Mwakoro Uoua
Neboa Iehova bwa Tii Ngaia te Atua ae Koaua
1. Antai te Atua ae tii ngaia ae koaua?
E TAKU te Baibara bwa e ngae ngkai a mwaiti aika atongaki bwa aongkoa atua, ma “iroura ngaira bon ti temanna te Atua, ae te Tama.” (1 I-Korinto 8:5, 6, BK) ‘Te Atua ae tii temanna’ aei bon Iehova ae te tia Kariki bwaai ni kabane. (Te Tua-Kaua 6:4; Te Kaotioti 4:11) E taekina ae kangai Iesu, “Atuau ae Atuami.” (Ioane 20:17, BK) E boraoi ana iango ma Mote are e kangai rimoa: “Iehova ba boni Ngaia te Atua; bon akea temanna i rarikina.” (Te Tua-Kaua 4:35) E rietata riki Iehova nakon bwaai ni kabane ake a tataromauriaki, n aroia bouannanti, aomata aika aongkoa atua, ao ai aiana ae Tatan te Riaboro ae “atuan aon te aba” aei. (2 I-Korinto 4:3, 4) Ni kaaitaraia atua aikai, Iehova bon ‘te Atua ae tii ngaia ae koaua,’ n aron are e kabwarabwaraa Iesu.—Ioane 17:3.
2. Tera aron kabonganan maiura ae riai, ngkai ti a reiakina taekan te Atua?
2 E rikirake tangiran te Atua irouia aomata aika a reiakina taekana, ao a anaaki nanoia iai n aroarona ae moan te raoiroi, ao n ataakin bwaai ake e a tia ni karaoi ibukia, ao ake e nang karaoi. Ngke e a tabe n rikirake riki ni korakora tangiran Iehova irouia, ao a a namakina riki ingaingaia ni kan neboia. A na kanga ni karaoa anne? Te anga teuana, ngkana a tuangia aomata tabemwaang taekana. “E kaotaki tauani bukin Iesu n te wi ao e maiu te aba iai,” e taku I-Rom 10:10. Te anga riki teuana ae ti na katotonga iai aroarona, boni man arora n taetae ao n ara mwakuri. “Kam na katotonga te Atua, ngkami natina aika a tatangiraki,” e taku I-Ebeto 5:1. (BK) Ti riai n ataa raoi aroaron Iehova imwain ae ti na karaoa anne.
3. Baikara aroaron te Atua aika tanoata riki taekaia?
3 A mwaiti rongorongo n te Baibara aika a kaotii aroaron te Atua aika moanibaan te raoiroi. Aroarona aika aua aika tanoata riki, bon te wanawana, te kaeti-taeka ae riai, te mwaaka, ao te tangira. “Ana bai te Atua te wanawana.” (Iobi 12:13, BK) “Bon te kaeti-taeka ae riai ana aro ni kabane.” (Te Tua-Kaua 32:4) “E bati ni maka ma ni korakora.” (Itaia 40:26, BK) “Te Atua bon te tangira.” (1 Ioane 4:8) Ma, mai buakon aroaron te Atua aika aua aika tanoata riki taekaia aikai, e ngaa ae e kaotiotia raoi bwa te aeka n Atua raa ngaia?
“Te Atua bon te Tangira”
4. Tera riki aroaron te Atua ae aana karikan te iuniweeti aei ma bwaai aika maiu ni kabane iai?
4 Iangoia bwa tera ae e kaira Iehova bwa e na karika te iuniweeti ma taian anera ao aomata aika wanawana. Wanawanana ke mwaakana? Tiaki ngaia anne, bwa e ngae ngke e kabonganai naba aroarona aikai te Atua, ma tiaki akanne ake a a kairia. Ao ana kaeti-taeka ae riai e aki nanonaki iai bwa e riai n tibwatibwa te bwaintangira ae te maiu. Ma ana tangira te Atua ae korakora ae e kairia bwa e na tibwatibwa te kimwareirei nakoia aomata tabemwaang, ae reke man te maiu ao te wanawana. Te tangira e kairia bwa e na baireia bwa aomata aika ongeaba a na bane ni maiu n aki toki n te Baretaiti. (Karikani Bwaai 1:28; 2:15) E kairaki n te tangira ngke e baireia bwa e na kamaunaki kabuakakan te aba ae reke man ana bure Atam.
5. N aron ae taekinaki n te Baibara, tera te aroaro ae bannan raoi Iehova, ao bukin tera?
5 Mangaia are aroaron te Atua ae te kabanea n raoiroi mai buakon aroarona ni kabane, bon te tangira. Boni ngaia oin raoi aroarona. E aki taekinaki n te Baibara bwa Iehova bon te wanawana, te kaeti-taeka ae riai, ke te mwaaka, e ngae ngke a kakawaki naba bwaai aikai, ma e taekinaki bwa Iehova bon te tangira. Eng, Iehova bon rabwatan raoi te tangira. Aio te tangira ae boto i aon te riai, ao tiaki man te namakin n te nano. Ana tangira te Atua e kairaki n te koaua ao te raoiroi. Bon te aeka n tangira ae te kabanea n rietata, ae e kaotiotaki raoi iroun Iehova ae te Atua. Te tangira aei boni kaueean raoi te bangaaomata, ao e irianaki n taai nako ma te mwakuri.
6. Tera ae e buokira ni katotonga aroaron te Atua e ngae ngke e rietata riki nakoira?
6 Bon aroaron te Atua ae moanibaan te raoiroi aei ae te tangira, ae e buokira ni katotonga aroarona. Tao ti taku bwa ti aki kona ni katotonga raoi aroarona, kioina ngkai bon aomata aika mangori ngaira, aika aki-kororaoi, ao ti aki toki ni kairua. Ma aio riki kaotan ana tangira Iehova ae korakora: E ataa tokin ara konabwai, ao e aki kaantaningaira bwa ti na kororaoi. E ataia bwa ti rangi n raroa nako ngkai ma te aro ae kororaoi. (Taian Areru 51:5) Ngaia anne bukina ae e taekina iai ae kangai Taian Areru 130:3, 4: “Iehova, ngkana tao Ko mutiakini buure, ao ai antai ae na tei, te Uea? Ma bon iai kabarani buure i Roum.” Eng, Iehova bon te Atua ae “on n te atataiaomata, ae akoi, ae iremwe n un, ae e bati te nanoanga” irouna. (Te Otinako 34:6) “Ba Ko raoiroi, te Uea, ao Ko kani kabara buure.” (Taian Areru 86:5) Ai bebete ra nanora n ataakin anne! Ai bebete ra aron te beku iroun te Atua ae moan te raoiroi aei, ma namakinan mwamwannanoakira ao nanoangakira n te tangira!
7. E a kanga n noraki ana tangira Iehova n ana karikibwai?
7 E noraki naba ana tangira Iehova n ana mwakuri ni karikibwai. Iangoi bwaai aika raraoi aika mwaiti ake e a tia ni katauraoi Iehova ibukin kakukureiara, n aron taiani maunga aika tamaroa, buakonikai, naama, ao ai marawa. E a tia naba n anganira karara ae kamimi ae kakaokoro nako ae kakukurei kanakina ao e kateimatoaa naba maiura. Irarikin anne, Iehova e a tia naba ni katauraoi uee aika moan te tamaroa ma ni boiarara, ao ai te karikibwai ae taiani man aika kamimi. E karaoi bwaai ake a na kukurei iai aomata, e ngae ngke e aki kabaeaki bwa e na karaoa anne. Te koaua bwa ti aki kona n namakina kakukurein ana karikibwai ni kabane ngkai, bwa ti maiu n te aonnaba ae kairaki n te waaki ae buakaka. (I-Rom 8:22) Ma iangoa ae e na karaoia Iehova ibukira ngkana ti a roko n te Baretaiti! E kakoauaa ae kangai te tia areru: “Ko kaurea baim, ao Ko kabaneia akana maiu ni kanuaiia n te bwai [ae riai] ae a tangiria.”—Taian Areru 145:16.
8. Tera te mwakuri ae te kabanea n raoiroi ae e kaota aron tangirara iroun Iehova?
8 Tera te mwakuri ae te kabanea n raoiroi ae e kaota aron tangiran te botannaomata iroun Iehova? E kabwarabwaraa ni kangai te Baibara: “E tangiriia aomata te Atua n te aro ae E anga Natina ae te rikitemanna iai, ba e aonga n aki mate ane onimakinna, ma e na reke i rouna te maiu are aki toki.” (Ioane 3:16) E karaoa anne Iehova ibukina bwa a raoiroi aomata? E kaekaa I-Rom 5:8: “Te Atua E kaota oin ana tangira nako ira n aei, ba ngke ti boni buakaka naba, ao E mate Kristo i bukira.” Eng, te Atua e kanakomaia Natina ae kororaoi bwa e na anga maiuna bwa te karea ni kaboomwi ae na kamaiura man te kabuakakaki nakon te bure ao te mate. (Mataio 20:28) E a kaukaki iai kawain karekean te maiu are aki toki irouia aomata aika a tangira te Atua. E kakukurei bwa ana tangira te Atua e rabunia aomata ni kabaneia aika a kani kakaraoa nanona, bwa te Baibara e tuangira ae kangai: “Te Atua E bon aki nanonano n tarakin aroia aomata; ma e tangiraki i Rouna ane makua, ma ni karaoa te raoiroi, i buakoia botanaomata ni kabaneia.”—Mwakuri 10:34, 35.
9. Tera ae ti riai n namakinna ngkai Iehova e a tia n anga Natina bwa te kaboomwi ibukira?
9 Ma tera aron kabonganan maiura ae riai, ngkai ti a ataia bwa Iehova e a tia n anga Natina bwa te kaboomwi ibukira, are e a kauka nakoira te maiu are aki toki? E riai ni kakorakoraa riki iroura tangiran te Atua ae koaua ae Iehova. Ao n te tai naba anne, e riai ni kairira bwa ti na kan ongora iroun Iesu, are te tia tei ibukin te Atua. “[Iesu] E mate i bukiia ni kabaneia, ba a aonga n aki manga kabane maiuia akana maiu, i bukiia, ma a na kabane maiuia i bukin Teuare mate i bukiia.” (2 I-Korinto 5:15) Ai kakukurei ra touakin mwin mwanekan Iesu, bwa aroarona boni bannan raoi ana tangira ao ana nanoanga Iehova! E kaotaki aei n ana taeka Iesu nakoia aomata aika nanorinano: “Bane mai nakoiu, ngkami aika kam kua ma n rawawata i ani uotami, ao N na motiki rawami. Katokaa au amo i aomi, ao reireiningkami irou, ba I nimamannei ma n nanorinano, ao a na reke raun nanomi. Ba e kamaiu amomi ae mairou, ao e bebete uotami ae N na katokaa i aomi.”—Mataio 11:28-30, BK.
Kaotiota Tangiraia Aomata Tabemwaang
10. Baikara aaro tabeua aika ti kona ni kaotiota iai tangiraia raora ni Kristian iroura?
10 Ti na kanga ni kaotia bwa ti bon tangiria raora ni Kristian, n te aro ae a tangirira naba iai Iehova ma Iesu? Tarai aaro aika mwaiti aika ti kona ni karaoa iai aei: “E taotaona nanona te tangira, e atataiaomata; e aki babakantang te tangira; e aki kamoamoa te tangira, e aki kainikatonga, e aki karaoa ae aki riai. E aki ukoukori ana bwai, e aki kakaiun, e aki mutiakina te karawawataki. E aki kimareirei n te buakaka, ma e kimareirei n te koaua. E taotaona nanona nakoni bwaai ni kabane, e onimakini bwaai ni kabane, e kaantaningai bwaai ni kabane, e nanomwaka nakoni bwaai ni kabane. E bon aki bwaka te tangira.”—1 I-Korinto 13:4-8; 1 Ioane 3:14-18; 4:7-12.
11. Antai naba aika ti riai n tangiria, ao n te aro raa?
11 Antai riki aika ti riai n tangiriia, ao ti na kanga ni kaotiota anne? E kangai Iesu: “Ma ngaia ae kam na nako ni uota au reirei nakoia botanaomata ni kabaneia; babetitoia n aran te Tama ao te Nati ao te Tamnei ae e Raoiroi. Reireinia n tou muini bai ni kabane aika I a tia n tuangingkami.” (Mataio 28:19, 20, BK) E nanonaki iai kabutan euangkerion ana aonnaba te Atua ae boou ae te baretaiti, ae i aoni kawaina n roko ngkai, nakoia aomata aika a tuai n riki bwa raora ni Kristian. E katereterea Iesu bwa e aki riai ni kaonotaki ara tangira nakoia aomata aika titeboo aia koaua ma ngaira, bwa e kangai: “Ngkana kam [tii] tangiriia akana a tangiringkami, ao tera kaniwangami ae kam na kariaa? Tiaki bon aroia naba tan riko angabai? Ngkana kam kamauriia tarimi n ti ngaia, ao tera kakaokoromi iai? Kai a karaoa naba anne bekan!”—Mataio 5:46, 47, BK; 24:14; I-Karatia 6:10.
“Nakonako n Aran Iehova”
12. Bukin tera bwa bon tii te Atua ae e kona n arana te ara anne?
12 Te itera teuana riki ae kakawaki ae e na neboaki te Atua ae koaua iai, bon ataakin, kabonganan, ao reiakinaia aomata tabemwaang taekan arana ae kaokoro ae Iehova. E kaota nanona ni koaua iai te tia areru ngke e kangai: “Ba a aonga n ataiko, ae IEHOVA aram, ba bon ti Ngkoe Teuare Moan te Rietata i aonaba ni bane.” (Taian Areru 83:18) E boni kangai nanon te ara ae Iehova: “E Karaoia bwa E na Riki.” Boni ngaia Teuare Kakannato ae kakoroa bukin ana babaire ni kabane. Bon tii te Atua ae koaua ae e riai n arana te ara anne, bwa aomata a aki kona ni koaua raoi bwa e na nakoraoi aia kekeiaki ke e na aki. (Iakobo 4:13, 14) Bon tii Iehova ae e kona n taekina ae kangai, “te taeka ae I atongnga e na bae naba ni karika uana.” (Itaia 55:11, BK) A mwaiti aomata aika taonaki n te kimwareirei ngke a moan nora aran te Atua n aia Baibara ao a reiakina nanon te ara anne. (Te Otinako 6:3) Ma a na kakabwaiaki n te atatai aei tii ngkana a “nakonako n aran Iehova . . . n aki toki.”—Mika 4:5.
13. Tera ae reitaki ma ‘ataakin’ Iehova ao te nakonako n arana?
13 E kangai Taian Areru 9:10 (BK) ni kaineti ma arana: “A onimakiniko akana a ataiko.” E bati riki ae e nanonaki iai nakon tii ataakin te ara ae Iehova, bwa ataakina e aki kona ni karika onimakinana, n akea riki te bwai ae karaoaki. Ataakin aran te Atua e nanona ataakin aroaron Iehova n Atua, karinean mwaakana, te ongeaba n ana tua, ao onimakinana ni bwaai ni kabane. (Taeka N Rabakau 3:5, 6) N aron naba anne, te nakonako n aran Iehova e nanona te anganano nakoina ao te tei ibukina bwa temanna naba te tia taromauria, ao ni kabonganai maiura n te aro ae boraoi ma nanona. (Ruka 10:27) Ko tabe ni karaoa anne?
14. Tera ae ti kainnanoia i rarikin namakinan ae ti kabaeaki bwa ti na beku iroun Iehova, ngkana ti na tokanikai ni beku irouna n aki totoki?
14 Ngkana ti na beku iroun Iehova n aki toki, e aki tau ngkana ti karaoa anne ibukina bwa ti taku bwa ti kabaeaki iai. Te abotoro Bauro e kaunga nanon Timoteo ae e a tia ni beku iroun Iehova i nanon ririki aika mwaiti, ni kangai: “Ko na kamarurungko n tatangira te Atua.” (1 Timoteo 4:7, BK) Te nano ni kan taromauri e nako man te nano ae onrake n tangiran te aomata ae e na taromauriaki. ‘Tangiran te Atua’ e nanona kaotiotan te karinerine ao maakakin Iehova ae korakora, ao kaotan te atataiaomata nakoina ibukin tatangiran aroarona ma kawaina nako. E kairira naba bwa ti na tangiria aomata ni kabaneia bwa a na karinea arana. Ti riai ni karikirakea tangiran te Atua i nanoni maiura ngkana ti na nakonako n aran Iehova ae tii ngaia te Atua ae koaua, n aki totoki.—Taian Areru 37:4; 2 Betero 3:11.
15. Ti na kanga ni kona n taromauria te Atua n tii ngaia?
15 Ngkana e na butimwaeaki ara beku iroun te Atua, ti riai n taromauria n tii ngaia, bwa boni ngaia te Atua ae “aki kariaia te atua temanna” i rarikina. (Te Otinako 20:5, BK) Ti aki kona n tangira te Atua, ao n tangira naba te aonnaba ae buakaka ae atuanaki iroun Tatan. (Iakobo 4:4; 1 Ioane 2:15-17) Iehova e ataia bwa te aroaro raa ae ti kataia n uaiakinna i aoni maiura. (Ieremia 17:10) E norira bwa ngkana ti bon tangira te raoiroi, ao e na buokira n tokanikai i aon kataakira aika a roroko ni katoa bong. E boutokaira n te taamnei ae raoiroi ae mwaaka, ao e na buokira n tokanikai i aon te buakaka ae taabangaki n te aonnaba aei. (2 I-Korinto 4:7) E na buokira bwa ti na kateimatoa ara kaantaninga ae korakora ae taekan te maiu are aki toki i aon te aonnaba ae te baretaiti. Ai raoiroi ra te kaantaninga anne! Ti riai n tatangira te kaantaninga anne, ma ni kukurei ni beku iroun te Atua ni koaua ae Iehova, kioina ngkai boni ngaia ae e kanakoraoia.
16. Tera ae ko riai ni kani karaoia, n ikotaki ma aomata aika mirion ma mirion riki mwaitiia?
16 Mirion ma mirion mwaitiia aomata ni katobibia te aonnaba aika a kukurei ni butimwaea ana kakao te tia areru ae kangai: “Kam na buokai n neboa Iehova, ao ti na bane ni karietata arana.” (Taian Areru 34:3) E kaoko Iehova bwa ko na mena i buakoia te koraki ae e a tabe n rikirake mwaitiia ngkai, n aaba nako ake a a waakina karaoan aei.
Te Maroro Ibukin te Kauring
• Aekakira aroaron Iehova? Ti na kanga ni kakabwaiaki ngkana ti a ota raoi n aroarona?
• Ti na kanga ni buokia aomata tabemwaang n reiakiniia te koaua ibukin te Atua?
• Tera ae reitaki ma ataakin aran Iehova, ao te nakonako n arana?
[Taamnei n iteraniba 14]
Ibukin ana tangira Iehova ae korakora, e na ‘kaurea baina ni kabaneia ni kanuaiia akana maiu n te bwai ae a tangiria’