Ès ou « aprann sikré-a » ki pé endé’w kontanté kòw épi sa ou ni ?

1. Kontanté kòw, kisa sa lé di, men kisa fòk pa fè ?

ÈS OU kontan lavi-a ou ni ? An moun ki satisfèt épi lavi’y ni tjè-kontan, pas i ka aprésié tout bon bagay Jéova ka ba’y. Anplis, i ka risanti lajwa épi lapé an tjè’y. I pa égri pas i mantjé’y yonn-dé bagay. É menmsi i ka kontanté kòy épi sa i ni, i pa blazé pou otan. Sé an bon bagay si an krétjen ka chèché fè plis ba Jéova (Wom. 12:1 ; 1 Tim. 3:1). É si an krétjen ka kontanté kòy épi sa i ni, i pé ké pèd lajwa’y si i pa ka risivrè lamenm an rèsponsabilité i té ké anvi ni.

2. Poutji, lè an moun pa ka kontanté kòy di sa i ni, sa pé danjéré ba’y ?

² Lè an moun pa ka kontanté kòy épi sa i ni, sa pé fè’y pran mové désizion. Pa èkzanp, sa pé mennen’y fè lè anplis adan travay-li pou achté bagay i pa djè ni bizwen. Malérèzman, yonn-dé krétjen jik rivé vòlè lajan ouben bagay yo té anvi. Yo dwèt di kòyo : « Man mérité sa », « A non, man za atann twòp » ouben « Man ké rann lajan-tala plita ». Men ba Jéova, vòlè sé vòlè, i pa enmen sa é sa ka sali non’y (Pwo. 30:9). I ni dòt, sa fè yo tèlman lapenn pa risivrè an rèsponsabilité adan lasanblé-a, yo anni sispann sèvi Jéova (Gal. 6:9). Ki manniè an sèvitè Jéova pé sonjé fè an bagay konsa ? Sa pé rivé, si piti-a-piti, i ka sispann kontanté kòy épi sa i ni.

3. Ki vérité nou ka touvé adan Filipien 4:11, 12 ka rasiré nou ?

³ Nou tout, nou pé aprann kontanté kònou épi sa nou ni. Lapòt Pòl ékri : « Kisiswa sitiyasion-mwen, man aprann fè épi sa man ni » (li Filipien 4:11, 12). Lè Pòl ékri sé pawòl-tala, i té lajòl. Magré sa, i té toujou ni lajwa an tjè’y. Kontanté kòy épi sa i té ni, sé ‘sikré-a i té aprann’. Si nou pa ka rivé kontanté kònou épi sa nou ni, sa Pòl di épi sa i viv pé ba nou lasirans nou pé touvé sikré-tala osi. Men pa kwè sé rédi chèz bò tab. Fòk nou aprann fè épi sa nou ni. Koumanniè nou pé fè sa ?

FÒK OU NI RIKONÉSANS

4. Poutji ni rikonésans kéy endé nou kontanté kònou épi sa nou ni ? (1 Tésalonisien 5:18).

⁴ An moun ki ni rikonésans, sa kontanté kòy épi sa i ni (li 1 Tésalonisien 5:18). Pa èkzanp, si nou ni rikonésans pas nou ni sa ki nésésè adan lavi-a, asiré nou pé kèy yenki sonjé sa nou té ké anvi ni. Si nou ka montré nou kontan rèsponsabilité nou ja ni adan lòwganizasion Jéova, sa ké endé nou mété tout tjè-nou adan sa nou ja ka fè, olié nou kouri dèyè dòt privilèj. Sé pou sa Labib ka ankourajé nou pran labitid di Jéova mèsi, lè nou ka prédié. Ni rikonésans ka endé nou risanti « lapé Bondié, ki wo pasé tou sa an moun pé konprann » ! (Fil. 4:6, 7).

5. Poutji sé Izrayélit-la té pou ni rikonésans ? (gadé zimaj-la osi).

⁵ Sonjé sa ki rivé sé Izrayélit-la. Yo té ka yenki pléré ba Jéova, pas manjé yo té ni Léjip té ka mantjé yo (Nonb 11:4-6). Sa vré ki lavi-a pa té an bòl toloman adan dézè-a. Men kisa ki té pé endé yo kontanté kòyo épi sa yo té ni ? Yo té pou sonjé tousa Jéova té ja fè ba yo épi rikonésans. Kisa Jéova té fè ba yo ? Jéova té vréyé 10 malè anlè Léjip, pas lè sé Izrayélit-la té èsklav, sé Éjipsien-an té ka malmennen yo. Apré, lè yo kité Léjip, Jéova té endé yo pran an patjé lajan, lò épi rad anlè sé Éjipsien-an (Ègz. 12:35, 36). Lè sé Izrayélit-la touvé kòyo blotjé ant lawmé Farawon-an épi lanmè Wouj-la, Jéova té fann lanmè-a an dé pou yo té pé chapé. É adan dézè-a, i té ba yo lamàn pou yo té pé manjé chak jou. Alò, pwoblèm-lan sé té kisa ? Menmsi Jéova té ba yo asé manjé, yo pa té ni asé rikonésans pou sa i té fè ba yo.

6. Kisa ki pé endé nou ni rikonésans ?

⁶ Kisa ki pé endé’w ni rikonésans ? Déja-pou-yonn, pran tan réfléchi asou tout bagay adan lavi-a ka ba’w tjè-kontan. Ou pé menm matjé an koté yonn-dé bagay ka ba’w tjè-kontan (Lam. 3:22, 23). Pou dé, di mèsi. Di lézòt mèsi pou sa yo ka fè ba’w. Épi pa bliyé di Jéova mèsi toulong (Sòm 75:1). Pou twa, chwézi zanmi ka montré rikonésans-yo. Pa bliyé, imité ka détenn, alò pran pokosion lè’w ka chwézi zanmi’w (Dét. 1:26-28 ; 2 Tim. 3:1, 2, 5). Lè nou ka chèché lokazion pou di lézòt mèsi, nou mwens égri parapòt a difikilté nou ka jwenn, é parapòt a bagay nou anvi men nou pa ni.

7. Kisa ki endé Natalia kontan sa i ni ?

⁷ Annou palé di Nataliaa, ki ka viv Lendonézi. I di : « Pandan pandémi Covid-19 la, man mété kòmwen ka konparé sitiyasion-mwen épi ta frè é sè-mwen. Rézilta, man pa té satisfèt. » (Gal. 6:4). Kisa ki endé Natalia chanjé manniè wè’y ? I ka réponn : « Man koumansé réfléchi asou tout bénédision Jéova té ka ba mwen chak jou. Man pran tan katjilé osi asou tout bon bagay man ni, pas man adan lòwganizasion Jéova. Épi, man pran labitid di’y mèsi. Kifè, man vréman kontan sa man ni. » Si’w ka santi ou maléré adan lavi’w, ès ou pé pa fè kon Natalia, pou pé sa ni rikonésans ?

FÒK OU NI LIMILITÉ

8. Adan ki zatrap Barik pri ?

⁸ An lè, Barik, ki té sikrétè pwofèt Jérémi, pa té satisfèt di lavi’y. I té pou endé Jérémi fè an travay ki té difisil menm. Yo té pou di sé Izrayélit-la ki té vini engra, sa ki té kèy rivé yo, davwè yo té dézobéyi Jéova. Men olié i mété lèspri’y asou sa Jéova té lé i fè, Barik koumansé sonjé yenki kòy. Kifè, Jéova itilizé Jérémi pou di’y : « Ou ka chèché gran bagay ba kòw. Sispann chèché sé kalté bagay-tala » (Jér. 45:3-5). Sé konsi Jéova té ka di’y : « Kontanté kòw épi sa ou ni. » Barik kouté Jéova épi i rété an tjè-koko épi’y.

9. Koumanniè 1 Korentjen 4:6, 7 ka endé nou ni bon manniè wè a ? (gadé sé zimaj-la osi).

⁹ Délè, an krétjen sé pé pansé ki sé li ki pou ni an rèsponsabilité adan sanblé-a. Pétèt i ni an patjé kapasité, i ni labitid travay rèd, épi i ka sèvi Jéova dépi an patjé lanné. Men sa pé rivé yo ba an lòt moun rèsponsabilité-a i té ka ziété. Kisa ki pé endé’y pa chokolaté kòy pou sa ? I sé pé médité asou sa Pòl di adan 1 Korentjen 4:6, 7 (li). Jéova pa ka ba nou an bagay pas nou pli bon pasé an lòt. Tout rèsponsabilité épi kapasité nou ni, sé an kado Jéova ka fè nou, pas i enmen nou épi i vréman janti épi nou (Wom. 12:3, 6 ; Éfé. 2:8, 9).

10. Koumanniè nou pé travay pou ni plis limilité ?

¹⁰ Nou pé aprann limilité lè nou ka pran tan katjilé asou lèkzanp Jézi. Jézi lavé pié sé apòt-li a, menmsi i té sav i té Yich Bondié, épi i té ni anpil lotorité. Lapòt Jan ékri : « Jézi, ki té sav Papa’y té mété tout bagay an lanmen’y, sé Bondié ki vréyé’y é i té ké ritounen bò Bondié [...] koumansé lavé pié sé disip-li a » (Jan 13:3-5). Jézi té pé ba disip-li lòd lavé pié’y. Men i pa janmen pansé, ki davwè i té Yich Bondié, i té pou ni an bèl kay, ni an patjé lajan, ouben i té pé blèz kòy adan lavi-a (Lik 9:58). I té ni anpil limilité é i té kontan sa i té ni. I ba nou an bèl lègzanp limilité (Jan 13:15).

11. Kisa ki endé Dennis kontanté kòy épi sa i ni ?

¹¹ Dennis, an frè ka viv Péyiba, ka éséyé suiv lègzanp limilité Jézi, menmsi sa pa toujou fasil. I ka èsplitjé : « Lè an moun ka trapé an rèsponsabilité man té lé ni, man ka santi lòwgèy-la ka monté andidan mwen. Pas silon mwen, man té pou ni rèsponsabilité-tala. Lè sa ka rivé, man ka étidié asou limilité. Adan JW Library^®, man sanblé vèsé ka palé di limilitéb. Konsa, man pé ritouvé yo fasilman épi viré li yo. Man anrèjistré osi asou téléfòn-mwen diskou asou limilitéc, é man ka kouté yo souvan. Man konprann ki tousa nou ka fè ba Jéova, sé pou louwé’y, é pa pou mété kònou douvan. Jéova janti épi nou, i ka ba nou chak an ti travay pou fè, men sé li ka fè travay-li réyisi. » Si’w ka koumansé santi ou maléré pas ou pa ni rèsponsabilité-a ou té lé, mété kòw an travay pou ni plis limilité. Sé gras a sa lanmitié’w épi Jéova ké vini pli fò, é ou ké kontanté kòw di sa’w ni (Jak 4:6, 8).

MÉDITÉ ASOU PWONMÈS JÉOVA FÈ’W

12. Poutji sé bèl pwonmès-la Jéova fè nou ka endé nou kontan sa nou ni jòdi-a ? (Iza. 65:21-25).

¹² Nou ké vréman kontan sa nou ni, si nou ka pran tan mété lèspri-nou asou bèl pwonmès Jéova fè nou. Adan liv Izayi-a, Jéova ka di i sav nou pé viv anlo bagay ka rann nou égri. Men i ka pwonmèt i ké fè tout pwoblèm-nou disparèt (li Izayi 65:21-25). Nou ké viv an sékirité adan bèl ti kay. Travay-la nou kèy fè épi dé lanmen-nou kèy ba nou satisfaksion. Nou ké pran pié-nou adan manjé ki bon pou santé-nou. Épi nou pé ké pè an bagay rivé yich-nou ouben nou menm (Iza. 32:17, 18 ; Ézé. 34:25). Nou pé asiré sèten ki tout sé bèl pwonmès-tala ké réyalizé dèmen !

13. Adan ki sitiyasion èspésialman fòk nou sonjé pwonmès Jéova ?

¹³ Poutji sa enpòwtan sonjé chak jou sa Jéova pwonmèt nou ? Pas nou ka viv « sé dènié jou-a » épi nou tout la ni pwoblèm ki « rèd pou sipòté » (2 Tim. 3:1). Chak jou, Jéova ka ba nou konsèy, lafòs épi pal-la nou bizwen pou tjenbé (Sòm 145:14). É lè nou ka bat mizè, sa i ka pwonmèt nou pé fè nou tjenbé. Pétèt ou ka bat rèd pou ba fanmiy-ou manjé, rad épi pou ba yo an kay. Ès sa lé di ou ké trimen tout lavi’w ? Piès pa ! Jéova pwonmèt ou i ké ba’w tousa ou bizwen adan paradi-a, é menm plis ki sa ! (Sòm 9:18 ; 72:12-14). Pétèt ou ni an maladi grav, ouben ou ka soufè chak jou anba an patjé doulè ; pétèt osi ou ka goumen kont ladéprésion. Men, ès ou ké soufè konsa tout lavi’w ? Ès pé ké ni piès djérizon ba’w ? Pa kwè sa ! Adan paradi-a, maladi épi lanmò ké pran lavòl (Rév. 21:3, 4). Pwonmès Jéova ka endé nou pa égri parapòt a sa ka rivé nou jòdi-a. É menmsi yo ka maltrété nou, ouben nou ka pèd an moun nou enmen, ouben kisiswa mové bagay ka rivé adan lavi-nou, nou pé toujou ni lajwa épi lapé an tjè-nou. Poutji ? Pas nou sav, menmsi nou ka jwenn pwoblèm ki rèd, sé « pou an ti moman ». É talè, adan monn nouvo a, nou pé ké janmen soufè ankò (2 Kor. 4:17, 18).

14. Ki manniè nou pé rann lafwa-nou pli fò adan pwonmès Jéova ?

¹⁴ Davwè pwonmès Jéova ka endé nou kontanté kònou di sa nou ni, kisa ki pé endé nou ni lasirans ki pwonmès Jéova ké réyalizé ? An bagay ki pé endé nou, sé imajinen kònou adan paradi-a. Pa ègzanp, lè nou ka santi nou entjèt pas lajan-an kout, nou pé imajinen manniè lavi-nou ké yé adan paradi-a. Nou pé ké ni bizwen lajan ankò, pas pèsonn pé ké maléré. Si nou égri pas nou pa risivwè tjèk rèsponsabilité, annou sonjé, adan monn nouvo a, sé kèy ti afè parapòt a bèl lavi-a nou ké ni, lè nou ké pawfé (1 Tim. 6:19). Pétèt sa difisil médité asou sé bèl pwonmès-la Bondié fè nou, pas ni anlo bagay ka pran tèt-nou. Men pli nou kèy fè éfò pou sonjé pwonmès Jéova, é pli sa ké vini an labitid ba nou.

15. Kisa témwayaj Christa ka aprann ou ?

¹⁵ Sa ki rivé Christa, madanm Dennis nou palé pli wo a, ka aprann nou valè sé pwonmès-la. I ka èsplitjé : « Man ni an maladi ka fébli kò-mwen, man pé pa maché, é man bouzwen sèvi an fotèy woulan. Épi fòk mwen rété an kabann-mwen près tout lajounen. Touléjou, sé soufè man ka soufè. Pa ni lontan, dòktè-mwen di mwen man kèy plizanpli mal. Men lamenm man di kòmwen, i pa ka wè dèmen kon mwen ka wè’y la. Man ka fiksé lèspri-mwen anlè pwonmès Jéova, é sa ka mété lapé an tjè-mwen. Jòdi-a, lavi-a ka malmennen mwen, men talè, man kèy pran pié-mwen adan monn nouvo a ! »

« MOUN KI KA KRENN JÉOVA PA KA MANTJÉ AYEN »

16. Poutji wa David di konsa ki moun ki ka krenn Jéova « pa ka mantjé ayen » ?

¹⁶ Menmsi nou ka kontanté kònou di sa nou ni, pwoblèm ké toujou la. David pèd 3 tjanmay. Yo manti anlè’y épi yo trayi’y. É an wa éséyé tjwé’y, épi i kouri dèyè’y pandan pliziè lanné. Magré tout sé léprèv-tala, David té kontan sa i té ni. Mi sa i di : « Moun ki ka krenn [Jéova] pa ka mantjé ayen » (Sòm 34:9, 10). Kisa i té lé di ? Nou pé asiré sèten an sèvitè Jéova pé ké jen mantjé sa i vréman bizwen (Sòm 145:16). Sa vré, sa pa lé di nou pé ké janmen ni pwoblèm. Men kon David, nou pé asiré sèten Jéova ké endé nou andiré lè nou anba léprèv. Nou pé ni lajwa épi lapé an tjè-nou, kisiswa sitiyasion-an nou ka viv.

17. Poutji ou bien désidé aprann kontanté kòw épi sa ou ni ?

¹⁷ Jéova lé nou ni tjè-kontan (Sòm 131:1, 2). Kidonk, fè tousa ou pé pou kontanté kòw épi sa ou ni. Kontinié travay rèd pou ni rikonésans épi limilité. Épi kontinié médité asou lèspérans-ou. Konsa, ou kèy pé di : ‘Wi, man kontan sa man ni’ (Sòm 16:5, 6).