Ko na Kanga n Nanomwaaka n te Mwakuri ni Minita?

KO A tia n namakinna ae ko a rangi ni kua ao ni bwarannano n te aro are ko aki kan uataboa te mwakuri n uarongorongo? E kona ni kataaki nanomwaakara n te kakaaitara ae korakora, te raraoma, te aoraki, te kariri mairouia tabonrorora, ke ngkana e aki kai noraki uaan ara uarongorongo. Ma iangoa ana katoto Iesu. E nanomwaaka i aani kataaki aika taiani kabanea ni kakaiaki “i bukin te kimareirei are kamenaki i mwaina.” (Ebera 12:2) E ataia Iesu ae e kakimwareireia nanon Iehova ngkana e kaotia n ana mwakuri bwa bon akea koauan taiani kabuakaka ibukin te Atua.​—Taeka N Rabakau 27:11.

Ko kona naba ni kakimwareireia nanon Iehova n nanomwaakam n te mwakuri ni minita. Ma tera ae ko na karaoia ngkana a taraa ni kakerikaaka korakoram n uarongorongo bwaai n tutuki tabeua? E taku Krystyna ae e a kara ma n aoraki: “I aki mimi ngkana I namakina te kua ao te bwarannano. Bwa a kona ni kakerikaaka ingaingan nanou n te tai ae aki teimaan au kangaanga aika irekereke ma te kara, n aron te aoraki ao te raraoma ibukini baika ti kainnanoi ibukin te maiu ni katoa bong.” Ko na kanga ni kona ni botumwaaka n te mwakuri ni minita n aki ongei bwaai n tutuki akanne?

Kakairi Irouia Burabeti

Ngkana a na botumwaaka n te mwakuri n uarongorongo taan tataekina te Tautaeka n Uea aika kakaonimaki, a kona ni kekeiaki ni kakairi n aroaroia ao aia iango burabeti ake rimoa. Iangoa te katoto teuana ni kaineti ma Ieremia. Ngke e weteaki bwa e na karaoa te mwakuri ni burabeti ao e rawa n te moantai. Ma e ngae n anne ao e kona n nanomwaaka Ieremia ni karaoa mwiokoana ae rangi ni kangaanga i nanon 40 tabun te ririki ibukina bwa e tia n reiakina ae e riai n onimakina te Atua ma nanona ni kabane.​—Ieremia 1:6; 20:​7-11.

E reke kaungaan nanon Henryk man ana katoto Ieremia. E taku: “Ni karaoan au mwakuri ni minita i nanon 70 tabun te ririki, n taai tabetai e bwara nanou ibukin aroia aomata ni butimwaea te rongorongo n aron aia kairiribai ke aki bwerengakia. N taai akanne, ao I kakauringa ana katoto Ieremia. Tangiran Iehova irouna ao ana iraorao ae nene ma ngaia e kakorakoraa bwa e na teimatoa n tataetae ni burabeti.” (Ieremia 1:17) E a tia naba Rafał ni kakorakoraaki n ana katoto Ieremia. E taku: “E onimakina te Atua Ieremia n oneani mwin ae e na kaatuua iaiangoana i bon irouna ma oin ana namakin. E ninikoria ni waakinako n aki ongea butanakon ribaakina. Anne te bwai ae I kataia n ururingnga.”

Temanna riki te burabeti are a bati aika buokaki n nanomwaaka n te mwakuri ni minita man ana katoto bon Itaia. E tuangaki iroun te Atua bwa a na bati kaain abana aika a na rawa n ongora irouna. E taku Iehova: ‘Kanenea nanon te botannaomata aei, ao kabono taningaia.’ Te koaua bwa e aki kona ni koro bukin ana kantaninga Itaia? N ana taratara te Atua ao e boni kona ni koro bukina! Ngke e mwiokoaki bwa te burabeti ao e kaeka ni kangai: “Aio ngai; kanakoai.” (Itaia 6:8-​10) E matoa nanon Itaia ni botumwaaka nakoni mwiokoana. Anne naba arom nakon te mwioko ae tataekinan te rongorongo ae raoiroi?

Ngkana ti na botumwaaka n te mwakuri ni minita n aki ongea aia aki bwerengaki taan ongora n aron Itaia, ti riai ngkanne n rarawa ni kaatuui ara iango i aon aroaro aika bubuaka mairouia aomata aika ti aitara ma ngaiia. E tokanikai i aon te bwarannano Rafał ni karaoan aei bwa e kangai: “I kataia n aki kaatuua iangoan aia taeka aika bubuaka. Bon iai inaomataia aomata aika n au aono ni kaeka n aron ae a tangiria.” E reitia Nei Anna ni kangai: “I kekeiaki bwa N na aki iaiangoi baika a aki kakukurei ao ni kabwaranano. E reke buokau bwa N na kona ni karaoa anne man te tatataro ao rinanoan te kibu ibukin te bong imwain nakou nakon te mwakuri ni minita. A waekoa ni kekerikaaki iango aika aki raraoi ngkana iai.”

E mwakuri te burabeti ae Etekiera i buakoia I-Iutaia aika wimatoa ake a kataenikaiaki i Baburon. (Etekiera 2:6) Ngkana e aki karokoa ana taeka te Atua irouia aomata Etekiera, ao iai temanna ae buakaka ae mate ao e tuai n ongo te kauring aei, e na boni bukinaki iai te burabeti aei ni maten te aomata anne. E tua ae kangai Iehova nakon Etekiera: “N na ukoukora boon raraana mai baim.”​—Etekiera 3:17, 18.

E kataia ni katitebooa aroarona Henryk ma Etekiera ngke e kangai: “I kani kaitiakai man raraaia aomata ni kabane. E kakawaki maiuia aomata bwa e a kaan ruanikaia.” (Mwakuri 20:26, 27) Titeboo ana namakin Zbigniew ma anne bwa e kangai: “E riai ni waakinaanako ana beku Etekiera n aki ongeia bwa tera aia iango aomata iai. I buokaki n aei bwa N na taraa te mwakuri n uarongorongo n aron ana taratara te tia Karikiriki.”

Tiaki Tii Ngkoe

Tiaki tii ngkoe ngkana ko karaoa te mwakuri n uarongorongo. N aron te abotoro Bauro, ti kona naba ni kangai: “Raao ni makuri ngaira i bukin te Atua.” (1 I-Korinto 3:9) E kaotia Krystyna bwa e boni bwabwara naba nanona n taai tabetai ngke e kangai: “Anne bukina ae I teimatoa iai ni bubutiia Iehova bwa e na kakorakoraai, ao e bon anganganai te korakora n taai nako ngkana I butiia.” Eng, ti kainnanoa taamnein te Atua bwa e na boutokaira n ara mwakuri ni minita!​—Tekaria 4:6.

Ngkana ti uataboa te uarongorongo, ti buokaki rinanon te taamnei are raoiroi bwa ti na kaotiotii aroaro aika “uaan te Tamnei.” (I-Karatia 5:22, 23) Ao n te aro anne, ti a buokaki iai ni botumwaaka n uarongorongo n aki ongei baika riki nakoira. E taku Henryk: “I buokaki ni kanakoraoi riki aroarou ngkana I kakorakoraai n te mwakuri ni minita. I reiakinna naba bwa I riai ni bwaina te taotaonakinnano ao te atataiaomata ao n aki kai bwarannano.” Ngkana ko nanomwaaka n te mwakuri ni minita n aki ongei bwaai n tutuki aika kakaokoro, ko a kona ni buokaki iai ni karikirakei uaan te taamnei ae raoiroi aika rangi ni bati riki.

E kamanenaia ana anera Iehova ni kairan te mwakuri ae okoro aei. (Te Kaotioti 14:6) E kaotaki n te Baibara bwa iai anera aika “tebubua teea ao ngaa ma ngaa.” (Te Kaotioti 5:11) A boutokaaki ana toro te Atua aika i aon te aba irouia anera i aan ana kairiri Iesu. Ko ururinga anne n am tai ni mwakuri ni minita ni kabane?

E taku Anna: “Kananoan au iango i aon te koaua are bon raora anera ni karaoan ara mwakuri ni minita, boni ngaia nibwani kaungaan nanou. E kakawaki irou te buoka are e reke mairouia anera i aan aia tararua Iehova ao Iesu.” Ai kakabwaiara ngaira ngkai ti a kona ni mwakuri ma anera aika kakaonimaki!

Ti na kanga ni kona ni buokaki n nanomwaaka ngkana ti mwakuri ma taan uarongorongo ake tabeman riki? Ti a tia ni kakabwaiaaki bwa ti a kinaia raoi aomata aika te koraki ae uanao aika taani Kakoaua aika kakaonimaki. Akea te nanououa bwa ko a tia n nora koauan te taeka n rabakau n te Baibara ae kangai: “E taima te biti te biti; Ao ai aron naba te aomata e taima matan raona.”​—Taeka N Rabakau 27:17.

Te kaai ni mwakuri ma tabeman riki n te mwakuri ni minita, e karekea ara tai ae kakawaki are ti na nori iai aanga ni mwakuri aika tao ti tuai n nonori mai imwaina. E taku Elżbieta: “Ngkana I mwakuri ma taan uarongorongo aika kakaokoro, e reke iai au tai ni kaotiota au tangira nakoia raao n te onimaki ao nakoia naba aomata ake ti kaitiboo ma ngaiia.” Kataia n uataboa te mwakuri ni minita ma taani uarongorongo aika kakaokoro bwa e na kakannongora iai am mwakuri ni minita.

Kawakina Raoi Marurungim

Ngkana ti kani kateimatoa ingaingan nanora n te mwakuri ni minita, ti riai ni karaoa raoi ara babaire, ara kaetieti ae teimatoa ibukin ara tai n ukeuke n reirei i bon iroura ao ni karekea motirawara ae tau. N taeka riki tabeua, ti riai ni kawakin raoi ara iraorao ma Iehova ao marurungin rabwatara.

E taekinaki ae kangai n te Baibara: “Ana babaire te aomata ae tataningamarau e na karika te bwaikoraki.” (Taeka N Rabakau 21:5) E taku Zygmunt ae ai 88 ana ririki: “Ibukina bwa iai au kaetieti ae nakoraoi ibukin au mwakuri ni minita, I a buokaki iai bwa e na rangi n uaana au mwakuri. I bairea raoi au tai bwa e aonga n tau au tai n uarongorongo.”

Ti kakorakoraaki ao ni kataubobongaaki n ara mwakuri ni minita man tabwaninin raoi ara atatai man te Baibara. N aron ae ti riai n amwarake ibukini marurungin rabwatara, ti riai naba ni katoatai n amwarake ni bwaai n taamnei bwa ti aonga n teimatoa n uataboa te mwakuri n uarongorongo. Ngkana ti kanuaira n Ana Taeka te Atua ni katoa bong ao ni butimwaei iai ‘amwarake n taia aika riai’ ti a kona ni kakorakoraaki iai n ara mwakuri ni minita.​—Mataio 24:45-​47.

E karaoi bitaki aika rangi ni kakawaki ni kaineti ma aroaroni maiuna Elżbieta bwa e aonga n nakoraoi riki ana mwakuri ni minita. E taku: “E korakora kauarerekean au tai are I kakabanea ngkoa ibukini matakuakinan te TV bwa e aonga ni bati riki au tai ni katauraoi ibukin te mwakuri ni minita. I iangoia aomata ake I a tia ni kaitiboo ma ngaiia n te aono are I mwakuri iai n au tai ni wareware n te Baibara ni katoa tairiki. Ao I ukeri kiibu ao kaongora aika a na kona ni buokaki iai.”

Ko kona ni buokaki bwa ko na kateimatoa korakoram ao ni kona naba ni kabatiaa am tai n uataboa te mwakuri ni minita n aron am kona, mani motirawam ae tau. N te itera teuana, e kona n rotaki buaka raoiroin am mwakuri ngkana e a rangi n riao te kaaki botu. E taku Andrzej, ae te tia uarongorongo ae ingainga nanona: “Ko kona n namakina ae ko rangi ni kua ngkana e aki tau am motirawa, ao maikanne are ai bon tii te rangatana naba nakon te bwarannano. I karaoi bwaai ni kabane ake I kona ni karaoi bwa I aonga n totokoa iai rikin anne.”​—Te Minita 4:6.

E ngae ngke ti rangi ni kakorakoraira ma tii tabeman aika a boni butimwaea raoi te rongorongo ae raoiroi. Ma e ngae n anne, e na bon aki mwanuokin ara mwakuri Iehova. (Ebera 6:10) E ngae ngkana a bati aika a aki kani kataetaeira, ma tao ane a na maroroakina bukin rokora ngkana ti kitania. E kona n anga uaana ae ai aron are ti warekia ibukin Etekiera ae kangai: Ane a na “bon ataia . . . ba e mena te burabeti i buakoia.” (Etekiera 2:5) Ni koauana, e aki bebete karaoan ara mwakuri ni minita ma ti kakabwaiaaki iai ao aomata riki tabeman ake a ongora.

E taku Zygmunt: “E buokira uataboan te mwakuri ni minita ni karina te aomata nabangkai ao ni kaota tangiran te Atua ao raora naba. Bon te mwioko ae rine uataboan te mwakuri ni kakamaiu aei.” E reitia naba Andrzej ni kangai: “E na bon aki okioki aron raababan te mwakuri aei ke n aaro aika titeboo ma aikai.” Ko kona naba ngkoe n taia uaana aika kakabwaia aika bati ngkana ko botumwaaka n te mwakuri ni minita ni boong aikai.​—2 I-Korinto 4:1, 2.

[Taamnei n iteraniba 31]

Ti buokaki n nanomwaaka n te mwakuri ni minita ngkana ti tabeakin raoi baika ti kainnanoi ibukin ara iraorao ma Iehova ao marurungin rabwatara