Jéova ka « fè nou tchò kontan toubonnman »

1-2. a) Annan ki sitiasyon roun patché moun fika jòdla ? b) Kisa nou ké wè annan sa artik-a ?

JÒDLA, roun patché moun ka éséyé tout kalité bagaj pou yé tchò kontan. Mé magré tousa yé ka fè, anyen pa ka maché. Roun patché moun tris pou mouri é yé ka pansé ki yé sitiasyon pa ké janmen chanjé. Détan, menm sèrvitèr Jéova-ya annan sa sitiasyon-an. Kou nou ka viv « dèrnyé jou-ya », nou savé ki nou ké gen bagaj ki « difisil pou sipòrté » (2 Tim. 3:1).

² Annan sa artik-a, nou ké wè sa ki pouvé fè nou pédi nou lajwa épi sa nou pouvé fè si sa ka rivé nou. Mé pou koumansé, nou divèt wè kimoun ki pouvé vréman fè nou tchò kontan.

KIMOUN KI POUVÉ VRÉMAN FÈ NOU TCHÒ KONTAN

3. Kisa sa Jéova fè ka anprann nou asou li ? (gadé zimaj-ya osi).

³ Jéova sa roun Bondjé ki éré. A dipi tout tan so tchò kontan. É i lé menm bagaj-a pou nou osi. A pou sa i fè roun patché bagaj ki ka fè nou tchò kontan. Parèkzanp, nou kontan lò nou ka wè kouman latè-a bèl ké tout kalité koulèr, nou kontan gadé zannimo ka jwé ansanm é nou ka pran plézi manjé bagaj ki chwit. Asiré, Jéova kontan nou é i lé nou profité di lavi-a !

Ti léfan : Image © Romi Gamit/Shutterstock ; ti pengwen : Vladimir Seliverstov/500px via Getty Images ; ti kabrit : Rita Kochmarjova/stock.adobe.com ; dofen : georgeclerk/E+ via Getty Images

4. a) Kouman Jéova pouvé éré menmsi i ka wè moun ka soufri asou latè ? b) Kouman Jéova ka idé nou ? (Psaume 16:11).

⁴ Menmsi Jéova sa « Bondjé ki éré-a », i byen savé kouman nou ka soufri asou latè é ki malò ka rivé nou (1 Tim. 1:11). Mé sa pa ka anpéché so tchò kontan. I savé ki tout soufrans ké fini roun jou. A li menm ki désidé kitan yé ké fini. Donk, i ka pran pasyans, i ka tchenbé pas i savé ki titalò i ké fè yé disparèt pou tout-tan. Anplis di sa, i ka konprann nou lò nou ka soufri é i lé idé nou. Kouman i ka fè sa ? Parèkzanp, i ka fè nou tchò kontan (li Psaume 16:11). Annou wè kouman i fè tchò so Pitit Jézi kontan.

5-6. Poukisa Jézi éré ?

⁵ Apré Jéova, moun-an ki pi éré-a, a Jézi. Poukisa ? Annou wè dé rézon : 1) « I sa pòrtrè Bondjé nou pa pouvé wè-a » ; annan tousa i ka fè, i kou so Papa (Col. 1:15 ; 1 Tim. 6:15). 2) A li ki pasé plis tan ké Jéova, Moun-an ki ka vréman fè nou tchò kontan.

⁶ Anplis di sa, Jézi toujou pran plézi fè sa Jéova té ka doumandé l’ fè (Prov. 8:30, 31 ; Jean 8:29). A pou sa so Papa fyèr di li (Mat. 3:17).

7. Kisa nou divèt fè pou nou tchò vréman kontan ?

⁷ Nou menm osi, nou tchò pouvé vréman kontan si nou ka vin pi pròch di Jéova, Moun-an ki ka vréman fè nou tchò kontan. Pi nou ké pran tan anprann konnèt li, pi nou ké pouvé imité l’ é pi nou tchò ké kontan. Si nou ka fè sa i ka di nou fè é si nou savé ki nou ka fè l’ plézi, nou tchò ké kontan osia (Ps. 33:12). Mé si nou tris pannan déztrwa jou ouben pi lontan, ès sa lé di ki nou pa ka fè l’ plézi ? Non ! Kou nou pa parfè, détan, nou pouvé tris ouben dékourajé. Jéova ka byen konprann sa (Ps. 103:14). Donk, annou wè aprézan sa ki pouvé fè nou pédi nou lajwa é sa nou pouvé fè si sa ka rivé nou.

PA LÉSÉ ANYEN FÈ TO PÉDI TO LAJWA

8. Kisa ki pouvé rivé nou lò nou anba traka ?

⁸ 1) Lò nou anba traka. Ès yé ka pèrsékité to akoz di to lafwa ? Ès to ka soufri akoz di roun katastròf natirèl ? Ès to ka soufri pas to maléré, to vyé ouben to malad ? Sa kalité bagaj-ya pouvé fè nou pédi nou lajwa fasilman, é sa ankò pi rèd si nou pa pouvé fè anyen pou chanjé nou sitiasyon. Labib ka di ki « lò to gen chagren, sa ka dékourajé to » (Prov. 15:13). Men sa Babis, roun ansyen ki pédi so frè, so papa ké so manman annan roun ti moman, ka di : « Mo té ka santi mo té tousèl san pyès moun pou idé mo. Détan, mo tchò té krazé osi paské tèlman mo té okipé, mo pa té rivé pasé plis tan ké mo frè épi ké mo papa ké mo manman anvan yé mouri. » Problèm nou ka jwenn pouvé fatigé nou épi dékourajé nou.

9. Kisa nou pouvé fè pou nou tchò viré kontan ? (Jérémie 29:4-7, 10).

⁹ Kisa nou pouvé fè pou nou tchò viré kontan ? Nou tchò pouvé viré kontan si nou ka arété enkyété pou bagaj nou pa pouvé chanjé é si nou gen rékonésans pou sa nou ja gen. Monn-an lé fè nou krè ki pou nou tchò kontan, nou lavi divèt parfè. Mé a pa vré menm ! Parèkzanp, Jéova di Jwif-ya yé té fòrsé alé Babilòn fè tousa yé té pouvé pou adapté yé kò koté yé té ké rété, menmsi yé sitiasyon té rèd (li Jérémie 29:4-7, 10). Kisa sa ka anprann nou ? A pou to asèpté to sitiasyon épi a pou to gen rékonésans pou bèl bagaj ki ka rivé to. Anplis di sa, sonjé ki Jéova pa ké lésé to (Ps. 63:7 ; 146:5). Men sa Effie, roun sò ki pa pouvé maché pas i fè roun aksidan, ka di : « Jéova, mo fanmi ké mo asanblé idé mo bokou. Mo toujou di mo kò ki si mo té ka arété fè tousa mo pouvé pou mo tchò kontan, mo té ké engra. Jéova ké mo frè ké sò-ya fè tèlman bagaj pou mo ! Mo lé montré yé ki mo gen rékonésans. »

10. Poukisa nou tchò pouvé kontan menmsi nou ka jwenn problèm ?

¹⁰ Menmsi nou lavi pa parfè é menmsi bagaj ki grav pouvé rivé nou ouben nou fanmi, nou tchò pouvé kontanb (Ps. 126:5). Poukisa ? Paské nou lajwa pa ka dépann di nou sitiasyon. Men sa Maria, roun sò ki pyonyé, ka di : « Menmsi nou gen problèm, nou tchò kontan paské nou ka sonjé sa Jéova ka promèt nou. Sa pa lé di ki nou pa jen ka kriyé ouben ki nou pa ka di sa nou ka rousanti. Mé nou Papa pouvé idé nou pou nou tchò kontinyé kontan kèlkéswa problèm nou gen. » Pa bliyé ki kèlkéswa problèm nou ka jwenn, yé ké fini roun jou. Titalò, Jéova ké tiré tousa ki ka fè nou soufri.

11. Kouman èkzanp apot Pòl pouvé ankourajé to ?

¹¹ Kisa pou nou fè si nou ka koumansé krè ki si nou gen problèm, a paské nou pa ka fè Jéova plézi ankò ? Nou pouvé sonjé sèrvitèr Jéova tan-lontan-yan ki jwenn roun patché problèm menmsi yé té fidèl. Annou pran èkzanp apot Pòl. A Jézi li menm ki té chwazi l’ pou i té di lavérité bay « nasyon-yan, rwa-ya ké pitit Israyèl-ya » (Actes 9:15). Men roun bèl lònò ! Pourtan, so lavi pa té sa roun bòl toloman (2 Cor. 11:23-27). Kou i té ka jwenn problèm asou problèm, ès sa té lé di ki Jéova pa té kontan l’ ankò ? Awa ! Okontrèr, si i té ka tchenbé, a té paské Jéova té ka béni l’ (Rom. 5:3-5). Aprézan, sonjé to sitiasyon. To fidèl, to ka tchenbé magré tout éprèv to ka jwenn. Donk to menm osi, to pouvé sir ki Jéova kontan to.

12. Kisa ki pouvé rivé nou si nou pa pouvé fè sa nou anvi fè pou Jéova ?

¹² 2) Lò nou pa pouvé fè sa nou té ké lé fè pou Jéova (Prov. 13:12). Kou nou kontan Jéova é nou gen rékonésans pou tousa i fè pou nou, nou ka éséyé wè kouman nou pouvé fè plis pou li. Mé si sa nou lé fè tro fò pou nou parapòrta nou sitiasyon, sa pouvé dékourajé nou (Prov. 17:22). Men sa roun pyonyé yé ka aplé Holly ka èspliké : « Mo té lé fè Lékòl pou évanjélizatèr Rwayonm-an, préché annan rounòt péyi ouben idé asou chantyé Ramapo. Mé mo sitiasyon chanjé é mo pa té pouvé fè pyès annan sa bagaj-ya ankò. Mo té tris menm. Lò i gen bagaj to lé fè mé to pa pouvé, to tchò ka fè to mal. » A sa ka rivé roun patché frè ké sò.

13. Si akoz di to sitiasyon i gen bagaj to pa pouvé fè, ki ròt bagaj to pouvé désidé fè ?

¹³ Kisa nou pouvé fè pou nou tchò viré kontan ? Pa bliyé ki Jéova pa ka doumandé nou fè plis ki sa nou pouvé fè. É a pa sa nou ka fè pou li ka fè si nou gen valò pou li. Sa i lé, a ki nou rékonnèt nou limit é ki nou rété fidèl (Mich. 6:8 ; 1 Cor. 4:2). Jéova ka gadé sa nou ka pansé, sa nou ka rousanti ké bèl kalité nou gen menmsi nou pa pouvé fè tousa nou té ké lé fè pou li. I pa ka doumandé nou fè plis ki sa nou pouvé fè. Donk, nou menm nou pa divèt chaché fè plis ki sa nou pouvé fèc. Si akoz di to sitiasyon i gen bagaj to pa pouvé fè pou Jéova, chaché ròt bagaj to pouvé fè. To pouvé fòrmé jennjan-yan annan to asanblé ouben idé gangan-yan. Pitèt to pouvé alé wè roun moun, aplé l’ ouben voyé l’ roun mésaj pou ankourajé l’. Jéova kontan lò to ka fè bagaj to pouvé fè. É pou rékonpansé to, i ké fè to tchò kontan. Épi sonjé ki annan monn nouvo-a, nou ké pouvé fè roun patché bagaj pou Jéova nou pa menm ka imajiné. A sa ki ka ankourajé Holly. Men sa i ka di : « Lò mo ka byen gadé, mo ké gen lavi pou tout-tan ! Titalò, Jéova ké idé mo fè tousa mo anvi fè pou li. »

14. Kisa ki pouvé fè nou pédi nou lajwa ?

¹⁴ 3) Si a anmizé ki pi enpòrtan annan nou lavi. Asou Entèrnèt, nou ka wè roun ran moun yé té ké di yé tchò kontan paské yé ka profité di lavi-a toulong. Nou pouvé koumansé krè ki, zafè achté sa nou lé, fè bagaj nou kontan ouben vwayajé, a sa ki ké fè nou tchò kontan. Sa bagaj-ya pa mové. Jéova fè nou pou nou profité di tout bèl bagaj i fè. Mé roun patché moun wè ki sa ki té divèt fè yé tchò kontan ka fè yé pédi yé lajwa. Eva, roun sò ki pyonyé, ka di : « Lò sa to ka mété an prémyé annan to lavi, a fè to kò plézi, to pa janmen gen asé. » Si sèl bagaj nou ka wè, a fè nou kò plézi, nou ké tris é sa ké dékourajé nou.

15. Kisa èkzanp rwa Salomon ka anprann nou ?

¹⁵ Rwa Salomon éséyé plizyèr bagaj diféran pou wè si sa té ké fè so tchò kontan. Parèkzanp, i gouté tout kalité manjé, i kouté bèl lanmizik é i achté roun patché bèl bagaj ki té chè. Mé sa bagaj-ya pa fè so tchò kontan é i di : « Wéy pa ka jen las gadé é zorè pa ka jen las tandé » (Eccl. 1:8 ; 2:1-11). Roun ran moun ka pansé ki si yé gen soumaké é si yé ka fè tousa yé anvi, yé tchò ké kontan. Mé sa pa vré menm ! Sa bagaj-ya pa pouvé vréman fè nou tchò kontan.

16. Poukisa nou pouvé di ki si nou ka idé ròt-ya, nou tchò pouvé viré kontan ? (gadé zimaj-ya osi).

¹⁶ Kisa nou pouvé fè pou nou tchò viré kontan ? Men sa Jézi di : « Nou tchò pi kontan lò nou ka bay ki lò nou ka rousouvwè » (Actes 20:35). Men sa roun ansyen yé ka aplé Alekos wè : « Mo ka fè tousa mo pouvé pou fè ti bagaj pou ròt-ya. Lò mo ka idé yé, mo pa ka mété mo lidé asou sa mo lé é konsa mo tchò kontan. » Kisa to pouvé fè pou ròt-ya ? Si to ka wè ki roun moun ka soufri, to pouvé ankourajé l’. Pitèt to pa ké rivé ranjé tout so problèm, mé si to ka kouté l’, to ka pran so lapenn é si to ka fè l’ sonjé ki i divèt jité so fardo asou Jéova, to ké pouvé konsolé l’ (Ps. 55:22 ; 68:19). To pouvé idé l’ osi pou i sir ki Jéova pa anbandonnen l’ (Ps. 37:28 ; Is. 59:1). Épi to pouvé propozé li fè roun bagaj pou li, parèkzanp fè manjé pou li ouben alé pronmennen ké li. É si to ka envité l’ préché ké to, i ké santi so kò pi byen. Atò, lésé Jéova itilizé to. Si nou ka sonjé ròt-ya pasé nou sonjé nou kò, nou tchò ké vréman kontan ! (Prov. 11:25).

17. Kisa nou divèt fè pou nou tchò vréman kontan ? (Psaume 43:4).

¹⁷ Si nou ka kontinyé vin pi pròch di nou Papa ki annan syèl-a, nou tchò ké vréman kontan. Labib ka di nou ki Jéova sa ‘sa-la ki ka fè nou tchò kontan toubonnman’ (li Psaume 43:4). Donk, kèlkéswa problèm nou ka jwenn, nou pa bézwen pè. Si nou ka mété nou lidé asou Jéova, Moun-an ki ka vréman fè nou tchò kontan, nou tchò ké kontan pou tout-tan ! (Ps. 144:15).