Teokrase Sɔɔmɔ Skul Kɛha 2000
1 Teokrase Sɔɔmɔ Skul lɛ efee jɔɔmɔ wulu diɛŋtsɛ eha Yehowa webii. Yɛ afii 50 ni eho lɛ mli lɛ, eye ebua mɛi akpekpei abɔ koni amɛhe asa, ni amɛle wiemɔ yɛ mɛi ahiɛ kɛ agbɛnɛ hu ákɛ Biblia mli anɔkwalei lɛ tsɔɔlɔi. (Lala 145:10-12; Mat. 28:19, 20) Ani oona bɔ ni skul lɛ eye ebua bo? Ebaanyɛ eya nɔ efee nakai yɛ afi 2000 lɛ mli, kɛ́ okɛ ohe wo mli kwraa kɛmɔ shi ni okɛ ŋaawoo ni akɛhaa lɛ tsu nii.
2 Atsɔɔ saji ni tsɔɔ nifeemɔi ni akɛha lɛ kɛ woji ni akɛbaatsu nii lɛ yɛ skul gbɛjianɔtoo kɛha afi 2000 lɛ mli yɛ klɛŋklɛŋ baafa lɛ mli. Atsɔɔ be ni ato kɛha nifeemɔ lɛ eko fɛɛ eko, wolo ni akɛbaatsu nifeemɔ lɛ he nii, bɔ ni abaatsu nifeemɔ lɛ he nii aha kɛ saji krokomɛi hu ni fata he. Nyɛfainɛ, nyɛŋɔa be ni nyɛkɛkanea emli gbɛtsɔɔmɔi lɛ ojogbaŋŋ ni nyɛkɛtsu nii.
3 Daa Otsi Biblia Kanemɔ: Gbɛjianɔtoi srɔtoi enyɔ yɔɔ kɛha daa otsi Biblia kanemɔ ni atsɔɔ yɛ skul gbɛjianɔtoo lɛ mli lɛ. Ekome ji nikanemɔ he gbɛjianɔtoo ni yɔɔ daa gbi kɛha Biblia lɛ baafai enumɔ kanemɔ. Akɛ Biblia mli saji otii lɛ damɔɔ nikanemɔ nɛɛ nɔ. Nikanemɔ gbɛjianɔtoo kroko lɛ ji nɔ ni akɛfata he, ni efalɛ feɔ enɛ toi enyɔ. Kɛ okɛ gbɛjianɔtoo nɛɛ tsu nii lɛ, obaanyɛ okane Biblia muu lɛ fɛɛ yɛ afii etɛ mli. Shishinumɔ yɛ he akɛ mɛi komɛi baasumɔ ni amɛkane babaoo fe nɔ ni ato he gbɛjianɔ yɛ nikanemɔ ni fata he lɛ mli, ni ekolɛ mɛi krokomɛi nyɛŋ anyiɛ sɛɛ pɛpɛɛpɛ. Ná nɔ ni obaanyɛ otsu lɛ he miishɛɛ moŋ fe ni okɛ ohe aaato mɛi krokomɛi ahe. (Gal. 6:4) Nɔ ni he hiaa ji ni okane Nyɔŋmɔ Wiemɔ lɛ daa gbi.—Lala 1:1-3.
4 Kɛ oosumɔ ni aŋma ogbɛi awo Teokrase Sɔɔmɔ Skul lɛ mli lɛ, no lɛ okɛ skul nɔkwɛlɔ lɛ agba he sane. Ofainɛ ni okɛ hiɛdɔɔ atsu nifeemɔ ni akɛwo odɛŋ lɛ he nii, ni kaafolɔ mli kɛkɛ. Jiemɔ hiɛsɔɔ kpo otsɔɔ skul lɛ ákɛ eji gbɛjianɔtoo ko ni jɛ Yehowa dɛŋ. Saamɔ ohe ojogbaŋŋ, ní ole nikasemɔ ni akɛwo odɛŋ lɛ jogbaŋŋ kɛmɔ shi, ni owie kɛjɛ otsuiŋ, bɔni afee ni oná skul ni yɔɔ srɔto kwraa nɛɛ he sɛɛ.