«  To sa roun moun ki gen bokou valò » !

1-2. Kisa ki pouvé fè nou sir ki nou gen valò pou Jéova ?

TOUT sèrvitèr Jéova gen valò pou li, mé roun ran annan yé pa ka rivé krè ki Jéova kontan yé. Pitèt moun malmennen yé kousidiré yé pa té vo anyen. Ès a sa yé fè ké to ? Si a sa, kisa ki pouvé fè to sir ki pou Jéova to gen valò ?

² Roun bagaj ki pouvé idé to, a réfléchi asou istwè annan Labib ki ka montré kouman Jéova lé nou wè ròt-ya. Jézi té ka rèspèkté moun-yan é i té janti ké yé. Lò i fè sa, i montré ki sa-ya ki ka krè ki yé pa anyen gen valò pou li ké pou so Papa (Jean 5:19 ; Héb. 1:3). Annan sa artik-a, nou ké wè 1) kouman Jézi idé moun-yan wè ki yé gen valò é 2) kouman nou menm nou pouvé sir ki nou gen valò pou Bondjé (Agg. 2:7).

KOUMAN JÉZI IDÉ MOUN-YAN WÈ KI YÉ GEN VALÒ

3. Kouman Jézi aji ké moun Galilé ki té ka vin pou i idé yé ?

³ Lò Jézi alé Galilé trwazyèm fwa-a pou préché, moun té ka vini di tout koté pou i géri yé. Jézi wè ki « yé té tou kanyankanyan ké pédi kou mouton ki pa gen bèrjé » (Mat. 9:36 ; gadé nòt pou étidyé). Yé chèf rélijyé té ka méprizé yé é yé jis té ka di ki yé té sa dé « moun ki té modi » (Jean 7:47-49 ; nòt pou étidyé). Parkont, Jézi pran tan ansényé yé épi géri yé pou montré yé ki yé té gen valò (Mat. 9:35). Anplis di sa, pou i té pouvé idé plis moun, i fòrmé so apot pou yé té préché épi ‘géri moun-yan ki té malad’ (Mat. 10:5-8).

4. Kisa fason Jézi fè ké sa-ya ki té ka kouté li ka anprann nou ?

⁴ Jézi té janti ké sa-ya ki té ka kouté l’ é i té ka rèspèkté yé. Lò i fè sa, i montré ki moun-yan ròt-ya ka méprizé gen valò ni pou li, ni pou so Papa. Si to ka adoré Jéova mé ki to pa sir ki to gen valò, réfléchi asou fason Jézi fè ké sa-ya ki té ka kouté l’. Si to ka fè sa, to ké wè ki to gen valò pou Jéova.

5. Èspliké annan ki sitiasyon roun madanm Jézi kontré Galilé té fika.

⁵ Jézi préché pou roun patché moun, mé détan i pran tan pou okipé di sèrten moun èspésyalman. Men roun èkzanp : Roun jou, lò i té Galilé, i kontré ké roun madanm ki té ka pédi disan dipi 12 lannen (Marc 5:25). Akoz di sa, dapré Lalwa, madanm-an pa té pròp, é si roun moun té ka manyen l’, sa moun-an pa té ké pròp nonplis. Donk, sa madanm-an té divèt souvan li rounso. É anplis di sa, i pa té pouvé alé ké ròt-ya pou adoré Bondjé annan sinagòg-a ouben pou lafèt-ya (Lév. 15:19, 25). Donk, sa madanm-an té ka soufri é pou li menm, i pa té gen pyès valò (Marc 5:26).

6. Kouman madanm-an ki té ka pédi disan vin géri ?

⁶ Sa madanm-an ki té ka soufri bokou té lé Jézi géri li. Mé i pa alé wè l’ pou doumandé l’. Poukisa ? Pitèt i té ronté pas i té malad ouben pitèt i té pè Jézi di li roun bagaj pas i té vin anmitan moun menmsi i pa té pròp dapré Lalwa. A pou sa, sèl bagaj i fè, a manyen lenj Jézi. I té sir ki si i té ka fè sa rounso, i té ké géri (Marc 5:27, 28). Érèzman i té gen lafwa, pas grasa sa Bondjé géri li. Apré sa, lò Jézi doumandé kimoun ki té manyen l’, i di a té li. Kouman Jézi réyaji ?

7. Kouman Jézi fè ké sa madanm-an ki té ka soufri bokou ? (Marc 5:34).

⁷ Jézi wè ki madanm-an té ka « tranblé fòrs i té pè ». A pou sa i pa palé rèd ké li é i montré l’ ki i té ka rèspèkté l’ (Marc 5:33). Kou Jézi té savé annan ki léta i té fika, i rasiré l’. I jis aplé li « mo tifi ». Lò i di sa, a pa té jis pou montré ki i té ka rèspèkté li. Jézi té janti é i té kontan li (li Marc 5:34). A sèl koté annan Labib nou ka wè Jézi ka aplé roun madanm « mo tifi ». I dèt di sa pas i wè ki madanm-an té « pè » toubonnman. Imajiné kouman sa Jézi di l’ divèt rasiré l’ ! Si Jézi pa té di li sa, i té ké géri l’, mé pitèt konsyans madanm-an té ké bat li. Jézi té lé géri li, mé a pa sa rounso i té lé fè. I té lé fè li savé ki i té gen roun Papa annan syèl-a ki té kontan l’, é sa Papa-a té ka wè l’ kou so tifi ki gen bokou valò pou li.

8. Ki problèm roun sò ki ka rété Brézil jwenn ?

⁸ Jòdla osi, roun ran sèrvitèr Bondjé malad é akoz di sa, yé ka santi ki yé pa gen valò é yé déprimé. Annou palé di Mariaa, roun sò pyonyé pèrmanan ki ka rété Brézil. Lò i fèt, i pa té gen ni so dé janm, ni so lanmen goch. I ka èspliké : « Lò mo té lékòl, kou mo té andikapé, yé té ka fè mo wè mizè toulong. Yé té ka di bagaj pou fè mo lapenn. Détan, menm mo fanmi té ka méprizé mo. »

9. Kisa ki idé Maria wè ki, pou Jéova, i gen valò ?

⁹ Kisa ki idé Maria wè ki i té gen valò ? I divini Témwen Jéova é so frè ké sò konsolé l’ é idé l’ wè so kò kou Jéova ka wè li. I ka di : « I pa gen asé paj annan mo karné pou mo mété non tout moun ki idé mo ! Mo ka di Jéova mèrsi ké tout mo tchò pas i bay mo roun fanmi frè ké sò ki bèl toubonnman. » Frè ké sò-ya idé Maria konprann ki, pou Bondjé, i gen valò.

10. Annan ki traka Mari Magdala té fika ? (gadé zimaj-ya osi).

¹⁰ Annou wè kouman Jézi idé rounòt moun konprann ki i té gen valò pou Jéova. Sa moun-an, a Mari Magdala. Sa madanm-an té gen sèt démon annan so kò ! (Luc 8:2). Nou pouvé pansé ki akoz di démon-yan, sa i té ka fè té dròl é moun-yan dèt té pè pasé òbò l’. I té ka soufri bokou. I dèt té pè toubonnman é i dèt té ka pansé ki pyès moun pa té kontan l’ é ki pyès moun pa té pouvé idé l’. Mé Jézi tiré mové lèspri-ya ki té asou l’ é apré sa, Mari divini so disip. Ki ròt bagaj Jézi fè pou idé l’ konprann ki i té gen valò pou Bondjé ?

11. Kouman Jézi montré Mari Magdala ki i té gen valò pou Bondjé ? (gadé zimaj-ya osi).

¹¹ Jézi doumandé Mari Magdala vini ké li ké so disip préché annan roun vilaj apré rounòtb. Atò, Mari té pouvé kouté Jézi ansényé moun-yan touléjou. Anplis di sa, jou-a menm Bondjé résisité l’, Jézi alé wè Mari Magdala. Sa madanm-an ka fè parti di prémyé disip Jézi alé wè sa jou-a. I jis doumandé li alé di apot-ya ki Bondjé té résisité l’. Tousa Jézi fè byen montré l’ ki i té gen valò pou Jéova ! (Jean 20:11-18).

12.Èspliké poukisa Lidia té ka pansé ki i pa té vo anyen.

¹² Kou Mari Magdala, jòdla, roun patché moun ka pansé ki pyès moun pa pouvé kontan yé. Lidia, roun sò ki ka rété Èspagn, ka di ki lò so manman té ansent di li, i té lé jité l’. Lò i té piti, so manman pa té ka okipé di li, i té ka fè l’ méchansté é i té ka jouré l’ toulong. Lidia ka di : « Mo té lé moun asèpté mo épi kontan mo. Mé kou mo manman té rivé fè mo krè ki mo té mové, mo té krè ki mo pa té ké janmen mérité moun kontan mo. »

13. Kisa ki idé Lidia wè ki i gen valò pou Jéova ?

¹³ Lò Lidia vin konnèt lavérité, bagaj-ya chanjé. I koumansé priyè Jéova, i étidyé Labib é frè ké sò-ya té janti ké li. Grasa sa, i konprann ki i té gen valò pou Jéova. I ka di : « Mo mouché ka di mo souvan ki i kontan mo. I toujou ka fè mo sonjé bèl kalité mo gen. É mo gen bon zanmi ki ka fè menm bagaj-a. » Ès to konnèt roun moun ki bézwen yé idé l’ wè ki i gen valò pou Jéova ?

KOUMAN NOU POUVÉ WÈ NOU KÒ KOU JÉOVA KA WÈ NOU

14. Kisa 1 Samuel 16:7 ka di asou fason Jéova ka wè moun-yan ? (gadé karé-a osi : « Poukisa sèrvitèr Jéova-ya gen valò pou li ? »).

¹⁴ Pa bliyé ki Jéova pa ka wè to kou monn-an ka wè to (li 1 Samuel 16:7). Jéova pa ka gadé si to bèl, si to gen roun patché soumaké ouben si to fè gran lékòl. A pa sa ka fè si to gen valò pou li (Is. 55:8, 9). Donk, pasé to wè to kò kou monn-an ka wè to, éséyé wè to kò kou Jéova ka wè to. To pouvé li istwè moun annan Labib ki té gen valò pou Jéova, menmsi yé menm té ka pansé ki yé pa té vo anyen, parèkzanp Éli, Noémi ké Ann. Rounòt bagaj to pouvé fè, a marké bagaj ki rivé to ki ka montré ki Jéova kontan to é ki to gen valò pou li. Anplis di sa, to pouvé rouli artik annan nou piblikasyon ki ka palé di zafè « confiance en soic ».

15. Poukisa Jéova di ki Danyèl té sa ‘roun moun ki té gen bokou valò’ ? (Daniel 9:23).

¹⁵ To pouvé sir ki kou to fidèl, to gen valò pou Jéova. Roun jou, lò profèt Danyèl té gen près 100 lannen, i santi ki i té « las pou mouri » é i té dékourajé (Dan. 9:20, 21). Kouman Jéova idé l’ pran fòrs ? I voyé zanj Gabriyèl fè l’ sonjé ki i té sa ‘roun moun ki té gen bokou valò’ é ki i té tandé so lapriyè (li Daniel 9:23). Poukisa Danyèl té gen bokou valò pou Jéova ? A paské i té gen roun patché bèl kalité, parèkzanp i té kontan lajistis é i té fidèl (Ézéch. 14:14). Jéova gardé sa istwè-a annan so Paròl pou konsolé nou (Rom. 15:4). Donk, a pou to sir ki Jéova ka kouté to lapriyè osi é ki to menm osi to gen valò pou li paské to ka fè sa ki drèt é to fidèl (Mich. 6:8, nòt ; Héb. 6:10).

16. Kisa ki pouvé idé to wè Jéova kou roun papa ki kontan to ?

¹⁶ A pou to wè Jéova kou roun papa ki kontan to. Jéova pa ka chaché kritiké sa to ka fè, i lé soutni to (Ps. 130:3 ; Mat. 7:11 ; Luc 12:6, 7). Roun patché krétyen ki ka pansé ki yé pa gen valò ka pran tan réfléchi asou sa é sa ka konsolé yé. Parèkzanp, Michelle, roun sò ki ka rété Èspagn, té ka santi ki moun pa té kontan l’ é ki i pa té vo anyen paské, pannan lontan, so mari di l’ roun patché méchansté. I ka di : « Chak fwa mo ka santi ki mo initil, mo ka éséyé imajiné Jéova ka kroké mo, ka montré mo ki i kontan mo é ka protéjé mo » (Ps. 28:9). Men sa Lauren, roun sò ki ka rété an Afrik di Sid, ka sonjé souvan : « Si Jéova pran tan fè mo vin òbò li jantiman ké kòrd lanmou-a, si i ka idé mo rété pròch di li dipi tout sa lannen-yan é ki i jis ka sèrvi mo pou ansényé ròt moun so Paròl, a ki, pou li, mo gen valò » (Osée 11:4).

17. Kisa ki pouvé fè to sir ki to ka fè Jéova plézi ? (Psaume 5:12 ; gadé zimaj-a osi).

¹⁷ A pou to sir ki to ka fè Jéova plézi (li Psaume 5:12). David di ki lò moun ki jis savé ki yé ka fè Jéova plézi, a kou « roun gran boukliyé » ki ka protéjé yé. Lò to ka koumansé pansé ki to pa sa roun bon moun, sa pouvé malmennen to mé sa « gran boukliyé »-a ké protéjé to. Kouman to pouvé savé si to ka fè Jéova plézi ? Kou nou wè l’, Jéova ka sèrvi so Paròl pou fè to sir di sa. Anplis di sa, i ka sèrvi ansyen-yan, to zanmi ké ròt krétyen pou fè to sonjé ki to gen valò pou li. Kouman to divèt réyaji lò yé ka ankourajé to konsa ?

18. Poukisa to divèt asèpté lò moun ka di bèl bagaj asou to ?

¹⁸ A pou to asèpté lò moun ki konnèt to é ki kontan to ka di bon bagaj asou to. Pa bliyé ki a pitèt Jéova ka sèrvi yé pou fè to konprann ki to ka fè l’ plézi. Michelle, nou ja palé anvan, ka di : « Piti piti, mo ka anprann krè tout bèl bagaj yé ka di asou mo. Sa pa fasil menm, mé a sa Jéova lé mo fè. » Anplis di sa, ansyen-yan fè roun patché bagaj pou idé Michelle konprann ki Jéova kontan li. Jòdla, Michelle pyonyé é i ka travay pou Bétèl-a dipi so kaz.

19. Poukisa to pouvé sir ki to gen valò pou Bondjé ?

¹⁹ Jézi ka fè nou sonjé ki nou gen bokou valò pou nou Papa ki annan syèl-a (Luc 12:24). Donk, nou pouvé sir ki, pou Jéova, nou gen valò toubonnman. A pa pou nou janmen bliyé sa ! É annou fè tousa nou pouvé pou idé ròt moun konprann ki yé gen valò pou Bondjé !