Nyɛfea Nyɔŋmɔ Wiemɔ lɛ Tsɔɔlɔi—Kɛtsɔ Woji Bibii kɛ Nitsumɔ Nɔ
1 Gbɛnaa nii ka Yehowa tsulɔ fɛɛ tsulɔ ni ejɔɔ ehe nɔ lɛ nɔ akɛ ena gbɛfaŋnɔ yɛ mɛi krokomɛi ni atsɔɔ amɛ Nyɔŋmɔ Wiemɔ lɛ mli. Hiɛdɔɔ ni yɔɔ nɛkɛ gbɛnaa nii nɛɛ he lɛ bafeɔ faŋŋ kɛ wɔyoo akɛ mɔ ni yɔɔ hegbɛ fɛɛ yɛ ŋwɛi kɛ shikpɔŋ nɔ lɛ ji mɔ ni kɛ nitsumɔ ewo wɔ dɛŋ akɛ ‘wɔyafee jeŋmaji fɛɛ kaselɔi, . . . ni wɔtsɔɔ amɛ nii’ lɛ. (Mat. 28:18-20) No hewɔ lɛ, sanekpakpa shiɛmɔ lɛ mli gbɛfaŋnɔ namɔ biɔ ni wɔtsɔmɔ tsɔɔlɔi!—2 Tim. 2:2.
2 Yɛ August mli lɛ, wɔbaanyɛ wɔkɛ wɔ nitsɔɔmɔ mli hesaai atsu nii beni wɔkɛ woji bibii lɛ haa lɛ. Wɔbaanyɛ wɔhala Ŋmalɛ mli susumɔi ni yɔɔ miishɛɛ kɛjɛ mli ni wɔsaa wiemɔi kukuji ni baanyɛ aye abua wɔ ni wɔje sanegbaa shishi.
3 Kɛ okɛ “Ani Nyɔŋmɔ Susuɔ Wɔhe Lɛlɛŋ?” wolo bibioo lɛ miiha lɛ, obaanyɛ okɛɛ akɛ:
◼ “Wɔtee nyɛ akutso nɛɛ mli bii pii aŋɔɔ ni wɔna akɛ amɛsusuɔ bɔ ni efɔŋ feemɔ, kɛ mɛi ahe gbeyeiwoo, kɛ awuiyeli efa babaoo lɛ he waa. Osusuɔ akɛ mɛni hewɔ enɛ ebatsɔ naagba ni tamɔ nɛkɛ? [Ŋmɛɛ gbɛ ni ejie naa.] Eji sane ni wɔnaa he miishɛɛ yɛ gbɛ krɛdɛɛ nɔ akɛ Biblia lɛ gba efɔ shi akɛ enɛ baaba. [Kanemɔ 2 Timoteo 3:1-3.] Kadimɔ akɛ enɛ baaba mli yɛ ‘naagbee gbii lɛ’ amli. Enɛ tsɔɔ akɛ eshwɛ fioo ni nɔ ko baaba naagbee. Mɛni osusuɔ akɛ eji?” Ŋmɛɛ gbɛ ni ejie naa. Gbelemɔ baafa 22, ni otsɔɔ lɛ mfoniri lɛ, ni nyɛsusu ŋmalɛ kome loo enyɔ ni atsɛ yisɛɛ yɛ nakai baafa lɛ ahe. Too gbɛjianɔ ni oku osɛɛ be kroko ni obatsɔɔ lɛ nɔ hewɔ ni wɔheɔ wɔyeɔ akɛ jɔɔmɔi nɛɛ ebɛŋkɛ kpaakpa lɛ.
4 Ekolɛ obaasumɔ ni okɛ gbɛ nɛɛ atsu nii beni okɛ “Mɛni Ji Yiŋtoo ni Yɔɔ Shihilɛ Sɛɛ—Te Ooofee Tɛŋŋ Ole Hu?” wolo lɛ haa lɛ:
◼ “Mɛi pii kɛ jaramɔ shihilɛi kpeɔ kɛ amɛmiibɔ mɔdɛŋ ni amɛle yiŋtoo ni yɔɔ shihilɛ sɛɛ. Yɛ be mli ni mɛi fioo ko naa miishɛɛ bibioo ko lɛ, mɛi pii hiɔ shihilɛ ni eyi obɔ kɛ nijiaŋwujee kɛ amanehulu mli. Ani osusuɔ akɛ nɛkɛ ji bɔ ni Nyɔŋmɔ to eyiŋ akɛ wɔbahi shi? [Ŋmɛɛ gbɛ ni eha hetoo.] Biblia lɛ tsɔɔ akɛ Nyɔŋmɔ miisumɔ ni wɔhi jeŋ ni tamɔ nɛkɛ mli.” Tsɔɔmɔ lɛ mfoniri ni yɔɔ baafa 21 lɛ, koni no sɛɛ lɛ ogbele baafai 25 kɛ 26, kukuji 4-6, ni otsɔɔ lɛ nɔ ni ewo shi yɛ he lɛ. Bi sane nɛɛ kɛha ehesusumɔ kɛji oku osɛɛ: “Te wɔɔfee tɛŋŋ wɔna nɔmimaa akɛ Nyɔŋmɔ baaha eshiwoo lɛ aba mli?”
5 Obaanyɛ okɛ “Na Wala Mli Ŋɔɔmɔ yɛ Shikpɔŋ nɔ Kɛya Naanɔ!” wolo lɛ aha kɛtsɔ mfoniri muu ni yɔɔ ehiɛ kɛ esɛɛ lɛ ni okɛaatsɔɔ mɔ lɛ nɔ, ni obi lɛ akɛ:
◼ “Ani obaasumɔ ni ohi jeŋ ni eyi obɔ kɛ gbɔmɛi ni yɔɔ miishɛɛ tamɔ nɛkɛ mli? [Ŋmɛɛ gbɛ ni eha hetoo.] Biblia lɛ kɛɔ wɔ akɛ Nyɔŋmɔ sumɔɔ gbɔmɛi asane, ni eesumɔ ni amɛhi shi kɛya naanɔ yɛ miishɛɛ mli yɛ shikpɔŋ nɛɛ nɔ.” Gbelemɔ mfoniri 49, ni okane Ŋmalɛi ni atsɛ yɛ jɛmɛ lɛ ekome. No sɛɛ lɛ, gbalamɔ ejwɛŋmɔ kɛya mfoniri 50 nɔ, ni otsɔɔ lɛ nɔ ni esa akɛ wɔfee kɛ wɔmiitao wɔhi shi yɛ Paradeiso nɛɛ mli. Ha ele akɛ oosumɔ ni oku osɛɛ oba ekoŋŋ ni okɛ lɛ abasusu nɔ hewɔ ni Yesu Kristo mli hemɔkɛyeli he hiaa lɛ he.
6 Kɛ ‘wɔha ana wɔshweremɔ faŋŋ kɛtsɔ wɔhiɛ ni wɔɔha ahi wɔ nitsɔɔmɔ lɛ nɔ’ lɛ, Yehowa naa he miishɛɛ waa. (1 Tim. 4:15, 16) Wɔ woji bibii lɛ baanyɛ afee yelikɛbuamɔ nɔ diɛŋtsɛ kɛha wɔ yɛ mɔdɛŋ ni wɔbɔɔ ni wɔye wɔbua mɛi ni shweɔ ni amɛnu “sanekpakpa” lɛ mli.—Yes. 52:7.