Te Mwakuri ae Okoro ae Baireaki Raoi ae Uaana
Bon te tia uarongorongo ae ingainga ae te roro n rikirake Maria Isabel n te kaawa ae San Bernado i Amerika Maiaki n te aba ae Chile. Boni kaain raoi te kaawa ae Mapuche ana utu neiei. A bane kaain ana utu neiei n ingainga ni boutokai mwakuri nako, ibukini katean te ekaretia ae boou n te taetae naba ni Mapuche ae te Mapudungun.
E iangoa te bae e na karaoia Maria Isabel, ngke e katanoataaki bwa e na karaoaki Kauringani mateni Kristo n te taetae ni Mapudungun ao a a tauraoi n tibwaaki nako beeba ni kakao aika 2,000 ibukin te Kauring. Tera ae e kona ni karaoia bwa e aonga n ibuobuoki? E uringi rongorongoia rooro n rikirake aika taani Kakoaua ake a uaana aia uarongorongo nakoia raoia n reirei ao taan reirei. E maroroakina ana iango aei ma ana karo ao a a kaai n iangoia bwa e na kataia ni karaoa ana babaire Maria Isabel ibukin tibwaani beeba ni kakao n te reirei. Tera are e karaoia?
Te moanibwai, e bubutii nakoia mataniwi n te reirei ibukini kariaiakana bwa e na kanimwa ana beeba ni kakao ni mataroan te tabo n reirei. A kariaia ana bubutii neiei ao a kamoamoaa ibukini mwamwakurin ana iango. N te ingabong teuana n tain te weteara, ao e a katanoataa taekan te beeba ni kakao te mataniwi n te reirei i aon te bwai n taetae!
Imwina, e a bubutii Maria Isabel bwa e na tibwai ana beeba ni kakao n ruun te tabo n reirei ni kabane. Imwini kariaiakana irouia taan reirei, e a titirakinia ataein ruu aikai ni kabane bwa iai kaaini Mapuche i buakoia ke akea. E taku: “N au iango, tao tii 10 ke 15 ataei aika kaain Mapuche n te reirei ma ngaia e raka riki, ao n tokina I a anganako beeba ni kakao aika 150!”
“E KANTANINGAIA BWA TE AOMATA AE IKAWAI RIKI”
E nora te katanoata ibukin te beeba ni kakao ni mataroan te tabo n reirei te ateiaine temanna ao e titiraki bwa antai ae e riai n ongora irouna. Iangoa kubanakon neiei ngke e a kairaki nakon te ataeinnaine ae tebwina ana ririki! E moangare Maria Isabel ao e taku: “E kantaningaia bwa te aomata ae ikawai riki.” Ngke e a tia ni kabwarabwaraa te beeba ni kakao ao n anganna, e a titirakinna ana atureti bwa e aonga ni kawaria ma ana karo n tuangnga baika bati riki ibukin Ana Tautaeka n Uea te Atua. Ai kimwareireira taan uarongorongo aika 20 mwaitiia ake a mwiokoaki n aonon te taetae ae te Mapundungun ngke a a nora te ateiaine anne ao n raonaki irouia 26 riki ake a kan ongora mai buakoia kaaini Mapuche, bwa a roko n ira te Kauring. E a rangi ni maiureirei te ekaretia anne ngkai!
Ko kona ni kammwakura am iango n aron naba anne ni kaoia raom n reirei ke raom ni mwakuri nakon te Kauring, te kabwarabwara ibukia aomata nako, ke te bwabwaro, n aki ongeia bwa iraua am ririki? E aera ko aki karaoa am kakaae n ara boki ao n nori rongorongo ake a kona n anganiko iango i aon aroni karaoan te aeka ni mwakuri anne n te aro ae uaana? Tataroakina naba te taamnei ae raoiroi mairoun Iehova bwa e na buokiko ni kaninikoriako n taetae ibukina. (Ruka 11:13) Ngkana ko karaoa anne, ko kona naba ni kubanako ma ni kimwareirei ao n rangi ni kaungaaki ni mwin am mwakuri ae baireaki raoi ae uaana.