Okɛ Biblia lɛ Atsu Nii Jogbaŋŋ
1. Mɛni obaanyɛ ofee kɛsaa ohe kɛha shiɛmɔ nitsumɔ lɛ?
1 Yɛ wolo ni wɔkpɛ yiŋ akɛ wɔkɛbaaha yɛ shiɛmɔ nitsumɔ lɛ mli lɛ fɛɛ sɛɛ lɛ, sɛɛnamɔ yɛ he akɛ wɔɔhala ŋmalɛ ko ni haa asusuɔ nii ahe ni wɔkɛ mɛi ni baabo toi lɛ baagba he sane. (Heb. 4:12) Ŋmalɛ ko ni akɛtsu nii yɛ wolo ni okɛhaa lɛ mli ni ooohala kɛtsu nii lɛ baaha onyɛ okɛ wolo lɛ aha yɛ gbɛ ni mɔɔ shi nɔ. Shiɛlɔi eyɔse yɛ hei komɛi akɛ sɛɛnamɔ yɛ he akɛ amɛaahiɛ amɛ Biblia lɛ yɛ amɛdɛ̃ beni amɛbɛŋkɛɔ mɔ ko loo beni amɛtsuɔ nii yɛ shia kɛ shia lɛ.
2. (a) Mɛɛ gbɛ nɔ wɔɔtsɔ wɔkɛ ŋmalɛ akpa wɔshiɛmɔ wiemɔ lɛ hiɛ? (b) Mɛɛ Ŋmalɛ naa saji mɛi nyaa he yɛ shikpɔŋkuku lɛ mli?
2 Okɛ Ŋmalɛ ko Akpa Hiɛ: Shiɛlɔi komɛi biɔ Biblia ŋmalɛ ko he sane ni yɔɔ mlɛo ni amɛhaa shiatsɛ lɛ tsɔɔ ejwɛŋmɔ yɛ he, kɛkɛ lɛ amɛkane ŋmalɛ lɛ, ni amɛkɛ enɛ kpáa amɛsanegbaa lɛ hiɛ. Enɛ gbalaa jwɛŋmɔ kɛyaa Nyɔŋmɔ Wiemɔ lɛ nɔ oya nɔŋŋ. Ani hiɛkpamɔ wiemɔi nɛɛ ekomɛi baahi kɛha nyɛshikpɔŋkuku lɛ?
◼ “Kɛ́ oyɛ hewalɛ ni okɛ tsakemɔi nɛɛ aaaba lɛ, ani obaafee nakai?” Kanemɔ Kpojiemɔ 21:4.
◼ “Mɛni hewɔ wɔyɔɔ jaramɔ bei ni tamɔ nɛkɛ mli?” Kanemɔ 2 Timoteo 3:1-5.
◼ “Ani osusuɔ akɛ wɔ akutso lɛ mli baafee he ko ni hi, kɛ mɔ fɛɛ mɔ kɛ ŋaawoo nɛɛ tsu nii?” Kanemɔ Mateo 7:12.
◼ “Ani osusuɔ akɛ obii lɛ baanyɛ aná shihilɛi ni atsɔɔ yɛ biɛ lɛ mli ŋɔɔmɔ?” Kanemɔ Lala 37:10, 11.
◼ “Ani osusuɔ akɛ be ko baaba ni wiemɔi nɛɛ baaba mli?” Kanemɔ Yesaia 33:24.
◼ “Ani ole nɔyeli tsakemɔ ni atsi tã yɛ biɛ lɛ jogbaŋŋ?” Kanemɔ Daniel 2:44.
◼ “Ani eba ojwɛŋmɔ mli pɛŋ akɛ obaabi Nyɔŋmɔ sane nɛɛ?” Kanemɔ Hiob 21:7.
◼ “Ani wɔbaanyɛ wɔna wɔsuɔlɔi ni egboi lɛ ekoŋŋ?” Kanemɔ Yohane 5:28, 29.
◼ “Ani gbohii lɛ le nɔ ni hiɛkalɔi lɛ feɔ?” Kanemɔ Jajelɔ 9:5.
3. Mɛɛ gbɛ nɔ wɔbaanyɛ wɔtsɔ wɔye wɔbua mɛi koni amɛnu Biblia ŋmalɛi ni wɔkaneɔ lɛ ashishi?
3 Tsɔɔmɔ Mli, Feemɔ He Nɔkwɛmɔnɔ, ni Otsɔɔ Bɔ ni Abaafee Akɛtsu Nii: Kɛ́ mɔ ko miisumɔ ni okɛ lɛ agba sane lɛ, kaawo sanegbaa lɛ foi. Hemɔ be ni okɛtsɔɔ ŋmalɛ ni okane lɛ mli, ofee he nɔkwɛmɔnɔ, ni otsɔɔ bɔ ni abaafee ni akɛtsu nii lɛ mli koni mɔ lɛ anu shishi. (Neh. 8:8) Kɛ́ mɛi nu nɔ ni Nyɔŋmɔ Wiemɔ lɛ tsɔɔ lɛ shishi ni amɛkpɛlɛ nɔ lɛ, ebaanyɛ eha amɛfee tsakemɔi ni sa kadimɔ yɛ amɛshihilɛ mli.—1 Tes. 2:13.
4. Mɛɛ gbɛ nɔ wɔbaanyɛ wɔtsɔ wɔkɛ Biblia lɛ atsu nii jogbaŋŋ kɛ́ wɔmiifee sɛɛsaramɔi?
4 Yaa nɔ okɛ Biblia lɛ atsu nii jogbaŋŋ beni ohaa mɛi náa he miishɛɛ lɛ. Obaanyɛ okɛ nɛkɛ gbɛ nɛɛ nɔŋŋ atsu nii kɛ́ oofee sɛɛsaramɔi: (1) Halamɔ ŋmalɛ ko ni sa. (2) Bi sane ko ni haa mɔ susuɔ nii ahe ni yɔɔ mlɛo ni kɔɔ ŋmalɛ lɛ he. No sɛɛ lɛ kanemɔ. (3) Tsɔɔmɔ mli, feemɔ he nɔkwɛmɔnɔ, ni otsɔɔ bɔ ni abaafee ni akɛtsu nii lɛ mli. Bɔɔ mɔdɛŋ waa ni okɛ nɔ ko afata Nyɔŋmɔ Wiemɔ lɛ he nilee ni mɔ lɛ yɔɔ lɛ he be fɛɛ be ni obaasara lɛ lɛ. Ekolɛ etsɛŋ ni obaabɔi Biblia mli nikasemɔ feemɔ!