Kouman to pouvé rété fidèl ké Jéova lò yé ka fè to soufri ?

1-2. Kimoun ki pouvé fè nou soufri ?

ROUN jou, Jézi pran èkzanp roun vèv ki pa té ka las doumandé roun jij idé li paské roun moun té fè l’ méchansté. So disip té pouvé konprann sa èkzanp-a paské annan sa lépòk-a, roun patché moun té ka fè ròt-ya wè mizè (Luc 18:1-5). É nou menm osi nou pouvé konprann sa èkzanp-a paské nou tout ja wè mizè akoz di roun moun.

² Jòdla, toupatou asou latè, roun patché moun ka pézé moun ké wéy, yé pa janti é yé voras. Donk, lò sa kalité moun-yan ka fè nou wè mizè, sa pa ka étoné nou (Eccl. 5:8). Parkont, lò a roun frè ouben roun sò ki pa janti ké nou, a pa menm bagaj-a. Nou pa ka pansé ki yé pouvé fè nou sa. Pourtan, a bagaj ki pouvé rivé. A pa lé nou frè ké sò-ya lé fè nou soufri. Problèm-an, a ki yé pa parfè. Fason Jézi réyaji lò so lèlmi fè l’ soufri ké anprann nou roun patché bagaj. Si nou ka rivé pran pasyans ké nou lèlmi, a pa ké nou frè ké sò-ya nou pa divèt pran pasyans ! Mé kisa Jéova ka rousanti lò yé ka fè nou soufri, ki a ofon ki a dèrò asanblé-a ? Ès i mélé ké sa ?

3. Ès Jéova ka wè lò moun ka fè nou wè mizè, é kouman nou savé sa ?

³ Jéova lé moun janti ké nou é i ka wè lò yé ka fè nou wè mizè. I « kontan lajistis » (Ps. 37:28). Jézi ka di nou ki nou pouvé sir ki lò moman-an ké rivé, so Papa « ké fè jistis fèt ké ti kouri » (Luc 18:7, 8). É titalò Jéova ké tiré tousa ki ka fè nou soufri é i pa ké pèrmèt pyès moun fè nou wè mizè ankò (Ps. 72:1, 2).

4. Kouman Jéova ka idé nou tchenbé lò ròt-ya ka fè nou wè mizè ?

⁴ Toupannan nou ka antann Jéova réglé tout problèm, i ka idé nou lò ròt-ya ka fè nou wè mizè (2 Pierre 3:13). Parèkzanp, i ka anprann nou kouman pou nou réyaji pou nou pa trapé plis problèm. Grasa so Pitit ki bay roun èkzanp ki parfè, i ka montré nou sa nou pouvé fè pou nou tchenbé lò ròt-ya ka fè nou wè mizè. I ka bay nou osi plizyèr konsèy pou nou swiv annan sa sitiasyon-an.

PANGA FASON TO KA RÉYAJI LÒ MOUN KA FÈ TO SOUFRI

5. Poukisa nou divèt panga fason nou ka réyaji lò moun ka fè nou ouben ròt-ya méchansté ?

⁵ Sa rèd lò moun ka fè nou ouben ròt-ya méchansté. Nou pa ka sipòrté sa é sa ka fè nou lapenn menm (Eccl. 7:7). A sa moun ki té gen lafwa, kou Jòb ké Abakouk, rousanti (Job 6:2, 3 ; Hab. 1:1-3). Menmsi sa nòrmal ki nou rousanti sa kalité bagaj-ya, a pou nou panga fason nou ka réyaji pou nou pa fè pyès mové bagaj.

6. Kisa èkzanp Absalon ka anprann nou ? (gadé zimaj-a osi).

⁶ Lò roun moun ka fè nou wè mizè ouben ka fè roun moun nou kontan wè mizè, nou pouvé anvi vanjé nou kò ouben vanjé moun-an. Mé si nou ka fè sa, nou ka riské trapé plis problèm. Annou réfléchi asou sa ki rivé Absalon, pitit rwa David. A pa ti kòlè i té kòlè paské so dimi frè Amnòn té vyolé so sò Tamar. Dapré Lalwa Moyiz, Amnòn té divèt mouri pou sa (Lév. 20:17). Donk, menmsi Absalon té gen rézon kòlè, i pa té gen drwa vanjé so sò li menm (2 Sam. 13:20-23, 28, 29).

7. Kouman roun sèrvitèr Jéova réyaji pannan roun tan lò i wè moun té ka fè méchansté ?

⁷ Lò nou ka wè moun ka fè méchansté san anyen pa rivé yé, nou pouvé koumansé krè ki sa pa ka sèrvi anyen ki nou kontinyé fè éfòr pou fè sa ki bon. A sa ki rivé roun sèrvitèr Jéova. I té ka wè méchan-yan fè moun ki té bon méchansté, mé a kousidiré tout bagaj té k’alé byen pou yé kanmenm. I di : « A konsa méchan-yan fika, yé lavi toujou dous » (Ps. 73:12). Afòrs sa té ka troumanté l’, i koumansé krè ki a pa té lapenn i kontinyé adoré Jéova. I di : « Lò mo té ka éséyé konprann sa, sa té ka troumanté mo » (Ps. 73:14, 16). I jis di : « Mo manké pran roun mové chimen ; mo manké chibré » (Ps. 73:2). A roun bagaj konsa ki rivé roun frè nou ké aplé Alberto.

8. Kouman roun frè réyaji pas yé fè l’ méchansté ?

⁸ Yé akizé Alberto, yé di ki i té vòlò soumaké asanblé-a. Mé sa pa té vré. Akoz di sa, i pédi tout rèsponsabilité i té gen é sa-ya ki té tandé palé di sa ki té rivé pa té ka rèspèkté l’ ankò. I ka di : « A pa ti yèg mo té yèg é mo té kòlè. » I té tèlman faché ki i arété alé annan réinyon-yan é i jis arété préché pannan senk lannen. Sa èkzanp-a ka montré nou sa ki pouvé rivé nou si nou pa ka kontrolé nou kò lò nou kòlè pas yé fè nou méchansté.

IMITÉ FASON JÉZI RÉYAJI LÒ YÉ FÈ L’ SOUFRI

9. Ki mové bagaj Jézi sipòrté ? (gadé zimaj-a osi).

⁹ Jézi montré nou pi bon fason pou nou réyaji lò moun ka fè nou wè mizè. Roun patché moun fè l’ méchansté, menm so fanmi té annan sa. Yé di ki i té vin fou ; chèf rélijyé-ya di ki i té ka travay ké démon-yan ; é plizyèr sòlda romen ari di so tèt, fè l’ patché méchansté épi tchwé l’ (Marc 3:21, 22 ; 14:55 ; 15:16-20, 35-37). Pourtan, i sipòrté tout sa kalité mové bagaj-ya san i pa janmen vanjé so kò. Kisa so èkzanp pouvé anprann nou ?

10. Kouman Jézi réyaji lò yé té ka fè l’ méchansté ? (1 Pierre 2:21-23).

¹⁰ (Li 1 Pierre 2:21-23a.) Jézi ka bay nou roun èkzanp ki parfè. I té savé kitan i té divèt fronmen so bouch épi kitan i té divèt palé (Mat. 26:62-64). Détan, lò moun té ka manti asou li, i té ka désidé pa di anyen (Mat. 11:19). Lò i té ka désidé palé, i pa té ka jouré sa-ya ki té ka pèrsékité l’ é i pa té ka ménasé yé. I té ka rivé kontrolé so kò pas « i té ka lésé tout bagaj annan lanmen Sa-la ki ka jijé ké jistis ». Sa ki té pi enpòrtan pou li, a ki Jéova té ka wè sa ki té ka pasé. I té sir ki Bondjé té ké ranjé tout bagaj o bon moman.

11. Bay plizyèr fason nou pouvé panga sa nou ka di ? (gadé zimaj-a osi).

¹¹ Lò yé ka fè nou wè mizè, annou imité Jézi, annou panga sa nou ka di. I gen sèrten bagaj moun pouvé fè nou ki pa tèlman grav, donk pitèt nou pouvé lésé sa tonbé. Anplis di sa, si nou pa ka di anyen, nou pa ké di bagaj ki pouvé fè sitiasyon-an vin pi mové (Eccl. 3:7 ; Jacq. 1:19, 20). Détan, nou ké divèt di roun bagaj pou défann roun moun yé ka fè soufri ouben pou défann sa nou ka krè (Actes 6:1, 2). É si nou ka désidé palé, nou ké fè atansyon pou nou rété kalm é pou nou rèspèkté moun-an (1 Pierre 3:15)b.

12. Kouman nou pouvé lésé tout bagaj annan lanmen « Sa-la ki ka jijé ké jistis » ?

¹² Nou pouvé imité Jézi osi lò nou ka lésé tout bagaj annan lanmen « Sa-la ki ka jijé ké jistis ». Lò moun pa janti ké nou ouben ka fè nou wè mizè, nou sir ki Jéova ka wè l’. É sa ka idé nou tchenbé paské nou savé ki Jéova ké ranjé tout bagaj. Si nou ka lésé tout bagaj annan lanmen Jéova, nou pa ké kòlè ouben nou pa ké tchenbé pyès moun asou nou tchò. Si nou pa ka fè sa, nou ka riské fè roun mové bagaj, pédi nou lajwa épi gaté nou lanmityé ké Jéova (Ps. 37:8).

13. Kisa ki pouvé idé nou kontinyé tchenbé lò moun ka fè nou méchansté ?

¹³ Nou pa pouvé imité Jézi roun fason ki parfè. Détan, nou ka di ouben nou ka fè bagaj nou ka rigrété apré (Jacq. 3:2). Anplis di sa, sèrten bagaj ki rivé nou ka fè nou soufri pannan tout nou lavi. Si a sa ka rivé to, a pou to sir ki Jéova ka wè sa ki ka rivé to. Épi Jézi ki soufri li menm osi pouvé konprann sa to ka rousanti (Héb. 4:15, 16). Anplis di èkzanp Jézi, Jéova ka bay nou plizyèr konsèy pou idé nou lò yé ka fè nou wè mizè. Annou wè dé vèrsé annan lèt Pòl ékri pou Romen-yan.

« LÉSÉ KÒLÈ BONDJÉ AJI »

14. Kisa sa lé di « lésé kòlè Bondjé aji » ? (Romains 12:19).

¹⁴ (Li Romains 12:19.) Annan sa vèrsé-a, ès to wè ki kòlè nou divèt lésé aji ? A « kòlè Bondjé ». Lò nou ka lésé kòlè Jéova aji, nou ka lésé li fè jistis fèt lò i lé é kou i lé. John, roun frè yé fè méchansté ka di : « Mo té divèt tchenbé pou mo pa vanjé mo kò mo menm. Romains 12:19 idé mo pran pasyans épi fè Jéova konfyans. »

15. Poukisa sa miyò ki nou lésé Jéova ranjé problèm-yan pou nou ?

¹⁵ Nou ké jwenn roun patché bénédiksyon si nou ka antann Jéova ranjé tout bagaj pou nou. Si nou pa ka éséyé ranjé problèm-an nou menm nou pa ké trapé pyès désèpsyon ni pyès angwas. Anplis di sa, Jéova ka propozé nou idé nou. A kousidiré i té ka di nou : « Bay mo sa problèm-an, mo ké jéré sa pou to ». Si nou ka krè li lò i ka promèt nou « A mo ki ké randé », nou ké lésé tout bagaj annan so lanmen paské nou sir ki i ké jéré bagaj-a pi byen pasé pyès moun. A sa ki idé John nou palé talò-a. I ka di : « Si mo ka lésé Jéova réglé problèm-an, sa ké lontan miyò pasé sa mo menm mo té ké pouvé fè. »

« GANYEN ASOU SA KI MOVÉ GRASA BON BAGAJ TO KA FÈ »

16-17. Kouman lapriyè pouvé idé nou ‘kontinyé ganyen asou sa ki mové grasa bon bagaj nou ka fè’ ? (Romains 12:21).

¹⁶ (Li Romains 12:21.) Pòl ankourajé krétyen-yan ‘kontinyé ganyen asou sa ki mové grasa bon bagaj yé té ka fè’. Annan Diskour-a i fè asou montangn-an, Jézi di : « A pou zòt kontan zòt lèlmi é a pou zòt priyè pou sa-ya ki ka pèrsékité zòt » (Mat. 5:44). A sa i fè li menm. Menmsi nou ja réfléchi asou kouman i soufri lò sòlda romen-yan klouwé l’ asou poto-a, nou pa ké janmen pouvé imajiné kouman sa té rèd.

¹⁷ Mé i kontinyé kontan Jéova, i rété fidèl menmsi i soufri bokou. Pasé i modi sa sòlda-ya, i priyè Bondjé. I di : « Papa, pardonnen yé, paské yé pa savé sa yé ka fè » (Luc 23:34). Si nou ka priyè pou sa-ya ki ka fè nou méchansté, sa pouvé idé nou rété kalm épi pa rété kòlè é pitèt menm nou ké chanjé fason nou ka wè yé.

18. Kouman lapriyè idé Alberto ké John sipòrté sa rot-ya té fè yé ?

¹⁸ Lapriyè idé frè-ya nou palé annan sa artik-a sipòrté sa ròt-ya fè yé. Men sa Alberto ka di : « Mo priyè pou frè-ya ki fè mo méchansté. Plizyèr fwa mo doumandé Jéova idé mo pa rété faché akoz di sa ki té rivé mo. » Érèzman, Alberto roukoumansé adoré Jéova é i fidèl. John li menm ka di : « Souvan, mo priyè pou frè-a ki té fè mo méchansté. Sa idé mo pa rété faché ké li épi arété jijé li. Mé sa idé mo gen lapè annan mo tchò osi. »

19. Kisa nou divèt fè toupannan nou ka antann lafen sa monn-an ? (1 Pierre 3:8, 9).

¹⁹ Nou pa savé ki mové bagaj nou ké gen pou sipòrté anvan lafen sa monn-an. Mé kèlkéswa sa ki pouvé rivé nou, annou pa janmen arété doumandé Jéova idé nou. Anplis di sa, annou imité fason Jézi réyaji lò yé té ka fè l’ méchansté é annou swiv prensip-ya ki annan Labib. Nou pouvé sir ki si nou ka fè sa, Jéova ké béni nou (li 1 Pierre 3:8, 9).