Imité Zadòk ki té gen kouraj

1-2. Zadòk, a té kimoun ? (1 Chroniques 12:22, 26-28).

IMAJINÉ sa : pasé 340 000 mouché rasanblé pou fè David rwa asou Israyèl. Pannan trwa jou, sa mouché-ya ka rété annan ti montangn-yan bò d’ Ébron. Yé ka ari, yé ka palé é yé ka chanté pou louwé Jéova (1 Chron. 12:39). Anmitan sa patché moun-yan, pitèt yé pa menm ka wè roun jennjan yé ka aplé Zadòk. Pourtan, Jéova fè sa ki fo pou nou savé ki Zadòk té la (li 1 Chroniques 12:22, 26-28). Mé Zadòk, a té kimoun ?

² Zadòk té sa roun prèt, é i té ka travay ansanm ké gran prèt Abyatar. Anplis di sa, Bondjé té bay li sajès pou vandé é té ka pèrmèt li konprann so volonté (2 Sam. 15:27). Lò Israyélit-ya té bézwen konsèy, yé té ka alé wè l’. Mé Zadòk té sa roun moun ki té gen bokou kouraj osi. É annan sa artik-a, a di sa kalité-a nou ké palé.

3. a) Poukisa sèrvitèr Jéova-ya divèt gen kouraj ? b) Kisa nou ké wè annan sa artik-a ?

³ Pannan sa dèrnyé jou-ya, pi sa k’alé, pi Satan ka ataké pèp Bondjé-a (1 Pierre 5:8). Atò, anvan moman-an rivé pou Jéova krazé Satan ké so monn méchan, a pou nou gen kouraj (Ps. 31:24). Annou wè trwa bagaj nou pouvé fè pou montré ki nou gen kouraj kou Zadòk.

SOUTNI RWAYONM BONDJÉ-A

4. Poukisa vré krétyen-yan divèt gen kouraj pou soutni rwayonm Bondjé-a ? (gadé zimaj-a osi).

⁴ Vré krétyen-yan ka soutni rwayonm Bondjé-a ké tout yé tchò. Mé pou yé fè sa, souvan, yé divèt gen kouraj (Mat. 6:33). Parèkzanp, nou divèt gen kouraj pou nou swiv prensip Jéova-ya épi préché bon nouvèl Rwayonm-an annan sa monn ki méchan-an (1 Thess. 2:2). Épi souvan, kou sa monn-an plizanpli divizé, a pou to gen kouraj osi pou to pa mélé annan zafè lapolitik (Jean 18:36). Kou roun patché sèrvitèr Jéova ka réfizé mélé yé kò annan lapolitik ouben antré annan larmé, yé ka trapé problèm soumaké, moun ka malmennen yé ouben gouvèrnman-an ka mété yé lajòl.

5. Poukisa Zadòk té bézwen kouraj pou soutni David ?

⁵ Zadòk pa ka vin Ébron sèlman pou fè lafèt pou David ki fin divini rwa. I ka vin ké so zarm é i paré pou briga (1 Chron. 12:38). I byen désidé alé ké David pou briga, épi défann Israyèl kont so lèlmi. I pa sa roun sòlda, mé i gen bokou kouraj.

6. Ki bèl èkzanp David té ka bay Zadòk annan zafè gen kouraj ? (Psaume 138:3).

⁶ Mé koté Zadòk, sa jenn prèt-a, pran sa kouraj-a ? Enben, i ka maché ké wonm ki vayan é ki plen ké kouraj. É i dèt ka pran èkzanp asou yé. I gen David parèkzanp. Kou i sa roun chèf ké roun gèryé plen ké kouraj, tout pèp-a lé i divini rwa (1 Chron. 11:1, 2). É pou i briga kont so lèlmi, a tout tan i ka konté asou fòrs Jéova ka bay li (Ps. 28:7 ; li Psaume 138:3). Zadòk gen ròt moun ki ka bay li roun bon èkzanp, kou Joad ké so pitit Bénaya, roun sòlda ki gen bokou èspéryans, épi 22 ròt chèf ki vin jwenn David (1 Chron. 11:22-25 ; 12:26-28). Tout sa mouché-ya té byen désidé fè David divini rwa épi protéjé l’.

7. a) Ki bèl èkzanp nou gen jòdla ? b) Kisa istwè frè Nsilu annan vidéyo-a ka anprann to ?

⁷ Nou ka trapé fòrs ké kouraj lò nou ka étidyé èkzanp sèrvitèr Jéova ki ka soutni so dominasyon ké kouraj. Nou Rwa, Jézi Kris, tchenbé rèd lò yé éséyé mété présyon asou l’ pou i mélé annan lapolitik épi pran parti annan monn Satan-an (Mat. 4:8-11 ; Jean 6:14, 15). I toujou té ka konté asou fòrs Jéova ka bay. Anplis di sa, nou gen èkzanp roun patché jenn frè ki ka réfizé fè larmé, ouben mélé annan lapolitik pou soutni Rwayonm-an. To pouvé alé asou jw.org pou wè sa roun ran dia.

IDÉ TO FRÈ KÉ SÒ-YA

8. Annan ki kalité sitiasyon ansyen-yan divèt gen kouraj pou idé yé frè ké sò-ya ?

⁸ Sèrvitèr Jéova-ya ka pran plézi idé yé konpanyen (2 Cor. 8:4). Mé détan, pou fè sa, a pou to gen kouraj. Parèkzanp, lò lagèr ka pété, ansyen-yan savé ki frè ké sò-ya ké bézwen ankourajman. Yé ké bézwen yé soutni yé, é pitèt sa ké rèd pou yé trapé manjé èspirityèl ouben sa yé bézwen pou yé viv. Paské yé kontan brébi-ya, détan, yé ka riské yé lavi pou idé yé (Jean 15:12, 13). Lò yé ka fè sa, yé ka swiv èkzanp Zadòk ki té gen bokou kouraj.

9. Dapré 2 Samuel 15:27-29, kisa David ka di Zadòk fè ? (gadé zimaj-a osi).

⁹ David ka riské mouri paské so pitit Absalon byen désidé divini rwa a so plas (2 Sam. 15:12, 13). I divèt lésé Jérizalèm lanmenm ! I ka di mouché-ya ki ka maché ké li : « Annou chapé, sinon nou pyès pa ké chapé anba lanmen Absalon ! » (2 Sam. 15:14). Toupannan so sèrvitèr ka pati, David ka randé so kò kont ki sa té ké pi bon si roun ran annan yé té ka rété Jérizalèm pou di l’ sa Absalon ka prévwè fè. Atò, i ka doumandé Zadòk ké ròt prèt viré Jérizalèm, konsa yé ké pouvé di li sa ki ka pasé (li 2 Samuel 15:27-29). Sa wonm-yan ké divèt panga. Sa David ka doumandé yé fè danjéré, yé ka riské mouri ! Absalon ka gadé pou so douvan lèstomak, i trèt é i kontan vanjé so kò. Imajiné sa i té ké pouvé fè Zadòk ké ròt prèt-ya si i té ka vin savé ki yé ka véyé so zafè pou protéjé David !

10. Kouman Zadòk ké so zanmi rivé protéjé David ?

¹⁰ David gen roun lidé, mé i bézwen Zadòk ké rounòt di so zanmi fidèl, Ouchay, idé li (2 Sam. 15:32-37). Yé ka fè sa David di yé : Ouchay ka fè kousidiré i ka soutni Absalon, épi i ka bay li konsèy asou fason pou i ataké David. Konsa, David ké gen tan préparé so kò. Apré sa, Ouchay k’alé wè Zadòk ké Abyatar pou di yé ki konsèy i bay Absalon (2 Sam. 17:8-16). A sa moman-an, Zadòk ké Abyatar pouvé fè David savé sa Absalon ké fè (2 Sam. 17:17). A konsa, grasa Jéova, Zadòk ké ròt prèt-ya idé protéjé David (2 Sam. 17:21, 22).

11. Kouman nou pouvé imité Zadòk ki té gen kouraj lò nou ka idé nou frè ké sò ?

¹¹ Si nou gen pou idé nou frè ké sò-ya lò yé lavi an danjé, kouman nou pouvé imité Zadòk ki té gen kouraj ? 1) Fè sa yé ka di to fè. Annan sa kalité sitiasyon-yan, sa enpòrtan di rété ansanm ansanm. Donk, byen swiv sa filyal-a ka di to fè (Héb. 13:17). A toulong, ansyen-yan divèt rouwè sa pou fè si i gen roun katastròf annan yé koté, ké sa òrganizasyon-an ka di osi asou sa pou fè lò roun katastròf tou pròch rivé (1 Cor. 14:33, 40). 2) A pou to gen kouraj, mé a pou to panga (Prov. 22:3). Byen réfléchi anvan to fè roun bagaj. Pa riské to lavi pou anyen. 3) Fè Jéova konfyans. Sonjé ki Jéova ka gadé pou to frè ké sò-ya, mé i ka gadé pou to osi. Donk, i pouvé idé to idé yé san to pa mété to kò an danjé.

12-13. Kisa sa Viktor ké Vitaly rakonté ka anprann to ? (gadé zimaj-a osi).

¹² An Ikrenn, dé ansyen yé ka aplé Viktor ké Vitaly té gen pou mennen dlo ké manjé pou yé frè ké sò. Viktor ka di : « Nou té ka chaché manjé tout koté. Souvan, nou té ka tandé kout fizi tou pròch ké nou. Roun jou, roun frè bay roun patché manjé, konsa roun patché proklamatèr té gen asé manjé pannan roun moman. Pannan nou té ka charjé kamyon-an, roun bonm tonbé apéprè 20 mèt òbò nou. Érèzman pou nou, i pa pété. Pannan tout lajournen, mo sipliyé Jéova idé mo kontinyé idé mo frè ké sò-ya. »

¹³ Vitaly ka di : « Nou té divèt gen bokou kouraj. Prémyé fwa nou mennen provizyon-yan, sa pran nou 12 lèr. Mo priyè pannan tout sa tan-an. » Vitaly té gen kouraj, mé i panga osi. I ka di dèyè sa : « A toulong mo té ka doumandé Jéova sajès épi idé mo rékonnèt mo limit. Mo té ka roulé sèlman asou larout gouvèrnman-an té di nou té pouvé pran. Épi lò mo wè kouman frè ké sò-ya té ka travay ansanm, mo lafwa vin pi fò. Yé té ka tiré sa ki té ka baré larout-ya, yé té ka rasanblé manjé, lenj ké ròt bagaj enpòrtan épi yé té ka mété tousa annan kamyon-an. É chak koté nou té k’alé, yé té ka bay nou manjé ké roun koté pou nou pozé. »

RÉTÉ FIDÈL KÉ JÉOVA

14. Byen souvan, kisa nou ka rousanti lò roun moun annan nou fanmi ouben roun di nou zanmi ka lésé Jéova ?

¹⁴ Lò roun moun annan nou fanmi ouben roun di nou zanmi ka lésé Jéova, a roun éprèv ki rèd toubonnman é ki ka dékourajé nou (Ps. 78:40 ; Prov. 24:10). Byen souvan, pi nou pròch di moun-an ki pati, pi sa rèd pou nou asèpté sitiasyon-an. David ké Zadòk té ké byen konprann sa krétyen-yan ki annan sa éprèv-a ka rousanti.

15. Poukisa Zadòk té divèt gen kouraj pou rété fidèl ké Jéova ? (1 Rois 1:5-8).

¹⁵ Zadòk rété fidèl lò so bon zanmi Abyatar désidé trayi Jéova. Sa rivé lò David té vyé é té tou pròch mouri. So pitit Adoniya éséyé divini rwa alòr ki a Salomon Jéova té chwazi pou i divini rwa (1 Chron. 22:9, 10). Élas, Abyatar chwazi soutni Adoniya (li 1 Rois 1:5-8). Lò i fè sa, i montré ki a pa té David rounso i té ka trayi, a Jéova osi. Imajiné kouman Zadòk té divèt tris é té divèt gen lapenn ! Li ké Abyatar té prèt ansanm pannan pasé 40 lannen (2 Sam. 8:17). Yé té okipé di « Arch vré Bondjé-a » ansanm (2 Sam. 15:29). Anvan sa, yé toulédé té soutni David pou i divini rwa, épi pou protéjé l’. É yé té fè roun patché ròt bagaj ansanm ankò (2 Sam. 19:11-14).

16. Kisa ki pitèt idé Zadòk rété fidèl ké Jéova ?

¹⁶ Magré sa Abyatar chwazi fè, Zadòk rété fidèl ké Jéova. É David té savé ki i té toujou pouvé fè Zadòk konfyans. Lò yé vin savé sa Adoniya té lé fè, David voyé Zadòk, Natan ké Bénaya pou vidé dilwil asou tèt Salomon, pou fè l’ divini rwa (1 Rois 1:32-34). Sa jou-a, kou Zadòk té gen moun ki té ka adoré Jéova é ki té fidèl òbò li, kou Natan ké ròt zanmi rwa David, sa dèt bay li plis fòrs, é sa dèt ankourajé l’ (1 Rois 1:38, 39). Finalman, lò Salomon divini rwa, i « fè prèt Zadòk pran plas Abyatar » (1 Rois 2:35).

17. Kouman to pouvé imité Zadòk si roun moun to kontan ka désidé lésé Jéova ?

¹⁷ Kouman nou pouvé imité Zadòk ? Si roun moun to kontan ka désidé lésé Jéova, montré Jéova ki to byen désidé rété fidèl ké li (Jos. 24:15). Bondjé ké bay to fòrs ké kouraj to bézwen. Fè li konfyans, priyè, é rété ansanm ké sa-ya ki ka adoré l’. To fidélité gen bokou valò pou Jéova. I ké rékonpansé to pou sa (2 Sam. 22:26).

18. Kisa sa Marco ké Sidse ka di ka anprann to ?

¹⁸ Marco ké Sidse gen dé tifi ki ja gran é ki lésé lavérité-a. Marco ka di : « Lò nou gen timoun, nou kontan yé tèlman ! Nou té ké fè nenpòrt ki bagaj pou protéjé yé. Donk, lò yé ka désidé lésé Jéova, nou tchò krazé. » I ka di ankò : « Mé Jéova la. I ka fè ki lò mo menm mo fèb, mo madanm fò, é lò a li ki fèb, a mo ki fò. » Sidse ka di : « Si Jéova pa té ka bay nou fòrs, nou pa té ké jen pouvé tchenbé annan sa sitiasyon-an. Mo pa té ka las di mo kò ki tousa ki té rivé, a té di mo fot. Donk, mo palé Jéova di sa. Roun ti tan apré sa, mo jwenn roun sò mo pa té wè dipi plizyèr lannen. I tchenbé mo, i gadé mo annan mo wéy, épi i di mo : “Sidse, pa janmen bliyé ki a pa di to fot !” Grasa Jéova, mo ka rivé kontinyé adoré l’ ké tchò kontan. »

19. Kisa to byen désidé fè ?

¹⁹ Jéova lé ki tout so sèrvitèr gen menm kouraj Zadòk té gen (2 Tim. 1:7). Mé i pa lé nou konté asou nou pròp fòrs. I lé nou fè l’ konfyans. Donk, lò to annan roun sitiasyon koté to divèt gen kouraj, doumandé Jéova bay to kouraj. To pouvé sir ki i ké bay to kouraj kou Zadòk ! (1 Pierre 5:10).