Ani Wɔkɛ Creator Wolo lɛ Aha?

Yɛ kpokpaa wulu nɔ kpeei ni afee lɛ shishi lɛ, wɔ fɛɛ wɔná he miishɛɛ akɛ wɔnine shɛ Is There a Creator Who Cares About You? wolo lɛ nɔ. Eji wolo ni afee aha mɛi ni, eyɛ mli akɛ amɛná tsɔsemɔ jogbaŋŋ yɛ je lɛŋ saji amli moŋ, shi ekolɛ amɛheee Nyɔŋmɔ nɔ amɛyeee lɛ titri. Nɛkɛ wolo nɛɛ tsuɔ hiamɔ ko ni yaa hiɛ waa be fɛɛ be lɛ he nii.

Yɛ yiŋtoi kpakpai ahewɔ lɛ, bei pii lɛ woji ni wɔkɛhaa daa nyɔɔŋ lɛ ji woji ni anyaa he waa diɛŋtsɛ. Ani enɛ tsɔɔ akɛ wɔtsi wɔhe kɛjɛ Creator wolo lɛ kɛhamɔ he? Dabi kwraa! Abaanyɛ akɛ nɛkɛ wolo nɛɛ aha aŋkroaŋkroi ni heee Nyɔŋmɔ nɔ amɛyeee ni baanyɛ aná he sɛɛ lɛ be fɛɛ be yɛ afi lɛ mli. Abaanyɛ akɛha aŋkroaŋkroi hu ni heɔ Nyɔŋmɔ nɔ amɛyeɔ shi amɛbɛ susumɔ ko diɛŋtsɛ yɛ amɛjwɛŋmɔ mli ni tsɔɔ mɔ ni eji loo nɔ ni esui kɛ eyiŋtoi ji lɛ. No hewɔ lɛ, aawo bo hewalɛ ni ohiɛ eko yɛ oshiɛmɔyaa baagi lɛ mli ni ofee klalo akɛ okɛaaha mɔ fɛɛ mɔ ni osusuɔ akɛ ebaaná ekanemɔ he miishɛɛ lɛ.