Te Mwakuri ae na Moanaki Karaoana ni Maati 17, Ibukini Katanoataan te Kauring
1. Tera te mwakuri ae na moanaki karaoana ni Maati 17?
1 Te Kauring ae kakaraoaki ni katoa ririki, boni kaotiotani maten Iesu. (1Kor. 11:26) Ngaia are ti tangiriia aomata nako bwa a na airi ma ngaira, ao n ongoraea taekan te kaboomwi ae ana bwaintituaraoi Iehova. (Ioa. 3:16) N te ririki aei ao e na moanaki karaoan ara mwakuri n te Kaonobong, Maati 17, ae kaoaia aomata nakon te Kauring. Ko ingainga n uataboa te mwakuri aei n am kabanea ni kona?
2. Tera ae ti kona n taekinna ngkana ti anganako te beeba ni kakao?
2 Baika Ti Kona n Taekin: E tamaroa riki ngkana ko kakimototoa am maroro. Ti kona ni kangai: “Mauri. Ti tangiria n anganiko ma kaain am utu te beeba ni kakao aei nakon te botaki ae kakawaki ae kakaraoaki ni katoa ririki, ae na karaoaki ni katobibia te aonnaba n Eberi 5. E na karaoaki te kabwarabwara man te Baibara ibukia aomata nako, i aon te baere kakororaoaki ni maten Iesu ao te bae e tabe ni karaoia ngkai. E kaotaki n te beeba ni kakao aei te tai ao te tabo ae na boo iai te botaki anne n ara aono.” Ti riai naba n anganako te maekatin ngkana e angaraoi, ngkana ti uataboa te mwakuri anne n te wikeen.
3. Ti na kanga ni kona ni kaoia aomata aika bati?
3 Kaoia Aomata Aika Bati: Tiara bwa ti na kaoia aomata aika bati. Ngaia are ti riai ni kaoia aika ti reirei ma ngaiia n te Baibara, aika ti okiokiriia, ara utu, raora ni mwakuri, raora n reirei, kaain rarikira ao tabeman riki aika ti kinaia. E na katauraoaki irouia unimwaane n te ekaretia te kaetieti ibukini mwakurian ara aono ni kabane. E uaana ara mwakuri ni katoa ririki ae kaoaia aomata nakon te Kauring. Ngke e roko n te tabo n taromauri te aine temanna n te ririki ae nako, ao e buokaki iroun te tia ibuobuoki temanna ni kakaaea te tia uarongorongo are e kaoa neienne. Ma e taekinna te aine anne bwa akea ae kinaa, ao e anganaki ana beeba ni kakao iroun temanna ae uarongorongo man te auti teuana ma teuana ni moaningabongin te bong anne.
4. Baikara bukina ae ti riai n ingainga iai n uataboa te mwakuri?
4 Tao e kona temanna ni kaea te Kauring ibukin te beeba ni kakao are ko anganna. E ngae ngkana ko butimwaeaki ke ko aki, ma e na riki am mwakuri korakora bwa te bwai ni kakoaua. E na katanoataaki ni beeba ni kakao ake ko tibwai, taekan Iesu ae e a riki ngkai bwa te Uea ae mwaaka. Ingaingam n uataboa te mwakuri aei, e na kaotiotaki iai nakoia te koraki ake a noriko aika kaain am aono, raom n uarongorongo, ao ae kakawaki riki bon Iehova, bwa ko rangi ni kakaitau ibukin te bwaintangira ae te kaboomwi.—IKoro. 3:15.