Kimwareirei n Ana Mare te Tiibutetei!
“Ti na kimwareirei ao ti na kakatonga . . . bwa e a roko ana tai ni mare te Tiibutetei.”—TE KAOTIOTI 19:7.
1, 2. (a) Antai ana mare ae e na karekea te kukurei ae okoro i karawa? (b) Baikara titiraki aika rio mai iai?
E KAINNANOAKI n taai nako te tai ae maan ibukin te katauraoi n te mare. Ma ti na kabotoi ara iango i aon te mare ae okoro ae ana mare te uea. Iangoa moa aei! E a tia ni waaki te katauraoi i nanon tao 2,000 te ririki. Ao e a rangi ni kaan ngkai te tai ae e nang katiteuanaaki iai te tia mare te mwaane ma te tia mare te aine. N te tai ae waekoa ao e nang katangaki te anene ni kimwareirei ae bati n ana baareti te Uea, ao a na anene aomata aika mwaitikurikuri i karawa ni kangai: “Kam na karaoiroa Iah, ibukina bwa e a moana tautaekana bwa te uea, Iehova ae Atuara ae Moan te Mwaaka. Ti na kimwareirei ao ti na kakatonga, ao ti na anganna neboana, bwa e a roko ana tai ni mare te Tiibutetei ao e a tauraoi neiere buuna nakon te mare.”—Te Kaotioti 19:6, 7.
2 Bon akea riki i rarikin “te Tiibutetei” ae Iesu Kristo ae na karekea te kukurei i karawa n ana mare. (Ioane 1:29) Tera aroni kunnikaina ni mare? Antai ae e na mare ma ngaia? Tera aroni katauraoan te aine anne ibukin te mare? E na boo n ningai te mare? E na karekea te kukurei i karawa te mare aei ma a na ira buakon te kimwareirei anne naake a kantaningaa te maiu n aki toki i aon te aba? Ibukin ingaingara ni kariariaa te tai anne, ti na rinanoi titiraki akanne ngkai ti reitaanako neneran Taian Areru 45.
‘A KABOIARARAAKI ANA KUNNIKAI’
3, 4. (a) Tera ae taekinaki ibukin ana kunnikai ni mare te tia Mare te Mwaane, ao tera ae karakaa kimwareireina? (b) Antai “natiia uea aika aine” ao “te uea te aine’ ake a uataboa kimwareirein te tia Mare te Mwaane?
3 Wareka Taian Areru 45:8, 9, BG. E karini kunnikaina ni mare aika moan raraoi aika bwaina n uea te tia Mare te Mwaane ae Iesu Kristo. E tonuraoi ngkai e anga te boi ae kakukurei kunnikaina kaanga aroni “boiarara aika moa n raraoi” n aron te mura ma te katia, ake a mena i buakon rengarenga ibukin te kabira are te bwaa ae tabu ae kamanenaaki irouia tibun Iteraera.—Te Otinako 30:23-25, BG.
4 E karakaaki kimwareirein te tia Mare te Mwaane n te anene ae korakora i karawa n ana baareti, ike e a namakinna iai bwa e uakaan ana mare. E uataboaki kimwareireina iroun “te uea te aine” ae ana botaki te Atua i karawa ao raoia naba “natiia uea aika aine” aika anera aika itiaki. Ai kakukureira ongoraean te bwanaa mai karawa ae kangai: “Ti na kimwareirei ao ti na kakatonga . . . bwa e a roko ana tai ni mare te Tiibutetei”!
KATAURAOAN TE TIA MARE TE AINE IBUKIN TE MARE
5. Antai “buun te Tiibutetei”?
5 Wareka Taian Areru 45:10, 11, BG. Ti a kinaa te tia Mare te Mwaane ma antai ngkanne te tia mare te aine? Bon tiaki raoi te aomata ma e tei ibukia Kristian aika kabiraki aika 144,000 mwaitiia. Iesu bon atun te ekaretia aei are kaainaki irouia taani kabiraki. (Wareka I-Ebeto 5:23, 24.) A na riki naba bwa kaain te Tautaeka n Uea iroun te Mesia ae Kristo. (Ruka 12:32) A teimatoa Kristian aika kabiraki n te taamnei aika 144,000 mwaitiia “n ririmwin te Tiibutetei n aki ongeia bwa taabo raa ike e nako iai.” (Te Kaotioti 14:1-4) A a maeka ma ngaia ni nnena ni maeka i karawa kioina ngkai a a riki bwa “buun te tiibutetei.”—Te Kaotioti 21:9; Ioane 14:2, 3.
6. E aera ngkai a atongaki taani kabiraki bwa “natin te uea te aine,” ao bukin tera bwa a reireinaki bwa a na ‘mwanuokinia aia aomata’?
6 E aki tii taekinaki buun te tiibutetei n te tai ae na roko bwa “te ateiaine” ma e aranaki naba bwa “natin te uea te aine.” (Taian Areru 45:13, BG) Antai te “uea” aei? Bon Iehova. A bon ‘natinaki’ iroun Iehova Kristian aika kabiraki. (I-Rom 8:15-17) Kioina ngkai a na riki taani kabiraki bwa te aine ae te tia mare i karawa, a a reireinaki aei: “Manuokiia naba am aomata ma ana auti tamam.” A riai n teimatoa ni “kaatuui [aia] iango i aoni bwaini karawa, ao tiaki bwain aon te aba.”—I-Korote 3:1-4.
7. (a) Tera aroni Kristo ni katauraoa buuna nakon taai aika a na roko? (b) Tera ana iango te tia mare te aine ibukini buuna n taai aika a na roko?
7 E katauraoa buuna Kristo nakon taai aika a na roko ibukin te mare i karawa i nanon tienture aika bati. E kabwarabwaraa te abotoro Bauro bwa “e tangira te ekaretia [Kristo] ao e anga boni ngaia ibukina bwa e aonga ni katabua ni kaitiakia n te ran rinanon te taeka n te aro bwa e na anga te ekaretia bon nakoina, ae te ekaretia ae tamaroa, ae akea baarekana ke bwarukurukuna, ke baika ai aroni baikai, ma e riai n itiaki ao n akea waewaeana.” (I-Ebeto 5:25-27) E tuangia Kristian aika kabiraki i Korinto rimoa Bauro ni kangai: “I tauaninne iroumi n aron ana tauaninne te Atua, bwa I a tia ni kabaeingkami bwa kam na mareaki ma te mwaane ae tii temanna ae te Kristo ao I kan anga ngkami nakoina bwa kaanga te teinnaine ae itiaki.” (2 I-Korinto 11:2) E kakawaki iroun te tia Mare te Mwaane ae Iesu Kristo ‘tamaroan’ ana onimaki buuna n taai aika a na roko. Ao e kinaaki iroun te tia mare te aine bwa ana “uea” ao e ‘bobaraaki nakoina’ ngkai boni buuna n taai aika a na roko.
E “KAIRAKI NAKON TE UEA” TE TIA MARE TE AINE”
8. E aera ngkai e tonuraoi kabwarabwaraan te tia mare te aine bwa “moan te tamaroa”?
8 Wareka Taian Areru 45:13, 14a, BG. E a kairaki te tia mare te aine ae “moan te tamaroa” nakon ana mare te uea. E kabotauaki te tia mare te aine ma te kaawa ae Ierutarem ae Boou n Te Kaotioti 21:2 ao e “katamaroaaki imwaini buuna.” E mimitong ni “mimitongin te Atua” te kaawa ae mena i karawa aei ao raneaneana “ai aron te atibu ae moan te kakawaki, ae ai aron te atibu ae te iatiba ae raneanea n aron raneanean te kirutitaro.” (Te Kaotioti 21:10, 11) E kabwarabwaraaki tamaroan Ierutarem ae Boou n te aro ae anainano n te boki ae Te Kaotioti. (Te Kaotioti 21:18-21) Maroaka are e kabwarabwaraaki te tia mare te aine iroun te tia areru bwa “moan te tamaroa”! Aio te bwai ae ti na kantaningaia n ana mare te uea i karawa.
9. Antai “te uea” are e uotaki nakoina te tia mare te aine, ao tera aroni kunnikain neiei?
9 E uotaki te tia mare te aine nakon Teuare te tia Mare te Mwaane are te Uea ae te Mesia. E a tia ni katauraoa neiei ni ‘kaitiakia n te ran rinanon te taeka.’ E ‘itiaki neiei n akea waewaeana.’ (I-Ebeto 5:26, 27) E riai naba te tia mare te aine n tonuraoi kunnikaina ma te tai anne. Ao e boni karaoa anne! Ni koauana, ‘e katamaroaaki kunnikaina n te koora’ ao ‘e na kairaki nakon te uea ma kunnikaina ae moan te tamaroa ae manimaninaki.’ Ibukini ngkanne ana mare te Tiibutetei, “e kariaiakaki neiei bwa e na kunnikainna n te rinen ae raoiroi ae raneanea ae itiaki, bwa e tei te rinen ae raoiroi ibukin aia mwakuri aika raraoi, te koraki aika itiaki.”—Te Kaotioti 19:8.
‘E A ROKO TAIN TE MARE’
10. E na boo n ningai ana mare te Tiibutetei?
10 Wareka Te Kaotioti 19:7. E na boo n ningai ana mare te Tiibutetei? E ngae ngke ‘e a tia ni katauraoia neiere buuna’ ibukin te mare, ma te bwai ae taekinaki imwina bon tiaki kabwarabwaraan te mare raoi. Ma e anga te kabwarabwara ae mataata ibukini kabaneani bongin te rawawata ae korakora. (Te Kaotioti 19:11-21) E nanonaki n aei bwa e na boo te mare imwain are e na bon tokanikai iai te tia Mare te Mwaane ae te Uea? Tiaki ngaia anne. A aki karinanaki raoi miitara aika n Te Kaotioti n taia ake a riki iai. E taekinaki ana mare te uea n Taian Areru 45 bwa e na boo imwini kabaean ana kabaang te Uea ae Iesu Kristo ao ‘mwanangana n tokanikai’ i aoia naake a riribaia.—Taian Areru 45:3, 4, BG.
11. Tera ae na karaoia Kristo imwaini waakinan te mare?
11 Mangaia are ti a kona n iangoia bwa e kangai karinanakin raoi baika riki n taia: Te moan, e na motikaki taekan “te kabekaau” are Baburon ae Kakannato are te botaki n Aro ae kewe ae katobibia te aonnaba. (Te Kaotioti 17:1, 5, 16, 17; 19:1, 2) Imwina, e na waakinaki ana motikitaeka te Atua irouni Kristo i aoia nikiran ana waaki ae buakaka Tatan i aon te aba, rinanoni kamaunaakina n Aremaketon ae “te buaka n te bong ae kakannato ae ana bong te Atua ae Moan te Mwaaka.” (Te Kaotioti 16:14-16; 19:19-21) Ni kabaneana, e na bon tokanikai te tia Buaka ae te Uea ngkana e a karenakoa Tatan ma ana taimonio nakon te kinono, ni kainia n te aro are kaanga a a mate.—Te Kaotioti 20:1-3.
12, 13. (a) E na boo n ningai ana mare te Tiibutetei? (b) Antai aika a na kimwareirei n ana mare te Tiibutetei i karawa?
12 A na kautaki bwa a na maiu i karawa Kristian aika kabiraki ngkana a kakaonimaki n uaa mateia ni kabaneani boong. Tabeua te tai imwini kamaunaani Baburon ae Kakannato, e na botiia Iesu nikiraia ni kabane te koraki ake a a riki bwa buuna. (1 I-Tetaronike 4:16, 17) Mangaia are imwaini moanakin te buaka ae Aremaketon, a na bane n roko i karawa te koraki ake a a riki bwa ‘buuna.’ Imwin te buaka anne, e a kona ni waakinaki ana mare te Tiibutetei. Ai kakukureira te mare anne! E taekinaki ae kangai n Te Kaotioti 19:9: “A a kukurei akana kaoaki nakon te baka n amwarake ibukin ana mare te Tiibutetei.” Ni koauana, a na rangi ni kimwareirei te koraki ake a a riki bwa buun te Tiibutetei aika 144,000 mwaitiia. Ao e na kakatonga te Uea ae te tia Mare te Mwaane ngkana e a bwanin raoi mwaitiia raona n uea ao a na ‘amwarake ma ni moi n ana taibora n ana Tautaeka n Uea’ n te aro ni kaikonaki. (Ruka 22:18, 28-30) Ma e ngae n anne, e na aki onoti te kimwareirei ibukin ana mare te Tiibutetei tii nakon te tia Mare te Mwaane ao te tia mare te aine.
13 N aron ae ti ataia mai moa riki, a botaki n anene kaaini karawa aika mwaitikurikuri ni kangai: “Ti na kimwareirei ao ti na kakatonga, ao ti na [angan Iehova] neboana, bwa e a roko ana tai ni mare te Tiibutetei ao e a tauraoi neiere buuna nakon te mare.” (Te Kaotioti 19:6, 7) Ma tera aroia ana toro Iehova i aon te aba? A na uataboa naba te aeka ni kimwareirei anne?
“A NA KAIRAKI MA TE KUKUREI”
14. Antai ‘kibono aika raon’ te tia mare te aine aika taekinaki n Taian Areru 45?
14 Wareka Taian Areru 45:12, 14b, 15, BG. E a kaman taekinna te burabeti ae Tekaria bwa n tain te toki ao a na kukurei ni bobotaki aomata man natannaomata ma nikiraia tibun Iteraera n taamnei. E korea ae kangai: “Ni boong akekei ao a na taua ririn temanna tengaun te aomata mai buakon taetaeia botanaomata ni kabane, eng, a na bon taua ririn temanna ae te I-Iutaia, ao a na kangai, Ti na airi ma ngkami, ba ti ongo ba E memena te Atua i roumi.” (Tekaria 8:23, BG) E taekinaki n Taian Areru 45:12 “tengaun te aomata” n te aro ni kaikonaki bwa “natin Turo te aine” ao a “kaubwai i buakoia aomata.” A roko nakoia nikiraia taani kabiraki ma bwaintituaraoi, ao ni ‘butiia akoaia’ ao buokan aia onimaki. A a tia mirion ma mirion ni butimwaea ‘rairaia nakon te raoiroi’ irouia nikiraia taani kabiraki ni moa man 1935. (Taniera 12:3, BG) A a tia raoia Kristian aika kabiraki ake a kakaonimaki ni koaua ni kaitiakii maiuia ao n riki bwa kibono aika korakora aia onimaki. A a tia ‘kibono aika raon’ te tia mare te aine aikai ni katabui maiuia nakon Iehova ao ni kaotiia bwa a aantaeka nakon te tia Mare te Mwaane ae te Uea.
15. Tera aroia ‘kibono aika raon’ te tia mare te aine ni kaai ni mwakuri ma te koraki ake a a riki bwa buun te Tiibutetei i aon te aba?
15 A rangi ni kakaitau riki nikiraia te koraki ake a a riki bwa buun te Tiibutetei irouia ‘kibono aika raon’ te tia mare te aine, ngkai a ingainga ni buoka tataekinan “te rongorongo ae raoiroi aei ae taekan te tautaeka n uea” ni kabutaa te aonnaba. (Mataio 24:14) A aki tii “teimatoa ni kangai, te taamnei ao te tia mare te aine: ‘Nakomai!’ ” ma a kangai naba te koraki aika ongo anne: “Nakomai!” (Te Kaotioti 22:17) Eng, a ongo “tiibu tabemwaang” aia taeka naake a a riki bwa buun te Tiibutetei ae kangai: “Nakomai!” ao a raonia ni kangai naba “Nakomai!” nakoia kaain te aonnaba.—Ioane 10:16.
16. Tera te kakabwaia are e a tia Iehova n angania tiibu tabemwaang?
16 A tangiriia raoia nikiraia taani kabiraki ao a kukurei n ataakin ae e a tia Taman te tia Mare te Mwaane ae Iehova, n angania tiibu tabemwaang i aon te aba kakabwaiaaia ae uataboan te kimwareirei ibukin ana mare te Tiibutetei i karawa. E taetae ni burabetinaki bwa “a na kairaki ma te kukurei ma te kakatonga” ‘kibono aika raon’ te tia mare te aine. Eng, a na uataboa te kimwareirei n te iuniweeti tiibu tabemwaang ake a kantaningaa te maiu n aki toki i aon te aba, ngkana e a boo ana mare te Tiibutetei i karawa. E tonuraoi ngkanne taekinaia kaain te “koraki ae uanao” n te boki ae Te Kaotioti bwa a “tei i matan te kaintokanuea ao i matan te Tiibutetei.” A beku iroun Iehova n oon ana tembora n taamnei i aon te aba.—Te Kaotioti 7:9, 15.
“A NA RUA MWIIA AM BAKATIBU NATIM”
17, 18. E na kanga ni kariki uaa aika bati ana mare te Tiibutetei ao antai ake a na riki bwa tamaia Kristo n ana tai n Tautaeka ae Maanna Tenga te Ririki?
17 Wareka Taian Areru 45:16, BG. E na reke bukini kimwareireia riki teuana ‘kibono aika raoni’ buuni Kristo i karawa ngkana a a nora te mare bwa e a kariki uaa aika bati n te waaki ae boou i aon te aba. Ao te Uea are te tia Mare te Mwaane, e na kautiia ana “bakatibu” ake a na riki bwa “natina” i aon te aba. (Ioane 5:25-29; Ebera 11:35) E na rineia “mataniwi” ni kabutaa te aba mai buakoia naati aikai. Akea te nanououa bwa e na rineia Kristo tabemwaang mai buakoia unimwaane n te ekaretia aika kakaonimaki ni boong aikai bwa a na mataniwi n te waaki ae boou i aon te aba.—Itaia 32:1.
18 E na riki Kristo bwa tamaia aomata n ana tai n Tautaeka ae Maanna Tenga te Ririki. Ni koauana, a na boni karekea te maiu n aki toki kaain aon te aba ni kabane ibukina bwa a kaotiota onimakinan ana karea ni kaboomwi Kristo. (Ioane 3:16) Ngaia are e a riki iai bwa ‘Tamaia ae Akea-tokina.’—Itaia 9:6, 7, BG.
E KAUNGAAKI BWA ‘E NA KARAOA ARANA BWA E NA URURINGAKI’
19, 20. Tera aron rotakia Kristian ni kabane ni boong aikai ni baike a riki aika kakukurei n Taian Areru 45?
19 Wareka Taian Areru 45:1, 17, BG. Ni koauana, a kaineti nakoia Kristian ni kabane baika a riki aika koreaki n Taian Areru 45. A rangi ni kimwareirei nikiraia taani kabiraki i aon te aba n te kantaninga are a na waekoa ni katiteuanaaki ma tariia ao te tia Mare te Mwaane. A kaungaaki tiibu tabemwaang bwa a na aantaeka riki nakon aia Uea ae mimitong ao ni kakaitau naba ngkai a a botaki ma nikiraia te koraki ake a a riki bwa buun te Tiibutetei i aon te aba. Imwin te mare, a na anga kakabwaia aika aki kona ni warekaki mwaitiia, Kristo ma raona n ana Tautaeka n Uea nakoia kaain te aonnaba.—Te Kaotioti 7:17; 21:1-4.
20 Ngkai ti iaiangoi taai aika imwaira ibukini kakororaoan “te bwai ae raoiroi” ibukin te Uea ae te Mesia, tiaki ngkanne kaungaaki bwa ti ‘na karaoa arana bwa e na ururingaki’? Ti bia mena i buakoia naake a na ‘katituaraoa te Uea n aki totoki.’