Oblahii kɛ Oblayei—Nyɛkɛ Nyɛskulyaa lɛ Atsua Nii Kɛmɔa Shi
1 Te onuɔ osɛɛ ni okuɔ kɛyaa skul yɛ gbɛhamɔ sɛɛ lɛ he ohaa tɛŋŋ? Ani ooshwe koni oná afi kroko mli skulyaa he sɛɛ? Ani okɛ hegbɛi ni skul lɛ kɛhaa bo lɛ tsuɔ nii kɛmɔɔ shi koni okɛgba oklasbii kɛ otsɔɔlɔi lɛ anɔkwale lɛ he sane? Wɔyɛ nɔmimaa akɛ oosumɔ koni ofee nɔ ni fe fɛɛ yɛ skul.
2 Feemɔ Nikaselɔ Kpakpa: Kɛ beni oyaa klas lɛ, osaa ohe jogbaŋŋ, ni ofee toiboo jogbaŋŋ lɛ, obaaná sɛɛnamɔi babaoo. Okɛ mɔdɛŋbɔɔ atsu skul nifeemɔi ni akɛbaa shia lɛ he nii, shi kaaŋmɛ gbɛ ni skul nifeemɔ miitsĩ teokrase nitsumɔi anaa.—Fil. 1:10.
3 Okɛ Yehowa Odasefoi kɛ Wolo-Kasemɔ wolo bibioo lɛ kanemɔ aje skul afi hee lɛ shishi. No sɛɛ lɛ, esa akɛ bo loo ofɔlɔi kɛ wolo lɛ ekomekome aha otsɔɔlɔi lɛ ateŋ mɔ fɛɛ mɔ. Hã amɛle akɛ abaaha sanebimɔi fɛɛ ni ekolɛ amɛyɔɔ lɛ ahetoo. Enɛ baaye ebua amɛ koni amɛnu oshishitoo mlai kɛ ohemɔkɛyelii lɛ ashishi jogbaŋŋ, ni amɛkɛ bo baafee ekome yɛ be mli ni okɛ nɔ ni atsɔɔ bo lɛ tsuɔ nii lɛ. Ebaama nɔ mi eha otsɔɔlɔi lɛ hu akɛ bo kɛ ofɔlɔi miisumɔ koni nyɛkɛ amɛ afee ekome yɛ be mli ni amɛyeɔ amɛbua bo koni oná wolo kasemɔ ni he yɔɔ sɛɛnamɔ lɛ.
4 Feemɔ Odasefonyo Kpakpa: Mɛni hewɔ obuuu skul lɛ akɛ oshikpɔŋkuku kɛha trukaa odaseyeli lɛ? Yɛ skul afi ni baa lɛ mli lɛ, obaaná hegbɛi ni ekaaa ní okɛaaye odase. Oyɛ mumɔŋ nilee ni yɔɔ naakpɛɛ ni kɛ́ okɛha lɛ, ebaanyɛ ‘ehere bo diɛŋtsɛ kɛ mɛi ni boɔo toi lɛ fɛɛ yiwala.’ (1 Tim. 4:16) Kɛtsɔ Kristofoi ajeŋba kpakpa he nɔkwɛmɔnɔ ni ooofee lɛ nɔ, kɛ odase ni oooye yɛ he fɛɛ he ni sa akɛ ofee nakai lɛ nɔ lɛ, bo kɛ mɛi krokomɛi fɛɛ baaná he sɛɛ.
5 Nyɛminuu fioo ko ye enanemɛi skulbii odase trukaa yɛ skul. Mɛi ni bo lɛ toi lɛ ateŋ mɛi komɛi ji Katoliknyo ko, mɔ ko ni heee Nyɔŋmɔ nɔ eyeee ni yeɔ mɛi ni heɔ Nyɔŋmɔ nɔ yeɔ lɛ ahe fɛo, kɛ oblanyo ko ni shɛreɔ zigaret ni enuɔ dãa hu waa diɛŋtsɛ. Yɛ fɛɛ mli lɛ, nyɛminuu fioo nɛɛ ye ebua enanemɛi 15 kɛshɛ henɔjɔɔmɔ kɛ baptisimɔ he!
6 No hewɔ lɛ, oblahii kɛ oblayei, nyɛkɛ nyɛhe ahaa nikasemɔ koni nyɛtsu nyɛ odaseyeli shikpɔŋkuku ni ekaaa lɛ mli nii. Kɛkɛ lɛ, nyɛbaaná sɛɛnamɔ kpelei kɛjɛ nyɛskulyaa lɛ mli.