“E a Reke Iroura te Mesia”!

Aua tabun te tienture imwini koreani kabaneani mwakoron te Baibara n Ebera ao e a kakororaoaki ana taetae ni burabeti Mika ibukin te Mesia: E boni bungiaki Iesu i Betereem. Tao 30 te ririki imwina n 29 C.E., e a kakororaoaki moani mwakoron ana taetae ni burabeti Taniera ibukin rokon te Mesia. E boni bwabetitoaki Iesu ao e kabiraki n te taamnei ae raoiroi iroun te Atua. E roko raoi n taina are e a kamani kakantaningaaki iai te Kariki ae te Mesia!

E waekoa ni moana ana mwakuri ni minita Iesu “n tataekina te rongorongo ae raoiroi ae taekan ana tautaeka n uea te Atua.” (Ruka 8:1) N aron are e a tia n taetae ni burabetinaki, e kakoauaaki bwa e bon akoi Iesu, e nanorinano ao e tabeakinia aomata ma nanona ni koaua. A manena ma n tatangira ana reirei ao e katoki “aeka n aoraki nako,” ike e a kaotia iai bwa e memena te Atua irouna. (Mataio 4:23) A baneakina Iesu aomata aika kakaokoro nako aia ririki ni maiu ao a kangai: “E a reke iroura te Mesia”!​—Ioane 1:41.

E a kaman taekinna Iesu bwa imwain raoi are e na kairiri n ana Tautaeka n Uea ao e na iai te buaka, te mwaeiei ao kangaanga aika bati riki n te aonnaba. E kaumakira ni kabane bwa ti na “teimatoa n tantani.”​—Mareko 13:37.

Iesu bon te mwaane ae kororaoi are e teimatoa n ongeaba iroun te Atua, ma bon iai taan riribaia ake a taua ni kamatea. Mangaia are e katauraoa te karea ae kororaoi ni matena bwa e aonga ni kaoka nakoira te bwai are a kabuaa Atam ma Ewa, ae te kantaninga ibukin te maiu ae akea tokina n te Bwaretaiti.

E kakororaoaki te taetae ni burabeti ni maten Iesu, n ai aron naba kautakina imwin tenibong iroun te Atua bwa te anera ae mwaaka. E a kaoti ngkanne Iesu nakoia taan rimwina aika e raka i aon 500 mwaitiia. Imwaini waeraken Iesu nako karawa, e mwiokoia taan rimwina bwa a na tataekina te rongorongo ae raoiroi ibukina ao ana Tautaeka n Uea nakoia “aomata mai buakoia botannaomata nako.” (Mataio 28:19) A kanga ni waakina raoi te mwioko anne?

​—E boto aei i aoni Mataio, Mareko, Ruka, Ioane, 1 I-Korinto.