Teimatoa n Riki Bwa te Minita ae Mwaatai
1. Baikara katoto n te moan tienture aika kaotaki iai arora ni mwaatai n riki bwa minita?
1 A riai Kristian ni mwaatai n riki bwa minita. Aei bukina are e angania taan rimwina Iesu te reirei ni kataneiai bwa a aonga ni mwaatai n te mwakuri n uarongorongo. (Ruka 9:1-5; 10:1-11) Anne naba bukina ngke e kairaki Aboro iroun Akura ma Beritikira ao a “kamataataa nakoina kawain te Atua, ni kaetia riki.” (Mwa. 18:24-26) N aron naba anne, e kaungaa Timoteo ae te tia tataekina te rongorongo ae raoiroi Bauro bwa e na teimatoa ni maiuakin ana reirei, bwa e aonga ‘n noraki rikirakena irouia aomata nako.’ (1Tim. 4:13-15) N aki ongeia bwa maanra ngaira n riki bwa taan uarongorongo ibukin te Uea, ti kainnanoa karikirakean rabakaura iai.
2. Ti na kangaa ni karekea reireiara mairouia tabemwaang?
2 Reireiam Mairouia Tabemwaang: Te anga teuana ibukini karikirakeani mwaataira bon reireiara mairouia tabemwaang. (TaeRab. 27:17) Ngaia are, kakauongo raoi ngkana a maroro raora n uarongorongo. Karekea aia ibuobuoki ae uaana taan uarongorongo aika mwaatai ao kakauongo raoi nakoia. (TaeRab. 1:5) Ko nanokokoraki ni manga okira te aomata, ni moana te reirei n te Baibara, ke n uataboi iteran nako te mwakuri ni minita? Biririmoa ni karaoi ao butiia te mataniwi n te kurubu ke te tia uarongorongo ae mwaatai ibukini kataneiaam. Uringnga naba ae e kona taamnein Iehova ni karikirakea konabwaira, ngaia are tataroakinna ni katoatai.—Ruka 11:13.
3. Tera arora ngkana ti anganaki te reirei n ibuobuoki, e ngae ngke ti aki kainnanoia?
3 Tai un ngkana ko anganaki te ibuobuoki ibukin rikirakem, e ngae naba ngkana ko aki kainnanoia. (TeMin. 7:9) Nanorinano ni butimwaea te ibuobuoki ao kakaitau iai n aron Aboro. Ko kaotiko iai bwa ko wanawana.—TaeRab. 12:15.
4. Tera ana kaungaunga Iesu ibukin te riki bwa te tia uarongorongo ae mwaatai?
4 E Neboaki te Atua ni Mwaataira: E kamanena te kaikonaki Iesu ni kaungaia iai taan rimwina bwa a na riki bwa minita aika mwaatai. E kabotaua ma te wain ao taan rimwina aika kabiraki bwa mwaanga. E taekina Tamana bwa e kaitiakii mwaanga nako aika kariki uaa “bwa a aonga ni kabatiai riki uaaia.” (Ioa. 15:2) N aron te tia bwaibwai n te nne ni kureebe are e tangiria bwa a na bati riki uaan arokana, e tangirira naba Iehova bwa ti na teimatoa ni karikii uaa ae ‘karaoiroana mai wira.’ (Ebera 13:15) Tera mwina ae kakukurei ngkai ti a riki bwa te tia uarongorongo ae mwaatai? E kaekaira Iesu ni kangai: “E neboaki Tamau n aei, ae kam teimatoa ni karikii uaa aika bati.”—Ioa. 15:8.