LÉSON 6

Èspliké poukisa to li vèrsé-a

Jean 10:33-36

SA TO DIVÈT FÈ : A pa yenki li vèrsé-a épi palé di rounòt bagaj. Asiré to kò ki moun-yan ka byen konprann ki vèrsé-a k’alé ké sa to ka èspliké-a.

Mété mo-ya ki pi enpòrtan douvan. Lò to fin li roun vèrsé, palé di mo-ya ki ka apiyé lidé ki pi enpòrtan-an. To pouvé fè sa lò to ka répété sa mo-ya, ouben lò to ka pozé roun késyon ki ka idé moun-yan wè ki mo ki pi enpòrtan.

Si to ka répété lidé ki annan vèrsé-a, menmsi to ka itilizé ròt palò, fè di roun fason ki moun-yan wè ki lidé ki pi enpòrtan-an k’alé ké sa to li annan Labib-a.
Palé di sa to lé moun-yan tchenbé. Montré ki palò ki annan vèrsé-a k’alé ké sa to té ka èspliké anvan to li sa vèrsé-a.

Lò to ka èspliké roun vèrsé to fin li, pa fronmen to Labib. Sa ké idé moun-yan wè ki sa to ka di-a, ka alé annan sans vèrsé-a.
Èspliké bagaj-ya di roun fason ki senp. Pa arété asou bagaj ki pa gen enpòrtans é ki pa k’alé annan sans lidé-a ki pi enpòrtan. Soulon sa moun-yan ja konnèt, a to ki ké divèt savé di ki kantité bagaj to ké palé ké yé, pou yé byen konprann sa to lé di-a.