Ai Bon Iriau Nako Naba Au Katii

AROU RIMOA:

I bungiaki mani kaikawaaki ni kaawan Rom, ae te tabo ae kaainaki irouia aomata aika maiu ni kainnano. E rangi ni kangaanga te maiu iai. I aki roko n te ataa raoi tinau ao akea au reitaki ae kaan ma tamau. I ikawairake ao n reiakina aroni kawakinani maiu n te kaawa ae a iowawa kaaina.

I a kamani moana iraeakini bwaai ma ngke tebwina au ririki. Bon au moantai ni birinako mani mwengau ngke ai 12 au ririki. A bati taai ake e ananai iai tamau mani kautun aia aobiti bureitiman ao ni kaokai nakoni mwengara. I kakauntaeka ma aomata n taai nako ao I rangi n iowawa ma n un irouia. Ngke ai 14 au ririki, I a kitana mwengau n aki manga okiria. I a moanna ni kamanenai drugs ao ni maeka i nanoni kawai. Ibukina bwa ai akea au tabo ni matu, I a urua te kaa teuana ao n tiku iai ni karokoa te karangaina. Imwina, I ukera te tabo n ran are N na kona n tebotebo iai.

I a rikirake ni mwaatai n iraei bwaai ni moa man anaakin te baeki ni karokoa bwaai man auti aika uarereke ao aia auti kaubwai n te tairiki. E a moanna n reke aroarou ae buakaka ao I a waekoa ni kaoaki bwa N na kaaina te kaeng ae tanoata taekana, ike e a reke iai au “tai” bwa N na manga irae n taiani bangke. Ibukina bwa I rangi n iowawa, I a waekoa ni karineaki irouia kaain ara kaeng. Ai bon iriau nako naba au katii. Ni koauana, I matu ma ngaia i aan uningau. E a riki bwa anuau te iowawa, kamanenaan taian drugs, te irae, te taetae ae aki riai ao te aroaro ni maiu ae kammaira. A boni kakioai n taai nako bureitiman. I katikaki n angiin te tai ao I kabureaki ma ni kaotinakoaki i nanon ririki aika bati.

ARONI BITAKINI MAIU MAN TE BAIBARA:

Ngke I kaotinakoaki man te karabuuti n te tai teuana ao I a iangoia bwa N na nako ni kawara tarin tinau temanna. I bon aki ataia ae a a tia n riki bwa Ana Tia Kakoaua Iehova ai tinau aei ma ai tariu aika uoman. A boni kaoai nakon aia botaki taani Kakoaua. Ibukini kiriuriun nanou, I a iangoia bwa N na iriia. Ngke ti a roko n te Tabo n Taromauri, I bon imanono bwa N na tekateka i rarikin te mataroa bwa I aonga n tarataraiia te koraki aika a rin ao n otinako. Ni koauana, bon iai irou au katii.

E boni bita maiu te botaki anne. I uringnga ae I iangoia bwa kaanga I a mena n te aonnaba ae kaokoro. I boni kamauraki irouia aomata aika akoi, a tatangira ma ni momoangare. E bon teimatoa ni mataata n au iango mataia n akoi ma kakaonimakia taani Kakoaua. E rangi ni kaokoro aei ma aroaron te maiu are I taneiai iai!

I a moana au reirei n te Baibara ma taani Kakoaua. Ngkana I kabatiaa reiakinana, e a rangi ni mataata riki nakoiu bwa I riai ni bitii aroaroni maiu ni kabane. I tou mwin taeka aika n Taeka N Rabakau 13:20, (BG) aikai: “Ko na nakonako ma aomata aika rabakau, ao ko na rabakau iai: Ma e na maraki te aomata ngkana e raonia akana nanobaba.” I a ataia ae I riai ni kitania kaain te kaeng n iowawa. E kangaanga karaoan anne, ma boni man ana ibuobuoki Iehova are I a tokanikai iai.

I kaitiakii naba aroarou aika bubuaka. Man au mwakuri korakora, I a kaaki te moko tikareti ao kamanenaan taian drugs. I korea irau ae mwarairai, I kanakoi au taabia ao ni katoka kamanenaan taetae aika bubuaka. Ai bon tibwa te moantai aei ni maiu ae I a moanna iai n taubaang ni baika I karaoi.

Bon akea kukureiu ni wareware ao n reirei, ai ngaia are bon te kangaanga ni koaua kaboraoani maiu ma baika I reiakini man te Baibara. Ma e ngae n anne, ngke I a kakorakoraai, e a rikirake irou tangiran Iehova teutana imwin teutana, ao iai te bwai ae e a moanna ni bitaki iai nanou bwa e a moanna n tabetabe mataniwin nanou. A aki toki n reke iango aika aki raraoi i bon i bukiu, n te aro are I a raraoma bwa e a aki kona Iehova n kabwarai au bure aika bubuaka ni kabane ake I a tia ni karaoi. I namakina kabebeteau ae bati n taai akanne ni warekan taekan Iehova ngke e kabwarai ana bure aika kakaiaki te Uea are Tawita ake e a tia ni karaoi. —2 Tamuera 11:1–12:13.

Te kangaanga riki teuana bon tibwaan au onimaki ma aomata tabeman n te mwakuri ni minita man te auti teuana ma teuana. (Mataio 28:19, 20) I rangi ni maaku bwa rimwi I a kaitiboo ma te aomata rimoa are I a tia n iowawa ke ni karaoa ae kairua nakoina n aaro tabeua! Ma teutana imwin teutana, I a kona n tokanikai i aon te maaku. E a moanna n reke te raunnano ni koaua ibukini buokaia tabemwaang bwa a na reiakina taekan Tamara are i karawa ae moan te raoiroi are e korakora nanona ni kabwarai buure.

AROU NI KAKABWAIAAKI:

I boni kamaiuaki man reiakinan taekan Iehova! A a tia ni mate angiia raoraou rimoa ke a kabureaki, ma e a reke irou te maiu ni koaua ae karaunano ao I a kariariai taai aika a na roko. I a tia n reiakina bwainan te nanorinano, te ongeaba ao te taubaang ni kaineti ma arou ae te iowawa. Ibukin anne, e a nakoraoi riki au iraorao ma aomata aika i rarikiu. I a tekateka n taanga ma te kukurei ngkai ma kaainnabau ae anainano aroarona ae Carmen. Ti kaai n rangi ni kimwareirei ni buokiia aomata nako bwa a na reiakina te Baibara.

Eng, I a karaoi ngkai mwakuri ma bwainan te kakaonimaki ae e irekereke iai n taai tabetai ma taiani bangke, ma n oneani mwin are N na kimoai, I a kaitiakii!