“E Ataiia Aika Bon Ana Aomata Iehova”

1. Taekina te karaki man te Baibara ae katuruturuaki iai te aeka n iango ae kewe are a taonakinako iai tabeman ana aomata te Atua. (Nora te taamnei ni moan te kaongora aei.)

N TE ingabong teuana ao e tei te Ibonga ae Rietata ae Aaron ni mataroan ana umwanrianna ae tabu Iehova ma n taua te baan ibukini kabuekan te karea ae boiarara. A tei i rarikina n te raroa ae raka i aoni uoua te mita Kora ma mwaane aika 250 mwaitiia aika angakarea naba nakon Iehova, ao a bane n toa ma te baan ni kabueki karea. (Warekaia Iteraera 16:16-18) Ni moan noraia mwaane aikai, a bane n taraaki bwa taan taromauria Iehova aika kakaonimaki ni koaua. Ma e ngae n anne, a kaokoro ma Aaron bwa tabemwaang bon taani karitei aika kainikatonga, aika a kakorakoraia n anaa te nakoa n ibonga. (Warekaia Iteraera 16:1-11) A boni mwamwanaiia i bon irouia n iangoan ae e na butimwaeaki aia taromauri iroun te Atua. Ma te kantaninga aei, e boni kamatauningaa Iehova are e kona n neneri naano ao aroia ni mwamwanaa te aba.—Ieremia 17:10.

2. Tera are e taetae ni burabetinna Mote, ao a kanga ni koro bukia?

² Teuana te bong imwain anne ao e taetae ni burabeti Mote ni kangai: “Ningabong ao E na kaotiia ana aomata Iehova.” (Warekaia Iteraera 16:5, BG) Ao n aron ae taekinaki, e kaota kaokoroia Iehova taan taromauri ni koaua ao taan taromauri ni kewe ngke “e otinako te ai mairoun Iehova, ao e kania [Kora ao] uabubua ma nimangaun te aomata ake a anga te karea are boiarara.” (Warekaia Iteraera 16:35, BG; 26:10) N te tai naba anne, e boni kamaiuaki Aaron iroun Iehova ike e a kaotaki iai koauan ae bon te ibonga ao te tia taromauria te Atua ni koaua.—Wareka 1 I-Korinto 8:3.

3. (a) Tera te bwai are e riki n ana bong te abotoro Bauro? (b) Tera reireiara man te baere e karaoia Iehova nakoia taani karitei n tienture ake mai mwaina?

³ E riki te aro naba anne tao 1,500 te ririki imwina riki n ana bong te abotoro Bauro. A kakairi n reirei aika kewe aomata tabeman ake a taku bwa Kristian ngaiia, ma a bon teimatoa naba ni bobotaki ma kaain te ekaretia. N ana taratara te tia mataku ae aki tarabwai, tao akea kaokoroia taan tannako man te koaua aikai mairouia naake tabeman riki n te ekaretia. Ma e karika te kabuanibwai aroia anne taan tannako man te koaua nakoia Kristian aika kakaonimaki. A a moanna kameaanti aikai ake a kunnikainia ni kunin te tiibu n “uruana aia onimaki tabeman.” (2 Timoteo 2:16-18) Ma bon te tia taratara ae kororaoi Iehova, ao e a kaman ataa aei Bauro n te bwai are e karaoia te Atua nakoia taani karitei ake Kora ma taani boutokaia n tienture ake mai mwaina. Ni kaineti ma aei, ti na rinanoa te kibu teuana man te Baibara ae kakaongora ao n nori reireiara iai aika manena.

“I AKI BIBITAKI NGAI AE IEHOVA”

4. Tera are e aki nanououa iai Bauro, ao e kanga ni kaotia nakon Timoteo?

⁴ E kakoauaa raoi Bauro bwa e kona Iehova n ataa te taromauri ae mwamwanaa te aba, ao e aki nanououa naba bwa e kona Iehova n ataiia te koraki aika ongeaba irouna. E kaotiotia Bauro bwa bon akea nanououana n taeka ake e rinei ngke e koroboki ni kairana n te taamnei nakon Timoteo. E korea ae kangai Bauro imwin taekinan ruanikain te onimaki are a a kamani karawawataaki iai tabeman i nanon te ekaretia irouia taan tannako man te koaua: “E ngae n anne, e teimatoa n nene aan te kateitei are e kawenea te Atua, ae kanikinaeaki n te taeka ae kangai: ‘E ataiia aika bon ana aomata Iehova, ao: ‘Ke a rawa nakon te buakaka aomata nako akana taboa aran Iehova.’”—2 Timoteo 2:18, 19.

5, 6. Tera ae kakawaki n aroni Bauro ni kamanena te kibuntaeka ae “nene aan te kateitei are e kawenea te Atua,” ao tera aron rotakin Timoteo iai?

⁵ Tera ae kakawaki n aroni Bauro n rinerinei ana taeka n te kibu aei? Tii aei kibun te Baibara ae taekinaki iai ae e “nene aan te kateitei are e kawenea te Atua.” E kabonganaaki te taeka ae “aan” n te Baibara bwa te kaikonaki ibukini bwaai aika kakaokoro n ikotaki naba ma te kaawa ae Ierutarem ae atuni kaawan Iteraera rimoa. (Taian Areru 87:1, 2) E kaikonakaki naba ana mwakuri Iesu ibukin ana kantaninga Iehova ma aan te kateitei. (1 I-Korinto 3:11; 1 Betero 2:6) Tera ana iango Bauro ngke e korea taekan “aan te kateitei are e kawenea te Atua”?

⁶ A mwaneweaki ana taeka Mote ibukini Kora ma taani boutokaia ake ni Warekaia Iteraera 16:5 irouni Bauro ao e a manga taekina “aan te kateitei are e kawenea te Atua.” E teretere bwa e bon taekini Bauro baike a riki n ana bong Mote n te aro are e a kakorakoraa ni kaungaa Timoteo ao ni kauringnga ae e kona Iehova n atai ao ni kaaitarai mwakuri ni karitei. E bon aki kona ni bitaki ana kantaninga Iehova irouia taan tannako man te koaua aika n te ekaretia n aron naba are e karaoia nakoni Kora n tienture ake mai mwaina. E bon aki kabwarabwaraa raoi Bauro te bwai ae nanonaki n ae e “nene aan te kateitei are e kawenea te Atua.” Ma e ngae n anne, e boni kauekeaki raun nanon Timoteo n taeka ake a kabonganaaki bwa e na onimakina ao ni kakoauai kawain nako Iehova.

7. E aera ngkai ti kona ni koaua raoi bwa e na karaoi ana mwakuri Iehova n raoiroina ao kakaonimakina?

⁷ A aki bibitaki ana boto n reirei Iehova aika kakawaki. E taekinaki ae kangai n Taian Areru 33:11, (BG): “A tei matoa nanon Iehova n aki toki, Ma ana taeka nanona nakon te rorona ma te rorona.” E taekinaki ni kiibu riki tabeua taekan ana tautaeka Iehova, ana tangira ni koaua, raoiroina ao kakaonimakina n aki toki. (Te Otinako 15:18; Taian Areru 106:1; 112:9; 117:2) E taekinaki ae kangai ni Maraki 3:6, (BG): “I aki bibitaki Ngai ae Iehova.” N aron naba anne, e taekinaki n Iakobo 1:17 bwa Iehova “e aki bibitaki n ai aron te nuu ae kai mwainging.”

TE ‘KANIKINA’ AE KATEIMATOA ONIMAKINAN IEHOVA

8, 9. Tera reireiara ae kona n reke man te ‘kanikina’ are n ana kaikonaki Bauro?

⁸ E kaotaki n ana kaikonaki Bauro n 2 Timoteo 2:19 aan te kateitei ma te koroboki ae kanimwaki i aona kaanga aron ae e kanikinaeaki. N taai ake rimoa, e rangi ni bwabwainaki kaotiotan te koroboki n aan te kateitei, tao ni kaotaki iai te aomata ae kateia ke ae bwaibwai iai. Bon te tia korea te Baibara Bauro are e moani kamanena te kaikonaki ae kakawaki aei.a Iai katanoata aika uoua n te kanikina i aon ‘te kateitei ae nene aana are e kawenea te Atua.’ Te moan, “E ataiia aika bon ana aomata Iehova” ao te kauoua, “Ke a rawa nakon te buakaka aomata nako akana taboa aran Iehova.” Ti kauringaki n aei te bwai are ti warekia ni Warekaia Iteraera 16:5.—Warekia.

⁹ Tera reireiara ae kona n reke man te ‘kanikina’ are n ana kaikonaki Bauro? A boto baika rangi ni kakawaki ao ana boto n reirei Iehova i aoni koaua aika uoua aika kakawaki ibukia aika bon ana aomata te Atua: (1) E tangiriia Iehova te koraki ake a kakaonimaki ni koaua nakoina, ao (2) E ribaa te buakaka Iehova. E kanga te reirei aei n irekereke ma taan tannako man te koaua aika n te ekaretia?

10. Tera aron rotakia naake a kakaonimaki n aia mwakuri taan tannako man te koaua n ana bong Bauro?

¹⁰ A bae n tabeaianga Timoteo ao tabeman riki aika kakaonimaki n aia mwakuri taan tannako man te koaua ake i buakoia. Tao a a tia Kristian tabeman n titiraki bwa e aera ngke a kariaiakaki aeka n aomata akanne bwa a na tiku i nanon te ekaretia. A bae n tia naba aika kakaonimaki n iangoia bwa tao e nora kaokoron aia motinnano ae nako mai nanoia Iehova ao aia mwamwanaa te aba n taromauri taan tannako man te koaua ke e aki.—Mwakuri 20:29, 30.

11, 12. E kanga ni kakoauaaki bwa e kakorakoraaki ana onimaki Timoteo n ana reta Bauro?

¹¹ Akea te nanououa bwa e kakorakoraaki ana onimaki Timoteo n ana reta Bauro. E kauringnga are e kakoauaaki Aaron bwa e kakaonimaki ao a kaotaraeaki, a ribaaki ao a kamaunaaki Kora ma raona ake taani mwamwanaa te aba. Ni koauana, e bon taekinna Bauro bwa e ngae ngke iai Kristian ni kewe i buakoia, ma e na ataiia aika bon ana aomata Iehova, n aron naba are e karaoia n ana bong Mote.

¹² E aki bibitaki Iehova ao e rangi n onimakinaki. E ribaa te buakaka ao e na karaoa te kaetitaeka ae riai n te tai are e a tia n namatia nakoia taani bure aika a aki rairi nanoia. Ibukina bwa e “taboa aran Iehova” Timoteo, e boni kauringaki naba iai oin tabena bwa e na ribaa aia kariri ae buakaka Kristian ni kewe.b

E KAKABWAIAAKI TE TAROMAURI AE KOAUA N TAAI NAKO

13. Tera ae ti kona ni koaua raoi iai?

¹³ Ti kona naba ni karekei kakorakoraan ara onimaki man ana taeka Bauro aika kairaki koreaia. Te moanibwai ae kakawaki, e karaunano ataakin ae e bon atai Iehova arora ni kakaonimaki ni koaua nakoina. Bon iai te bwai ae e na karaoia n ataakin anne. Ma e rangi ni korakora nanon Iehova n tangiriia akana bon ana aomata. E taekinaki ae kangai n te Baibara: “A biribiri matan Iehova ni kabuta aonaba ni kabane, ba E na kaotia ba E korakora i bukiia akana a moa n eti nanoia nako Ina.” (2 Rongorongo 16:9, BG) Mangaia are ti kona ni koaua raoi iai bwa a kakabwaiaaki baika ti karaoi ibukin Iehova “man te nano ae itiaki.”—1 Timoteo 1:5; 1 I-Korinto 15:58.

14. Te aeka n taromauri raa ae e ribaia Iehova?

¹⁴ Boni kauringara naba ataakin ae Iehova e bon ribaa te taromauri ae mwamwanaa te aba. Ibukina bwa “a biribiri matan Iehova ni kabuta aonaba ni kabane,” e boni kona n ataia akana a “eti nanoia nako Ina.” E taekinaki n Taeka N Rabakau 3:32 (BG) bwa e “ribaki iroun Iehova te aomata ae rarawa,” ao ai uana naba ma ane bon nanona ni kani karitei, e baka n ongeaba ao e boni kakarabaa ni karaoa ae bure. E ngae ngke e kona ni mwaatai ni mwamwanaia aomata te tia kewe i nanon tabeua te tai, ma e berita Iehova ni mwaakana ao raoiroina bwa ‘e na aki kabwaia ane e karabai ana bure nako.’—Taeka N Rabakau 28:13, BG; wareka 1 Timoteo 5:24; Ebera 4:13.

15. Tera ae ti riai n rarawa nako iai, ao bukin tera?

¹⁵ A tangira Iehova ma nanoia ni koaua angiia ana aomata. E burenibwai reken temanna ae kakairi n te aro n taromauri ae kewe n oin nanona i nanon te ekaretia. Ma e ngae n anne, ngkana ngaia bwa e riki n ana bong Mote ao n aia ekaretia Kristian rimoa, e boni kona naba n riki ni boong aikai. (2 Timoteo 3:1, 5) Ma ti riai n nanououa irouia raora ni Kristian ibukini kakaonimakia ni koaua nakon Iehova? Ti aki! E boni bure kananoan ara iango i aon te bwai ae ti nanououa iai ibukia tarira n te onimaki. (Wareka I-Rom 14:10-12; 1 I-Korinto 13:7.) Ma ae kakawaki riki, ngkana ti aki onimakina kakaonimakia ma te nano ae eti tabemwaang n te ekaretia, e na ruanikai iai ara onimaki.

16. (a) Tera ae ti kona ni karaoia ngaira n tatabemanira nako bwa ti aonga n totokoa rikini wakaan te mwamwanaa te aba i nanora? (b) Baikara reireiara man te bwaoki ae “Teimatoa n Tuoingkami . . . Teimatoa n Tuoingkami . . .”?

¹⁶ A riai Kristian n tatabemania nako n ‘tuoi oin aia mwakuri.’ (I-Karatia 6:4) Ibukina bwa ti boni kabwaka, ti boni kona n aki taratara raoi n taai nako n te aro are ti a kakairi n aroaro aika bubuaka nakon are ti na kakairi n aika raraoi. (Ebera 3:12, 13) Ngaia are ti kona n tuoi ara iango ibukin te beku iroun Iehova man te tai teuana ma teuana. Ti kona n titirakinira ni kangai: ‘I bon taromauria Iehova ibukin tangirana ao ataakin riaina n tautaeka? Ke I kaatuua riki iangoani kakabwaia ake I kantaningai bwa a na reke irou n te Bwaretaiti?’ (Te Kaotioti 4:11) Ni koauana, ti kona ni bane ni kakabwaiaaki man tutuoan ara mwakuri ao kanakoani betin nako te mwamwanaa te aba mai nanora.

TE KAKAONIMAKI NI KOAUA AE KAREKEA TE KAKUKUREI

17, 18. Bukin tera bwa ti riai n taromauria Iehova ma nanora ni koaua?

¹⁷ Ti karekei kakabwaia aika bati ngkai ti kakorakoraira n taromauri ma nanora ni koaua. E taku te tia areru: “E a kabaia te aomata ane aki kabuakakaki iroun Iehova, Ane akea naba te mamana te aba i nanon tamneina.” (Taian Areru 32:2, BG) Eng, a kukurei riki akana kaitiaki nanoia man te mwamwanaa te aba, ao a a kona ni karekea te kakukurei ae kororaoi n taai aika a na roko.

¹⁸ E na boni kaotiia aomata nako aika kakaraoa ae buakaka Iehova ke aika a waakina te maiu ae kiriuoua n te tai are e a tia n namatia, ike e kateretereaki raoi iai “okoron te aomata ae e raoiroi ma te aomata ae e buakaka, ao okoron ane e toro iroun te Atua ma ane e aki.” (Maraki 3:18, BK) Ma ngkai ni karokoa te tai anne, e karaunano ataakin ae “a mena matan Iehova i aoia akana raoiroi, ao e uki taningana nakon aia kakorakora n tataro.”—1 Betero 3:12.