Nɔ Ko Ni Yɔɔ Jeŋ Hee Shishitsɔɔmɔ Lɛ Mli Ni He Yɔɔ Sɛɛnamɔ Waa

Nɔ ko yɛ Ŋmalɛ Krɔŋkrɔŋ Lɛ—Jeŋ Hee Shishitsɔɔmɔ lɛ mli ni hãa wɔnaa akɛ, saji ni yɔɔ Biblia lɛ mli lɛ kɛ amɛhe kpãa gbee. No ji alfabɛtai bibii ni akɛwo ŋmalɛi lɛ amli wiemɔi lɛ ekomɛi ahe lɛ. Alfabɛtai nɛɛ yeɔ amɛbuaa wɔ ni wɔnaa ŋmalɛi ni kɛ sane ni wɔkaneɔ lɛ yɔɔ tsakpaa. Kɛ́ ookane Biblia ni aprinti lɛ ni ona alfabɛta yɛ ŋmalɛ mli wiemɔ ko he lɛ, taomɔ nakai alfabɛta lɛ nɔŋŋ yɛ alfabɛtai ni ato naa yɛ baafã lɛ teŋgbɛ lɛ amli. Ŋmalɛi fɛɛ ni yɔɔ alfabɛta ni yɔɔ teŋgbɛ lɛ he lɛ kɛ sane ni okaneɔ lɛ yɛ tsakpaa. Kɛ́ ookane Biblia lɛ yɛ jw.org loo JW Library^® lɛ nɔ lɛ, klikimɔ alfabɛta ni yɔɔ ŋmalɛ lɛ mli wiemɔ lɛ he lɛ, ni obaana ŋmalɛi ni kɛ lɛ yɔɔ tsakpaa.

Mɛɛ ŋmalɛi nɛkɛ alfabɛtai bibii ni akɛwo ŋmalɛi lɛ amli wiemɔi lɛ ahe lɛ baanyɛ aye abua wɔ ni wɔna? Ekomɛi nɛ:

Ŋmalɛ ni wieɔ sane kome too lɛ nɔŋŋ he: Ŋmalɛ ni yɔɔ alfabɛta lɛ he lɛ baanyɛ afee ŋmalɛ ni hãa wɔnaa Biblia mli wolo kroko ni wieɔ sane ni wɔkaneɔ lɛ nɔŋŋ he. Akɛ nɔkwɛmɔnɔ lɛ, kwɛmɔ 2 Samuel 24:1 kɛ 1 Kronika 21:1.

Wiemɔi ni atsɛ yisɛɛ: Ŋmalɛ ni yɔɔ alfabɛta lɛ he lɛ baanyɛ afee ŋmalɛ ko ni atsɛ emli wiemɔi lɛ ayisɛɛ yɛ sane ni wɔkaneɔ lɛ mli. Akɛ nɔkwɛmɔnɔ lɛ, kwɛmɔ Mateo 4:4 kɛ 5 Mose 8:3.

Gbalɛ ni eba mli: Ŋmalɛ ni yɔɔ alfabɛta lɛ he lɛ baanyɛ afee ŋmalɛ ko ni hãa wɔnaa gbalɛ ko kɛ bɔ ni eba mli ehã. Akɛ nɔkwɛmɔnɔ lɛ, kwɛmɔ Mateo 21:5 kɛ Zakaria 9:9.