LÉSON 7

Bay enfòrmasyon ki vré

Luc 1:3

SA TO DIVÈT FÈ : Sèrvi enfòrmasyon ki vré lò to ka idé moun-yan byen konprann sa to lé di.

Pa pran to enfòrmasyon nenpòrt ki koté. Sa to ka di divèt vini di Palò Bondjé-a, é dipi to pouvé, li dirèktéman sa ki marké annan Labib-a. Lò to ka palé di roun bagaj asou lasyans, roun bagaj ki rivé, roun istwè, ouben to ka bay ròt enfòrmasyon, a pou to byen vérifyé ki sa to ka di-a vré jòdla toujou.
Byen sèrvi enfòrmasyon to trapé. Èspliké vèrsé-ya soulon sa ròt vèrsé annan Labib-a ka di, épi dapré piblikasyon « èsklav fidèl ké avizé-a » (Mat. 24:45). Lò to ka sèrvi roun enfòrmasyon to pran rounòt koté ki Labib-a ouben annan nou piblikasyon, pa chanjé sa moun-an té lé di.

Pa di plis ki sa ki vréman pasé, épi pa chanjé chif-ya. Panga ! Pa di « près tout moun » pasé to di « roun ran moun », ouben « toujou » pasé to di « détan ».
Sèrvi sa enfòrmasyon-yan pou fè moun-yan byen réfléchi. Lò to fin li roun vèrsé annan Labib-a, ouben lò to fin palé di roun enfòrmasyon to trapé, pozé késyon ki plen ké rèspè ; ouben bay roun èkzanp pou idé moun-yan konprann sa to lé fè yé konprann.