AWTIK POU ÉTIDIÉ 23
KANTIK 2 Jéova sé gran non’w
Ki lenpòwtans non Jéova pou ni ba nou
« Jéova ka di : « Zòt ka sèvi mwen témwen » (IZA. 43:10).
MI SA NOU KÉ WÈ
Nou ké wè sa nou pé fè pou montré ki Jéova sen é ki tousa Satan di anlè’y pa vré.
1-2. Koumanniè nou sav ki non Jéova sé sa ki pli enpòwtan ba Jézi ?
PA NI ayen ki pli enpòwtan ba Jézi ki non Jéova. Pèsonn pa ka défann non Jéova plimié ki Jézi. Kon nou wè adan awtik-la simenn pasé, Jézi té paré mò pou montré Jéova té fè tout bagay bon manniè-a é ki non’y sen (Mak 14:36 ; Ébré 10:7-9). É alafen sé 1000 an-an, lè dominasion’y kèy bout, i kèy rimèt Papa’y tout pouvwa i té trapé, pas i lé Papa’y risivwè tout lonnè-a (1 Kor. 15:26-28). Tousa i fè ba non Papa’y, ka montré i enmen Papa’y anlo.
2 Jézi vini anlè latè pou palé an non Papa’y (Jan 5:43 ; 12:13). I fè disip-li konnèt non’y (Jan 17:6, 26). I ansénié épi fè mirak an non Papa’y (Jan 10:25). É i mandé Jéova jété an zié asou sé disip-li a ‘parapòt a non’y’ (Jan 17:11). Sa klè, non Jéova té ni an gran valè ba Jézi. Kidonk, koumanniè an moun pé di i sé an vré disip Jézikri, si i pa konnèt épi pa ka sèvi non Papa’y ?
3. Kisa nou kèy wè adan awtik-tala ?
3 Nou ki ka fè anlo éfò pou suiv lègzanp Jézi, nou ka ba non Papa’y anlo valè (1 Piè 2:21). Jéova ka ba moun ki ka préché « bon nouvèl Wayòm-lan » non’y, é adan awtik-tala nou ké wè poutji (Mat. 24:14). Nou ké wè osi, ki lenpòwtans non Jéova pou ni, ba nou chak la.
« AN PÈP BA NON’Y »
4. a) Ki mision Jézi ba disip-li avan i viré an sièl ? b) Pawòl-la « zòt ké sèvi mwen témwen », ki kèsion sa ka lévé ?
4 Jiskont avan Jézi viré an sièl-la, mi sa i di disip-li : « Zòt ké risivwè puisans lè lèspri sen ké vini anlè zòt, é zòt ké sèvi mwen témwen Jérizalèm, adan tout Lajidé é Lasamari, épi jis koté ki pli lwen anlè latè » (Akt 1:8). Kidonk, sé disip-la té ké ni pou préché bon nouvèl-la toupatou asou latè, é pa sèlman an Izrayèl. Piti a piti, moun ki asou tout latè té kèy ni posibilité vini disip Jézikri (Mat. 28:19, 20). É gadé sa Jézi di osi : « Zòt ké sèvi mwen témwen. » Ès disip Jézi té ké sèlman témwen Jézi, oben fòk yo té ké aprann konnèt non Jéova épi vini témwen’y tou ? Annou wè sé évènman-an ki pasé adan Akt chapit 15 pou réponn kèsion-tala.
5. Koumanniè sé apòt-la épi sé ansien Jérizalèm-lan montré manniè sa enpòwtan konnèt non Jéova ? (gadé zimaj-la osi).
5 Lanné 49 apré Jézikri, sé apòt-la épi sé ansien Jérizalèm-lan réyini kòyo. Yo diskité pou sav si sé moun-lan ki pa té Juif té pou fè kòyo siwkonsi pou vini krétjen. Pou bout diskision-an, Jak, dimi frè Jézi, di konsa : « [Piè] pran tout tan’y pou rakonté kouman, pou prèmié fwa, Bondié otjipé kòy di sé nasion-an pou chwézi andidan yo an pèp pou non’y. » I ripran pawòl pwofèt Amòs, lè i di : « Pou lèrèstan sé nonm-lan chèché Jéova poubon, yo épi osi moun tout nasion, moun ki ka pòté non-mwen, sé sa Jéova di » (Akt 15:14-18). Sé nouvo disip-la ki té kèy sòti adan tout nasion té kèy aprann konnèt Jéova, men yo té kèy osi ‘pòté non’y’. Kifè, tout moun té ké sav yo ka riprézanté non-tala.
An 1ié sièk-la, adan an réyinion komité santral la, sé frè-a konprann ki sé krétjen-an pou vini an pèp ka pòté non Bondié (gadé paragraf 5-lan).
6-7. a) Poutji Jézi vini anlè latè ? b) Jézi vini anlè latè pou an lòt rézon pli enpòwtan ankò. Kilès ?
6 Non Jézi lé di « Jéova ka sové ». Sa vré, sé gras a Jézi, Jéova ka sové moun ki ka montré lafwa an li. Jézi vini anlè latè pou ba lavi’y pou sové lézòm (Mat. 20:28). Gras a ranson-an, Bondié té pé padonnen péché-yo, é yo té pé ni lavi étèrnèl (Jan 3:16).
7 Men poutji lézòm té bizwen sakrifis-tala ? Sé parapòt a sa ki pasé adan jaden Lédenn-lan. Kon nou wè adan awtik-la simenn pasé, prèmié paran-nou, Adan épi Èv, ribélé kòyo kont Jéova. Kifè, yo épi désandan-yo pèd posibilité viv pou toujou (Jén. 3:6, 24). Kidonk, Jézi vini anlè latè pou sové désandan Adan épi Èv. Men i vini anlè latè pou an lòt rézon pli enpòwtan ankò. Sonjé ki adan jaden Lédenn, Satan manti pou sali non Jéova (Jén. 3:4, 5). Kidonk, sa té vréman nésésè rann non Jéova sen. Jézi té sav ki lè non Jéova té ké sen ki an sièl, ki anlè latè, limanité té ké sové. Jézi sé té méyè moun-lan ki té pé rann non Jéova sen, pas i riprézanté’y lè i vini anlè latè, é i fè tousa Jéova té mandé’y fè.
Koumanniè an moun pé di i sé an vré disip Jézikri, si i pa konnèt épi pa ka sèvi non Papa’y ?
8. Kisa sé moun-lan ki té kèy montré yo ni lafwa an Jézi té kèy pou rikonnèt ?
8 Tout sé krétjen-an ki té kèy suiv Jézi, té ké pou rikonnèt ki sé Jéova ki Sovè-yo (Jan 17:3). Anplis, toukon Jézi, yo té kèy pòté non Jéova. Fòk osi yo té konprann poutji sa té fondal-natal ki non-tala vini sen. Sé konsa yo té kèy pé sové (Akt 2:21, 22). Kidonk tout disip Jézi té ké pou aprann konnèt li, men osi aprann konnèt Jéova tou. Nou ka konprann poutji Jézi bout lapriyè’y la épi sé pawòl-tala nou ka touvé an Jan chapit 17 : « Mwen aprann yo konnèt non’w é mwen ké kontinié fè’y, pou menm lanmou-a ou ni ba mwen andidan yo osi, é pou mwen menm fè yonn épi yo » (Jan 17:26).
« ZÒT KA SÈVI MWEN TÉMWEN »
9. Si nou lé suiv lèkzanp Jézi, kisa ki pou ni plis lenpòwtans ba nou ?
9 Tout vré disip Jézi pou montré ki sa ki pli enpòwtan ba yo, sé ki non Jéova vini sen (Mat. 6:9, 10). Fòk yo konsidéré ki non-tala pli wo pasé nenpòt ki non. É osi montré épi aksion-yo ki non-tala ni kont lenpòwtans-li. Alò, kisa nou pé fè pou non Bondié vini sen, épi montré ki tousa Satan di asou Jéova pou fè’y ditò sé mansonj ?
10. Ki afè ka pasé adan Izayi chapit 42 a 44 ? (Izayi 43:9 ; 44:7-9 ; gadé zimaj-la osi).
10 Adan Izayi chapit 42 a 44, nou ka wè sa nou pé fè pou rann non Jéova sen. Adan sé chapit-tala, Jéova ka mandé sé moun-lan ki pa ka adoré’y, montré ki bondié-yo ka ègzisté poubon. Kon adan an tribinal, i ka mandé si i ni yonn-dé témwen ki pé ba prèv di sa. Men tout moun ka fè dèyè ! (li Izayi 43:9 ; 44:7-9).
Nou Témwen Jéova adan tousa nou ka di épi fè (gadé paragraf 10 épi 11).
11. Kisa Jéova ka di sèvitè’y adan Izayi 43:10-12 ?
11 (Li Izayi 43:10-12.) Jéova di sèvitè’y : « Zòt ka sèvi mwen témwen, […] é mwen man sé Bondié-zòt. » Apré sa, i ka mandé yo réponn kèsion-tala : « Ès ni an lòt Bondié ki mwen ? » (Iza. 44:8). Kidonk, nou ni privilèj réponn kèsion-tala. Adan sa nou ka di épi sa nou ka fè, nou pé montré ki Jéova sé sèl vré Bondié-a, é ki non’y pli wo pasé tout non ka ègzisté. Magré présion Satan ka mété anlè nou, nou pé montré adan manniè nou ka viv, ki nou enmen Jéova épi tout tjè-nou, é ki nou lé rété fidèl. Wi, sé konsa nou pé partisipé pou rann non’y sen !
12. Koumanniè pwofési-a nou ka touvé an Izayi 40:3, 5 réyalizé ?
12 Annou wè an pwofési ka montré ki manniè Jézi sèvi témwen ba Jéova é rann non’y sen. Izayi té prédi ki an moun té ké « paré chimen-an ba Jéova » (Iza. 40:3). Ki manniè pwofési-tala réyalizé ? Jan Lèbatis paré chimen-an ba Jézi. Épi Jézi vini anlè latè é i palé an non Jéova (Mat. 3:3 ; Mak 1:2-4 ; Lik 3:3-6). Pwofési-tala té ka di ankò : « Laglwa Jéova ké parèt aklè » (Iza. 40:5). Men ki manniè ‘laglwa Jéova parèt aklè’ ? Lè Jézi té asou latè, i riprézanté Jéova an manniè pawfé. Kifè, sé té konsi Jéova li menm té asou latè (Jan 12:45).
13. Koumanniè nou pé imité Jézi ?
13 Lè nou ka défann non Jéova nou ka suiv lèkzanp Jézi. Kon Jézi, nou ka témwagné ba Jéova. Nou ka pòté non Jéova, é nou ka di tout moun bèl bagay i ka fè. Men, pou nou ba an témwayaj ki éfikas, fòk nou fè sé moun-lan konnèt osi, wòl potalan Jézi pou rann non Bondié sen (Akt 1:8). Jézi sé pli gran Témwen Jéova ki ni, é nou ka suiv larèl-li (Rév. 1:5). Men atjèlman, annou wè lenpòwtans non Jéova pou ni ba nou chak la.
LENPÒWTANS NON JÉOVA BA NOU
14. Annakò épi Sòm 105:3, ki santiman non Jéova ka lévé an tjè-nou ?
14 Nou fiè pòté non Jéova (li Sòm 105:3). Sé pa ti kontan Jéova kontan lè nou ‘ka vanté kònou’ pas nou ka pòté non’y (Jér. 9:23, 24 ; 1 Kor. 1:31 ; 2 Kor. 10:17). Si nou ka fè sa, sé pas nou fiè i sé Bondié-nou. Nou vréman kontan pas nou pé onoré non’y épi défann répitasion’y ! Fòk pa nou janmen wont fè kolèg-nou, kanmarad lékòl-nou, vwazen-nou épi dòt moun sav nou Témwen Jéova. Djab-la sé lé nou sispann palé di non Bondié alantou nou (Jér. 11:21 ; Rév. 12:17). Pou vré, li épi tout sé moun-lan ka manti anlè Bondié, lé fè lézòm oubliyé non-tala (Jér. 23:26, 27). Men nou ki enmen non Jéova, nou lé louwé’y épi tout tjè-nou « tout lajounen » (Sòm 5:11 ; 89:16).
15. Kisa sa lé di mété konfians-nou adan non Jéova ?
15 Nou ka mété konfians-nou san rété adan non Jéova (Jow. 2:32 ; Wom. 10:13, 14). Pou vré, mété konfians-nou adan non Jéova, sé pa jiskont konnèt épi sèvi non-tala. Men mété konfians-nou adan non-tala, sé aprann konnèt moun-lan ka pòté non-tala, apiyé anlè’y, épi kouté konsèy-li (Sòm 20:7 ; 99:6 ; 116:4 ; 145:18). Sa lé di osi palé di non’y é di kalité’y ba dòt moun pou ankourajé yo ripanti kòyo. Épi endé yo fè chanjman ki nésésè pou fè Jéova plézi pou yo sové (Iza. 12:4 ; Akt 2:21, 38).
16. Koumanniè nou pé montré Satan sé an mantè fini ?
16 Nou paré soufè pou non Jéova gloriyé (Jak 5:10, 11). Lè nou ka rété fidèl a Jéova anba gwo pwoblèm, nou ka montré Satan sé an mantè. Antan Jòb, Satan akizé sèvitè Jéova lè i di : « An nonm kapab ba tousa i ni pou sové lavi’y » (Jòb 2:4). Djab-la prétann ki moun ki té ka sèvi Jéova té ka sèvi’y sèlman pas tout bagay té bèl ba yo, é lè yo té kèy ni pwoblèm, yo té kèy ladjé’y. Jòb montré sa pa té vré piès ! Jòdi-a osi, nou pé montré ki menm lè lavi-a rèd ouben menm lè Satan ka éséyé dékourajé nou, nou pé ké janmen ladjé Jéova. Nou pé asiré senten, Jéova ké toujou jété an zié anlè nou ‘parapòt a non’y’ (Jan 17:11).
17. Silon 1 Piè 2:12, ki manniè ankò nou pé gloriyé non Jéova ?
17 Nou ka fè tousa nou pé pou ba non Jéova kont rèspé’y (Pwo. 30:9 ; Jér. 7:8-11). Davwè sé moun-lan sav nou Témwen Jéova, sa nou ka fè pé gloriyé ouben dézonoré non Bondié (li 1 Piè 2:12). Sé poutji nou ka fè tousa nou pé pou gloriyé Jéova adan sa nou ka di épi sa nou ka fè. Si nou ka fè sa, magré nou pa pawfé nou ké gloriyé non Jéova kanmenm.
18. Ki manniè ankò nou pé montré ki non Jéova enpòwtan ba nou ? (gadé nòt-la osi).
18 Non Jéova pli enpòwtan ki pwòp répitasion-nou (Sòm 138:2). Poutji sa ésansièl ? Pas yonn-dé moun alantou nou pé pansé ouben di mové bagay anlè nou, pas nou ka sèvi Jéovaa. Lè Jézi mò, sé moun lan té ka konsidéré’y kon an malfétè é yo té ka méprizé’y. Men Jézi asèpté mò manniè-tala pou gloriyé non Papa’y. I « méprizé lawont », sa lé di, sa lézòt té ka pansé di’y sé pa sa ki té pli enpòwtan ba’y (Ébré 12:2-4). I té bien désidé fè volonté Papa’y (Mat. 26:39).
19. Kisa ou ka risanti ba non Jéova, é poutji ?
19 Nou fiè sèvi Jéova. Pòté non Témwen Jéova sé an lonnè ba nou ! Pas non Jéova sitèlman enpòwtan ba nou, nou ké kontinié gloriyé’y menmsi yo ka méprizé nou. Nou ka ba non Bondié-nou plis enpòwtans ki pwòp répitasion-nou. Annou kontinié gloriyé non’y menmsi Satan ka éséyé dékourajé nou. Si nou ka fè sa, nou ké montré non Jéova sé sa ki pli enpòwtan ba nou, menm manniè Jézi montré sa.
KANTIK 10 Annou gloriyé Jéova, Bondié-nou !
a Menm Jòb, ki té an nonm fidèl, pèd bonsans-li lè sé 3 konpè’y la sali répitasion’y. O dépa, lè i pèd tout yich-li épi tousa i té ni, i « pa péché é i pa janmen di ki Bondié fè an bagay ki mové » (Jòb 1:22 ; 2:10). Men lè yo akizé’y di fè mové bagay, sa fè’y di « pawòl anlè ». Prèmié bagay i chèché fè, sé défann répitasion’y pito ki ta Bondié (Jòb 6:3 ; 13:4, 5 ; 32:2 ; 34:5).