E Mwannanoiko Te Atua?

E riai ni kantaningaia Tawita bwa e na mwannanoia te Atua? E mwannanoiko te Atua? A bati aomata aika kakorakoraia ni kakoauaa ae e bon tabeakinia te Atua ae moan te mwaaka. Bukin tera?

Bukina teuana, boni moan te rietata te Atua nakoia aomata. N aron ae e noraki n nakoana ae rine, “ai aron te timtim ae ti teuana man te baketi botanaomata, ao a atongaki ba ai aroni bubun te tano i aon tauan te rawawata.” (Itaia 40:15, BG) E iangoia temanna te tia kororongorongo ni boong aikai ae e aki kakoauaa te Atua bwa “bon te iango ae moan te tamaroa kakoauaan ae iai te Atua are e waekoa ni mutiakiniko ni baika ko karaoi.”

N te itera are teuana, a namakinna tabeman ibukin aroaroia bwa a aki tau n ururingaki iroun te Atua. N te katoto, e taku te rorobuaka temanna ae Jim: “I tataro n taai nako bwa N na bwaina te rau ao te taotaonakinnano, ma n te tai ae waekoa ke rimwi riki, I a manga bon un naba. N tokina, I a iangoia bwa bon uton te buakaka ngai ao e aki kona ni buokai te Atua.”

E rangi n raroanako te Atua mairouia aomata n te aro are e a kabwaka n norira? Tera aron ana namakin ibukia ana aomata aika aki kororaoi? Ngke arona bwa e aki kaotaraei rongorongona te Atua, bon akea ngkanne te aomata ae kona n taetae n te aro ae eti ibukin te Atua ao ni kaekai titiraki akanne. Mangaia are a karauaki nanora n ana rongorongo te Atua nakoia botannaomata are e kaira koreana ae te Baibara bwa bon tiaki te Atua ae raroanako ma n aki tabeakinia aomata. E taekinaki ae kangai n te Baibara: “Man etina, e bon aki raroa mairoura n tatabemanira nako.” (Mwakuri 17:27) Ni kaongora aika aua aika imwin aei ao ti na maroroakin iai baike e tuangira te Atua n te Baibara ibukin arona ni mutiakinia aomata nako ao kaotan te aeka ni mwamwannano anne nakoia aomata aika raraoi n ai arom naba.