E Bairea Kamaiuaia Botannaomata te Atua

E berita te Atua nakon Aberaam are kakaonimaki bwa e na riki “te kariki” are e taetae ni burabetinna mai buakoia kanoana. A na karekei kakabwaia ‘botannaomata ni kabane’ rinanon te kariki anne. (Karikani Bwaai 22:​18, BG) E mwaing imwina riki tibun Aberaam are Iakoba nako Aikubita ike e a rikirake iai ana utu man riki bwa te natannaomata ae Iteraera rimoa.

Imwina, a bon tautoronaki tibun Iteraera i Aikubita iroun te Barao ae tuamatoa ni karokoa kateirakean te burabeti ae Mote iroun te Atua, bwa e na kairiia nako te natannaomata anne man te aba aei n rinukan Taari ae Uraura ae bwenaua n te aro ni kakai. Imwin anne, a anganaki tibun Iteraera te tua iroun te Atua n ikotaki ma Tuua Ake Tebwina are a na kairiraki ao ni kamanoaki iai. A katereaki n tuua akanne angakarea ibukini kabwaraani buure. Ni kairan Mote iroun te Atua, e a tuangia iai tibun Iteraera are e na karekeaki aia burabeti riki temanna iroun te Atua. Te burabeti anne bon “te kariki” are e beritanaki.

E raka i aon 400 te ririki imwina, e a berita te Atua nakon te Uea ae Tawita bwa teuare e nangi roko, bon “te kariki” are e taetae ni burabetinaki i Eten are e na kairiri n te tautaeka ae akea tokina. Teuanne bon te Mesia are te tia Kamaiu ae rineaki iroun te Atua bwa e na kamaiuia botannaomata ao ni manga kaoka te aonnaba nakon te Bwaretaiti.

E kaotiota taekan te Mesia ae bati riki teutana imwin teutana te Atua rinanon Tawita ao burabeti riki tabeman. A taetae ni burabetinna bwa e na nanorinano ma n akoi ao e nang toki te baki, te ribuaka ao te buaka i aan ana tautaeka. A na karekea te rau aomata ni kabane i marenaia n ikotaki naba ma maan. Bon tiaki ana moani kantaninga te Atua te aoraki, te rawawata ao te mate, mangaia are a na boni kamaunaaki ma a na kautaki nakon te maiu i aon te aonnaba aomata ake a tia ni mate.

E taetae ni burabetinna te Atua rinanon te burabeti ae Mika bwa e na bungiaki te Mesia i Betereem, ao rinanon te burabeti ae Taniera bwa e na tiringaki imwina riki. Ma e na kauta te Mesia mai buakoia maate te Atua ao n rineia bwa te Uea i Karawa. E taetae ni burabetinna naba Taniera bwa n tokina ao a na kamaunaaki tautaeka ni kabane n te Tautaeka n Uea iroun te Mesia. E koaua bwa e roko te Mesia n aron ae taetae ni burabetinaki?

​—E boto aei i aoni Karikani Bwaai mwakoro 22-50, n ikotaki naba ma Te Otinako, Te Tua-Kaua, 2 Tamuera, Taian Areru, Itaia, Taniera, Mika, Tekaria 9:9.