Kisa to pouvé fè pou to tchò kontan toupannan laj ka antré ?

1-2. Kouman Jéova ka wè so sèrvitèr-ya ki ja granmoun ? (Psaume 92:12-14 ; gadé zimaj-a osi).

A PA tout moun ka réyaji menm fason-an lò yé ka wè ki yé ka vin vyé. Ès to ka sonjé jou to wè ki to té gen roun chivé blan ? Pitèt to té lé raché l’ pou pyès moun pa wè l’, mé to konprann ki menmsi to té ka raché to chivé blan, yé té ké pousé kanmenm. Sa èkzanp-a ka montré ki sa rèd pou roun patché moun asèpté ki yé ka vin vyé.

² Kouman nou Papa ki annan syèl-a ka wè so sèrvitèr-ya ki ja granmoun ? (Prov. 16:31). I ka di ki yé kou bèl pyébwa (li Psaume 92:12-14). Poukisa i ka di sa ? Paské souvan pyébwa-ya ki vyé ka fè bokou féy ouben flèr ki ka santi bon. I gen roun pyébwa ki bèl toubonnman : Cerisier du Japon-an. Sèrten annan sa pyébwa-ya pi vyé pasé 1 000 lannen é yé bèl toubonnman. Kou sa pyébwa-ya ki bèl toubonnman, sèrvitèr Bondjé-ya ki fidèl é ki gen yé ti laj bèl : yé gen valò pou li ! Jéova ka wè bèl kalité yé gen. Yé adoré l’ pannan roun patché lannen é yé rété fidèl ké li, ki lò tout bagaj té k’alé byen, ki lò bagaj-ya té rèd.

3. Bay roun èkzanp ka montré ki Jéova ka sèrvi moun ki ja gen yé bon laj pou fè so travay.

³ A pa paské roun moun ka pran laj ki i pa gen valò pou Jéova ankòa. Souvan, Jéova ka sèrvi moun ki ja gen yé bon laj pou fè so travay. Parèkzanp, Sara té ja byen vyé lò Jéova di li ki i té ké fè roun timoun é ki sa timoun-an té ké bay roun gran nasyon, é ki a di sa nasyon-an Mési-a té ké soti (Gen. 17:15-19). Moyiz li menm osi té vyé lò Jéova doumandé li fè Israyélit-ya soti an Éjip (Ex. 7:6, 7). É apot Jan té vyé lò Jéova bay li so lèspri sen pou i ékri senk liv annan Labib.

4. Dapré Proverbes 15:15, kisa ki pouvé idé sa-ya ki ka pran laj tchenbé magré tout problèm yé ka jwenn ? (gadé zimaj-a osi).

⁴ Sa-ya ka vin vyé ka jwenn roun patché problèm. Men sa roun sò di pou ari : « Lavyéyès, a pa pou moun ki fèb. » Mé si sa-ya ki ka pran laj ka fè tousa yé pouvé pou yé tchò kontanb, sa ké idé yé tchenbé magré tout problèm yé ka jwenn (li Proverbes 15:15). Annan sa artik-a, nou ké wè sa yé pouvé fè pou yé tchò toujou kontan. Nou ké wè osi sa frè ké sò-ya annan asanblé-a pouvé fè pou idé yé. Mé pou koumansé, annou wè kisa ki pouvé dékourajé nou lò nou ka vin vyé.

SA KI POUVÉ DÉKOURAJÉ TO LÒ TO KA PRAN LAJ

5. Kisa ki pouvé dékourajé frè ké sò-ya ki ja granmoun ?

⁵ Si to sa roun granmoun, kisa ki pouvé dékourajé to ? Pitèt to dékourajé pas to pa ka rivé fè sa to té ka fè anvan. To ka sonjé ki lò to té pi jenn, to té gen roun pi bon lasanté é sa ka fè to lapenn (Eccl. 7:10). Roun sò yé ka aplé Ruby ka èspliké : « Sa rèd pou mo abiyé pas tout mo kò ka fè mo mal é mo zo rèd. Menm pou mété mo chosèt, a tout roun traka. Kou mo lanmen ka fè mo mal, mo pa ka rivé byen sèrvi mo dwèt, é akoz di sa, tout bagaj rèd pou fè. » É Harold, ki travay annan Bétèl-a, ka di : « Détan, mo faché paské mo pa pouvé fè tousa mo té kontan fè anvan. Mo té gen labitid fè bokou èspòr. A baseball mo té pi kontan. Souvan, lò nou té ka jwé, ròt-ya té ka di : “Bay Harold balon-an pas i toujou ka marké !” Mé aprézan, mo krè mo pa menm ké rivé lansé balon-an ankò. »

6. a) Ki ròt bagaj pouvé dékourajé frè ké sò-ya ki ja granmoun ? b) Kisa ki pouvé idé roun granmoun désidé si i divèt arété kondwi ? (gadé artik-a : « Ès mo divèt arété kondwi ? », annan sa menm Tourdégard-a).

⁶ Pitèt to dékourajé osi pas kou i gen sèrten bagaj to pa ka rivé fè ankò, a roun moun ki divèt fè yé pou to. Parèkzanp, pitèt to bézwen roun moun vini annan to kaz pou idé to ouben to blijé rété koté to pitit. Ouben pitèt kou to malad ouben to pa ka wè ankò, to pa pouvé ni soti kou to lé ni kondwi roun loto. Sa pouvé fè to lapenn bokou. Mé pa bliyé ki a pa paské to pa pouvé fè tousa to té ka fè anvan ki to pa gen valò pou Jéova ké pou ròt-ya. Anplis di sa, to pouvé sir ki Jéova ka konprann sa to ka rousanti. I savé ki to kontan li ké to frè ké sò-ya bokou é a sa ki pi enpòrtan pou li (1 Sam. 16:7).

7. Si roun moun tris pas i pè mouri anvan Armagédon rivé, kisa ki pouvé idé l’ ?

⁷ Pitèt to tris paské to pè mouri anvan Armagédon rivé. Si a sa, kisa ki pouvé idé to ? Sonjé ki Jéova ka pran pasyans anvan i fini ké sa monn-an (Is. 30:18). Mé i pa ka fè l’ pou bon tchò. Kou i ka pran pasyans, sa ka bay roun patché moun tan pou yé anprann konnèt li é pou yé adoré l’ (2 Pierre 3:9). Donk, lò to dékourajé, sonjé tout sa moun-yan ki ké profité di pasyans Jéova-a anvan lafen-an rivé. É pitèt moun to fanmi ké pouvé profité di sa.

8. Kisa ki pouvé rivé roun granmoun ki malad ouben ki ka soufri ?

⁸ Ki nou jenn ki nou vyé, lò nou pa byen, détan, nou ka di bagaj ouben nou ka fè bagaj nou ka rigrété apré (Eccl. 7:7 ; Jacq. 3:2). Parèkzanp, Jòb, ki té sa roun moun ki té fidèl, « palé san réfléchi » pas i té ka soufri (Job 6:1-3). Anplis di sa, lò roun granmoun malad ouben i ka pran médikaman, i pouvé di ouben fè bagaj i pa té ké jen di ouben fè si i pa té annan sa sitiasyon-an. Mé menmsi nou malad ouben nou vyé, nou pa divèt méchan ké ròt-ya ouben krè ki moun blijé fè bagaj pou nou. É si nou ka wè ki nou di roun bagaj ki pa té janti, annou kouri doumandé pardon (Mat. 5:23, 24).

SA TO POUVÉ FÈ POU TO TCHÒ TOUJOU KONTAN

9. Poukisa frè ké sò-ya ki ja granmoun pa divèt pè asèpté ròt-ya idé yé ? (gadé zimaj-ya osi).

⁹ Asèpté ròt-ya idé to (Gal. 6:2). O koumansman, pitèt sa ké rèd pou to. Men sa roun sò yé ka aplé Gretl ka di : « Détan, sa rèd pou mo asèpté ròt-ya idé mo paské, pou mo, a kousidiré mo té ka anbété yé. Sa pran tan pou mo chanjé fason mo té ka pansé é pou mo asèpté ki mo té bézwen ròt-ya idé mo. » Sonjé ki ròt-ya ké kontan to lésé yé idé to (Actes 20:35). É sa ké fè to plézi lò to ké wè kouman yé kontan to é yé ka gadé pou to.

10. Poukisa di mèrsi enpòrtan ? (gadé zimaj-ya osi).

¹⁰ Di mèrsi (Col. 3:15 ; 1 Thess. 5:18). Lò ròt-ya ka fè bon bagaj pou nou, nou kontan, mé détan nou pouvé bliyé di yé mèrsi. Si nou ka fè sa-ya ki idé nou roun bèl sourir é si nou ka di yé mèrsi, yé ké savé ki nou byen kontan tousa yé fè pou nou. Leah ka pran swen di plizyèr frè ké sò ki ja granmoun annan Bétèl-a. Men sa i ka di : « I gen roun sò ki toujou ka marké roun ti bagaj asou roun ti papyé pou di mo mèrsi. I pa ka ékri bokou bagaj, mé sa tèlman janti ! Sa toujou ka fè mo plézi. É kou mo savé ki i kontan sa mo ka fè pou idé l’, sa ka fè mo tchò kontan. »

11. Kouman frè ké sò-ya ki ja granmoun pouvé idé ròt-ya ? (gadé zimaj-ya osi).

¹¹ Fè sa to pouvé pou idé ròt-ya. Si nou ka gadé pou ròt-ya é nou ka chaché idé yé, nou pa ké gen tan pou réfléchi asou noupa problèm. Roun dolo afriken ka di ki granmoun-yan kou roun bibliyotèk plen ké liv ki pouvé anprann nou roun patché bagaj. Mé si roun liv ka rété fronmen, i pa ké anprann nou pyès anyen. Donk, kou to konnèt roun patché bagaj, pran douvan pou partajé sa to konnèt ké to èspéryans ké sa-ya ki pi jenn. Pozé yé késyon épi kouté yé. Èspliké yé ki nou tchò toujou kontan lò nou ka obéyi Jéova é ki a pi bon bagaj nou pouvé fè. Si to ka konsolé to zanmi é to ka bay yé fòrs, sa ké fè to tchò kontan, asiré pa pitèt (Ps. 71:18).

12. Dapré Isaïe 46:4, kisa Jéova promèt fè pou so sèrvitèr-ya ki fidèl é ki ja granmoun ? (gadé zimaj-ya osi).

¹² Doumandé Jéova bay to fòrs. Détan, pitèt to ka santi ki to las ouben ki to fèb é sa pouvé dékourajé to. Mé pa bliyé ki Jéova « pa jen las, i pa jen ka fatigé » (Is. 40:28). Kouman i ka sèrvi so fòrs ki pa jen ka fini ? I ka roubay so sèrvitèr ki fidèl é ki ja granmoun fòrs (Is. 40:29-31). Annan so Paròl, i promèt yé ki i té ké idé yé (li Isaïe 46:4). É i toujou ka fè sa i promèt (Jos. 23:14 ; Is. 55:10, 11). Lò to ké priyè Jéova, i ké idé to. Konsa, to ké wè ki i kontan to é sa ké fè to tchò kontan.

13. Dapré 2 Corinthiens 4:16-18, kisa nou pa divèt bliyé ? (gadé zimaj-ya osi).

¹³ Pa bliyé ki to pa ké rété vyé pou tout-tan. Si nou annan roun sitiasyon ki rèd pou sipòrté, sa ké pi fasil pou nou tchenbé si nou savé ki nou pa ké rété annan sa sitiasyon-an pou tout-tan. É Labib ka di nou ki titalò, pyès moun pa ké vin vyé é pyès moun pa ké tonbé malad ankò (Job 33:25 ; Is. 33:24). Donk, to tchò pouvé kontan paské to savé ki titalò to ké gen roun pi bon lasanté, to ké pi fò é to ké pi bèl pasé pyès tan annan to lavi (li 2 Corinthiens 4:16-18). Aprézan, annou wè sa ròt-ya pouvé fè pou idé to.

SA RÒT-YA POUVÉ FÈ POU IDÉ TO

14. Poukisa sa enpòrtan ki nou aplé ouben ki nou alé wè frè ké sò-ya ki ja granmoun ?

¹⁴ Annou pran labitid alé wè épi aplé nou frè ké sò-ya ki ja granmoun (Héb. 13:16). Granmoun-yan pouvé tris paské yé souvan yé rounso. Camille, roun frè ki blijé rété annan so kaz, ka di : « Mo ka rété lakaz tout lajournen é détan, mo pa gen anyen pou mo fè. Détan, mo ka santi kousidiré yé té fronmen mo annan roun kaj. Lò a konsa, mo pa byen menm é mo kòlè. » Lò nou ka alé wè nou frè ké sò-ya ki ja granmoun, nou ka montré yé ki yé gen valò pou nou, ki nou kontan yé, é sa ka rasiré yé. Sa dèt ja rivé nou tout di ki nou ké aplé ouben nou ké alé wè roun granmoun di nou asanblé, épi finalman nou pa ka fè l’. Nou tout gen bokou bagaj pou fè. Donk, kisa ki pouvé idé nou fè sa « ki pi enpòrtan », kou alé wè nou frè ké sò-ya ki ja granmoun ? (Phil. 1:10). Pitèt nou ké divèt marké annan nou almanak ki nou lé aplé roun frè ouben roun sò annan nou asanblé ouben voyé li roun mésaj. Épi osi, nou pouvé désidé chwazi roun jou pou alé wè yé chak simenn. A roun bagaj pou nou prévwè fè. A pa pou nou di : « Soulon van vanté, latcho poul panché ! »

15. Ki bagaj sa-ya ki pi jenn pouvé fè ansanm ké sa-ya ki pi vyé ?

¹⁵ Si nou jenn, pitèt nou ka doumandé nou kò di kisa nou pouvé palé ké sa-ya ki pi vyé ouben ki bagaj nou pouvé fè ké yé. Mé a pa pou nou enkyété nou kò tròp pou sa. Fè sa roun bon zanmi ka fè (Prov. 17:17). Anvan ouben apré réinyon-yan, annou alé wè yé pou palé ké yé. Nou pouvé doumandé yé ki vèrsé yé pi kontan. Nou pouvé doumandé yé rakonté nou roun bagaj ki rivé yé lò yé té piti é ki ka fè yé ari. Nou pouvé envité yé vin gadé roun émisyon Télé JW ké nou. É pitèt nou pouvé fè ròt bagaj pou idé yé. Parèkzanp, to pouvé gadé si yé téléfonn ouben yé tablèt ka byen maché é si yé gen piblikasyon-yan ki fin soti. Men roun lidé roun sò yé ka aplé Carol ka bay : « Propozé to zanmi ki ja granmoun fè bagaj to menm to kontan. Menmsi mo vyé, mo anvi profité di lavi-a toujou. Mo kontan alé annan magazen, mo kontan manjé o rèstoran, é mo kontan alé pronmennen pou pran plézi gadé sa Jéova kréyé. » É men sa roun sò yé ka aplé Maira ka di : « Mo gen roun zanmi ki gen 90 lannen. I vyé 57 lannen pasé mo. Mé souvan, mo ka bliyé ki i lontan pi gran pasé mo paské nou kontan ari é nou kontan gadé fim ansanm. É lò nou gen roun problèm, roun ka idé ròt. »

16. Poukisa a roun bon bagaj si nou k’alé ké nou frè ké sò-ya ki ja granmoun lò yé gen randévou koté roun dòktèr ?

¹⁶ Lò yé gen roun randévou ké roun dòktèr, annou alé ké yé. Nou pouvé mennen yé annan yé randévou mé nou pouvé rété ké yé osi pou nou wè si dòktèr-ya ka byen pran swen di yé é si yé ka fè sa ki fo pou idé yé (Is. 1:17). Pitèt nou ké pouvé idé yé si nou ka marké sa dòktèr-a ka di pannan randévou-a. Men sa roun sò ki ja granmoun yé ka aplé Ruth ka di : « Souvan, lò mo ka alé mo rounso annan roun randévou ké roun dòktèr, dòktèr-a pa ka krè mo. Détan, roun ran dòktèr ka di bagaj kou : “Ou pa gen pyès problèm, ou ka fè sanblan.” Mé lò roun moun ka vin ké mo, dòktèr-a janti. Mo ka di frè ké sò-ya ki ka pran tan vin ké mo, mèrsi. »

17. Kisa sa-ya ki pi jenn pouvé fè pou idé sa-ya ki pi vyé préché ?

¹⁷ Annou préché ké frè ké sò-ya ki ja granmoun. Pitèt roun ran annan yé pa gen fòrs pou préché di kaz an kaz. Si roun sò ki ja granmoun annan sa sitiasyon-an, pitèt to pouvé propozé l’ vin fè prézantwar ké to. To pouvé prévwè pran roun chèz pou i asiz òbò prézantwar-a. Rounòt bagaj to pouvé fè, a propozé roun frè ki ja granmoun vini fè roun étid ké to. To pouvé menm fè l’ annan so kaz. Anplis di sa, ansyen-yan pouvé prévwè fè déztrwa réinyon prédikasyon annan kaz sa frè ké sò-ya pou sa pi fasil pou yé préché. Jéova kontan lò nou ka fè tousa nou pouvé pou nou bay nou gangan-yan lònò (Prov. 3:27 ; Rom. 12:10).

18. Di kisa nou ké palé annan ròt artik-a ?

¹⁸ Sa artik-a fè nou sonjé ki Jéova kontan frè ké sò-ya ki ja granmoun é ki yé gen valò pou li. É a konsa frè ké sò-ya annan asanblé-a ka wè yé osi ! Si to sa roun granmoun, to ka byen wè ki pi to ka pran laj, pi sa rèd. Mé grasa Jéova, to tchò pouvé kontan (Ps. 37:25). Ès sa pa ka ankourajé to lò to savé ki titalò to tchò ké pi kontan pasé pyès tan ? Mé é si nou ka idé roun granmoun annan nou fanmi, nou timoun ouben roun zanmi ki malad ? Kisa nou pouvé fè pou nou tchò kontan ? Nou ké réponn sa késyon-an annan ròt artik-a.