Sa to pouvé fè pou to tchò toujou kontan si to ka pran swen di roun moun

1-2. Kisa Jéova ka rousanti pou sa-ya ki ka pran swen di roun moun ? (Proverbes 19:17 ; gadé zimaj-ya osi).

JIN-YEOL, roun frè ki ka rété an Koré di Sid, ka di : « Mo ké mo ti madanm nou maryé dipi 32 lannen. Mé sa ka fè 5 lannen mo divèt okipé di li. I gen maladi Parkinsonn é i pa pouvé boujé. I ka rété lakaz, é mo kontan pran swen di li. Mo kontan l’ toubonnman. Lannwit, i ka dronmi asou roun lit èspésyal é mo ka dronmi òbò li. Mo ka pran somèy toupannan mo ka tchenbé so lanmen. »

² Ès to ka pran swen di roun moun to kontan kou to papa ouben to manman, to mari ouben to madanm, to timoun ouben to zanmi ? Si a sa, to dèt kontan pran swen di li. Anplis di sa, lò to ka fè sa, to ka montré to kontan Jéova (1 Tim. 5:4, 8 ; Jacq. 1:27). Mé sa pa lé di ki to pa ka jwenn problèm é souvan ròt-ya pa ka wè sa. Détan, to jis pouvé krè ki pyès moun pa pouvé konprann sa to ka rousanti. Pitèt douvan ròt-ya, to ka ari, mé lò to tousèl, a pléré to ka pléré (Ps. 6:6). Pitèt ròt-ya pa savé sa to ka rousanti. Mé Jéova savé sa to ka rousanti é i ka konprann to (gadé Exode 3:7). I ka wè lò to ka pléré é i ka wè sakrifis to ka fè é yé gen valò pou li (Ps. 56:8 ; 126:5). I ka wè tousa to ka fè pou idé moun-an. Pou li, a kousidiré i dévé to é i ka promèt to ranboursé to (li Proverbes 19:17).

3. Poukisa sa té dèt rèd pou Abraam ké Sara pran swen di Téra ?

³ Labib ka palé di plizyèr sèrvitèr Bondjé ki té ka pran swen di roun moun ki té malad ouben ki té gen so laj. Annou pran èkzanp Abraam ké Sara. Lò yé soti Our, yé papa, Téra, té gen apéprè 200 lannen. Pourtan, i pati ké yé. Yé maché apéprè 960 kilomèt pou rivé Arann (Gen. 11:31, 32). Abraam ké Sara té kontan Téra, mé éséyé imajiné kouman sa té dèt difisil pou yé pran swen di li pannan sa vwayaj-a ki té long. Anplis di sa, pitèt yé té ka vwayajé asou do chamo ouben nann. Pou roun granmoun kou Téra, sa pa té dèt fasil menm. Abraam ké Sara té dèt las détan. Mé Jéova bay yé fòrs yé té bézwen. Menm fason Jéova soutni Abraam ké Sara, i ké soutni to é i ké bay to fòrs (Ps. 55:22).

4. Kisa nou ké wè annan sa artik-a ?

⁴ Si to tchò kontan, sa ké idé to kontinyé pran swen di moun-an to okipé di-a (Prov. 15:13). Nou tchò pouvé kontan menm lò nou annan roun sitiasyon ki rèd (Jacq. 1:2, 3). Mé kisa to pouvé fè pou to tchò toujou kontan ? Roun bagaj to pouvé fè, a fè Jéova konfyans épi priyè l’ pou doumandé li idé to wè bèl bagaj ki ka rivé to annan to lavi. Annan sa artik-a, nou ké wè ki ròt bagaj sa-ya ki ka pran swen di roun moun pouvé fè pou yé tchò toujou kontan. Nou ké wè osi sa so frè ké sò-ya pouvé fè pou idé l’. Mé anvan sa, annou wè poukisa yé divèt fè sa ki fo pou yé tchò toujou kontan é kisa ki pouvé dékourajé yé.

SA KI POUVÉ DÉKOURAJÉ TO LÒ TO KA PRAN SWEN DI ROUN MOUN TO KONTAN

5. Poukisa sa-ya ki ka pran swen di roun moun divèt fè sa yé pouvé pou yé tchò toujou kontan ?

⁵ Si roun moun ki ka pran swen di rounòt moun ka sonjé yenki problèm i ka jwenn, so tchò pa ké kontan. É akoz di sa, i pa ké gen fòrs ankò (Prov. 24:10). É si roun moun pa gen fòrs ankò, pitèt i pa ké janti é i pa ké pouvé idé ròt-ya kou i té ké fè l’ si i té byen. Kisa ki pouvé dékourajé roun moun ki ka pran swen di rounòt moun ?

6. Poukisa roun ran annan sa-ya ki ka pran swen di roun moun ka fè sa yé k’aplé roun burn-out ?

⁶ Sa-ya ki ka pran swen di roun moun pouvé fè sa yé k’aplé roun burn-out. Roun sò yé ka aplé Leah ka di : « Lò to ka pran swen di roun moun, sa ka pran tout to fòrs, menm lò tout bagaj k’alé byen. Souvan, lò lajournen-an fini, a kousidiré mo pa gen pyès fòrs ankò. Détan, mo pa menm gen fòrs pou réponn roun mésaj. » Ròt ankò pa ka rivé pozé asé ouben pran roun ti tan pou yé. Pourtan, a sa yé té ké byen bézwen. A sa Inés ka di : « Mo pa ka dronmi asé. Pannan tout lannwit mo gen ka lévé pou pran swen di mo bèlmè. É sa ka fè roun patché lannen mo ké mo mari nou pa pran pyès vakans. » I gen sa ki pa pouvé asèpté lò yé ka envité yé. Yé pa pouvé asèpté rèsponsabilité annan asanblé-a nonplis pas moun-an yé ka okipé di-a bézwen yé la ké yé toulong. Akoz di sa, détan, yé ka santi yé kò yé rounso é yé tris pas yé pa pouvé fè tousa yé té ké lé fè.

7. Poukisa i gen sa ki ronté ouben ki tris ?

⁷ Sa-ya ki ka pran swen di roun moun pouvé tris toubonnman pas yé ka pansé ki yé pa ka fè asé ouben lò yé ka wè annan ki sitiasyon moun-an fika. Roun sò yé ka aplé Jessica ka di : « Souvan mo ka di mo kò ki a pou mo fè plis pou mo papa. É lò mo ka pran roun ti tan pou mo, mo ka santi kousidiré mo pa té gen drwa pran sa ti tan-an. » I gen sa ki tris pas yé ka pansé ki yé pa ka jen fè asé pou moun-an ouben détan yé ka pansé ki yé pa ké pouvé kontinyé konsa ankò. É i gen ròt ankò ki ronté pas yé di ouben yé fè roun bagaj ki pa té janti pas yé té las sa jou-a (Jacq. 3:2). I gen ròt ankò yé tchò ka raché lò yé ka wè ki anvan, moun-an yé ka okipé di-a té gaya, mé ki aprézan, a pa menm moun-an ankò. Roun sò yé ka aplé Barbara ka di : « Sa ki pi rèd pou mo, a wè moun-an mo kontan-an désann piti piti. »

8. Lò nou ka di sa-ya ki ka pran swen di roun moun mèrsi, kisa sa ka fè yé ? Bay roun èkzanp.

⁸ Sa-ya ki ka pran swen di roun moun pouvé krè ki ròt-ya pa gen rékonésans pou sa yé ka fè. Poukisa ? Pas i pa gen bokou moun ka di yé mèrsi ouben ka félisité yé pou travay ké sakrifis yé ka fè. Pourtan, sa té ké pouvé ankourajé yé toubonnman (1 Thess. 5:18). A sa roun sò yé ka aplé Melissa ka di : « Détan mo ka kriyé afòrs mo dékourajé. Mé lò sa-ya mo ka idé ka di mo : “Mèrsi pou tousa ou ka fè pou mo”, sa ka roubay mo fòrs ! É landimen-an, lò mo ka lévé, mo anvi kontinyé pran swen di yé. » Roun frè yé ka aplé Ahmadu kontan toubonnman osi lò yé ka di l’ mèrsi. Li ké so madanm ka okipé di yé ti nyès ki ka rété koté yé é ki ka fè kriz épilèpsi. I ka di : « I pa pouvé konprann tousa nou ka fè pou li é sa nòrmal. Mé a pa ti kontan mo kontan lò i ka di mo mèrsi ouben lò i ka marké asou roun ti papyé : “Mo kontan zòt”. »

SA TO POUVÉ FÈ POU TO TCHÒ TOUJOU KONTAN

9. Kouman roun moun ki ka pran swen di rounòt moun pouvé montré i ka rékonnèt so limit ?

⁹ A pou to rékonnèt to limit (Prov. 11:2). A pa touléjou nou gen tan ké fòrs pou fè tousa nou lé fè. Donk, to ké divèt désidé sa to pouvé fè ké sa to pa pouvé fè. Détan, to ké gen pou di moun-yan non. É a pa roun mové bagaj ! Lò to ka fè sa, to ka montré ki to ka rékonnèt to limit. Anplis di sa, si roun moun ka propozé to idé to, pa pè asèpté. Roun frè yé ka aplé Jay ka di : « Nou pa pouvé fè plis ki sa nou pouvé fè. Si nou konnèt nou limit é nou ka rèspèkté yé, nou tchò ké toujou kontan. »

10. Poukisa to divèt chaché konprann poukisa moun-an ka fè bagaj ki pa nòrmal ? (Proverbes 19:11).

¹⁰ Chaché konprann poukisa moun-an ka fè bagaj ki pa nòrmal (li Proverbes 19:11). Si to ka fè sa, sa ké idé to rété kalm si i pa janti ké to. Sèrten maladi pouvé fè roun moun fè bagaj ki pa nòrmal (Eccl. 7:7). Parèkzanp, roun moun ki janti é ki dous pouvé koumansé babyé ké to. I pouvé plenn so kò toulong ouben volé asou to. Ouben magré tousa to ka fè pou li, i ka di i pa bon. Si to ka okipé di roun moun ki gen roun maladi ki grav, pitèt a ké roun bon bagaj si to ka anprann plis bagaj asou so maladi. Sa ké idé to wè ki a pa lé i lé aji konsa, mé a so maladi ki ka fè l’ fè sa (Prov. 14:29).

11. Kisa sa-ya ki ka pran swen di roun moun divèt pran tan fè touléjou ? (Psaume 132:4, 5).

¹¹ Pran tan fè to lanmityé ké Jéova vin pi fò. Détan, to ké divèt pran mwens tan ka fè sèrten bagaj pou to fè « bagaj ki pi enpòrtan » (Phil. 1:10). Parèkzanp, to bézwen tan pou to fè to lanmityé ké Jéova vin pi fò. David té sa roun rwa ki té gen bokou bagaj pou i fè mé adoré Jéova, a sa ki té pi enpòrtan annan so lavi (li Psaume 132:4, 5). Kou David, a pou to pran tan li Labib ké priyè touléjou. Roun sò yé k’aplé Elisha ka di : « Mo tchò toujou kontan paské mo ka priyè é mo ka pran tan réfléchi asou plizyèr psaumes ki ka konsolé mo. Pou mo, lapriyè, a roun bagaj ki enpòrtan toubonnman. Mo ka priyè Jéova tout lajournen pou mo rété kalm. »

12. Poukisa sa-ya ki ka idé roun moun divèt pran tan okipé di yé pròp lasanté ?

¹² Pran tan okipé di to lasanté. Détan, sa-ya ki gen bokou bagaj pou fè, kou sa-ya ki ka pran swen di roun moun, pa ka rivé byen manjé pas yé pa gen tan achté ké fè manjé ki bon pou yé lasanté. Mé si yé lé gen roun bon lasanté, yé bézwen manjé bon bagaj épi fè èspòr souvan. Donk, byen sèrvi ti tan to gen pou to byen manjé é pou to fè èspòr souvan osi (Éph. 5:15, 16). Anplis di sa, éséyé dronmi asé (Eccl. 4:6). Lò to ka byen dronmi, sa ka idé to bokou. Dòktèr-ya ka di ki sa ka idé to pa ka enkyété to kò tròp é sa ka idé to rété kalm lò bagaj-ya rèd. Épi to ké bézwen tan pou to anmizé osi (Eccl. 8:15). Roun sò ka èspliké sa ki ka idé l’ pou so tchò toujou kontan. I ka di : « Lò mo ka wè i gen roun bèl solèy, mo ka profité pou mo soti. É mo ka prévwè soti ké roun zanmi pou mo fè mo kò plézi omwen roun fwa annan mwa-a. »

13. Poukisa ari bon pou to lasanté ? (Proverbes 17:22).

¹³ A pou to ari moso (li Proverbes 17:22 ; Eccl. 3:1, 4). Lò to ka ari, sa ka idé to pa enkyété to kò tròp. Lò to ka okipé di roun moun, bagaj to pa té ka antann pouvé rivé. Mé si to ka rivé ari lò bagaj konsa ka rivé, sa ké idé to tchenbé pi fasilman. É lò to ka ari ké moun-an to ka okipé di-a sa pouvé fè zòt vin pi pròch.

14. Poukisa palé ké roun zanmi to ka fè konfyans pouvé idé to ?

¹⁴ Palé ké roun zanmi to ka fè konfyans. Magré tousa to ké fè pou to tchò toujou kontan, détan to pa ké pouvé ankò. A sa moman-an, sa ki ké idé to, a palé ké roun bon zanmi, roun zanmi ki pa ké jijé to é ki pa ké fè to ronté parapòrta sa to ké di (Prov. 17:17). I ké pran tan kouté to é i ké ankourajé to é pitèt a sa to ké bézwen pou to tchò toujou kontan (Prov. 12:25).

15. Poukisa nou ka di ki lò nou ka réfléchi asou èspwar nou gen-an, sa ka fè nou tchò kontan ?

¹⁵ Imajiné kouman to lavi ké fika lò to ké moun-an to ka okipé di-a zòt ké annan paradi-a. Pa bliyé ki to pa ké gen pou pran swen roun moun ki gen so laj ouben ki malad pou tout-tan. Jéova pa té prévwè nou té ké fè sa (2 Cor. 4:16-18). « Vré lavi-a », a pou dimen (1 Tim. 6:19). Si to ké moun-an to ka okipé di-a, zòt ka palé di sa zòt ké fè annan paradi-a, sa ké pouvé fè zòt tchò kontan bokou (Is. 33:24 ; 65:21). Roun sò yé ka aplé Heather ka di : « Souvan, mo ka di sa-ya mo ka okipé di yé-a ki titalò nou ké fè bokou bagaj ansanm. Nou ké koud, nou ké kouri ouben nou ké fè vélo. Mo ka di yé osi ki nou ké fè dipen é nou ké fè manjé pou sa-ya nou kontan ki ké résisité. Apré sa, nou ka di Jéova mèrsi ansanm pou bèl èspwar i ka bay nou. »

SA RÒT-YA POUVÉ FÈ POU IDÉ TO

16. Si i gen roun sò ouben roun frè annan nou asanblé ki ka pran swen di roun moun, kouman nou pouvé idé l’ ? (gadé zimaj-a osi).

¹⁶ Nou pouvé bay roun lanmen pou sa-ya ki ka pran swen di roun moun pouvé gen tan pou yé pozé. Nou pouvé propozé sa frè-a ouben sa sò-a pasé tan ké moun-an i ka okipé di-a. Konsa, i ké gen tan pozé épi fè so bagaj (Gal. 6:2). Sèrten frè ké sò ka òrganizé é yé ka fè roun program pou idé sa frè ké sò-ya chak simenn. I gen roun sò yé ka aplé Natalya é so mari pa pouvé boujé. Men sa i ka di : « Roun frè annan asanblé-a ka vini roun ouben dé fwa annan simenn-an pou pasé tan ké mo mari. Yé ka préché ansanm, yé ka kozé é yé jis ka gadé fim. Mo mari kontan sa bokou. Épi mo menm, sa ka pèrmèt mo pozé épi fè ròt bagaj, parèkzanp alé pronmennen. » Détan, nou pouvé propozé frè-a ouben sò-a rété ké moun-an i ka okipé di-a lannwit pou li menm pouvé byen dronmi.

17. Kisa nou pouvé fè pannan réinyon-yan pou idé sa-ya ki ka pran swen di roun moun ?

¹⁷ Pannan réinyon-yan, nou pouvé soutni frè ké sò-ya ki ka pran swen di roun moun. Détan, sa frè ké sò-ya pa ka byen profité di réinyon-yan ké gran asanblé-ya paské yé ka okipé di moun-an. Nou pouvé propozé yé asiz òbò moun-an pannan roun parti program-an ouben pannan tout réinyon-an. É si aprézan moun-an yé ka okipé di-a oblijé rété a so kaz ? Nou pouvé propozé frè-a ouben sò-a rété lakaz ké moun-an pou gadé réinyon-an. Konsa li menm ké pouvé alé lasal.

18. Ki ròt bagaj nou pouvé fè pou idé frè ké sò-ya ki ka pran swen di roun moun ?

¹⁸ Nou pouvé félisité frè ké sò-ya ki ka pran swen di roun moun épi priyè pou yé. Ansyen-yan divèt pran tan ankourajé sa frè ké sò-ya souvan (Prov. 27:23). É kèlkéswa nou sitiasyon, nou tout pouvé pran labitid di sa frè ké sò-ya ki nou kontan yé é ki tousa yé ka fè gen bokou valò. Épi nou pouvé doumandé Jéova kontinyé bay yé fòrs épi idé yé pou yé tchò toujou kontan (2 Cor. 1:11).

19. Ki bèl bagaj nou divèt sonjé ?

¹⁹ Titalò, Jéova ké swiyé tout dlo di nou wéy. Pyès moun pa ké malad ni mouri ankò (Rév. 21:3, 4). « Moun-an ki ka bwété ké kouri kou roun bich » (Is. 35:5, 6). Pyès moun pa ké vyé, pyès moun pa ké pa ké soufri pas i vyé é pyès moun pa ké gen pou okipé di roun moun ki malad ankò. « Nou pa ké sonjé » sa bagaj-ya ankò (Is. 65:17). Mé toupannan nou ka antann sa bagaj-ya fèt, Jéova la pou idé nou. Si nou ka kontinyé konté asou li pou i bay nou fòrs, i ké idé nou « tchenbé rèd ké pasyans épi ké lajwa » (Col. 1:11).