E a Kaan Toki te Rawawata!

ANA KAIRIRI TE TAUTAEKA AE RAOIROI

“E na katea ueana Atuani karawa, ae na bon aki uruaki n aki toki, ao e na aki katukaki tauan taekana nakon te botannaomata teuana, ma e na ururu ma ni kamaunai uea akanne ni kabane, ao e na tei matoa n aki toki.”​—Taniera 2:​44, BG.

Ana Tautaeka n Uea te Atua bon te tautaeka i karawa. E na onei mwia aia tautaeka nako aomata te tia Tautaeka iai are rineaki ae Iesu Kristo, ao e na taraia raoi bwa e na kakororaoaki nanon te Atua tiaki tii i karawa ma i aon te aba naba. (Mataio 6:​9, 10) E na aki oneaki mwin te tautaeka aei n aia tautaeka aomata ibukina bwa bon “ana tautaeka n uea ara Uea ae ara tia Kamaiu ae Iesu Kristo, ae te tautaeka ae akea tokina.” E na bon noraki iai te rau ae akea tokina.​—2 Betero 1:11.

A NANG AKEA AARO AIKA KEWE

“E oninikia Tatan bwa te anera ae kaotiota te oota. Mangaia ae bon tiaki te bwai ni kamimi ngkana a onikiia naba ana tabonibai bwa kaanga tabonibai ibukin te raoiroi. Ma tokia e na boni boraoi ma aia mwakuri.”​—2 I-Korinto 11:​14, 15.

A na kaotaraeaki Aaro aika kewe bwa bon ana mwakuri te Riaboro ao a na kamaunaaki mai aon te aba. A nang aki manga noraki aia inanonano Aaro ao aia katuturaraa. E nang reke aia tai taan tangira “te Atua ni koaua ae maiu” n taromauria n “tii teuana te onimaki” ao “n te taamnei ao te koaua.” Ai korakorara te rau ao te katiteuanaaki iai!​—1 1 I-Tetaronike 1:9; I-Ebeto 4:5; Ioane 4:23.

A NANG KORORAOI AOMATA

“E na boni memena [te Atua] irouia. Ao e na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki. A a mauna bwaai rimoa.”​—Te Kaotioti 21:​3, 4.

E kona ni karaoa aei Iehova ae te Atua rinanon Natina ae Iesu, are e anga maiuna ibukia kaain te aonnaba. (Ioane 3:16) A nangi bane ni kororaoi aomata i aan ana kairiri Iesu. A na akea riki te rawawata ibukina bwa “te Atua e na boni memena irouia” ao e na kaoa “te rannimata ni kabane mai mataia.” A na waekoa n riki bwa bwaai rimoa aki kororaoia ao rawawataia aomata ao “a na abana te aba akana raoiroi, Ao a na mamaeka iai n aki toki.”​—Taian Areru 37:​29, BG.

A NANG AKEA TAAMNEI AIKA BUAKAKA

“E taua te rakon are te naeta nikawai, are te Riaboro ao Tatan [Iesu Kristo], ao e kabaea i nanon tenga te ririki. Ao e karenakoa i nanon te kinono ao e kaina te kinono ao e kanikinaea, bwa e aonga n aki manga burebureiia riki botannaomata.” ​—Te Kaotioti 20:​2, 3.

A nangi bane n toki ana kariri Tatan ngkana e a kabaeaki ma ana taimonio ao ni karenakoaki nako nanon “te kinono,” ike ai akea iai te bwai ae kona ni karaoia. A na aki manga tautaekania aomata n te aro ae buakaka. Ai boni karaunanora ngkana ti a mena n te aonnaba ae akea iai ana kariri Tatan ma taamnei aika buakaka!

A NANG TOKI “KABANEANI BOONG”

A nang toki “kabaneani boong” n te baere e taekinna Iesu ae te “rawawata ae korakora.” E taku: “E na roko te rawawata ae korakora ae tuai ni kaoti mangke e moani karikaki te aonnaba ni karokoa ngkai, ao e na aki manga kaoti rimwi.”​—Mataio 24:21.

E na rangi ni korakora te rawawata n te aro are a nang riki kabuanibwai aika tuai n nonoraki. A na toki baikai n “te buaka n te bong ae kakannato ae ana bong te Atua ae Moan te Mwaaka,” ae rangi n ataaki bwa “Aremaketon.”​—Te Kaotioti 16:​14, 16, te kabwarabwara mai nano.

A kariariaa tokin te waaki ae buakaka ae ngkai aomata ake a tangira te eti n taabo ni kabane. Iangoi moa kakabwaia tabeua aika imwaira i aan ana kairiri Ana Tautaeka n Uea te Atua.

E NA KARAOA AE BATI RIKI TE ATUA!

A na kawakinaki maiuia “te koraki ae uanao” n te waaki ae boou i aon te aba: E taekinaki n Ana Taeka te Atua bwa a ‘nako mai buakon te rawawata ae korakora’ “te koraki ae uanao” ae e aki kona ni warekaki mwaitiia ao a na kawakinaki maiuia n te waaki ae boou i aon te aba ae mena iai te raoiroi. (Te Kaotioti 7:​9, 10, 14; 2 2 Betero 3:13) A na mwiokoa kamaiuaia iroun Iesu Kristo ae “ana Tiibutetei te Atua, ae kamaunai aia bure kaain te aonnaba.”​—Ioane 1:29.

A na reke kakabwaia aika bati man ana kaetieti te Atua: “A na buta aonaba n atakin Iehova,” n te waaki ae boou i aon te aba. (Itaia 11:​9, BG) Iai naba i nanon te reirei mairoun te Atua kaetieti ibukin te aroaro ni maeka ma te rau ma aomata nako ao ae boraoi ma te otabwanin. E kangai ana berita te Atua: “Bon Iehova ae Atuam Ngai, ae I reireiko arom ae ko na kabaia iai, ae I kaiririko i nanon te kawai ae riai ba ko na nakonako iai.”​—Itaia 48:​17, BG.

A na kautaki man te ruanimate aomata aika tangiraki iroura: Ni menan Iesu i aon te aba ao e kauta raoraona are Rataro man te mate. (Ioane 11: 1, 5, 38-44) Ibukin anne, e a kaota iai te bwai ae e na karaoia i aan ana babaire Ana Tautaeka n Uea te Atua n te aro ae rangi n raababa nako.​—Ioane 5:​28, 29.

E na tokanikai te rau ao te raoiroi n aki toki: E nang riki riaoan te tua bwa bwain rimoa i aan ana tautaeka Kristo. Ti kanga n ataa anne? Ibukina bwa e kona n nori naano Iesu ao e na kamanena te konabwai anne ni motiki taekaia iai aomata aika raoiroi ma aika buakaka. A na bon aki kariaiakaki te koraki ake a rawa ni bitii aroia aika bubuaka bwa a na maeka n ana waaki ae boou te Atua i aon te aba.​—Taian Areru 37:​9, 10; Itaia 11:​3, 4; 65:20; Mataio 9:4.

Ti a tia ni maroroakin tii tabeua mai buakoni berita aika bati man te Baibara ake a kamataataa te tai ae moan te tamaroa ae imwaira. Ngkana e a waaki ni kairiri Ana Tautaeka n Uea te Atua i aon te aba, e na tokanikai n aki toki “kabatian te raoi.” (Taian Areru 37:​11, 29, BG) A nangi mauna nako baike a karikii marakia ao rawawataia botannaomata aika taonaki nako iai. Ti kona ni kakoauaa raoi aei man ana berita te Atua ae kangai: “Noria! I a kabooui bwaai ni kabane. . . . A kona n onimakinaki taeka aikai ao a koaua.”​—Te Kaotioti 21:5.