Mɛni Jamɔ Mli Heyeli Tsɔɔ Kɛha Bo?

Eyɛ mli akɛ abuɔ jamɔ mli heyeli akɛ shishijee hegbɛi ni ayɔɔ lɛ eko yɛ United States moŋ, shi kui abasabasa-feemɔ ni akɛte shi awo Yehowa Odasefoi, tee nɔ yɛ maŋ lɛŋ he fɛɛ he yɛ 1940 afii lɛ amli

GBƆMƐI akpekpei abɔ ewuu yɛ he. Mɛi komɛi egboi po yɛ he. Eji adesai anii ni jara wa waa fe fɛɛ lɛ ateŋ ekome lɛlɛŋ. Mɛni ji no? Heyeli! The World Book Encyclopedia lɛ tsɔɔ heyeli shishi akɛ “nyɛmɔ ni ayɔɔ ni akɛaahala nibii ni asumɔɔ koni atsu he nii.” Etsaa nɔ akɛ: “Yɛ mla shishinumɔ naa lɛ, gbɔmɛi yeɔ amɛhe kɛji adesa shihilɛ gbɛjianɔtoo kɛ husui ni esaaa, ni he ehiaaa, ni nilee bɛ mli lɛ enyɛɛɛ amɛnɔ. Esa akɛ shihilɛ gbɛjianɔtoo lɛ abu amɛ hegbɛi hu he—ni ji, amɛ shishijee heyelii, hewalɛi, kɛ hegbɛi.”

Susumɔ nɛɛ tamɔ nɔ ni yɔɔ mlɛo. Shi, yɛ shihilɛ mli diɛŋtsɛ lɛ, efeɔ tamɔ nɔ ni enyɛŋ eba akɛ gbɔmɛi kɛ amɛhe aaakpa gbee yɛ he ni esa akɛ afo husui awo heyeli he kɛyashi lɛ he. Akɛ nɔkwɛmɔ nɔ lɛ, mɛi komɛi heɔ yeɔ akɛ esa akɛ nɔyeli awo mlai koni ekɛbu maŋbii aheyeli he. Shi mɛi krokomɛi hu baawie ashi enɛ akɛ mlai nɛɛ ji naatsii nii krɛdɛɛ ni esa akɛ ahã maŋbii lɛ aye amɛhe kɛjɛ shishi lɛ! Eyɛ faŋŋ akɛ, heyeli tsɔɔ nibii sɔrɔtoi kɛhaa gbɔmɛi sɔrɔtoi.

Shi Jamɔ Mli Heyeli Hu?

Ekolɛ heyeli ni gbɔmɛi kɛ amɛhe kpaaa gbee yɛ he kwraa ji jamɔ mli heyeli, ni atsɔɔ shishi akɛ “hegbɛ ni mɔ ko yɔɔ akɛ eeehe nɔ ni esumɔɔ eye, ni etsu hemɔkɛyeli ni esumɔɔ lɛ he nii.” Taakɛ Jeŋmaji Ekomefeemɔ lɛ Mla kɛ Hegbɛi ni Adesai Yɔɔ lɛ Ajajemɔ yɛ Jeŋ Fɛɛ lɛ tsɔɔ lɛ, “mɔ fɛɛ mɔ yɛ hegbɛ kɛha susumɔ, henilee kɛ jamɔ mli heyeli namɔ.” Nɔ ni fata enɛ he ji hegbɛ ni mɔ ko yɔɔ “akɛ etsake ejamɔ loo hemɔkɛyeli,” kɛfata heyeli ni eyɔɔ “akɛ eeejie ejamɔ loo hemɔkɛyeli kpo yɛ nitsɔɔmɔ, nifeemɔ, jamɔ kɛ gbijurɔyeli mli” lɛ he.—Sanejajemɔ 18.

Eka shi faŋŋ akɛ, wɔbaakpa jeŋmaŋ fɛɛ jeŋmaŋ ni kɛ anɔkwayeli susuɔ eshishibii ahe lɛ gbɛ akɛ ekɛ nɛkɛ heyeli nɛɛ aaaha. Shi dɔlɛ sane ji akɛ, jeee be fɛɛ be enɛ baa mli nakai. Taakɛ The World Book Encyclopedia tsɔɔ lɛ, “Nyɔŋmɔ jamɔ saa gbɔmɛi babaoo ahenumɔi ni mli wa waa lɛ ahe. Nɔyelii komɛi yɛ ní tsakpaa ni mli wa waa hiɔ amɛkɛ jamɔ ko teŋ, ni amɛbuɔ gbɔmɛi ni yɔɔ hemɔkɛyelii krokomɛi amli lɛ akɛ amɛwoɔ maŋkwramɔŋ nɔyeli hegbɛ he gbeyei. Ekolɛ nɔyeli lɛ hu baabu jamɔ akɛ ehe yɛ gbeyei yɛ maŋkwramɔ gbɛfaŋ, ejaakɛ ekolɛ jamɔi lɛ kɛ bulɛ ni akɛhaa Nyɔŋmɔ lɛ yeɔ toiboo ni aaafee aha maŋ lɛ hiɛ.”

Yɛ yiŋtoi nɛɛ ahewɔ lɛ, nɔyelii komɛi kɛ naatsii baa jamɔ he nitsumɔ nɔ. Fioo komɛi jeɔ gbɔmɛi anijiaŋ wui koni amɛkɛ amɛhe akawo hemɔkɛyelii lɛ eko kwraa mli. Ni eyɛ mli akɛ ekrokomɛi hu kɛɔ akɛ amɛfiɔ jamɔ mli heyeli sɛɛ moŋ, shi amɛkudɔɔ jamɔ mli nifeemɔi fɛɛ yɛ gbɛ ni yɔɔ kpɛŋŋ nɔ.

Akɛ nɔkwɛmɔ nɔ lɛ, susumɔ shihilɛ ni hi shi afii babaoo yɛ Mexico lɛ he okwɛ. Eyɛ mli akɛ Maŋ Nɔkwɛmɔ Gbɛjianɔtoo lɛ maa jamɔ mli heyeli nɔ mi moŋ, shi etsɔɔ faŋŋ akɛ: “Sɔlemɔtsui ni akɛtsuɔ nii akɛ maŋbii ajamɔ hei lɛ ji Maŋ lɛ, ní Maŋ Nɔyeli lɛ damɔ shi kɛha lɛ lɛ nɔ̃, ni lɛ ji mɔ ni baatsɔɔ amɛteŋ nɔ ni abaanyɛ aya nɔ akɛtsu nii yɛ nakai gbɛ nɔ.” Atsake Maŋ Nɔkwɛmɔ Gbɛjianɔtoo lɛ mli yɛ 1991, ni akɛ nɛkɛ naatsii nɛɛ ba naagbee. Shi kɛlɛ, nɔkwɛmɔ nɔ nɛɛ tsɔɔ faŋŋ akɛ abaanyɛ atsɔɔ jamɔ mli heyeli shishi yɛ gbɛi sɔrɔtoi anɔ, yɛ shikpɔji sɔrɔtoi anɔ.

Jamɔ Mli Heyeli Kroko

Ani jamɔ mli heyeli yɛ shikpɔŋ ni oyɔɔ nɔ lɛ nɔ? Kɛji eko yɛ lɛ, te atsɔɔ shishi ahãa tɛŋŋ? Ani obaanyɛ oja Nyɔŋmɔ yɛ gbɛ ni osumɔɔ nɔ, aloo ani anyɛɔ onɔ akɛ otsɔ Maŋ jamɔ lɛ mli nyo? Ani aŋmɛɔ bo gbɛ ni okane jamɔ he woji ni okɛha mɛi krokomɛi hu, aloo nɔyeli lɛ egu woji ni tamɔ enɛɛmɛi akɛ nɔ ni mla eŋmɛɛɛ gbɛ? Ani obaanyɛ okɛ mɛi krokomɛi agba ohemɔkɛyeli lɛ he sane, aloo abuɔ enɛ akɛ jamɔ mli hegbɛi ni amɛyɔɔ lɛ anɔtɔmɔ?

Sanebimɔi nɛɛ ahetooi damɔ maŋ ni oyɔɔ mli lɛ nɔ. Shi, miishɛɛ sane ji akɛ, jamɔ mli heyeli ko yɛ ni damɔɔɔ maŋ ni mɔ ko yɔɔ mli lɛ nɔ kwraa. Beni eyɔɔ Yerusalem yɛ afi 32 Ŋ.B. lɛ, Yesu kɛɛ esɛɛnyiɛlɔi lɛ akɛ: “Kɛji nyɛhi shi yɛ miwiemɔ lɛ mli lɛ, minɔkwa kaselɔi ji nyɛ, ni nyɛaale anɔkwale lɛ, ni anɔkwale lɛ aaaha nyɛye nyɛhe.”—Yohane 8:31, 32.

Mɛni Yesu kɛ wiemɔ ni ewie nɛɛ tsɔɔ? Etoibolɔi Yudafoi lɛ miishwe ni amɛna heyeli kɛjɛ Roma nɔyeli shishi. Shi jeee heyeli kɛmiijɛ maŋkwramɔŋ nɔnyɛɛ shishi Yesu wieɔ he lɛ. Shi moŋ, eewo ekaselɔi lɛ ashi yɛ nɔ ko ni hi kwraa fe no he, taakɛ wɔbaana yɛ sane ni nyiɛ sɛɛ lɛ mli lɛ.