Karaoa Ngkai Am Babaire Ibukini Karababaan Am Mwakuri ni Minita
1. Tera te bae kakawaki n namwakainan te Kauring, ao tera arora ni katauraoi nako iai?
1 Ni katoaa namwakainan te Kauring, ao e reke iai ara tai ni “kabatia katituaraoan Iehova.” (TaiAre. 109:30, BG) Ko kona ni karababaa am mwakuri ni minita i nanoni Maati, bwa am anga ni kaotiota am kakaitau nakon te tia Katauraoa te kaboomwi? Aio te tai ibukini karaoan am babaire.—TaeRab. 21:5.
2. N te ririki ae nako ao tera aromi n tatabemaningkami nako, ni butimwaea te babaire ni kerikaakin te aoa ae na kakoroaki irouia auxiliary bwaiania i nanon Eberi?
2 Auxiliary Bwaiania: N te ririki ae nako, ao a rotaki n te kimwareirei ae bati ekaretia nako n ataakin te babaire ni kerikaakin te aoa ae na kakoroaki ibukin te auxiliary bwaiania i nanon Eberi. E korea ae kangai te tari te mwaane temanna: “I reirei n te kauarinan, ao e aki kona n reke angau n regular bwaiania. Ma N na kataia ngkai ni kakoroa 30 te aoa ao ni kakorakoraai ni kakoroa 50 te aoa i nanon Eberi.” E korea ae kangai te tari te aine ae kabwanina ana tai ni mwakuri ni kareketianti: “E rangi ni bebete kakoroan te aoa ae tenibwi!” Ngke e katanoataaki te babaire aei, ao e taku te tari te aine ae te bwaiania ngkoa ae ai 80 ngkai ana ririki: “Aio te tai are I a kamani kantaningaia! E ataia Iehova bwa bon te mwakuri ae rangi n raoiroi i nanoni maiu, te bwaiania!” A katei tiaia tabeman aika a aki kona n auxiliary bwaiania, bwa a na kabatiaa riki karaoan te mwakuri ni minita.
3. Baikara bukina ae ti riai n iangoa iai te auxiliary bwaiania n namwakaina aika Maati, Eberi ao Mei?
3 Bon te tai ae angaraoi te namwakaina ae Maati ibukin te auxiliary bwaiania, bwa e a manga reke naba iai ara tai ni kakoroa te aoa ae 30 ke 50. Irarikin anne, ni moa man te Kaonobong ae Maati 17, ti na uataboa te mwakuri ae kakawaki ni kaoia aomata nako bwa a na uataboa karaoan te Kauring ma ngaira n Eberi 5. A na rangi ni kimwareirei aomata aika bati ni kabatiaan aia ibuobuoki n te mwakuri ni minita, n te aro are a na manga tangiria n auxiliary bwaiania n Eberi ao Mei, ni kakoroa te aoa ae 50.
4. Ti na kanga ni kabatiaa ara ibuobuoki n te mwakuri ni minita, ao tera mwina?
4 N tain am Taromauri n Utu n te tairiki n te wiki ae imwina, e aera ko aki maroroakinna bwa e na kanga kaain am utu temanna ni karababaa ana mwakuri ni minita n namwakainan te Kauring? (TaeRab. 15:22) Butiia Iehova bwa e na kakabwaiaa am kakorakora. (1Ioa. 3:22) Ko na aki tii kabatiaa katituaraoan Iehova ni kabatiaan am ibuobuoki n te mwakuri ni minita, ma ko na karikirakea naba iai kimwareireim.—2Kor. 9:6.