April—Be ni Esa akɛ Wɔhiɛ Adɔ yɛ Nitsumɔi Kpakpai Ahe!
1 Kɛ ahum ni naa wa miibɛŋkɛ he ko ni mɛi yɔɔ jɛmɛ lɛ, ehe hiaa waa ni abɔ mɛi lɛ oshara ni baa lɛ he amaniɛ oya. Kɔkɔbɔɔ lɛ mli waa yɛ be mli ni ahum lɛ bɛŋkɛɔ kpaakpa lɛ. Mɛni hewɔ? Ejaakɛ wala ebaje oshara mli! Ekolɛ mɛi lɛ ateŋ mɛi komɛi nuko tsutsu kɔkɔbɔɔ ni akɛha lɛ he. Ekolɛ, mɛi komɛi nu, shi amɛku amɛhiɛ amɛshwie ehe nitsumɔ nɔ. Nakai nɔŋŋ eji yɛ ŋwɛi kɔkɔbɔɔ ni afã wɔ akɛ wɔha ale lɛ he, dani Nyɔŋmɔ “lasuogbele” ni ji ejalɛ mlifu ahum lɛ atswa nɛkɛ jeŋ fɔŋ nɛɛ mli kadimɔnii lɛ fɛɛ kɛya. (Abɛi 10:25) Gbɔmɛi akpe toi akpei abɔ ni yɔɔ lɛ anaanɔ wala namɔ yɛ oshara mli! Esa akɛ atswa kɔkɔbɔɔ lɛ he adafi. Esa akɛ ‘wɔhiɛ adɔ yɛ nitsumɔi kpakpai ahe.’—Tito 2:11-14.
2 Aaafee afii nyɔŋmai abɔ ni eho nɛɛ lɛ, Yehowa webii lɛ kɛ ekãa eha Kaimɔ gbijurɔyeli be lɛ efee be ni amɛkɛjieɔ ekãafeemɔ srɔto ko kpo amɛtsɔɔ yɛ sɔɔmɔ nitsumɔ lɛ mli. Yɛ afi 1939 mli lɛ, Informant lɛ ni ebatsɔ Wɔ Maŋtsɛyeli Sɔɔmɔ lɛ kɛ hewalɛwoo nɛɛ ha akɛ: “Yɛ nidumɔ be ni baa, kɛ jeŋ tsemɔ kpakpa lɛ hewɔ lɛ, esa akɛ wɔkpa gbɛ akɛ ŋmɛlɛtswai ni [asafoŋ] shiɛlɔi lɛ baaye yɛ shiɛmɔ nitsumɔ lɛ mli lɛ baaku abɔ he toi enyɔ, ni be ni gbɛgbalɔi lɛ kɛbaatsu nii lɛ baaya hiɛ. Hɔgbaa gbii enumɔ yɔɔ April nyɔŋ lɛ mli. Agbɛnɛ hu Hɔɔ gbii enumɔ yɔɔ mli. Okɛ Hɔɔ fɛɛ Hɔɔ kɛ Hɔgbaa fɛɛ Hɔgbaa ní yɔɔ April nyɔŋ lɛ mli lɛ . . . aye odase yɛ gbɛ krɛdɛɛ nɔ.” Enɛ bafee oti ko ni akɛfɔ̃ nyɛmimɛi lɛ ahiɛ afii 60 ni eho nɛ! Taakɛ afi 1939 lɛ ji lɛ, April hiɛ otsi lɛ naagbee enumɔ. Mɛni ji ogbɛjianɔtoo kɛha nyɔŋ nɛɛ? Mɛɛ nibii okadi akɛ obaafee yɛ April 2000 kalenda lɛ nɔ? Too gbɛjianɔ koni ofata Yehowa webii krokomɛi lɛ ahe kɛtsu nitsumɔi kpakpai ni he yɔɔ sɛɛnamɔ nɛɛ yɛ nyɔŋ krɛdɛɛ kɛha mumɔŋ hiɛyaa nɛɛ mli.
3 Nɔ ni Wɔkpaa Gbɛ akɛ Wɔbaanyɛ Wɔtsu: Gbi ni he hiaa fe fɛɛ ni yɔɔ afi 2000 lɛ mli lɛ yagbeeɔ nyɔŋ nɛɛ nɔ. No ji April 19, Yesu gbele lɛ kaimɔ gbi lɛ. Nyɛhaa wɔbɔa mɔdɛŋ fɛɛ ni wɔɔnyɛ koni wɔfɔ̃ mɛi pii nine bɔ ni wɔɔnyɛ kɛba Kaimɔ lɛ shishi. Taakɛ awo wɔ he ŋaa yɛ nyɛsɛɛ nyɔŋ lɛ mli lɛ, ŋmalamɔ mɛi fɛɛ ni kɛ okwɛ ni amɛbaanyɛ amɛba Kaimɔ lɛ shishi lɛ agbɛi oshwie shi, ni okwɛ koni ohiɛ akakpa mɔ ko nɔ. Esa akɛ afɔ̃ shiɛlɔi fɛɛ ni efee kpɔkee, Biblia kaselɔi, mɛi ni aku sɛɛ ayasara amɛ, mɛi ni tsutsu ko lɛ akɛ amɛ kaseɔ nii, nitsumɔ mli nanemɛi, skul nanemɛi, akutsoŋbii, wekumɛi, kɛ nanemɛi krokomɛi fɛɛ nine. Ani mɛi ni baasumɔ ni amɛya eko lɛ eto gbɛjianɔ jogbaŋŋ koni amɛshɛ jɛmɛ yɛ be naa? Kɛ jeee nakai lɛ, ani obaanyɛ ojɛ suɔmɔ mli oye obua? Yɛ Kaimɔ gbi lɛ nɔ nakai gbɛkɛ lɛ, wɔ fɛɛ wɔbaaná hegbɛ wɔha mɛi ni eba lɛ aná miishɛɛ. Yɛ Kaimɔ lɛ sɛɛ lɛ, wɔbaanyɛ wɔya nɔ wɔye wɔbua nɛkɛ mɛi ni yɔɔ wiemɔ lɛ he miishɛɛ nɛɛ lolo.
4 ‘Wɔhiɛ ní aaadɔ yɛ nitsumɔi kpakpai ahe’ yɛ gbii ni baanyiɛ Kaimɔ lɛ hiɛ kɛ sɛɛ fɛɛ lɛ ji gbɛ kpakpa ni wɔɔtsɔ nɔ wɔkɛtsɔɔ akɛ wɔhiɛ sɔɔ nibii fɛɛ ni Yehowa efee eha wɔ lɛ. Ekolɛ jeŋ ni baatse jogbaŋŋ yɛ hei babaoo lɛ baaha wɔteŋ mɛi babaoo atsu nii waa yɛ sanekpakpa jajemɔ nitsumɔ lɛ mli. Kɛji akɛ oosɔmɔ akɛ gbɛgbalɔi awalɔ lɛ, no lɛ, obaanyɛ ofee bɔ fɛɛ bɔ ni ooonyɛ ni okɛ ŋmɛlɛtswai 50 loo nɔ ni fa fe nakai atsu nii yɛ sɔɔmɔ nitsumɔ lɛ mli. (Mat. 5:37) Tsu be he gbɛjianɔ ni oto lɛ he nii yɛ nyɔŋ lɛ shishijee mli nɔŋŋ. (Jaj. 3:1; 1 Kor. 14:40) Eba akɛ wɔ fɛɛ wɔbaatsu bɔ ni wɔɔnyɛ koni wɔkɛfi gbɛgbalɔi lɛ asɛɛ, kɛtsɔ ekãa ni wɔɔwo amɛ lɛ nɔ, kɛ nii ni wɔkɛ amɛ aaatsu yɛ shiɛmɔ lɛ mli lɛ hu nɔ. (Okɛto 2 Maŋtsɛmɛi 10:15, 16 he.) Kɛ́ wɔkɛ ekãa du nii yɛ April mli lɛ, wɔbaanyɛ wɔkpa miishɛɛ babaoo kɛ jɔɔmɔi agbɛ kɛjɛ Yehowa ŋɔɔ. (Mal. 3:10) Ekolɛ, enɛ baaha oya nɔ osɔmɔ lolo kɛtsa nɔ akɛ gbɛgbalɔi awalɔ aloo daa gbɛgbalɔ. Eba akɛ, mumɔŋ ekãa ni wɔná kɛje April shishi lɛ baatsa nɔ kɛbote nyɔji krokomɛi lɛ amli, yɛ be mli ni wɔyaa nɔ lolo akɛ Maŋtsɛyeli lɛ he shiɛlɔi daa gbi lɛ.
5 Ŋwanejee ko bɛ he akɛ, Yehowa webii akpei abɔ baaje shia Biblia mli nikasemɔi ashishi yɛ nyɔŋ nɛɛ nɔ. Ani obaasumɔ ni oje eko feemɔ shishi? Sɔlemɔ yɛ mɔ ni oooná kɛkase nii lɛ he titri, ni otsu osɔlemɔ lɛ he nii. Obaaná nɔmimaa akɛ Yehowa hiɛ baasɔ nii ni obiɔ yɛ heshibaa mli kɛha yelikɛbuamɔ koni onine ashɛ mɛi ni hiɛ tsui ni ja lɛ anɔ ni otsɔɔ amɛ nii lɛ he.—1 Yoh. 3:22.
6 Aka gbɛ ko ni atsɔɔ nɔ ajeɔ sanegbaa shishi ni eyeɔ omanye waa lɛ akwɛ ni akɛje sanegbaai ashishi. Ojeɔ shishi kɛ sanebimɔ nɛɛ akɛ: “Ani osusuɔ akɛ awui ni ayeɔ yɛ skul srɔtoi lɛ amli lɛ jɛ daimonioi anifeemɔ aloo eji nɔ ko ni eba akɛni fɔlɔi tsɔseee amɛbii lɛ hewɔ?” Ŋmɛɛ gbɛ ni ewie. Kɛji akɛ mɔ lɛ ha hetoo akɛ eji “daimonioi anifeeemɔ” lɛ, kanemɔ Kpojiemɔ 12:9, 12, ni oma nii ni Abonsam tsuɔ ni ehaa naagbai teɔ shi yɛ je lɛ mli lɛ nɔ mi. Agbɛnɛ gbelemɔ Taoɔ wolo lɛ kɛya nikasemɔ ni ji 4 lɛ, ni obi mɔ lɛ akɛ, ani ele he ni Abonsam jɛ eba lo. Kanemɔ klɛŋklɛŋ kukuji enyɔ lɛ ni nyɛgba he sane. Kɛ́ mɔ lɛ kɛɛ “akɛni fɔlɔi tsɔseee amɛbii lɛ hewɔ” ni awuiyeli yɔɔ skul srɔtoi lɛ amli lɛ, kanemɔ 2 Timoteo 3:1-3 ni oma su ni eka shi faŋŋ akɛ nomɛi kɛ nɛkɛ naagbai nɛɛ baa lɛ nɔ mi. No sɛɛ lɛ gbelemɔ Taoɔ wolo lɛ kɛya nikasemɔ 8 lɛ, ni okane kuku 5 lɛ, ni otsa sanegbaa lɛ nɔ. Kɛ onyɛ oto gbɛjianɔ kɛha sɛɛkuu kɛsaramɔ lɛ, no lɛ, obaanyɛ okɛ mɔ lɛ aje daa Biblia mli nikasemɔ shishi. Yɛ saramɔ lɛ eko mli lɛ, obaanyɛ obi lɛ kɛji akɛ ele mɔ ko ni miisumɔ ni ebo nɔ ni ekaseɔ lɛ toi.
7 Gbɛ kroko ni wɔɔtsɔ nɔ ‘wɔhiɛ adɔ yɛ nitsumɔi kpakpai ahe’ yɛ April mli lɛ ji ni wɔkɛ wɔhe aaawo shiɛmɔ nitsumɔ lɛ mli yɛ gbɛ̀i srɔtoi anɔ. Ani osusu odase ni oooye yɛ shwɛmɔhei aloo tsɔji ashimaamɔhe he? Yɛ bɔs shidaamɔhe aloo yɛ oketeke shimaamɔhe? Aloo obaasumɔ ni oka tɛlifoŋ nɔ odaseyeli, gbɛjegbɛ he odaseyeli, aloo nitsumɔhei amli odaseyeli okwɛ? Mɛni hewɔ ohaaa osusumɔi nɛɛ aba mli yɛ nyɔŋ nɛɛ mli? Yehowa baaye ebua bo koni oná ekãa ni he hiaa kɛha efeemɔ. (Bɔf. 4:31; 1 Tes. 2:2b) Ekolɛ obaanyɛ oto gbɛjianɔ koni okɛ gbɛgbalɔ aloo shiɛlɔ ko ni he esa yɛ nɛkɛ sɔɔmɔ nitsumɔ gbɛ̀i nɛɛ amli lɛ atsu nii.
8 Mɔ fɛɛ mɔ ni miisumɔ koni ená odaseyeli nitsumɔ lɛ mli gbɛfaŋnɔ kɛmɔ shi lɛ baasumɔ ni ekɛ ehe awo trukaa odaseyeli nitsumɔ mli. Nɔ ni nɔŋŋ ni he hiaa titri ji ni okɛ mɔ ko aje sanegbaa ni ŋɔɔ shishi. Teemɔ sanegbaa ko ni waaa shi, ekolɛ, okɛ sane ni ama nɔ mi ni yɔɔ kuku 6 lɛ baatsu nii. Bɔɔ mɔdɛŋ ni okɛ be fioo ni onáa lɛ po atsu nii ni ekafeee efolo. Wɔshɛrɛɛɛ shika kukuji bibii wɔshwieee yɛ fa ni efaaa lɛ hewɔ. Mɛni hewɔ okɛ minitii enumɔ, nyɔŋma, aloo nyɔŋma kɛ enumɔ po tsuuu nii kɛyeee trukaa odase?
9 Be Kɛha Sane He Susumɔ: Kuu osɛɛ ni osusu otii ni ama nɔ mi waa yɛ drama ni afee yɛ “Nyɔŋmɔ Gbalɛ Wiemɔ” Kpokpaa Wulu nɔ Kpee lɛ mli lɛ he. Drama ni yitso ji Hiɛsɔɔ ní Wɔɔná Wɔha Wɔmumɔŋ Gboshinii Lɛ ha wɔsusu srɔtofeemɔ agbo ni kã Yakob kɛ Esau teŋ lɛ he jogbaŋŋ. Esau kɛɛ akɛ taakɛ Yakob ji lɛ enyaa mumɔŋ nibii lɛ nɔŋŋ hu he, shi Esau nitsumɔi etsɔɔɔ nakai. (1 Mose 25:29-34) Mɛɛ kɔkɔbɔɔ ni mli wa enɛ ji kɛha wɔ nɛkɛ! Taakɛ Yakob ji lɛ, nyɛhaa wɔfea klalo akɛ wɔɔple, ni wɔnɔ po, koni wɔnine ashɛ Yehowa dɛŋ jɔɔmɔ nɔ. (1 Mose 32:24-29) Mɛni hewɔ wɔkɛ April kɛ nyɔji ni baanyiɛ sɛɛ aba lɛ fɛɛ tsuuu nii koni wɔkɛwo ekãa ni wɔyɔɔ lɛ mli hewalɛ, ni wɔkaku wɔhiɛ wɔshwie wɔmumɔŋ gboshinii ni yɔɔ naakpɛɛ lɛ nɔ?
10 “Yehowa gbi wulu lɛ ebɛŋkɛ, ebɛŋkɛ, ni eeye oyai naakpa.” (Zef. 1:14) Esa akɛ ajaje Maŋtsɛyeli sanekpakpa lɛ atsɔɔ. Oshara eba wala he! Eba akɛ nyɔŋ nɛɛ aaafee nyɔŋ krɛdɛɛ, nɔ ni ajɔɔ kɛha Yehowa webii fɛɛ yɛ be mli ni wɔkɛ ekomefeemɔ tsɔɔ akɛ ‘wɔhiɛ dɔɔ yɛ nitsumɔi kpakpai ahe’ lɛ.
[Akrabatsa ni yɔɔ baafa 4]
Kaimɔ lɛ Yeli He Kaimɔi
Abaaye afi nɛɛ Kaimɔ lɛ he gbi jurɔ lɛ Shɔ, April 19. Esa akɛ onukpai lɛ asusu saji ni nyiɛ sɛɛ nɛɛ ahe jogbaŋŋ:
◼ Kɛ nyɛmiito be lɛ he gbɛjianɔ kɛha kpee lɛ, nyɛkwɛa koni akɛ okadi nibii lɛ akaha mɛi lɛ, ja hulu enyɔ shi dã.
◼ Esa akɛ aha mɔ fɛɛ mɔ, ní wielɔ lɛ fata he lɛ ale be pɔtɛɛ kɛ he ni abaaye yɛ.
◼ Esa akɛ aná aboloo pɔtɛɛ kɛ wein pɔtɛɛ lɛ ni aha efee klalo. Akɛ wein ni shwɛ kɛjɛ nyɛsɛɛ afi lɛ nɔ lɛ mli lɛ akatsu nii.—Kwɛmɔ February 15, 1985 Watchtower lɛ baafa 19.
◼ Akɛ plɛtei, glasei kɛ okpɔlɔ kɛ enɔhaanɔ kpakpa aba asa lɛ nɔ ni akɛma shi yɛ he ko ni sa kɛtsɔ hiɛ.
◼ Esa akɛ asaa Maŋtsɛyeli Asa loo he kroko ni abaakpe yɛ lɛ fɛɛ fɛfɛo kɛtsɔ hiɛ kwraa dã.
◼ Esa akɛ ahala mɛi ni baakwɛ shitaramɔ nɔ kɛ mɛi ni kɛ okadi nibii lɛ baaha lɛ kɛtsɔ hiɛ, ni atsɔɔ amɛ gbɛ ni sa ni amɛaatsɔ nɔ amɛtsu amɛnii lɛ, ni atsɔɔ amɛ nɔ ni amɛbaatsu.
◼ Esa akɛ ato gbɛjianɔ koni akɛ okadi nibii lɛ eko ayaha mɔ fɛɛ mɔ ni afɔ lɛ mu ni bɛ gbɔmɔtsoŋ hewalɛ ni enyɛɛɛ eba kaimɔ lɛ shishi lɛ.
◼ Kɛ ato gbɛjianɔ koni nɔ ni fe asafo kome afee yɛ Maŋtsɛyeli Asa kome lɛ nɔŋŋ mli lɛ, no lɛ esa akɛ ekomefeemɔ kpakpa akã asafoi lɛ fɛɛ ateŋ bɔni afee ni akafa tsɔ yɛ he ni atsɔɔ kɛhoɔ, he ni atsɔɔ kɛbaa jɛmɛ, nyiɛmɔhei, kɛ he ni akɛ tsɔnei mamɔɔ lɛ.