LÉSON 4

Préparé lèspri moun-yan pou yé byen konprann vèrsé-ya

Matthieu 22:41-45

SA TO DIVÈT FÈ : Anvan to li roun vèrsé, asiré to kò ki moun-an ké pouvé byen konprann sa vèrsé-a.

A pou to savé poukisa to ka li sa vèrsé-a. A pou to fè moun-yan konprann lidé ki pi enpòrtan-an anvan menm to li roun vèrsé.

Si to lé bay plis détay asou sa vèrsé-a, parèkzanp, kimoun ki ékri sa liv-a ouben kimoun ki di sa palò-ya, a pou to sir ki sa to ké di-a vré.
Montré ki a Labib-a ki ka palé. Lò to ka palé ké moun ki ka krè annan Bondjé, byen fè yé konprann ki Labib-a, a « Palò Bondjé » ki sa pi bon chimen-an pou trapé sajès.
Bay moun-yan anvi kouté vèrsé-a. Pozé roun késyon koté to ké jwenn répons-a annan vèrsé-a. Palé di roun problèm, épi montré kouman vèrsé-a ka idé ranjé sa problèm-an. Ouben, palé di roun prensip, épi montré roun istwè annan Labib-a ki ka èspliké sa.

Sonjé sa moun-yan ja konnèt asou vèrsé-a é sa yé ja konnèt asou lidé to lé palé-a. Lò to ka byen préparé lèspri moun-yan pou yé kouté vèrsé-a, menmsi yé byen konnèt sa vèrsé-a, a pou to bay yé anvi kouté épi idé yé wè vèrsé-a rounòt fason.