Sonjé lézòt adan lapriyè’w

1. Koumanniè nou sav lapriyè-nou enpòtan ba Jéova ?

LAPRIYÈ sé an bèl kado. Katjilé asou sa : Jéova ba sé zanj-lan yonn-dé aktivité pou fè (Sòm 91:11). I ba Yich-li Jézi osi gwo rèsponsabilité (Mat. 28:18). Men ki moun ka kouté lapriyè-nou ? Jéova désidé gadé sa ba kòy. Labib ka di Jéova « ka kouté lapriyè » nou chak la (Sòm 65:2).

2. Ki manniè nou sav Pòl té ka prédié ba lézòt, é ki bèl ègzanp i ka kité ba nou ?

² Menmsi nou pé palé di pwoblèm-nou ba Jéova, fòk nou pansé prédié ba lézòt. Sé sa lapòt Pòl té ka fè. Pa ègzanp, i ékri sanblé Éfèz : « Man ka kontinié palé di zòt adan lapriyè-mwen » (Éfé. 1:16). Men délè, Pòl té ka priyé èspésialman ba an moun. Pa ègzanp, i di Timoté : « Man ka di Bondié mèsi, […] épi man ka prédié ba’w lannuit kon lajounen, wi, ou adan lapriyè-mwen » (2 Tim. 1:3). Sa vré, Pòl té ni pwòp pwoblèm-li pou palé adan lapriyè’y (2 Kor. 11:23 ; 12:7, 8). Men i té ka pran tan prédié ba lézòt.

3. Kisa ki sé pé anpéché nou prédié ba lézòt ?

³ Délè, nou pé oubliyé prédié ba lézòt. Poutji ? An sè yo ka kriyé Sabrinaa ka ba nou an rézon. I ka di : « Lavi-a adan monn-tala rèd menm. Nou toujou adan an kous-kouri. Kifè, nou pé touvé kònou ka néyé anba pwoblèm, épi prédié yenki ba kònou. » Ès sé an labitid ou ni ? Si wi, awtik-tala pé itil ba’w. I kèy èsplitjé’w pou koumansé, poutji sa enpòtan prédié ba lézòt. Apré, i ké ba’w yonn-dé konsèy kèy endé’w fè sa.

POUTJI FÒK NOU PRIYÉ BA LÉZÒT ?

4-5. Poutji nou ka di lapriyè « ni anpil fòs » ? (Jak 5:16).

⁴ Priyé ba lézòt « ni anpil fòs » (li Jak 5:16). Lè nou ka priyé ba lézòt, ès sa pé aji poubon asou sitiyasion-yo ? Asiré. Pa ègzanp, Jézi té sav lapòt Piè té kèy viré do ba’y. Alò i di’y : « Man sipliyé ba’w pou lafwa’w pa fébli » (Lik 22:32). Pòl osi té sav, lapriyè té pé ni an lenfliyans asou sa ka rivé an moun. Alòs yo té fèmen’y lajòl pa koté Wòm pou ayen, mi sa i ékri Filémon : « Man ka èspéré, gras a lapriyè-zòt, yo kèy libéré mwen » (Filém. 22). É sé sa ki fèt : yo libéré Pòl lamenm é i té pé rikoumansé préché.

⁵ Men ès lapriyè-nou pé fòsé Jéova aji tèl é tèl fason ? Piès pa. Men lè i ka wè sèvitè’y lé vréman an bagay, délè, i ka désidé réponn lapriyè-yo. Sav sa, ka ba nou balan pou prédié épi tout tjè-nou, épi kité bagay-la an lanmen Jéova épi lafwa (Sòm 37:5 ; 2 Kor. 1:11).

6. Lè nou ka prédié ba lézòt, ki manniè sa ka aji asou santiman-nou ? (1 Piè 3:8).

⁶ Prédié ba lézòt ka endé nou ni ba yo an « konpasion plen tandrès » (li 1 Piè 3:8). Lè’w ni konpasion ba an moun, ou ka éséyé konprann soufwans-li épi sa ka ba’w anvi ba’y an soulajman (Mak 1:40, 41). An ansien yo ka kriyé Michael di konsa : « Lè man ka palé di sa lézòt bizwen adan lapriyè-mwen, sa ka endé mwen bien konprann difikilté yo ka jwenn, épi man ka vini enmen yo ankò plis. » Richard, ki ansien osi, ka palé di an lòt bon bagay lapriyè ka pòté ba lézòt. I ka èsplitjé : « Lè’w ka prédié ba an moun, sa ka ba’w ankò plis anvi fè an bagay ba’y. » I ka ajouté : « Lè’w ka prédié ba an moun épi ou ka fè aksion pou endé’y, avrédi ou ka travay kantékant épi lapriyè’w pou Bondié ba’y an soulajman. »

7. Poutji nou pé di, prédié ba lézòt ka endé nou pa rété yenki anlè pwoblèm-nou ? (Filipien 2:3, 4 ; gadé sé zimaj-la osi).

⁷ Priyé ba lézòt ké pèwmèt nou pa yenki sonjé pwoblèm-nou (li Filipien 2:3, 4). Nou tout ni pwoblèm adan lavi-nou, pas nou adan an monn ki anba lanmen Djab-la (1 Jan 5:19 ; Rév. 12:12). Men lè nou ni labitid priyé ba lézòt, sa ka fè nou sonjé ‘tout frè-nou asou latè ka jwenn sé menm soufwans-lan’ (1 Piè 5:9). An pionié yo ka kriyé Katherine ka di : « Prédié ba lézòt ka fè mwen sonjé sé pa mwen sèl ki ni pwoblèm. Sa ka endé mwen osi pa rété yenki anlè mové bagay ka rivé mwen. »

YO BIZWEN LAPRIYÈ-NOU

8. Ba ki moun nou pé priyé ?

⁸ Ba ki moun nou pé priyé ? Nou pé priyé ba gwoup moun. Pa ègzanp, ba moun ki ni pwoblèm santé. Nou pé priyé osi ba sé jenn-lan ki lékòl, pas yo ka sibi présion kanmarad-yo, ouben pas yo ka mété yo alafèt. Épi osi, ba frè é sè-nou ka santi laj-la ka monté. Anplis di sa, i ni anpil frè é sè ki pou tjenbé doubout douvan lopozision adan lafanmi-yo ouben adan péyi-yo (Mat. 10:18, 36 ; Akt 12:5). I ni ki té oblijé kité kay-yo parapòt a pwoblèm politik. Dòt ankò sibi katastwòf natirèl. Sa vré, pétèt nou pa konnèt sé frè é sè-tala, men nou pé priyé ba yo. É lè nou ka fè sa, nou ka suiv koumandman Jézi ki di ‘enmen kònou yonn lòt’ (Jan 13:34).

9. Poutji fòk nou prédié ba sé frè-a ka dirijé nou épi ba madanm-yo ?

⁹ Nou pé priyé osi ba sé frè-a ka dirijé nou, kontèl sé manb Komité santral la épi asistan-yo, sé manb komité filial-la, sé frè-a ki rèsponsab an sèvis adan Bétèl-la, sé rèsponsab siwkonskripsion-an, sé ansien-an épi sé asistan-an. Anpil adan sé frè-tala ka travay rèd, magré yo ni pwòp pwoblèm-yo (2 Kor. 12:15). Mark, an rèsponsab siwkonskripsion, ka di : « Si i ni an bagay ki rèd ba mwen, sé viv lwen lé paran-mwen, pas yo ja ni an bèl laj. Lé dé-a ni an mové santé. Menmsi sè-mwen épi mari’y ka otjipé di yo, sa ka fè mwen lapenn sav man pé pa fè plis ba yo. » Ki nou konnèt ouben ki nou pa konnèt pwoblèm sé frè-tala ka jwenn, annou sonjé yo adan lapriyè-nou, pas yo ka travay rèd (1 Tés. 5:12, 13). Nou pé prédié osi ba madanm-yo, pas yo ka ba yo fòs-la lanné apré lanné, pou doubout dèyè rèsponsabilité-yo.

10-11. Ès Jéova ka kouté lapriyè-nou, menmsi nou pa ka prédié èspésialman ba an frè ouben an sè ?

¹⁰ Kon nou wè a, nou ka prédié souvan ba gwoup frè é sè. Pa ègzanp, menmsi nou pa ni an moun èspésialman an lèspri-nou, nou pé mandé Jéova endé tout frè é sè-nou ki lajòl, ouben konsolé sa ki pèd an moun yo enmen. An ansien yo ka kriyé Donald di konsa : « I ni tèlman frè é sè ka soufè, ki délè, nou ka fè an lapriyè ba yo tout ansanm. »

¹¹ Ès sé modèl lapriyè-tala ka fè Jéova plézi ? Asiré ! Pou vré, nou pa konnèt sa chak frè é sè bizwen. Kidonk, sa toutafètman nòwmal nou prédié ba gwoup frè é sè (Jan 17:20 ; Éfé. 6:18). Lapriyè konsa ka montré nou ‘enmen tout frè é sè-nou’ asou latè (1 Piè 2:17).

LÈ’W KA CHWAZI PRIYÉ ÈSPÉSIALMAN BA AN MOUN

12. Poutji nou ka di, lè nou òbsèvatè, lapriyè-nou kèy pli prési ?

¹² Fòk ou òbsèvatè. Sé an bon bagay lè’w ka priyé ba gwoup frè é sè. Men sa bien osi, ou nonmen non frè é sè’w adan lapriyè’w. Ès adan lasanblé’w la, an moun ka goumen touléjou kont an maladi grav ? Ès i ni an jenn adan lasanblé’w la, ki dékourajé palakòz présion i ka sibi lékòl ? Ès i ni an paran adan lasanblé’w la ka goumen pou élivé yich-li tou sèl adan « prensip èk avètisman Jéova » ? (Éfé. 6:4). Si ou òbsèvatè, soufwans lézòt kèy touché’w, é sa ké ba’w anvi priyé ba yob (Wom. 12:15).

13. Poutji nou pé priyé ba an moun nou pa konnèt ? Èsplitjé.

¹³ Nonmen non frè èk sè’w, lè’w ka prédié ba yo. Ou pé fè’y menmsi zòt pa janmen jwenn. Pa ègzanp, sonjé frè èk sè’w ki lajòl Lakrimé, Éritré, Larisi épi Sengapou. Lè’w ka alé asou jw.org, ou pé touvé non yo toutc. Brian, an rèsponsab siwkonskripsion, ka èsplitjé : « Lè man ka ékri non an frè ouben an sè-mwen ki lajòl, épi man ka di non’y tou wo, man rimatjé, sa ka endé mwen sonjé’y, épi palé di’y lè man ka prédié. »

14-15. Kisa kèy endé nou prési adan lapriyè-nou ?

¹⁴ Fòk ou prési adan lapriyè’w. Michael, nou palé pli wo a, di konsa : « Lè man ka li listwa frè ki lajòl asou jw.org, man ka éséyé imajinen kisa man té kèy risanti alaplas-yo. Man sav man té kèy entjèt ba madanm-mwen, é man té kèy lé sé frè é sè-a pran swen di’y. Sa ka pèwmèt mwen di bagay prési, lè man ka priyé pou frè-mwen ki lajòl épi ki mayé » (Ébré 13:3, gadé nòt-la adan Bib-la ki fèt pou étidié, an fwansé).

¹⁵ Si nou ka éséyé imajinen lavi frè é sè-nou ki lajòl, nou kèy sav kisa nou pé mandé Jéova ba yo ankò. Pa ègzanp, nou pé prédié pou sé gadien-an pa maltrété yo, men pito janti épi yo. Épi prédié pou sa ki ni an lotorité anlè yo, kité yo adoré Jéova (1 Tim. 2:1, 2). Nou pé prédié osi pou lègzanp fidélité-yo ankourajé manb lasanblé-yo. Épi pou moun ki pa Témwen Jéova wè bèl konduit-yo épi kouté mésaj-nou (1 Piè 2:12). Asiré, nou pé aplitjé sé menm konsèy-tala, lè nou ka prédié ba frè é sè-nou ka sipòté dòt léprèv ankò. Kidonk, si nou òbsèvatè, si nou ka nonmen non frè é sè-nou adan lapriyè-nou, épi si nou prési lè nou ka prédié, nou kèy montré nou ni an patjé lanmou yonn ba lòt. (1 Tés. 3:12).

FÒK NOU RÉYALIS LÈ NOU KA PRIYÉ BA LÉZÒT

16. Menmsi lapriyè-nou pé ni an lenfliyans anlè sitiyasion an moun, kisa fòk nou sonjé ? (Matié 6:8).

¹⁶ Kon nou fini wè a, lapriyè-nou pé ni an lenfliyans anlè sitiyasion an moun. Men fòk nou réyalis parapòt a sa lapriyè-nou pé fè ba an moun. Sonjé, Jéova pa bizwen nou mété’y okouran an bagay, pas i ja sav tout bagay. É i pa bizwen non pli, nou ba’y piès konsèy pou di’y méyè manniè pou jéré an sitiyasion. Avan menm sèvitè’y réyalizé yo bizwen an bagay, ouben nou menm réyalizé sa an sèvitè’y bizwen, Jéova ja sav (li Matié 6:8). Alò, poutji fòk nou priyé ba lézòt ? Anplis di sa nou wè adan awtik-tala, sé an manniè montré lézòt yo enpòtan ba nou. Lanmou ka ba nou balan pou priyé ba lézòt. É Jéova kontan lè i ka wè sèvitè’y imité lanmou’y.

17-18. Ba an ègzanp ka montré manniè sa enpòtan prédié ba lézòt.

¹⁷ Menmsi lapriyè-nou pa oblijé chanjé ayen adan sitiyasion frè èk sè-nou, yo ka montré tout lanmou-a nou ni ba yo, é Jéova ka rimatjé lanmou-tala. Imajinen an fanmi ki ni 2 jenn tjanmay, an ti gason épi an ti-fi. Ti gason-an kouché anlè an kabann pas i malad. Ti-fi a kèy wè papa’y épi ka sipliyé’y : « Souplé papa, fè an bagay ba ti frè-mwen. I malad menm ! » Papa-a ja ka métrizé sitiyasion-an ; i enmen yich-li é i ka pran swen di’y. Men, lè i ka wè ti-fi’y li a tèlman entjèt ba frè’y, épi ka mandé’y endé’y, papa-a dwèt ni tjè-kontan !

¹⁸ Jéova ka ankourajé nou sousié kònou yonn di lòt, épi prédié yonn pou lòt. Lè nou ka prédié, fòk pa nou montré nou ka sonjé pwòp kònou sèlman, men fòk nou montré nou enmen frè èk sè-nou ; é Jéova ka wè sa (2 Tés. 1:3 ; Ébré 6:10). Anplis, kon nou wè’y la, lapriyè-nou pé ni an lenfliyans asou sitiyasion an moun. Kidonk, annou toujou sonjé lézòt adan lapriyè-nou !