« Tchè-kontan pou moun ki ka montré-yo fidèl a san pou san »

1-2. a) Ki biten sèwten gouvènman fè ki montré kè yo té kont pèp a Bondyé é kijan sèwvitè a Bondyé ka réyaji ? b) Kijan on moun pé ni tchè-kontan menmsi yo ka pèwsékité-y ? (palé osi dè imaj-la ki anlè po a jounal-la).

ALÈLA, yo ka entèwdi aktivité an nou oben yo ka anpéché-nou adoré Bondyé kon nou vé adan plis ki 30 péyi. Yo jous mèt sèwten adan frè é sè an nou lajòl. Ès sé frè é sè lasa fè on mové biten ? Pou Jéova, yo pa fè ayen dè mal. Sèl biten yo fè, sé li Labib, étidyé-y, préché é pran réinyon a yo. Yo montré osi kè yo ka rèfizé mélanjé-yo adan zafè a politik. Magré yo ka jwenn bon pèwsékisyon, sé krétyen-lasa ka rété fidèl a san pou sanb. Ayen pa ka anpéché-yo rété fidèl a Jéova é sa ka fè tchè a yo kontan !

² Sèten ou ja ni lokazyon vwè foto a sèwten Témwen a Jéova ki ni onlo kouraj é sèten lè ou vwè jan yo té ka souri, ou rété èstèbèkwè. Yo ni tchè-kontan pas yo sav kè konm yo ka rété fidèl a Jéova a san pou san, sa ka fè-y plézi (1 Kron. 29:17a). Mi sa Jézi di : « Tchè-kontan pou moun yo ka pèwsékité pas yo ka fè sa ki jis [...]. Fò tchè a zòt kontan, fò-zòt kontan toubònman, pas zò ni on gwo rékonpans » (Mat. 5:10-12).

ÈGZANP A SÉ APÒT-LA

3. Dapré Akt 4:19, 20, kijan sé apòt-la réyaji lèwvwè yo pèwsékité-yo é poukwa yo réyaji konsa ?

³ Frè é sè an nou ka sibi menm difikilté ki sé difikilté-la sé apòt-la jwenn la davwa yo té ka palé dè Jézi. A plizyè rèpriz sé jij-la‘ba-yo lòd dè pa palé an non a Jézi ankò’. Sé jij-lasa té ka fè pawti a tribinal-la ki té pli enpòwtan la an tan a sé Juif-la (Akt 4:18 ; 5:27, 28, 40). Kijan sé apòt-la réyaji ? (li Akt 4:19, 20). Yo té sav kè té ni on moun ki pli ho ki sé jij-lasa é ‘ki té ba-yo lòd dè préché pou pèp-la é dè bay on témwagnaj konplé’ anrapò èvè Jézi (Akt 10:42). Alò Pyè é Jan, ki té ka palé an non a tout sé apòt-la, réponn sé boug-lasa èvè onlo kouraj é yo di kè yo té préféré obéyi Bondyé plito ki yo té obéyi-yo. Anplisdisa, yo di kè yo pa té ké arété palé dè Jézi. Sé konsi yo té ka mandé sé jij-lasa : « Ès zò ka pansé kè sa zò ka mandé-nou fè pi enpòwtan ki sa Bondyé ka mandé-nou fè ? »

4. Dapré Akt 5:27-29, ka sé apòt-la fè é kijan nou pé imité-yo ?

⁴ Sé apòt-la ban-nou on bèl ègzanp. Yo ‘kouté Bondyé olyé yo té kouté lézòm’ (li Akt 5:27-29). É jòdijou osi, sé vré krétyen la ka suiv ègzanp-lasa. Konm sé apòt-la té vé rété fidèl a Jéova a san pou san, yo ba-yo kou. Men lèwvwè yo kité tribinal-la, yo té « tou kontan pas Bondyé té touvé kè yo té alahotè pou pèd lonnè a yo akòz dè non [a Jézi] ». Yo woumèt-yo ka préché onfwamenm (Akt 5:40-42).

5. Nou bizwen ni répons a on kèsyon. Ki kèsyon ésa ?

⁵ Ègzanp-la sé apòt-la lésé ban-nou la, ka fè-nou pozé-nou on kèsyon ki enpòwtan toubònman. Pa ègzanp, nou vwè kè sé apòt-la désidé kouté Bondyé olyé yo té kouté lézòm é nou vwè osi kè Labib ka mandé-nou ‘soumèt-nou a sa ki ni otorité-la’ (Wom. 13:1). Alò nou pé mandé-nou : « Kijan nou pé fè sé 2 biten-lasa anmenmtan ? Kijan nou pé ‘obéyi a sé gouvènman-la é a sé otorité-la’ kon Pòl ankourajé-nou fè, toupannan nou ka rété fidèl a Jéova a san pou san é kè nou ka montré kè nou ka soutyenn dominasyon a-y ? » (Tit 3:1).

« SA KI NI OTORITÉ-LA »

6. a) An Women 13:1, yo ka palé dè « sa ki ni otorité-la ». Dè kimoun yo ka palé ojis é kijan pou nou aji èvè yo ? b) Ès moun ki ka gouvèné asi latè pé fè tousa yo vé ?

⁶ (Li Women 13:1.) Adan vèwsé-lasa, lè yo ka palé dè « sa ki ni otorité-la », yo ka palé dè moun asi latè ki ni on pouvwa si lézòt é ki ka dirijé-yo. Fò sé krétyen-la soumèt-yo a sé otorité-lasa. Poukwa ? Pas sé yo ki ka fè ansòt pou pa ni dézòd an péyi-la, sé yo ki ka fè sé moun-la rèspèkté sé lwa-la an péyi-la é dépawfwa, yo jous ka défann sèwvitè a Jéova (Rév. 12:16). Sé pousa Labib ka ban-nou lòd dè ba-yo enpo-la, sé taks-la, krent-la é lonnè-la yo ka mandé la (Wom. 13:7). Men otorité-la sé moun-lasa ni, yo ni-y yenki paskè Jéova ka pèwmèt-yo ni-y. Dayè, Jézi montré sa on mannyè ki klè lèwvwè Pons Pilat, gouvènè women la, té ka pozé-y déotwa kèsyon. Lè Pilat di Jézi konsa kè i ni pouvwa asi vi a-y oben asi mò a-y, mi sa Jézi réponn-li : « Ou pa té’é ni pon pouvwa asi mwen si a pa té Bondyé-la ki an syèl-la ki té ba-w li » (Jan 19:11). Menmjan ki Pilat, jòdijou pouvwa-la sé moun-la ki ka dirijé la é sé moun-la ki ka fè politik la ni la pa ka pèwmèt-yo fè tout biten.

7. a) A ki moman nou pa ka obéyi moun ki ka dirijé asi latè ? b) Fò moun ki ka dirijé asi latè sonjé on biten. Ki biten ésa ?

⁷ Dépi lwa a péyi-la nou ka rété adan-y la annakò èvè lwa a Bondyé, nou ka rèspèkté-yo. Men lèwvwè yo ka mandé-nou fè on biten kè Bondyé ka kondanné oben lèwvwè yo ka anpéché-nou fè on biten kè Bondyé ka mandé-nou fè, nou pa ka obéyi-yo. Pa ègzanp, ni onlo gouvènman, ki ka mandé sé jenn gason-la fè lawméc. Ni sa osi ki vé anpéché-nou tradui Bib-la é piblikasyon an nou é yo vé anpéché-nou préché é réini-nou. Lèwvwè sé moun-la ki ka dirijé la ka mal sèvi èvè pouvwa-la yo ni la é kè yo ka pèwsékité-nou pa ègzanp, nou pé sèten kè Bondyé pé’é pran sa é kè yo ké ni kont a rann-li. An réyalité, Bondyé ka véyé jès a yo (Ékl. 5:8).

8. Ki diférans ki ni ant Jéova é sé otorité-la é poukwa sa enpòwtan kè nou sav sa ?

⁸ Sé gouvènman-la ni onlo pouvwa men a pa yo ki ni otorité-la ki pli ho la. Sé Jéova ki ni otorité-lasa. Dayè, adan Labib, yo ka di a plizyè rèpriz kè i sé « Sila ki Pli Ho la » (Dan. 7:18, 22, 25, 27).

« SILA KI PLI HO LA »

9. Ka pwofèt Danyèl vwè adan on vizyon ?

⁹ Adan on vizyon, pwofèt Danyèl vwè on mannyè ki klè kè Jéova ni lontan plis pouvwa ki tout sélézòt otorité-la. Odépa, i vwè 4 gwo manman bèt é sé 4 bèt-lasa ka rèprézanté déotwa puisans mondyal ki ègzisté an tan lontan : Babilòn, Wayòm a sé Mèd-la é sé Pèws-la, Lagrès é Wòm. É i vwè osi puisans mondyal la ki ka dirijé jòdijou, kivédi i vwè alyans-la Lamérik é Langlètè ka fòwmé la (Dan. 7:1-3, 17). Aprésa, i vwè Jéova ki té sizé asi twòn a-y adan tribinal-la ki té an syèl-la (Dan. 7:9, 10). Sa pwofèt-la vwè aprésa, sé on bèl avèwtisman pou moun ki ka dirijé si latè konnyéla la.

10. Dapré Danyèl 7:13, 14, 27, Jéova ka ba dòt moun gouvèné asi latè, kimoun ésa é ka sa ka aprann-nou asi-y ?

¹⁰ (Li Danyèl 7:13, 14, 27.) Pouvwa-la sé gouvènman-la ni la Jéova ka pran-y an men a yo pou ba dòt moun li. Sé moun-lasa mérité ni pouvwa-la Jéova ka ba-yo la plis ki sé gouvènman-la é yo pli puisan ki sé gouvènman-la ki ka dirijé la. Men kimoun Jéova ka bay pouvwa-lasa ? I ka ba on moun « ki té ka sanm gason a lòm » li kivédi Jézikris, é i ka ba « sé moun-la ki sen la é ki ka sèvi Sila ki Pli Ho la » li osi kivédi sé 144 000 la é yo ké gouvèné « pou touttan » (Dan. 7:18). Konm Jéova sé « Sila ki Pli Ho la », sé li tousèl ki pé aji konsa.

11. Ka Danyèl ka di ankò ki ka montré kè Jéova ni plis pouvwa ki tout sé nasyon-la ?

¹¹ Sa Danyèl ka vwè adan vizyon-lasa annakò èvè sa i té di tibwen avan. I té di kè Bondyé-la ki an syèl-la ka woté wa é ka mèt wa anplas é i té di osi « kè Sila ki Pli Ho la ka dominé adan wayòm a lézòm, é kè i ka ba moun i vlé li » (Dan. 2:19-21 ; 4:17). Ès Jéova ja woté wa ki té anplas oben ès i ja mèt wa anplas ? Wi !

12. An tan lontan, Jéova ni lokazyon woté otorité a plizyè wa an men a yo. Bay on ègzanp ki ka montré sa (gadé imaj-la).

¹² An tan a Labib Jéova montré kè kèlkèswa sé otorité-la ki té anplas la, ponyonn adan yo pa té ni plis pouvwa ki-y. An-nou vwè 3 ègzanp. An Éjipt, Faraon té fè sé Ébré-la vin èsklav é a plizyè rèpriz i rèfizé lésé-yo pati. Men Jéova libéré-yo é i néyé Faraon adan lanmè Wouj la (Ègz. 14:26-28 ; Sòm 136:15). On jou pannan on fèt, Baltaza, wa a Babilòn « lévé kont Ségnè-la ki an syèl-la » é i ba « dyé ki fèt an awjan é an lò » louwanj olyé i ba Jéova glwa (Dan. 5:22, 23). Men Bondyé fè misyé-lasa ki té plen òwgèy vin toupiti. Lannuit-lasa Bondyé fè-yo tchouyé Baltaza é i ba sé Mèd-la é sé Pèws-la wayòm-la (Dan. 5:28, 30, 31). Éwòd Agripa 1^é ki té wa a la Palèstin fè-yo tchouyé lapòt Jak é i té ni lentansyon fè-yo fè menm biten èvè lapòt Pyè. Men Jéova anpéché-y fè sa. Jéova voyé zanj a-y pou tchouyé-y (Akt 12:1-5, 21-23).

13. Plizyè moun ki té ka dirijé mèt-yo ansanm pou goumé èvè Izrayèl men Jéova fè-yo pèd konba. Bay on ègzanp.

¹³ Anplisdisa, Jéova montré kè menm lèwvwè plizyè nasyon ka mèt-yo ansanm pou goumé èvè pèp a-y, i pli fò ki yo. Pa ègzanp, Jéova goumé pou sé Izraélit-la, i pèwmèt-yo gangné 31 wa a Kanaan ki té mèt-yo ansanm pou goumé èvè pèp a-y é i pèwmèt pèp a-y pran sé gran téritwa-la i té ba-yo la adan péyi-la i té pwomèt-yo la (Joz. 11:4-6, 20 ; 12:1, 7, 24). Anplisdisa, lèwvwè wa Bènadad é 32 moun-Siri ki té ka dirijé vin goumé èvè Izrayèl, Jéova ba-yo on bèl plich é i fè-yo pèd konba (1 Wa 20:1, 26-29).

14-15. a) Ka wa Nabikodonozò é wa Dariyis rèkonnèt anrapò èvè dominasyon a Jéova ? b) Ka yonn adan sé moun-la ki maké sé sòm-la di anrapò èvè Jéova é pèp a-y ?

¹⁴ A plizyè rèpriz, Jéova montré kè sé-y ki sé Sila ki Pli Ho-la ! Lèwvwè Nabikodonozò, wa a Babilòn, mété-y ka bat lèstonmak a-y parapòt a ‘fòs a-y, puisans a-y, glwa a-y é grandè a-y’ olyé i té montré-y toupiti é kè i té rèkonnèt kè sé Bondyé tousèl ki mérité kè yo adoré-y, Jéova fè-y pèd tèt a-y. Lèwvwè Nabikodonozò géri, i « louwé Sila ki Pli Ho la » é i rèkonnèt kè « dominasyon a [Jéova] sé on dominasyon ki étèwnèl ». I di osi : « Pa ni ponmoun ki pé anpéché-y aji » (Dan. 4:30, 33-35). Apré yo té mèt fidélité a Danyèl a léprèv lèwvwè yo té jété-y adan tou a liyon la é kè Jéova té pwotéjé-y, mi sa wa Dariyis di : « Fò-zòt ké trapé latranblad douvan Bondyé a Danyèl. Pas sé Bondyé-la ki vivan la é i ka viv pou touttan. Wayòm a-y pé ké jan détwi é dominasyon a-y ké diré pou touttan » (Dan. 6:7-10, 19-22, 26, 27).

¹⁵ Yonn adan sé moun-la ki maké sé sòm-la di : « Jéova mèt men a-y pou konplo a sé nasyon-la pa maché ; i fè pwojé a sé pèp-la échwé. » I di osi : « Tchè-kontan pou nasyon-la ki ni Jéova konm Bondyé, pèp-la i chwazi la pou i vin ta-y » (Sòm 33:10, 12). Ès sa pa’a ban-nou on bon rézon pou nou rété fidèl a san pou san ?

DÈNYÉ LAGÈ-LA

16. Dè kibiten nou pé sèten é poukwa ? (gadé imaj-la).

¹⁶ Nou palé dè sa Jéova fè an tan lontan. Men ka ki kay pasé adan on ti moman ? Nou pé sèten kè pannan « gwo tribilasyon-la », Jéova ké sové sèwvitè a-y ki fidèl (Mat. 24:21 ; Dan. 12:1). Lèwvwè tout sé nasyon-la ké mèt-yo ansanm, pou fòwmé sa yo ka kriyé Gòg dè Magòg, é kè yo ké ataké pèp a Bondyé, Jéova ké pwotéjé pèp a-y. Menmsi sé 193 péyi-la ki ka fè pawti a Lénasyonzini té ka mèt-yo ansanm, yo pé’é pé fè ayen douvan Pli Ho la é douvan lawmé a sé zanj-la ki an syèl-la. Mi sa Jéova pwomèt : « Asiré pa pétèt, an ké fè ansòt mwen vin pli gran ankò an zyé a onlo nasyon, an ké fè-yo vwè kè an sen é an ké fè-yo konnèt-mwen. Wi, yo ké sav kè an sé Jéova » (Ézék. 38:14-16, 23 ; Sòm 46:10).

17. Dapré Labib, ka ki kay rivé wa a tout latè é ka ki kay rivé moun ki ka montré kè yo fidèl a san pou san ?

¹⁷ Lèwvwè Gòg ké ataké pèp a Bondyé, Jéova ké mèt an wout asi-y é sé ké dènyé lagè-la yo ka kriyé Awmagédon. Pannan lagé-lasa, Jéova kay montré puisans a-y é i kay détwi « sé wa-la ki asi tout latè » (Rév. 16:14, 16 ; 19:19-21). Apawtiw dè péryòd-lasa, « sé enki moun ki ka fè sa ki dwèt ki ké rété asi latè, é sé enki moun ki fidèl a san pou san ki ké rété anlè-y » (Pwov. 2:21).

FÒ-NOU RÉTÉ FIDÈL A SAN POU SAN

18. Ka onlo vré krétyen té paré a fè é poukwa ? (Danyèl 3:28).

¹⁸ Pannan plizyè syèk, ni onlo vré krétyen ki té paré a pèd libèté-la yo té ni la é yo té jous paré a pèd vi a yo pas yo té enmé Jéova é pas pou yo sé-y ki té Gran Mèt a yo. Sé misyé-lasa é sé madanm-lasa montré kè yo té byen désidé a rété fidèl a Jéova. Yo fè menm biten ki sé 3 Ébré-la ki rété fidèl a Sila ki Pli Ho la é lèwgadé i sové-yo adan on fouw ki té plen difé (li Danyèl 3:28).

19. Asi ki biten Jéova ké bazé-y pou jijé sèwvitè a-y, é ka pou nou fè alò ?

¹⁹ David palé dè jan sa enpòwtan kè nou montré-nou fidèl a san pou san. Dayè, mi sa i ékri : « Jéova ké anonsé ki jijman i ka ba sé pèp-la. Jijé-mwen, o Jéova, pas an fè sa ki dwèt é pas an rété fidèl a-w a san pou san » (Sòm 7:8). É mi sa i di ankò : « Fè ansòt pou fidélité an mwen é jistis an mwen pwotéjé-mwen » (Sòm 25:21). Nou ké ni méyè vi ki tini si nou ka rété fidèl a Jéova a san pou san kèlkèswa sa ki ka rivé-nou. Nou ké rèsanti menm biten ki boug-la ki maké adan on sòm : « Tchè-kontan pou moun ki ka montré-yo fidèl a san pou san, pou moun ki ka suiv lwa a Jéova » (Sòm 119:1).