Woji Bibii—Dɛŋdadei ni he Yɔɔ Sɛɛnamɔ Kɛha Sɔɔmɔ Nitsumɔ Lɛ
1 Bei pii lɛ, ninenaa nitsulɔ ni he esa waa lɛ hiɛɔ nitsumɔ dadei sɔrɔtoi, ni afee eko fɛɛ eko kɛha nitsumɔ krɛdɛɛ ko. Akɛ Maŋtsɛyeli jajelɔi lɛ, wɔyɛ woji bibii sɔrɔtoi babaoo ni baaye abua wɔ ni wɔkɛ hesaa atsu gbɔmɛi ni wɔshiɛɔ wɔtsɔɔ amɛ lɛ amumɔŋ hiamɔ nii ahe nii. (Abɛi 22:29) Ekolɛ okɛ mɔ ko baakpe yɛ shinaa ko naa ni eyɛ jwɛŋmɔŋ nɔnyɛɛ shishi. Yɛ he kroko hu lɛ, ekolɛ shiatsɛ lɛ miishwe ni ena nɔyeli ni yeɔ anɔkwa, yɛ be mli ni mɔ kroko hu miisusu he akɛ ani yiŋtoo ko yɛ shihilɛ sɛɛ lo. Mɛɛ gbɛ nɔ wɔɔtsɔ wɔkɛ wɔ woji bibii lɛ atsu nii ni wɔkɛye wɔbua nɛkɛ gbɔmɛi nɛɛ?
2 Kɛ okɛ “Ani Nyɔŋmɔ Susuɔ Wɔhe Lɛlɛŋ?” wolo bibioo lɛ miiha lɛ, obaanyɛ okɛɛ akɛ:
◼ “Mɛi ni naa amanehulu kɛ jalɛ sane ni ayeee ni yaa nɔ yɛ je lɛŋ lɛ ateŋ mɛi komɛi shwaa Nyɔŋmɔ akɛ lɛ eha fɛɛ ebalɛ nakai. Amɛsusumɔ ji akɛ, akɛni Nyɔŋmɔ ji ofe hewɔ lɛ, eji esusuɔ wɔhe lɛlɛŋ kulɛ, ebaafo wɔ amanehului nɛɛ fɛɛ asɛɛ. Te bo hu onuɔ he ohaa tɛŋŋ? [Ŋmɛɛ gbɛ ni ejie naa.] Lala 72:12-14 tsɔɔ akɛ Nyɔŋmɔ susuɔ wɔhe lɛlɛŋ. Amanehulu kɛ jalɛ sane ni ayeee nɛɛ jeee etɔmɔ. Ewo shi akɛ etsɛŋ ni ebaajie efɔŋ feelɔi lɛ kwraa. Nɛkɛ wolo bibioo, ni ji Ani Nyɔŋmɔ Susuɔ Wɔhe Lɛlɛŋ? nɛɛ tsɔɔ nɔ ni ebaafee, kɛ bɔ ni wɔɔfee ni wɔna he sɛɛ.” Ekolɛ obaanyɛ okɛ wiemɔi ni yɔɔ baafa 27, kuku 22 lɛ atsa sanegbaa lɛ nɔ.
3 Kɛji okɛ “Yiŋtoo ni Yɔɔ Shihilɛ Sɛɛ” wolo bibioo lɛ miitsu nii lɛ, ekolɛ obaasumɔ ni oje shishi yɛ nɛkɛ gbɛ nɔ:
◼ “Yɛ naagbee lɛ, mɔ fɛɛ mɔ susuɔ yiŋtoo ni yɔɔ shihilɛ sɛɛ lɛ he. Ani no ji ni ahi shi afii 70 loo 80, kɛkɛ lɛ no sɛɛ lɛ agbo atee? Aloo ani shishinumɔ babaoo yɛ shihilɛ sɛɛ fe enɛ? Te osusuɔ he ohaa tɛŋŋ? [Ŋmɛɛ gbɛ ni ejie naa.] Wɔnaa Nyɔŋmɔ yiŋtoo fɛfɛo kɛha gbɔmɔ kɛ shikpɔŋ nɛɛ, yɛ Lala 37:29.” Kɛ okane ŋmalɛ lɛ ogbe naa lɛ, gbelemɔ mfoniri ni yɔɔ baafa 31 lɛ, ni owie bɔ ni nibii baafee yɛ Paradeiso shihilɛ mli lɛ he babaoo lolo.
4 Obaanyɛ okɛ “Naa! Miifee Nii Fɛɛ Ehee” wolo bibioo lɛ sɛɛ mfoniri lɛ fɛɛ atsɔɔ ni okɛwie wolo lɛ he, koni obi akɛ:
◼ “Mɛni osusuɔ akɛ ehe baahia dani anyɛ aha shikpɔŋ lɛ afee tamɔ nɛkɛ? [Ŋmɛɛ gbɛ ni ewie.] Mɔ fɛɛ mɔ ni yɔɔ mfoniri nɛɛ mli lɛ yɛ shia kɛ nitsumɔ ni enaa he miishɛɛ. Toiŋjɔlɛ yɛ, ni ayɛ niyenii babaoo hu, ni awoko shikpɔŋ lɛ nɔ muji. Bɔ fɛɛ bɔ ni amɛaabɔ mɔdɛŋ waa amɛha lɛ, adesai anɔyelii naa akɛ amɛnyɛɛɛ amɛkɛ jeŋ ni tamɔ nɛkɛ aba kɔkɔɔkɔ. Shi kɛlɛ, Biblia lɛ maa nɔ mi ehaa wɔ akɛ Nyɔŋmɔ ‘baafee nii fɛɛ ehee.’ [Gbelemɔ baafa 30, ni okane Kpojiemɔ 21:3, 4.] Nɛkɛ wolo bibioo nɛɛ baanyɛ aye abua bo ni okase nɔ ni ehe hiaa ni ofee koni ohi shi yɛ nakai jeŋ hee lɛ mli.” Kɛ mɔ lɛ jie miishɛɛ babaoo kpo lɛ, gbelemɔ baafa 3, ni ofee bɔ ni wɔfeɔ Biblia mli nikasemɔ wɔhaa lɛ he nɔkwɛmɔ nɔ otsɔɔ lɛ.
5 Obaanyɛ okɛ gbɛ nɛɛ atsu nii kɛ “Shihilɛ yɛ Shikpɔŋ Nɔ” wolo bibioo lɛ:
◼ “Mɛi pii susuɔ akɛ ehe baahia ni amɛya ŋwɛi koni amɛyana naanɔ wala mli ŋɔɔmɔ, shi mɛni obaasusu yɛ shi ni aaahi kɛya naanɔ yɛ shikpɔŋ nɛɛ nɔ lɛ he? [Ŋmɛɛ gbɛ ni eha hetoo.] Biblia lɛ maa nɔ mi ehaa wɔ akɛ wɔbaanyɛ wɔna naanɔ wala, ni etsɔɔ wɔ bɔ ni wɔɔfee ni wɔshɛ nakai oti lɛ he hu.” Kanemɔ Yohane 17:3. No sɛɛ lɛ, okɛ mfoniri 49 lɛ atsɔɔ shiatsɛ lɛ ni obi lɛ akɛ: “Ani obaasumɔ ni ohi jeŋ ni tamɔ nɛkɛ mli?” Okɛ wolo bibioo lɛ aha lɛ, ni oto gbɛjianɔ kɛha sɛɛsaramɔ.
6 Woji bibii lɛ wieɔ saji ni eba yɛ ebe naa lɛ ahe, ni amɛhaa mɛi asanebimɔi ahetoo, ni amɛkɛ miishɛjemɔ haa. Kɛ wɔkɛ dɛŋdadei nɛɛ tsu nii yɛ ŋaa mli lɛ, no lɛ wɔbaanyɛ wɔye wɔbua anɔkwafoi lɛ koni “amɛna anɔkwale lɛ he anɔkwa nilee.”—1 Tim. 2:4, NW.