A “Rawa Nakon te Buakaka” Ana Aomata Iehova

1. Tera ae rangi n rine n ara taromauri?

KO A tia n nora te ara ae Iehova ni koreaki i aoni kateitei n aia tabo botannaomata ke ni bwain nanon auti ake a kakawakinaki iai bwain rimoa aika kakawaki? Ngkana ko a tia n nora te ara aei n taabo akanne, akea te nanououa bwa ko na namakina te kimwareirei. Ni koauana, e rangi n rine aran te Atua n ara taromauri ngkai ngaira Ana Tia Kakoaua! Akea riki aia botaki aomata n te aonnaba ni boong aikai ae rangi ni kakabongana aran te Atua n ai arora. Mangaia are ti ataia bwa e irianaki te mwioko ae uouotan aran te Atua ma karaoani mwakuri ake e na karineaki iai.

2. Tera mwiokoara ngkai ti kakabwaiaaki bwa ti a kinaaki ibukin uouotan aran te Atua?

² E aki reke akoara iroun Iehova n tii kamanenaan arana. Ti riai ni kaboraoi maiura ma ana kaetieti ibukin te aroaro ni maiu ae riai. Ao ibukin anne, ti kauringaki n te Baibara bwa a riai ana aomata Iehova ni “kitana te buakaka.” (Taian Areru 34:14, BG) E kamataataa n taekina te boto n reirei aei te abotoro Bauro ngke e korea ae kangai: “Ke a rawa nakon te buakaka aomata nako akana taboa aran Iehova.” (Wareka 2 Timoteo 2:19.) Ngkai ana tia Kakoaua ngaira, ti a rangi n ataaki n taboan te ara ae Iehova. Ma ti na kanga ngkanne n rawa nakon te buakaka?

“KAM NA NAKO MAN” TE BUAKAKA

3, 4. Tera te kibu ae ringaki iai nanoia taan rabakau n te Baibara i nanon te tai ae maan, ao bukin tera?

³ Iangoa te bwai ae nanonaki raoi n te Baibara n ana taeka Bauro n 2 Timoteo 2:19. E taekinaki n te kibu aei bwa e “nene aan te kateitei are e kawenea te Atua,” ao imwina e a manga mwanewei katanoata aika uoua ake a koreaki i aona. Te moani katanoata, “E ataiia aika bon ana aomata Iehova,” bwa bon taeka aika anaaki man Warekaia Iteraera 16:5, (BG). (Nora te kaongora ae imwain aei.) Te kauoua ni katanoata, “Ke a rawa nakon te buakaka aomata nako akana taboa aran Iehova,” a a bon tia n ringaki iai nanoia taan rabakau n te Baibara. Bukin tera?

⁴ E kaotaki n ana taeka Bauro bwa e boni mwanewei man te boki riki teuana. Ma e ngae n anne, e taraa n akea te boki n te Baibara n Ebera ae boraoi ma taeka ake e mwanewei Bauro. Mangaia are tera ae nanonna te abotoro ngke e kangai: “Ke a rawa nakon te buakaka aomata nako akana taboa aran Iehova”? Imwin raoi taeka akanne, e a mwanewea kanoan Warekaia Iteraera mwakoro 16, ike e a taekina iai rongorongon ana karitei Kora. E kona n irekereke te kauoua ni katanoata ma baika riki n tain te karitei anne?

5-7. Baikara bwaai ake a riki n ana bong Mote ake e mwanewei Bauro n 2 Timoteo 2:19? (Nora te taamnei ni moan te kaongora aei.)

⁵ E taekinaki n te Baibara bwa e raonaki ni mataniwi Kora i aoia taani karitei nakoni Mote ma Aaron irouia Ratan ao Abiram ake natin Eriaba. (Warekaia Iteraera 16:1-5) A boni kaotii nanoia n aki karinerine nakoni Mote ao n rawa nakoni mwaakana ni kairiri ae anganaki iroun te Atua. A teimatoa taani karitei akanne ni maeka i buakoia ana aomata Iehova ike a a karuanikaia iai aia onimaki naake a kakaonimaki. E na anga te tua ae mataata Iehova ngkana e a roko ana tai ni kaotaraea te kaokoro i marenaia taan taromauria aika kakaonimaki ni koaua ma taani karitei.

⁶ Ti wareka ae kangai n te rongorongo: “Ao E taetae Iehova nakoni Mote, ni kangai, Ko na taetae nakon te botaki, ni kangai, Kam na tei rake mai rarikin nako umani Kora, ma Ratan, ma Abiram. Ao e tei rake Mote ao e nako n Ratan ma Abiram; ao aia unimwane Iteraera a iria n ri mwina. Ao e taetae nakon te botaki, ni kangai, I butingkami ba kam na nako man umaia aomata aika buakaka aikai, ao tai ringa aia bwai teuana, ba kam kawa ni kamaunaki i buakon aia bure ni kabane. Ao a tei rake mai rarikin nako umani Kora, ma Ratan, ma Abiram.” (Warekaia Iteraera 16:23-27, BG) Imwina, e a tiringia taani karitei ni kabane Iehova. N te itera are teuana, a teimatoa ni maiu taan taromauri aika kakaonimaki ni koaua ake a rawa nakon te buakaka ngke a kitania taani karitei.

⁷ E nori naano Iehova! E nori naba aia kakaonimaki ni koaua aika bon ana aomata. Mangaia are a riai ana aomata aika kakaonimaki ni koaua ni motinnanoia bwa a na kaokoroia mairouia aika buakaka. Ngkanne e a kona Bauro ni mwanewea te rongorongo are ni Warekaia Iteraera 16:5, 23-27, (BG) ngke e korea ae kangai: “Ke a rawa nakon te buakaka aomata nako akana taboa aran Iehova.” E na boraoi ngkanne te aeka n iango anne ma taeka ake e taekini Bauro aikai: “E ataiia aika bon ana aomata Iehova.”— Timoteo 2:19.

“TAI MUTIAKIN TITIRAKI NI BABA AIKA AKEA MANENAIA”

8. E aera ngkai e aki tau tii kamanenaan te ara ae Iehova ke te riki bwa kaain te ekaretia?

⁸ N taekinani baike a riki n ana bong Mote irouni Bauro, e boni kauringa iai Timoteo riaina ni karaoa ana motinnano bwa e aonga ni kamanoa ana iraorao ae kakawaki ma Iehova. E bon aki tau tii te riki bwa kaain te ekaretia ni Kristian, n aron naba ae e aki tau tii taboan te ara ae Iehova n ana bong Mote. A riai ni motinnanoia taan taromauri aika kakaonimaki bwa a na rawa nakon te buakaka. Tera nanon aei nakon Timoteo? Ao baikara reireiaia ana aomata Iehova ni boong aikai, ake a kona n reke man ana reirei ni kairiri Bauro aika kairaki n te taamnei?

9. Tera aron rotakia ekaretia ni Kristian rimoa n “titiraki ni baba aika akea manenaia”?

⁹ A katauraoaki i nanon Ana Taeka te Atua taeka n reirei aika eti raoi ni kaineti ma aeka ni buakaka nako aika a riai n rawa ke n ribai Kristian. N te katoto, ti noria ni baika koreaki n 2 Timoteo 2:19 bwa e tuangaki Timoteo irouni Bauro bwa e “na aki uneakin taian taeka” ao e na “rarawa nakon taetae aika akea uaaia.” (Wareka 2 Timoteo 2:14, 16, 23.) Iai tabeman kaain te ekaretia ake a boutokai aia reirei taan tannako man te koaua. E taraa n ae tabemwaang a kairiia naba aomata nakon iangoan te kani kauntaeka. E ngae ngkana e aki nako te kauoua n iango anne man te Baibara ma a boni karekea te itabarara i marenaia. A boni karika te un ma te kauntaeka ibukin aia taetaenikawai, ike e a riki iai te mamaara n te onimaki n te tabo anne. Mangaia are e a kamataataa Bauro ni kangai: “Tai mutiakin titiraki ni baba aika akea manenaia.”

10. Tera arora ae riai ngkana ti aitara ma taan tannako man te koaua?

¹⁰ A aikoa bati n aitara ana aomata Iehova ni boong aikai ma taan tannako man te koaua i nanon te ekaretia. Ma e ngae n anne, ngkana ti aitara ma reirei aika aki boraoi ma te Baibara, ti riai ni motinnanoia bwa ti na rarawa iai n aki ongeia bwa te boki raa ae anaaki mai iai. Bon te aro n nanobaba kabanean ara tai ni kauntaeka ma taan tannako man te koaua tao n itaramata ma ngaia, ni kaekai aia taeka n te Internet, ke aanga riki tabeua. E ngae naba ngkana e karaoaki anne ibukini buokan temanna, ma e na kauntaba te aeka ni maroro anne ma te kairiri man te Baibara ae ti a tibwa tia ni maroroakinna. Ma ngkai ana aomata Iehovangaira, ti rarawa ma nanora ni kabane, eng ti rawa nakoia taan tannako man te koaua.

11. Tera ae kona n riki man “titiraki ni baba aika akea manenaia,” ao a na kanga unimwaane aika Kristian ni katea te banna ni katoto ae tamaroa?

¹¹ Iai bwaai riki tabeua irarikin te tannako man te koaua aika kona n uruaka te rau n te ekaretia. N te katoto, e kona ni karekea kakaokoron te iango “titiraki ni baba aika akea manenaia” ibukin te kaokirii. Ni koauana, ngkana iai aika a kaungaa karaoani kaokirii aika urui ana tua Iehova ni kaineti ma te aroaro ni maiu ae riai, a riai n aki kariaia te aeka n aroaro anne unimwaane n te ekaretia tii ibukin totokoan te kauntaeka. (Taian Areru 11:5; I-Ebeto 5:3-5) Ai ngaia are a taraia raoi unimwaane bwa a na aki kaungai oin aia iango. A kakaonimaki ni koaua ni mutiakina te kaungaunga man te Baibara are a anganaki mataniwi aika Kristian aei: “Kam na kawakina ana nanai te Atua ane kam tararuaia, . . . tiaki n ai aroia taan taui aroia te koraki ake ana bwai te Atua, ma kam na riki bwa te katoto nakon te nanai.”—1 Betero 5:2, 3; wareka 2 I-Korinto 1:24.

12, 13. (a) Tera aroia Ana Tia Kakoaua Iehova ni kaineti ma rinean aia kaokirii, ao baikara booto n reirei n te Baibara aika kaineti ma aei? (b) A na kanga booto n reirei aika kabwarabwaraaki ni barakirabe 12 n irekereke ma baike a tangiri aomata aika kakaokoro?

¹² Ni kaineti ngkanne ma te kaokirii, a aki taekinaki aeka n taamnei, takaakaro n te viteo, booki, ke anene n ara botaki aika ti riai n rarawa nako iai. Bukin tera? A bane ni kaungaaki aomata n te Baibara bwa a na kataneiai “aia atatai . . . bwa a na ataa ae eti ao ae kairua.” (Ebera 5:14) A bon taekinaki n te Baibara booto n reirei aika kakawaki ake e kona n iaiangoia te Kristian n rinean ana kaokirii. Tiara n iterani maiura ni kabane, bon riaira n “teimatoa n tutuoa bwa tera ae e kukurei iai te Uea.” (I-Ebeto 5:10) Iai te reirei n te Baibara ibukia atun utu bwa bon iai mwaakaia n te aro are a kona n iangoia bwa a na aki kariaia kaokirii tabeua n aia auti.a—1 I-Korinto 11:3; I-Ebeto 6:1-4.

¹³ A aki kaineti booto n reirei man te Baibara akana kabwarabwaraaki mai moa ma tii rinean ara kaokirii. A kona naba ni karika te kauntaeka iango ni kaineti ma te kunnikai, te katamaroa, te marurung ao te amwarake ao baika a tangiri aomata. Ibukin anne, a wanawana ana aomata Iehova bwa a rawa ni kauntaeka i aoni baikanne ngkana e aki uruakaki iai te boto n reirei n te Baibara kioina ngkai “e aki riai ni kauntaeka ana toro te Uea ma e riai n nimamannei nakoia aomata nako.”—2 Timoteo 2:24.

RARAWA NAKON IRAORAO AIKA BUBUAKA!

14. Tera te kaikonaki are e kamanena Bauro ni kamataataa iai riain te rarawa nakon iraorao aika bubuaka?

¹⁴ Baikara aaro riki tabeua aika a kona iai n “rawa nakon te buakaka aomata nako akana taboa aran Iehova”? Boni man rawaia ni karekea aia iraorao ae kaan ma aomata aika kakaraoa ae buakaka. E kakawaki ataakin ae e toua mwin ana kaikonaki Bauro ibukin ‘te kateitei ae nene aana are e kawenea te Atua’ ma te kaikonaki riki teuana. E boni korea taekan “te auti ae bubura” ma “mwangko aika karaoaki man te kai ao te kaatibu irarikini mwangko aika karaoaki man te koora ao te tirewa. Tabeua a kabonganaaki n te aro ae rine, ma tabeua n te aro ae aki rine.” (2 Timoteo 2:20, 21) Imwina, e a kaungaia Kristian bwa a na ‘kararoaia’ ke ni kaokoroia mairouia mwangko aika kabonganaaki n te aro ae “aki rine.”

15, 16. Tera reireiara man te kaikonaki ibukin “te auti ae bubura”?

¹⁵ Tera nanon te kaikonaki aei? E boni kabotaua te ekaretia ni Kristian Bauro ma “te auti ae bubura” ao kaain te ekaretia n tatabemania nako ma “mwangko,” ke bwain nanon te auti. A kona mwangko tabeua i nanon te auti ni karuanikai ngkana a kabarekaaki ke a aki itiaki. E na boni kawakini bwaai akanne kaain te auti ni kaokoroi mwangko aika itiaki ma aika aki itiaki n aron ake e kuuka te aba iai.

¹⁶ N aron naba anne, a kakorakoraia ana aomata Iehova ni boong aikai ni maiuakina ae itiaki, ao a riai naba n rawa ni kaania ma aomata nako i nanon te ekaretia aika teimatoa n aki karinei ana boto n reirei Iehova. (Wareka 1 I-Korinto 15:33.) Ngkana ngaia bwa e riai ni karaoaki aei i nanon te ekaretia, ai batira riki riaira n “tannako” mani karekean ara iraorao ae kaan ma akana i tinanikun te ekaretia, ake a bati mai buakoia aika bon ‘taani bakimwane, taan aki ongeaba irouia aia karo, taan taetae ni kabuakaka, taan uarao, taan iowawa, taan ribaa te raoiroi, taani kamwamwane ao taan tangira riki kakukurein te rabwata nakon tangiran te Atua.’!—2 Timoteo 3:1-5.

E KAKABWAIAI ARA MOTINNANO IEHOVA

17. A kanga n taratara raoi tibun Iteraera ake a kakaonimaki ni koaua ngke a kaaitara ma te buakaka?

¹⁷ A mwaneweaki n te Baibara baika eti raoi ibukin aroia tibun Iteraera ni karaoi aia motinnano ngke a tuangaki bwa a na “tei rake mai rarikin nako umani Kora, ma Ratan, ma Abiram.” E taekinaki n te rongorongo bwa “a tei rake” ngkekei naba. (Warekaia Iteraera 16:24, 27, BG) A bon aki baenikai ke n rawa ni karaoa anne. A bon “tei rake mai rarikin nako” umwaia. A ingainga nanoia ni kabane n ongeaba naake a kakaonimaki ni koaua. A kukurei ni karaoa anne ma nanoia ni kabane. A bon tei n nene ibukin Iehova ao n ribaa te buakaka. Baikara reireiara man te katoto aei?

18. Tera ae nanonaki n ana taeka Bauro ngke e kaumaka Timoteo bwa e na “birinako mani baike a bwabwarui rooro n rikirake”?

¹⁸ Ti riai ni waekoa ni karaoa te bwai teuana ke ara motinnano ngkana ti na kawakina ara iraorao ma Iehova. Aio te bwai ae nanonaki n ana taeka Bauro ngke e kaumaka Timoteo bwa e na “birinako mani baike a bwabwarui rooro n rikirake.” (2 Timoteo 2:22) N te tai anne, e a kaman riki Timoteo bwa te rorobuaka bwa tao ai 30 tabun ana ririki. Ma e ngae n anne, a boni kona naba aika ikawai n reke irouia baika a “bwabwarui rooro n rikirake.” Ngke e kaaitara ma baika a bwabwaruaki akanne Timoteo, e riai ni “birinako” mai iai. N taeka riki tabeua, e riai Timoteo n “rawa nakon te buakaka.” E anga te rongorongo naba anne Iesu ngke e kangai: “Ngkana e kabwakako matam, autia ao karenakoa.” (Mataio 18:9) Ni boong aikai, a boni kukurei Kristian aika mutiakina te reirei ni kairiri aei ma nanoia ni koaua ni kawakina aia iraorao ma te Atua ao a waekoa ni mwakuria ke n aki baenikai.

19. A kanga tabeman ni boong aikai n tia ni karaoi aia motinnano ibukini kamanoaia mani karuanikain nako aia onimaki?

¹⁹ A a tia tabeman ake iai aia kangaanga ma te kamanging imwain rikia bwa taani Kakoaua ni karaoi aia motinnano bwa a na boni kaaki te moi manging. Tabeman riki a rarawa nakon aeka ni kaokirii tabeua ake a iangoia bwa akea bureia, ma a kona ni karikirakea mamaaran aroaroni maiuia. (Taian Areru 101:3) N te katoto, imwain rikin te tari te mwaane temanna bwa te tia Kakoaua, e kukukurei n irii bobotaki n taabo aika kaotiotaki iai aroaro aika kammaira. Ma imwin reiakinan te koaua, e a bon rarawa ni mwaie e ngae naba ngkana bon aia botaki taani Kakoaua bwa e maaka are e na manga ueke tangirani ke iaiangoani baika aki riai ake e kakaraoi rimoa. Ni koauana, a aki kantaningaaki Kristian bwa a na rarawa n nima naba teutana te manging, te mwaie, ke bwaai riki tabeua aika aki bure. Ma ti boni bane ni kantaningaaki bwa ti na karaoi ara motinnano ao ni kamanoira man ruanikain nako ara onimaki rinanon ara mwakuri.

20. Tera ae karekea te aki nanououa ao te kabebeteaki e ngae naba ngkana e aki bebete iroura te “rawa nakon te buakaka”?

²⁰ Iai mwiokoara ae irian uouotan aran te Atua. Ti riai n “rawa nakon te buakaka” ao ni “kitana te buakaka.” (Taian Areru 34:14, BG) Ni koauana, e bon aki bebete karaoan anne n taai nako. Ma ai kabebete nanora ataakin ae e na bon tangiriia n taai nako Iehova “aika bon ana aomata” ao ane e nimti kawaina aika raoiroi.—2 Timoteo 2:19; wareka 2 Rongorongo 16:9a.