpitiokpitio lɛ baanyɛ ana wɔnɔ hewalɛ yɛ mumɔŋ. Mumɔŋ niyenii fioo ni ŋɔɔ ni wɔɔye lɛ baanyɛ atee wɔ akɔnɔ shi kɛha anɔkwalei ni mli kwɔlɔ lɛ namɔ. Miishɛɛ ni jɛɔ nikasemɔ mli baa lɛ baanyɛ awo wɔ hewalɛ koni wɔtao Yehowa Wiemɔ lɛ mli vii.
4 Too Be ni Hi Kɛha Bo Fe Fɛɛ he Gbɛjianɔ: Mɛi komɛi kɛ gbɛkɛ muu lɛ fɛɛ feɔ teemɔŋ nikasemɔ, shi mɛi komɛi hu sumɔɔ ni amɛkɛ be fioo pɛ akase nii be mli ni amɛfeɔ nakai shii abɔ yɛ be kɛ beaŋ. Kɛ onaa akɛ onyɛɔ ojwɛŋɔ nikasemɔ lɛ nɔ waa leebi maaŋkpa lɛ, ekolɛ obaanyɛ okpɛ oyiŋ ni okase nɔ ko dani oye nii leebi. Kɛ ojwɛŋmɔ hiɔ nikasemɔ nɔ waa gbɛkɛ lɛ, obaanyɛ ofee onikasemɔ lɛ dani oyawɔ gbɛkɛ. Bɔ fɛɛ bɔ ni shihilɛ lɛ ji lɛ, nɔ ni he hiaa ji ni otsu he nii daa, ni okɛ ohe akpɛtɛ be he gbɛjianɔtoo ni hi kɛha bo fe fɛɛ lɛ he.
5 Kɛ awo wɔ hewalɛ ni wɔfɔ teemɔŋ nikasemɔ feemɔ lɛ, ekolɛ wɔkɛ oyaiyeli baatsɔɔ akɛ wɔbɛ deka po momo. Shi ehe miihia ni wɔ fɛɛ wɔkɛ anɔkwayeli apɛi bɔ ni wɔkɛ wɔbe tsuɔ nii wɔhaa lɛ mli. Ani afiteɔ be babaoo daa gbi kɛhaa tɛlivishin nɔ nifeemɔi akwɛmɔ? Ani wɔmiisumɔ ni wɔkɛ nibii komɛi ni wɔsumɔɔ asha afɔle? Bɔ ni wɔkɛ wɔ bei tsuɔ nii wɔhaa lɛ mlipɛimɔ yɛ anɔkwayeli mli lɛ baanyɛ atsɔɔ bei komɛi ni abaanyɛ akɛtsu nii ni sɛɛnamɔ aba he babaoo yɛ teemɔŋ nikasemɔ mli.—Efes. 5:15, 16.
6 Ebiɔ ni wɔgbala wɔjwɛŋmɔ fɛɛ kɛya Nyɔŋmɔ Wiemɔ kasemɔ lɛ nɔ. Ni aaabɔ mɔdɛŋ akɛ aaafee nɔ kroko yɛ nakai be kome too lɛ nɔŋŋ mli lɛ baa emli sɛɛnamɔi lɛ ashi. Kɛ wɔmiisumɔ ni wɔkase nii, beni wɔyeɔ nii, wɔboɔ redio toi, loo beni wɔkwɛɔ tɛlivishin lɛ, eeenyɛ eba akɛ wɔnyɛŋ wɔha wɔjwɛŋmɔ fɛɛ ahi nɔ ni wɔbɔɔ mɔdɛŋ ni wɔkase lɛ nɔ. (1 Tim. 4:15) No hewɔ lɛ ehe miihia ni wɔkwa nibii ni baagbala wɔjwɛŋmɔ kɛjɛ nikasemɔ lɛ nɔ.—Kwɛmɔ School Guidebook, baafai 33-4.
7 Biblia mli ŋaawoo lɛ kasemɔ kɛ ekɛ nitsumɔ daa lɛ he miihia ejaakɛ nakai ji gbɛ ni wɔtsɔɔ nɔ ni wɔnine shɛɔ gbɛtsɔɔmɔ nɔ kɛjɛɔ Yehowa ŋɔɔ. Ha efee oti ni ma ohiɛ akɛ oooha anɔkwale ni akala lɛ abote otsui mli moŋ. Ŋɔɔ hegbɛ fɛɛ hegbɛ ni onaa lɛ, kɛ efaaa po, koni okane mumɔŋ nibii, osusu he, ni ojwɛŋ nɔ.—5 Mose 6:6-8; Kol. 1:9, 10.