Aia Titiraki Taani Wareware . . .
Bukin Tera Bwa e Tauraoi n Angania Aomata te Bwaintituaraoi ae te Maiu Are Aki Toki te Atua?
▪ E taekinaki n te Baibara bwa e anganira te Atua te kantaninga ibukini karekean “te maiu are aki toki.” (Ioane 6:40) Ma tera ae e kairia bwa e na anganira te aeka ni kantaninga aei? E bon tii boto i aon te kaetitaeka ae riai?
E irekereke te kaetitaeka ae riai ma karaoan te eti ao te aki inanonano nakoia aomata. Ti tau ni karekea te maiu? Ti bon aki. E taekinaki ae kangai n te Baibara: “Bon akea te aomata ae raoiroi i aonaba, ae kakaraoa ae raoiroi, ae aki bure.” (Te Minita 7:20, BG) Iai te tuuaa imwin te bure. E kauringaki te moan aomata ae Atam iroun te Atua bwa n te bong ae e bure iai ao e na boni mate. (Karikani Bwaai 2:17) Imwina, e kairaki te abotoro Bauro rinanon te taamnei bwa e na korea ae kangai: “Boon te bure te mate.” (I-Rom 6:23) Mangaia are, ngkana ngaia bwa e eti ae a bon tau ni mate kanoan nako Atam, bukin tera ngkanne bwa te Atua e tauraoi n angania te kona ni maiu n aki toki?
Katauraoani kantaningaan te maiu are aki toki bon “te bwaintituaraoi ae akea boona.” Boni kaotani korakoran ao raababan ana tangira te Atua ao ana akoi ae rianako. E taekinaki ae kangai n te Baibara: “A bane ni bure aomata ao a bane ni kabwaka ni kaotiotii aroaron te Atua aika moanibaa n raraoi. Ma e angania te Atua te bwaintituaraoi ae akea boona, ngke e atongia bwa a raoiroi n ana akoi ae rianako. E boto aei i aon te kainaomataaki ae reke man te kaboomwi, are e kabwakaaki boona irouni Kristo Iesu.”—I-Rom 3:23, 24.
E ngae ngke ti bane n tau ni mate, ma e baireia te Atua bwa e na anga te maiu are aki toki nakoia ake a tangiria. Te inanonano ngkanne aei? E taekinaki ae kangai n te Baibara: “Tera ngkanne ae ti na taekinna? Iai te ribuaka iroun te Atua? Tiaki ngaia anne ae na riki! Bwa e taku nakoni Mote: ‘N na nanoangaa ane I kan nanoangaia, ao N na kaota te atataiaomata nakon ane I kan atataiaomata nakoina.’ . . . Kaanga antai ngkoe ngkai ko kabootaeka nakon te Atua?”—I-Rom 9:14-20.
N taabo tabeua n te aonnaba, e kona te aomata ae iai nakoana ae rietata n te tautaeka ke te tia moti, ni kainaomataa te aomata ae te tia kakeru ae e katuuaaeaki n te aro ae korakora. Ngkana e kukurei te tia bure anne n iri nanon tuua ni katuuaaeana ao ni kaotiota bitakin ana iango ao aroarona, tao e a kona ngkanne te tia moti ke te beretitenti n iangoa kabwaraan ana bure rinanoni kabebetean tuuaana ke boni kainaomataana mani katuuaaeana. E kona ni kaotiotaki raoi te akoi ae rianako n te aeka ni mwakuri aei.
N aron naba anne, e kona Iehova ni baireia bwa e na aki kamatoaa katuuaaeaia taani bure nako ake a bon tau ni katuuaaeaki. Ma e kairaki n te tangira bwa e na kona n anga te maiu are aki toki nakoia ake a tangiria ao ni maiuakini ana kaetieti nako. E taekinaki ae kangai te Baibara: “E aki inanonano te Atua, ma a butimwaeaki irouna aomata ni kabaneia aika maakua ma ni kakaraoa ae raoiroi, mai buakoia botannaomata nako.”—Mwakuri 10:34, 35.
Ana mwakuri n tangira Iehova ae te kabanea ni korakora ibukira, boni kanakoan Natina bwa e na karawawataaki ao ni mate ibukira. E taekina ae kangai Iesu ibukin Tamana: “E rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane onimakinna, ma e na reke irouna te maiu are aki toki.”—Ioane 3:16.
N aki ongeia bwa tera rikiaia aomata nako ake a tangira Iehova ao ni kakaraoa nanona, ma a bane n tii te tikina aron tangiraia iroun te Atua. Ai ngaia are, te kantaninga ibukin te maiu are aki toki, bon te bwai ae rangi ni kakawaki ibukini kaotiotan te akoi ae rianako, ae te mwakuri ae kaota te tangira ae moanibaan te raoiroi mairoun te Atua.
[Kabwarabwaraan n iteraniba 25]
E rangi ni moamoa riki kakawakin te kantaninga ibukin te maiu are aki toki ibukini kaotiotan te akoi ae rianako, ae te mwakuri ae kaota te tangira ae moanibaan te raoiroi