Ana Kainnewa te Mate

E rangi ni kananokawaki maroroakinan te mate. A bati aomata aika a aki kani maroroakinna. Ma rimwi riki ke n te tai ae waekoa, ti na bon rotaki iai. E na karina n roko ana kainnewa te mate ao e kammaraki.

Akea te bwai ae kona ni katauraoira ni bwaai ni kabane imwaini maten ara karo, buura ke natira. E kona ni karina n taonira te nanokawaki ke ti kaotiotia i nanon te tai ae maan. E ngae ngke antai ae mate, ma ti bon aki kona ni birinako mani kammarakina ao n tokina e kona n rangi ni kauruakinano.

E taku Antonio are e mate tamana n te kabuanibwai n te kawai: “Ai aron ae iai ae rokana am auti ao e uotaanako kiingina. Ko bon aki kona n okira mwengam i nanon tabeua te tai. Ko a tiku naba ma tii ururingana. Bon te namakin ni koaua ae boou aei. E ngae ngke ko kataia ni kakewea kioina ngkai e taraa n aki eti ma bon akea te bwai ae ko kona ni karaoia.”

Ngke e aitara ma te aekaki anne Dorothy ae 47 ana ririki are akea buuna ao e boni motinnanoia bwa e na ukeri kaekaan titiraki tabeua. Ngkai bon te tia Reirein Taabati neiei, e tuai mani kakoauaa ae tokini bwaai nako bon te mate. E ngae ngke e reireinia ataei bwa ti teimatoa ni maiu imwini matera, ma e bon aki ataia raoi bwa tera ae riki imwin te mate. E titirakina ana mitinare n ana Aro ae te Anglican neiei ni kangai: “Tera ae na riki ngkana ti mate?” E kaekaa ni kangai: “Akea ae kona n ataia raoi, ma ti na tii taotaon nanora ao n aki raraoma.”

E koaua bwa ti karikaki bwa ti na tii “taotaon nanora ao n aki raraoma”? Iai te anga teuana ae ti kona ni kakoauaa raoi bwa tokini bwaai nako te mate?