E Ota Iroum te Atua?

REIREIARA MAN TE KARIKIBWAI

Iangoa te reitaki ae te kabanea ni kaan ae reke irouia bwebwee ake titeboo teia. Iai te reitaki ae okoro i marenaia. E taku Nancy Segal ae te tarekita n te Twin Studies Center are iai naba bwebweena, bwa iai tabeman bwebwee aika “a a taneiai ma te namakin ae kataetaean te aomata ae e ota raoi irouia, n akea aia kabwarabwara.” E kabwarabwaraa reitakina ma bwebweena temanna te aine ni kangai: “Ti kaai n atai arora nako.”

E aera ngkai e reke te aeka n ota ae okoro aei? E noraki ni mwin te kakaae bwa e ngae ngke e irekereke iai te mwenga ao aia tararua kaaro, ma e taraa n ae e irekereke riki ma rikia ni bwebwee.

IANGOA AEI: Bon tii te tia Karikira ae atai raoi arora. E bon taekina aei te tia areru are Tawita: “Ko teimatoa n nangoai i nanoni biroton tinau. A  aki raba mairoum riiu ngke I karaoaki n te aro ae raba. . . . A norai naba matam ngke I a tibwa beru. A koreaki bwaina nako i nanon am boki.” (Taian Areru 139:13, 15, 16) Bon tii te Atua ae kona n ota raoi n aroni karikara ao n aroaroni maiura. Ana atatai te Atua ibukira ae okoro aei ao aroni karaoara, a a karauaki iai nanora bwa e bon ota n arora nako.

REIREIARA N TE BAIBARA IBUKIN ANA ATATAI TE ATUA

E tataro ni kangai Tawita: “Ko a tia n nenerai ngkoe ae Iehova, ao ko ataai. Ko ataa au tai n tekateka ao au tai n teirake. Ko atai au iango mai kiraroa. Imwain ae I taekina te taeka ni wiu, ao noria! Ko a kaman ataia raoi ngkoe ae Iehova.” (Taian Areru 139:1, 2, 4) E atai naba Iehova ara namakin aika raba ao e “atai bwaai ni kabane aika n te iango.” (1 Rongorongo 28:9; 1 Tamuera 16:6, 7) Tera ae oti ni kiibu aikai ibukin te Atua?

E ngae ngkana ti aki taekin ara iango nako ma ara namakin n ara tataro, ma e aki tii nora te bae ti karaoia ara tia Karikiriki ma e ota naba bwa e aera ngkai ti karaoia. Irarikin anne, e ataa te bae raoiroi ae ti kani karaoia, e ngae ngkana iai baika a tukira bwa ti na bunrii nanora. Ni koauana, ibukina bwa e a tia te Atua ni karina i nanora te tangira n te moantai, e kukurei ao n ingainga naba ni kan nori ao n ota n ara iango ma ara mwakuri.—1 Ioane 4:7-10.

E karaui nanora ni kangai te Baibara

• “A mena matan Iehova i aoia akana raoiroi, ao a uki taningana nakon aia kakorakora n tataro ni bubutii.”—1 BETERO 3:12.

• E berita te Atua ni kangai: “N na anganiko te ataibwai ao N na reireiniko te kawai ae ko riai n nako iai. N na anganiko taeka n reirei ao e na memena naba matau i aom.”—TAIAN ARERU 32:8.

E RANGI N ATATAIAOMATA TE ATUA

E kona ataakin ae e ota te Atua n ara kangaanga ao n ara namakin ni buokira bwa ti na nanomwaaka ribuakoni kangaanga? Iangoa te bae riki nakon Anna mai Nigeria. E taku neiei: “I nanououa bwa e manena te maiu ni kaineti ma kangaanga aika I rinanoi ke e aki. E a tia ni mate buu ao I tararuaa natiu te aine ae rin n te onnaoraki ibukin aorakina ae te hydrocephalus (batin te ran n te kaburoro), ike e a kuneaki naba aorakiu ae e kaentia mammau ao I riai ni korokoro, ni bwainnaoraki ni bwain te kaentia ae te chemotherapy ao te radiotherapy. E bon rangi ni kangaanga irou bwa N na rin n te onnaoraki ao n tararuaa naba natiu.”

Tera are e buoka Anna ni kekeiaki n ana kangaanga? “I iaiangoi kiibu n aron are n I-Biribi 4:6, 7, ae kangai bwa ‘te rau are mairoun te Atua ae riaon aia iango aomata, e na kawakin nanomi ma ami iango.’ Ngkana I uringa te kibu aei ao I namakina reitakiu ma Iehova, ao I ataia ae e ota riki irou. I rangi ni kaungaaki naba irouia taari n te ekaretia.

“E ngae ngke I boni kabokorakora naba ngkai ma aorakiu, ma e a moanna riki n nakoraoi arou ma natiu. Ibukina bwa e mena i rarikira Iehova, ti a ataia ae ti aki riai n iangoi baika kabwaranano ngkana ti kaaitara ma kangaanga. E karaui nanora Iakobo 5:11 ni kangai: ‘Ti iangoiia ake a nanomwaaka bwa a kukurei. Kam a tia n ongo nanomwaakan Iobi ma n nora mwin ana mwakuri Iehova nakoina, ao kam a ataia iai bwa e rangi n tatangira [ke, “rangi n atataiaomata,” kabwarabwara mai nano] Iehova ao n nanoanga.’” E ota raoi Iehova n te baere rinanona Iobi, ao ti kakoauaa naba bwa e bon ota naba ni kangaanga aika ti rinanoi.