Kaaniko Ma Te Atua

“Iehova, . . . Ko Ataai”

“TI KONA n taonaki n te rawawata ae moan te korakora n ataakin ae akea ae tabeakinira ke n ota n arora.”a A kaineti taeka aikai nakoim? Ko a tia n namakinna bwa akea ae tabeakiniko ke n ota n te bae ko rinanona? Ngkana ngaia anne, ko kona ni karekea raun nanom n aei: E rangi n tabeakinia taan taromauriia Iehova, n te aro ae e atai bwaai ni kabane aika riki ni maiuia ni katoabong. A karauaki nanora n ana taeka Tawita n Taian Areru 139, (BG) ni kaineti ma te koaua aei.

E kakoauaa raoi Tawita bwa e bon tabeakinna te Atua ao e taku: “Iehova, Ko tirotiroai, ao Ko ataai.” (Kibuna 1) E kabongana te taeka aei Tawita ni kataamneia te iango aei. Te weabe n te taetae n Ebera ae rairaki ikai bwa “tirotiroai,” e kona n nanonaki iai kenakin te atibu ae kakawaki (Iobi 28:3), tarataraan te aba (Taani Motiki-Taeka 18:2), ke nenerani baika koaua ibukin te kaboowi (Te Tua-Kaua 13:14). Eng e ataira raoi Iehova, n aron ae kaanga e a tia n tirotiroi iterani maiura nako ma aroarora ni kabane. E reireinira Tawita bwa e bon tabeakinia ana toro te Atua. E tirotiroi raoi aroia ao e kinaia n tatabemania nako.

E karababaa riki aron te Atua n tirotiroia aomata Tawita ngke e taku: “Ko ata tekatekau ma teirakeu, Ko ata nanou mai kiraroa.” (Kibuna 2) N te aro teuana, e ‘raroa’ Iehova bwa e maeka i karawa. Ma e ngae n anne, e ataa te tai ae ti tekateka iai tao imwin ara mwakuri korakora n te bong teuana, te tai naba ae ti teirake iai n te ingabong, ao maiura ni katoabong. E atai naba ara iango, baika ti tangiri, ao baika ti kani karaoi. E namakina te maaku Tawita ngkai e aki toki n tarataraia Iehova? E aki, ma e kukurei n anne. (Kibuna 23, 24) Bukin tera?

E ataia Tawita bwa iai bukina ae raoiroi iroun Iehova ngkai e tarataraiia taan taromauria. E taekina bukina aei Tawita ngke e korea ae kangai: “Ko tirotiroa kawaiu ma weneu, Ao Ko atai aroarou ni kabane.” (Kibuna 3) E nori ‘aroarora ni kabane’ Iehova n aron ara kairua ao ara mwakuri aika raoiroi ni katoabong. E kaatuua ana iango i aon ae raoiroi ke ae buakaka? Te taetae n Ebera ae rairaki ikai bwa “tirotiroai” e kona n nanona “raumeaa,” ke “kaokoroa” n aron ae e karaoia te tia ununiki ngkana e kaokoroa kunin te uita ae akea manenana ibukini karekean te uita ae kakawaki. Te taeka ae “ataa” e raira te taetae n Ebera ae kona n nanona “e kakawaki” irouna. Ngkana e neneri Iehova baika a taekin taan taromauria ao baika karaoi ni katoabong, ao e kakawaki riki irouna aia mwakuri aika raoiroi. Bukin tera? Ibukina bwa e kakawaki irouna aia kakorakora ibukini kakukureiana.

Ti reireiaki n Taian Areru 139 bwa e rangi n tabeakinia taan taromauria Iehova. E tirotiroi nanoia ao e tararuai maiuia ni katoabong. Mangaia are e atai kangaanga aika a kaaitarai, ao e ota ni korakain aia iango ma nanoia ake a kona n riki mani kangaanga aikai. E anaaki nanom bwa ko na taromauria te Atua ae mwamwannano aei? Ngkana ngaia anne, ko kona ni kakoauaa aei: E bon aki kona Iehova ni “mwanuokin ami mwakuri ao ami tangira ake kam kaotia ibukin arana.”—I-Ebera 6:10.

[Kabwarabwara ae nano]