Teokrase Sɔɔmɔ Skul Kɛha Afi 2002
1 Gbɔmɛi babaoo ebuuu nyɛmɔ ni akɛwieɔ lɛ akɛ nɔ ko ni he hiaa. Shi kɛlɛ, wiemɔ ji nikeenii ni jɛ Yehowa ŋɔɔ. Ehaa wɔkɛ mɛi krokomɛi gbaa sane ni wɔtsɔɔ wɔsusumɔi kɛ henumɔi. Nɔ ni fe fɛɛ lɛ, no wɔkɛjieɔ wɔ-Nyɔŋmɔ lɛ yi.—Lala 22:23; 1 Kor. 1:4-7.
2 Atsɔseɔ hii, yei, kɛ gbekɛbii yɛ Teokrase Sɔɔmɔ Skul lɛ mli koni amɛjaje Yehowa gbɛi lɛ. (Lala 148:12, 13) Skul lɛ he gbɛjianɔtoo kɛha afi 2002 lɛ kɔɔ Biblia mli saji babaoo ni amɛhe baaba sɛɛnamɔ kɛha wɔ diɛŋtsɛ yɛ amɛkɛ nitsumɔ yɛ sɔɔmɔ lɛ mli lɛ ahe. Kɛji akɛ wɔsaa wɔhe kɛha skul lɛ ni wɔkɛ wɔhe wo mli lɛ, ebaaha wɔ nilee kɛ hesaai ákɛ Nyɔŋmɔ Wiemɔ lɛ tsɔɔlɔi lɛ aya hiɛ.—Lala 45:2.
3 Kanemɔ Biblia lɛ Daa Gbi: Kɛji akɛ Biblia lɛ bɛŋkɛ wɔ be fɛɛ be lɛ, wɔbaanyɛ wɔkane kɛji akɛ wɔfeee nɔ ko. Wɔteŋ mɛi babaoo náa minitii fioo ko yɛ gbi lɛ mli ni wɔbaanyɛ wɔkɛtsu nii yɛ nɛkɛ gbɛ nɔ. Kwɛ sɛɛnamɔ ni yɔɔ he akɛ kɛ hoo lɛ wɔkane baafa kome daa gbi, ni enɛ nɔŋŋ he hiaa koni wɔkɛ wɔ Biblia kanemɔ he gbɛjianɔ ni ato yɛ skul lɛ mli lɛ anyiɛ pɛpɛɛpɛ!—Lala 1:1-3.
4 Nyɛmɔ ni akɛkaneɔ Biblia lɛ jogbaŋŋ lɛ baanyɛ aye abua wɔ koni wɔnine ashɛ wɔ toibolɔi lɛ atsui nɔ ni wɔkanya amɛ ni amɛjie Yehowa yi. Esa akɛ nyɛmimɛi ni tsuɔ Nifeemɔ ni Ji 2 lɛ he nii yɛ skul lɛ mli lɛ atĩ mli amɛkane lɛ waa aahu shii abɔ amɛkwɛ. Skul nɔkwɛlɔ lɛ kɛ yijiemɔ baaha kɛ ŋaawoo ni baaha nikanemɔ lɛ aya hiɛ.
5 Okɛ Reasoning Wolo lɛ Atsu Nii: Nifeemɔi ni Ji 3 kɛ 4 lɛ damɔ Reasoning wolo lɛ nɔ. Ekolɛ wɔteŋ mɛi pii baabɔ mɔdɛŋ ni wɔkɛ gbɛjianɔtoo ni yeɔ ebuaa nɛɛ atsu nii yɛ shiɛmɔ nitsumɔ lɛ mli. Esa akɛ nyɛmimɛi yei lɛ ahala shihilɛi ni abaanyɛ akɛtsu nii yɛ shikpɔŋkuku lɛ mli. Esa akɛ skul nɔkwɛlɔ lɛ aje gbɛ agbala ejwɛŋmɔ kɛya gbɛ ni amɛtsɔɔ nɔ amɛtsɔɔ nii lɛ kɛ bɔ ni amɛkɛ Ŋmalɛi lɛ tsuɔ nii amɛhaa lɛ nɔ.
6 Eba akɛ Teokrase Sɔɔmɔ Skul lɛ aaaye abua wɔ fɛɛ koni wɔya nɔ wɔkɛ Nyɔŋmɔ nikeenii ni ji wiemɔ lɛ atsu nii ni wɔkɛjaje sanekpakpa lɛ ni wɔkɛjie wɔ-Nyɔŋmɔ kpeteŋkpele ni ji Yehowa lɛ yi!—Lala 34:2; Efe. 6:19.