Teokrase Sɔɔmɔ Skul Kɛha Afi 2001
1 Ŋmalɛ naa yiŋtoi babaoo yɛ hewɔ ni esa akɛ wɔ fɛɛ wɔkɛ wɔhe awo Teokrase Sɔɔmɔ Skul lɛ mli jogbaŋŋ bɔ ni wɔɔnyɛ.—Abɛi 15:23; Mat. 28:19, 20; Bɔf. 15:32; 1 Tim. 4:12, 13; 2 Tim. 2:2; 1 Pet. 3:15.
2 Gbɛjianɔ ni ato kɛha daa otsi Biblia kanemɔ lɛ etee nɔ efee skul lɛ he kadimɔ nii aahu. Enɛ shɛɔ aaafee Biblia lɛ baafa kome kanemɔ gbi fɛɛ gbi. Kɛjɛ afi nɛɛ nɔ kɛyaa lɛ, ato Biblia kanemɔ he gbɛjianɔ hu aha niŋmaa kaa fɛɛ niŋmaa kaa otsi lɛ. Akɛ Biblia kanemɔ he gbɛjianɔtoo ni akɛfata he afii etɛ ni eho nɛ lɛ eba naagbee. Kɛ oosumɔ ni okane Biblia lɛ babaoo kɛya hiɛ fe bɔ ni ato he gbɛjianɔ lɛ, obaanyɛ ofee bo diɛŋtsɛ onikanemɔ he gbɛjianɔtoo.
3 Nifeemɔ ni ji 2 lɛ tsɔseɔ nyɛmimɛi hii kɛha Nyɔŋmɔ Wiemɔ lɛ ‘kanemɔ yɛ mɛi ahiɛ.’ (1 Tim. 4:13) Kɛ oyɛ nikanemɔ he nifeemɔ ko lɛ, yaa nɔ okane lɛ waa shii abɔ. Obaanyɛ okɛ Asafo lɛ Blɔfo Biblia kasɛtii lɛ atsu nii koni okɛha onitsɛmɔ, gbee mli tsakemɔ, kɛ sui krokomɛi kɛha nikanemɔ kpakpa aya hiɛ.
4 Nifeemɔ ni ji 3 kɛ nɔ ni ji 4 lɛ damɔ Reasoning wolo lɛ ni afee koni akɛtsu nii yɛ shiɛmɔ nitsumɔ lɛ mli lɛ nɔ. Kɛ nikasemɔ ni akɛha bo lɛ sɛɛ kɛ fe bɔ ni obaanyɛ osusu he yɛ be ni ato lɛ mli lɛ, halamɔ nɔ̃ pɛ ni he baaba sɛɛnamɔ fe fɛɛ kɛha nyɛ asafo lɛ shikpɔŋkuku lɛ. Obaanyɛ okɛ nifeemɔ gbɛ fɛɛ gbɛ ni sa kɛha nyɛ shikpɔŋkuku lɛ atsu nii.
5 Bɔɔ mɔdɛŋ waa bɔ ni ooonyɛ koni otsu nifeemɔi fɛɛ ni akɛhaa bo yɛ skul lɛ mli lɛ he nii. Hemɔ be saŋŋ ni okɛsaa ohe jogbaŋŋ, ní owie kɛjɛ otsuiŋ. Obaafee hewalɛwoo jɛɛhe kɛha asafo lɛ, ni bo diɛŋtsɛ hu obaaná he sɛɛ akɛ okɛ ohe aaawo Teokrase Sɔɔmɔ Skul lɛ mli kɛ otsui fɛɛ yɛ afi 2001.