Te Bwai ae E na Karaoia te Atua Ibukin te Buakaka

E kamatataaki raoi nakoira n te Baibara te bwai ae e na karaoia Iehova ma Natina ae Iesu Kristo ibukin te rawawata ae riki mairoun Tatan te Riaboro. E taekinaki ae kangai n te Baibara: “Ibukin aei, ao e a kaotaki Natin te Atua [ae Iesu] bwa e aonga n urui ana mwakuri te Riaboro.” (1 Ioane 3:8) E boto te waaki ae ngkai i aon te nanonrang, te riribai ao mwakuri aika buakaka aika a na kamaunaaki. E berita Iesu bwa e na “kabwakaaki” Tatan te Riaboro ae “te tia tautaeka i aoia kaain te aonnaba aei.” (Ioane 12:31) Ngkai ai akea ana kariri Tatan, e na kateaki ngkanne te waaki ae boou i aon te aba ao e na riki te aonnaba aei bwa te tabo ae rau.—2 Betero 3:13.

Ma tera aroia naake a imanono n rawa ni bitii aroaroia ao ake a teimatoa ni karaoi baika bubuaka? Iaiangoa te berita ae mataata aei: “A na maekana aon te aba akana raoiroi, Ao a na tiku i aona akana moa n raoiroi. Ma a na teweaki nako akana buakaka mai aon te aba, Ao a na taekaki taani bure mai nanona.” (Taeka N Rabakau 2:21, 22, BG) A nang mauna aia kariri aomata aika buakaka. A na mena i aan aekani waaki aika rau akanne aomata aika ongeaba teutana imwin teutana ao ni kainaomataaki man rikiaia ae te aki kororaoi.—I-Rom 6:17, 18; 8:21.

E na kanga te Atua ni kamauna te buakaka n te waaki ae boou i aon te aba anne? Tiaki mani kakeaani bongan te bwaintituaraoi ae te inaomata n rinea ae ti na karaoia ao karaoaia aomata aika aroia robots. Ma e na reireinia aomata aika ongeaba kawaina nako ao ni buokiia bwa a na bitii maiuia man iangoan ao karaoani baika karuanikai.

Tera ae e na karaoia te Atua ibukini kangaanga aika aki kantaningaaki? E a tia ni berita bwa e na waekoa ana Tautaeka n Uea n tautaekana te aonnaba. E rineaki Iesu Kristo iroun te Atua bwa te Uea n te Tautaeka n Uea anne, ike e a mwaaka iai ni katoki aoraki. (Mataio 14:14) Iai naba mwaakan Iesu n tautaekani bwain nako te aonnaba. (Mareko 4: 35-41) Mangaia are e nang toki te rawawata are e riki n “aia bong ma aroia aika aki ataaki.” (Te Minita 9:11, BG) A na akea te kabuanibwai ae na bwakaria te botannaomata i aan ana tautaeka Kristo.—Taeka N Rabakau 1:33.

Tera aroia aomata aika raoiroi aika mirion ma mirion ake a karawawataaki ni mateia aika kakaiaki? E taku Iesu teutana te tai imwaini kautan raoraona are Rataro: “Boni ngai te mangauti ao te maiu.” (Ioane 11:25) Eng, iai mwaakan Iesu ni kautiia maate ke ni manga kaoka te maiu nakoia te koraki ake a tia ni mate!

Ngkana e anaaki nanom bwa ko na maeka n te aonnaba are a nang aki riki mwakuri aika bubuaka nakoia aomata aika raoiroi, e aera ko aki kateia bwa tiam reiakinan ae bati riki man te Baibara ibukin te Atua ae koaua ao ana kantaninga? A kukurei Ana Tia Kakoaua Iehova aika n am tabo ni buokiko bwa ko na karekea te atatai anne. Ti kukurei ni kaoko bwa ko na reitaki ma ngaiia i aon abam ke kororeta nakoia naake a boreetia te maekatin aei.