Koumanniè Jéova ka endé nou tjenbé anba léprèv

1. Poutji nou bizwen landirans, é ki moun ki pé ba nou fòs-la pou tjenbé ? (1 Piè 5:10).

SÉ DÈNIÉ jou-a difisil pou sipòté. Kifè, sèvitè Jéova bizwen landirans. Yonn-dé ka goumen kont an maladi yo ni dépi an moman. I ni dòt tjè-yo fann pas yo pèd an moun yo enmen. Ouben ankò, i ni dòt ka tjenbé rèd anba lopozision lafanmi ouben sé gouvènman-an (Mat. 10:18, 36, 37). Alò, fòk ou asiré sèten, kisiswa difikilté-a ou ka jwenn, Jéova pé ba’w fòs-la pou tjenbé (li 1 Piè 5:10).

2. Gras a kisa nou pé tjenbé ?

² An moun ka andiré ka rivé tjenbé san dékourajé lè i ka jwenn bwa-koré, pèsékision, léprèv ouben tantasion. Sé Jéova ka ba nou kapasité-tala. Si nou ka rivé tjenbé, sé pa gras a fòs-nou, men sé pito pas Jéova ka ba nou ‘puisans-li ki fò pasé sa ki nòwmal’ (2 Kor. 4:7). Adan awtik-tala, nou ké palé di 4 bagay Jéova mété a dispozision-nou pou endé nou andiré. Nou ké wè osi, ki bénéfis sé bagay-tala ka pòté ba nou.

LAPRIYÈ

3. Poutji nou pé di lapriyè sé an mirak ?

³ Jéova fè an bagay èstwòdinè ki pé endé nou andiré : i fè an manniè pou nou pé sa palé épi’y, menmsi nou péchè (Ébré 4:16). Sonjé sa : Nou pé priyé’y tout lè, é nou pé palé épi’y di tout bagay. I ka konprann nou, kisiswa lang-lan nou ka palé é i ka tann nou, kisiswa koté-a nou yé — menmsi nou anba bwa ouben lajòl (Jon. 2:1, 2 ; Akt 16:25, 26). É si, palakòz lentjétid ouben langwas, nou pa ka rivé di sa nou ka risanti, i kapab konprann sa nou lé di’y vréman (Wom. 8:26, 27). Asiré, lapriyè sé an mirak !

4. Poutji mandé Jéova lafòs pou tjenbé, sé an bagay ki annakò épi volonté’y ?

⁴ Adan Pawòl-li, Jéova ka ba nou an garanti : « I ka kouté nou, kisiswa sa nou ka mandé’y ki annakò épi volonté’y » (1 Jan 5:14). Alò, ès nou pé mandé’y lafòs pou tjenbé ? Asiré ! Pas sa annakò épi volonté’y. Kisa ka pèwmèt nou di sa ? Djab-la pa ka sispann pwovotjé Jéova. É lè nou ka tjenbé douvan an léprèv, nou ka ba Jéova sa ki fo pou réponn Satan (Pwo. 27:11). Anplis di sa, Bib-la ka di nou sa Jéova lé pou toulbon. I lé « montré lafòs-li ba moun ki ka sèvi’y épi tout tjè-yo » (2 Kwo. 16:9). Kidonk, nou pé asiré sèten Jéova pé, épi i lé endé nou andiré (Iza. 30:18 ; 41:10 ; Lik 11:13).

5. Koumanniè lapriyè pé endé nou rété kam lè nou ka soufè ? (Izayi 26:3).

⁵ Labib-la ka di, lè nou ka priyé, Bondié ka ba nou an lapé ki pli wo pasé tout lapé nou pé konnèt. É lapé-tala ka ‘pwotéjé tjè-nou épi lèspri-nou’ lè nou ka soufè (Fil. 4:7). Malérèzman, lè yo douvan an léprèv, an patjé moun ki pa ka sèvi Jéova, ka éséyé divès bagay pou rété kam épi oubliyé pwoblèm-yo. Men lapé-a Jéova ka ba nou bien pli wo ki tout modèl lapé sé bagay-tala ka pwopozé. Lè nou ka prédié Jéova, nou ka montré’y ki sé anlè’y sèlman nou ka apiyé. É i ka réponn nou lè i ka ba nou an ‘lapé ki ka diré pou tout tan’ (li Izayi 26:3). Pa ègzanp, i ka ba nou lapé-tala, lè i ka endé nou sonjé vérité nou aprann adan Pawòl-li, Labib. Sé vérité-tala ka apézé lèspri-nou épi tjè-nou. Yo ka ba nou lasirans non sèlman Jéova ka otjipé di nou, men anplis, i lé nou ni tjè-kontan adan lavi-a (Sòm 62:1, 2).

6. Ki manniè lapriyè pé endé’w andiré ? (gadé zimaj-la osi).

⁶ Mi sa’w pé fè : Lè’w anba léprèv, « jété chaj-ou asou Jéova » épi mandé’y lapé-a i ka ba (Sòm 55:22). Mandé’y osi sajès-la ou bizwen an, pou’w pé sa rivé jéré difikilté ou ni (Pwo. 2:10, 11). Sipliyé’y pou i ba’w lafòs tjenbé, é pa oubliyé chak lè-a di’y mèsi (Fil. 4:6). Pran tan gadé tousa ka montré i ka ba’w fòs-la lè’w ni pwoblèm, épi sonjé di’y mèsi pou pal-la i ka ba’w la. Pa kité léprèv ou ka jwenn anpéché’w wè bénédision ou ka risivwè (Sòm 16:5, 6).

PAWÒL BONDIÉ

7. Poutji étidié Labib ka endé nou tjenbé lè nou ka jwenn léprèv ?

⁷ Jéova ba nou Pawòl-li pou endé nou tjenbé lè nou ka jwenn léprèv. Poudivré, adan Labib, ni an patjé vèsé ka ba nou lasirans i ka soutienn nou. Annou pran an ègzanp. An Matié 6:8, Jézi di : « Papa-zòt sav sa zòt bizwen avan menm zòt mandé’y. » Jézi konnèt Jéova pli bien pasé nou tout la. Kidonk, nou pa ni piès rézon douté ki Jéova sav sa nou bizwen lè nou anba léprèv. É an patjé dòt vèsé kon tala pé ba nou tjè pou andiré (Sòm 94:19).

8. a) Palé di an prensip Labib ki pé endé’w tjenbé rèd. b) Jou-a nou ké ni an pwoblèm, kisa ki kèy endé nou sonjé sé prensip-la nou bizwen a moman-tala ?

⁸ Adan Labib, i ni osi yonn-dé prensip ki pé endé nou tjenbé rèd lè nou anba léprèv. Sé prensip-tala pé ba nou sajès-la nou bizwen pou pran bon désizion (Pwo. 2:6, 7). Pa ègzanp, Labib-la ka ankourajé nou pa entjèt pou sa ki pé rivé dèmen, men pito apiyé asou Jéova chak jou (Mat. 6:34). Si nou ni labitid li Labib épi médité asou’y, jou-a nou ni an pwoblèm, sa ké pli fasil ba nou sonjé sé prensip-la nou bizwen a moman-tala.

9. Lè nou ka li adan Bib-la manniè Jéova endé sèvitè’y ki té fidèl, ki manniè sa ka aji anlè nou ?

⁹ Adan Labib, i ni osi listwa moun kon nou menm, ki mété konfians-yo adan Jéova épi ki risivwè fòs-la yo té bizwen an (Ébré 11:32-34 ; Jak 5:17). Lè nou ka wè manniè Jéova endé sé moun-tala, lafwa-nou ka vini pli fò, pas nou sav i ké endé nou osi. Pou vré, Jéova kon « an koté nou pé séré, i sé lafòs-nou, lanmen’y fasil pou touvé lè nou an lapenn » (Sòm 46:1). É lè nou ka réfléchi anlè manniè sé sèvitè-tala mété konfians-yo an Jéova, épi manniè yo kontinié sèvi’y magré bagay-la té rèd, sa ka ba nou anvi fè kon yo (Jak 5:10, 11).

10. Ki manniè ou pé sèvi Bib-la méyè manniè ki ni ?

¹⁰ Mi sa’w pé fè : Li Bib-la chak jou épi fè an lis vèsé ki ké vréman itil ba’w. Tou lématen, anlo moun ka li vèsé-a épi koumantè-a adan bwochi-a Examinons les Écritures chaque jour. Sa ka pèwmèt yo médité asou an bagay ka ankourajé yo pandan jounen-an. Sé sa Mariea konstaté, lè sé dé paran’y lan trapé an kansè. I ka èsplitjé : « Tou lématen, man té ka li tèks-la adan bwochi-a Examinons les Écritures, épi man té ka médité anlè’y. Gras a labitid-tala, man té ni an vèsé biblik an lèspri-mwen chak jou. Sa té ka pèwmèt mwen pa yenki sonjé kòmwen, épi sitiyasion-an man té ka viv la, menmsi i té rèd menm. Men man té ka mété lèspri-mwen asou an bagay ki té pli wo » (Sòm 61:2).

FRÈ É SÈ-NOU

11. Poutji sa ka rasiré nou di sav ki dòt frè é sè ka viv menm modèl léprèv ki nou ?

¹¹ Pou endé nou andiré, Jéova ba nou an fanmi frè é sè. Sa ka rasiré nou di ‘sav ki frè-nou toupatou asou latè ka jwenn sé menm soufwans-lan’ (1 Piè 5:9). Poutji nou ka di sa ? Pas, kisiswa sé léprèv-la nou ka jwenn, dòt avan nou jwenn sé menm léprèv-la é yo rivé tjenbé. Sa lé di ki nou osi, nou pé tjenbé lè nou ni difikilté ! (Akt 14:22).

12. Ki manniè frè èk sè-nou ka endé nou, é kisa nou pé fè ba yo ? (2 Korentjen 1:3, 4).

¹² Frè é sè-nou pé ankourajé nou. É sé sa lapòt Pòl konstaté. Souvan, i di frè é sè’y mèsi, pas yo ba’y an bèl pal lè i pa té ni dwa sòti kay-li ; i menm di non-yo adan sé lèt-li a. Sé frè é sè’y la konsolé’y, ankourajé’y épi ba’y pal-la i té ni bizwen (Fil. 2:25, 29, 30 ; Kol. 4:10, 11). Sé menm bagay-la jòdi-a. Lè nou bizwen fòs pou tjenbé, frè èk sè-nou toujou la ba nou. É lè sé yo ki ka bat mizè, nou menm nou la pou soutienn yo (li 2 Korentjen 1:3, 4).

13. Kisa ki endé Maïa tjenbé rèd ?

¹³ Maïa, an sè Larisi, trapé an bèl ankourajman gras a sé frè é sè’y la. An 2020, lapolis fouyé kay-li, épi apré sa, yo mété’y douvan lajistis pas i palé di kwayans-li ba dòt moun. I ka èsplitjé : « Lè man pa té pé ankò, sé frè é sè-a kriyé mwen, épi yo ékri pou di mwen manniè yo té enmen mwen […]. Man té toujou sav man té adan an gran fanmi éti sé lanmou ki mèt. Men dépi 2020, man konstaté sa ankò plis. »

14. Kisa nou pé fè pou frè é sè-nou endé nou lè nou anba léprèv ? (gadé zimaj-la osi).

¹⁴ Mi sa’w pé fè : Rété pwòch frè é sè’w. Pa ézité mandé sé ansien-an endé’w. Yo pé vini « an koté pou séré lè van ka souflé, […] an koté pou séré lè ni gwo lapli » (Iza. 32:2). Men adan menm balan-an, pa oubliyé ki frè é sè’w ka jwenn pwoblèm osi. Si’w ka soutienn an moun ki bizwen an pal, sa kèy endé’w rété pozitif épi wè pwòp léprèv-ou bon manniè-a (Akt 20:35).

LÈSPÉRANS-NOU

15. Ki manniè lèspérans-lan Jézi té ni endé’y tjenbé, é ki manniè lèspérans-nou pé endé nou osi ? (Ébré 12:2).

¹⁵ Pou tjenbé douvan an léprèv, Jéova ba nou an lèspérans ki solid (Wom. 15:13). Sonjé manniè lèspérans-lan Jézi té ni, endé’y sipòté pli mové jou-a i pasé asou latè (li Ébré 12:2). Jézi té sav fidélité’y té ké ba laprèv ki tousa Djab-la rakonté asou Jéova sé manti. Men osi ki Jéova mérité nou gloriyé’y. Anplis di sa, i té présé rijwenn Papa’y épi gouvèné adan Wayòm-lan épi sé frè’y la. Menm manniè-a, lèspwa nou ni viv asou latè-a pou toujou, ka endé nou andiré tout léprèv monn Satan-an ka fè nou sibi.

16. Koumanniè lèspérans-nou endé Alla tjenbé rèd, é kisa lègzanp-li ka aprann ou ?

¹⁶ Annou wè ki manniè lèspwa viv adan monn nouvo a endé Alla, an sè Larisi, ki té ni mari’y fèmen lajòl. Lè sa rivé, mi sa i konstaté : « Lè man ka mété lèspérans-mwen an mitan lapriyè-mwen épi méditasion-mwen, sa ka endé mwen pa dékourajé twòp. Man sav apré lapli, sé solèy. Jéova ké genyen, é nou osi. »

17. Koumanniè nou pé di Jéova mèsi pou lèspérans-lan i ba nou ? (gadé zimaj-la osi).

¹⁷ Mi sa’w pé fè : Pran tan katjilé asou sé bèl pwonmès-la Jéova fè’w pou dèmen. Wè kòw adan monn nouvo a ka pwofité di tout bénédision ou ka atann. Konsa, tout léprèv ou sé pé jwenn jòdi-a kèy parèt ou « léjè épi kout » (2 Kor. 4:17). Anplis di sa, fè tousa ou pé pou palé di lafwa’w ba tout moun ou ka jwenn. Mété kòw alaplas sé moun-lan : sa dwèt difisil ba yo sipòté monn Satan-an épi tout pwoblèm ka alé épi’y, san yo konnèt pwojé Bondié pou dèmen ! Menm an ti diskision toupiti, pé ba an moun lanvi sav plis asou Wayòm-lan épi lèspérans-nou.

18. Poutji nou pé asiré sèten Jéova ké réyalizé tout pwonmès-li ?

¹⁸ Aprézavwè Jòb travèsé an patjé difikilté, mi sa i di Jéova : « Atjèlman, man sav ou pé fè tout bagay, é pa ni ayen adan sa ou lé fè ki enposib ba’w » (Jòb 42:2). Jòb konprann ki ayen pé pa anpéché Jéova réyalizé pwonmès-li. Vérité-tala pé ba nou lafòs pou andiré. Annou pran an ègzanp : An moun malad dékourajé pas i ay wè an patjé dòktè, men yo piès pa rivé djéri’y. Men apré sa, i ka jwenn an bon dòktè ki ka touvé sa i ni é ka èsplitjé’y ki manniè i kèy djéri’y. I sav sa ké pran tibren tan, men i ka santi kòy soulajé. Atjèlman, menmsi maladi-a la, sa pli fasil ba’y tjenbé, pas i sav i ké djéri. Menm manniè-a, pas nou asiré sèten paradi-a ké rivé, nou pé tjenbé adan monn-tala.

19. Kisa nou bizwen pou andiré ?

¹⁹ Kon nou wè adan awtik-tala, Jéova pé endé nou andiré gras a lapriyè, Pawòl-li, frè é sè-nou, épi lèspérans-lan i ka ba nou. Si nou ka fè tousa nou pé pou sèvi sé bagay-tala Jéova ba nou, i ké endé nou, kisiswa sé soufwans-lan nou pé ni atjèlman. É i kèy endé nou osi tjenbé rèd, jiktan monn Satan-an épi tout soufwans ké disparèt (Fil. 4:13).