Te Angareirei ma te Boroutia ae te Rongorongo ae Raoiroi
1. Tera aroni katauraoan te boroutia ae te Rongorongo ae Raoiroi?
1 N aron ae maroroakinaki n Ara Mwakuri ni Minita ae bwain Turai, te bwai ni mwakuri teuana ae kakawaki n ara bwaoki ni mwakuri ibukin te angareirei, bon te boroutia ae te Rongorongo ae Raoiroi Mairoun te Atua! A aki koreaki kanoani kiibu ake a kaotaki iai bwa a aonga kaain te auti ni kona ni warekia man te Baibara. Kioina ngkai a katauraoaki n aron anne ara boki aika bati ibukin te reirei, e a kona iai te tia wareware ni karekea reireiana i bon irouna, ma e katauraoaki te boroutia aei bwa e na iai te tia ibuobuoki iai. Ngaia are ngkana ti anganako, ti riai ni kataia ni karaoa te reirei iai bwa e aonga kaain te auti n nora aroni kakukurein reiakinan te rongorongo ae raoiroi man te Baibara.—Mat. 13:44.
2. Ti na kangaa ni kabongana te boroutia ae te Rongorongo ae Raoiroi ni moan rokora n te auti?
2 Ni Moan Rokom n te Auti: Ko bae ni kangai: “I kani maroro ma ngkoe n te tai aei ibukin tabeaiangaia te botannaomata ni kaineti ma te maiu n taai aika a na roko. N am iango, a na rikirake n nakoraoi baika a riiriki? [Kariaia te kaeka.] Iai te rongorongo ae raoiroi n te Baibara ae kona n anganira te kantaninga. Aikai tabeua titiraki aika iai kaekaaia n te Baibara.” Angani kaain te auti te boroutia ao tuangnga bwa e na rinea te titiraki teuana mai akuna. Imwina, karaoa te reirei ni kabongana te moani barakirabe n te reirei anne. Te anga riki teuana bon tabekan te titiraki ae kauekea te kan ongora man te reirei are ko rineia ibukini kaain te auti, ao imwina kaota aroni buokana man te boroutia ni karekea iai kaekaana man te Baibara.
3. Kabwarabwaraa aroni waakinan te reirei mani kabonganaan te boroutia ae te Rongorongo ae Raoiroi.
3 Aroni Kairan te Reirei n te Baibara: (1) Wareka te titiraki ae nambwanaki ae turu koreana, ni buoka iai kaain te auti bwa e na iaiangoa te reirei ae kakawaki iai. (2) Wareka te barakirabe are i aana. (3) Wareki kiibu aika tei n rara ao kabonganai titiraki aika a na kaira te iango ni buoka kaain te auti, bwa e na nora aroni kaekaan te titiraki anne mani kiibu ake iai. (4) Manga kamanenaa te ka-2 ao te ka-3 n anga, ngkana iai riki te barakirabe i aan te titiraki anne. (5) Kabaneana, ongora ana kaeka kaain te auti ibukin te titiraki arei n nora iai otana. Imwin okiokirana ao n te tai are ko a katoatai iai ni waakina te reirei n te Baibara, tao ko kona ni bitia nakon te boki ae Ana Reirei ni Koaua te Baibara ke ni kabanea te boroutia anne.
4. Ti na kangaa ni mwaatai ma te bwai ni mwakuri ae kakawaki aei?
4 Ti riai n taneiai ma te bwai ni mwakuri ae kakawaki aei. Kabonganaa n taai ake e angaraoi iai. Imwaini karaoan te reirei teuana ma teuana, iangoa aron te aomata are reirei ao te anga ae moan te tamaroa ae e na mataata iai, mani kabonganaani kiibu ake n te reirei. (TaeRab. 15:28; Mwa. 17:2, 3) Ngkai ko a mwaatai ao n rabakau iai, ko na bae n rangi n iangoa te boroutia aei bwa am bwai ni mwakuri teuana ae ko tatangiria n reiakinia iai aomata taekan te koaua!