E Ataiko Raoi Te Atua

BUKIN NANOKOKORAKIA TABEMAN: A bati aika a iangoia bwa e taraia aomata te Atua bwa taani bure aika aki itiaki ao a aki tau ni mutiakinaki irouna. E namakinna Kendra are e taonaki n te rawawatannano man aorakin ana iango ae kakaiaki bwa bon te tia bure ngaia ibukina bwa e aki kona ni kakororaoa kaboraoani maiuna ma baike e tangiri te Atua. E taku neiei n tokina: “I aikoa tatataro.”

TE REIREI MAN ANA TAEKA TE ATUA: E nori aki kororaoim aika raba Iehova ao e ataiko bwa antai raoi ngkoe. E taekinaki ae kangai n te Baibara: “E atai arora ni karaoaki; E uringira ba taano ngaira.” Ma te bwai ae kakawaki riki, e aki karekei naba kaira “n ai aron ara bure” ma e nanoangaira ni kabwarai ara bure ngkana ti rairi nanora.—Taian Areru 103:10, 14, BG.

Iangoa Tawita, ae uean Iteraera are e taekinaki n te moani kaongora mai buakon aika a karinanaki aikai teuana imwin teuana. E taku Tawita n ana tataro nakon te Atua: “A nora moan rikiu are tuai banin matam, Ao a bane bwain rabatau ni koreaki i nanon am boki . . . Te Atua, Ko na tirotiroai, ao ata nanou.” (Taian Areru 139:16, 23, BG) Eng, e kakoauaa raoi Tawita bwa e ngae ngke e kakaiaki ana bure n tabetai, ma e kona Iehova n nora nanona n rairannano.

E ataiko raoi riki Iehova nakoni kinaakim irouia aomata nako. E taekinaki ae kangai n te Baibara: “E tarataraa tinanikun te aba te aomata, ma E tarataraa te nano Iehova.” (1Tamuera 16:7, BG) E ataia te Atua bwa bukin tera ngkai ko karaoa anne ao a na bane baikai ni karikiko bwa te aeka n aomata raa ngkoe: rikiam, aroni kaikawaam, baika a otabwaniniko ao anuam. E noriko ngkai ko kakorakorako ni kan riki bwa te aomata ae raoiroi, ao e kakawaki anne irouna e ngae naba ngke iai am kairua.

Ma e kanga te Atua ni kabongana ana atatai ae kangaanga te ota iai ibukini kabebeteam bwa ko na ataiko bwa ‘antai raoi ngkoe’?