Tera Ae Nanonaki Ni Bwaai Aika Riiriki Ngkai?
E TAKU Iesu Kristo: E na kanikinaeaki “tokin te waaki i aon te aba,” n te buaka, te rongo, aoraki aika kamamate ao mwaeiein te aba.—Mataio 24:1-8, NW; Ruka 21:10, 11.
Ni moa man te ririki 1914, ao a rotaki maiuia aomata n taiani buaka i marenaia botannaomata ke i marenaia reeti n aomata, ao n taai aika mwaiti e riki aei imwin aia mwakuri mataniwin Aaro n irekereke ma botaki n tautaeka, ao mwakuri n iowawa aika tiritiri ake a taabangaki karaoaia ngkai.
E ngae ngke e a rikirake te rabakau ni kaineti ma te ununiki, ma a bon rotaki naba n te rongo aomata aika irabubua te mirion mwaitiia ni kabutaa te aonnaba. Ni katoa ririki, ao a mate aomata aika mirion ma mirion mwaitiia man aki taun kanaia.
Butinakon aoraki aika kamamate man ewewe, boni ngaia naba kanoan te kanikina are e taekinna Iesu. Imwin te Moan Buaka are Kabutaa Aonnaba ao e taekinaki bwa a mate aomata aika raka mwaitiia i aon 21,000,000 man te aoraki are te flu. Ni butinnaoraki ake rimoa, a bon ituaki kaain te tabo teuana, ma e kaokoro te flu aei bwa e rota te botannaomata n te aonnaba ni kabutaa, ao ai uana naba ma abamwakoro aika raroa nako. E tabe ni buta te aonnaba n te AIDS ngkai, ao te kangenge, te maraeria, te baabobo, ao te dengue fever, a teimatoa n aaba aika tabe n rikirake.
E ribootinaki bwa iai ngaa ma ngaa mwaitin mwaeiein te aba aika kakaokoro korakoraia ni katoa ririki. N aki ongei bwaai aika kanakoraoa aron ataakin ao ribootinakin mwaeiei, ma e kaakatanoataki n rongorongon aonnaba taekan kabuanibwai ake imwin mwaeiein te aba n taabo ake e korakora iai te botannaomata.
E a kaman taekina naba aio te Baibara: “Ko na ata aei, ba ane a na roko tai aika kamamate ni boong aika kaitira. Ba ane a na riki aomata ba taan tangiriia i bon i rouia, n taani kani manemane, taani kamoamoaia, taani kainikatonga, taan taetaebuaka te Atua, taan aki iri nanoia aia karo, taani bangaomata, taan aki itiaki, taani babakaine, taani kainamatoa, taani winanti, taan aki tauu baangiia, taan tiritiri, taan riba te raoiroi, taani kamwanea te aba, taan tautau aroia, taan nanorietata, taan tangira riki te maie nakon te Atua; taani bakan tangira te Atua, ma a kaakea mwakan tangirana: ko na tan nako mairouia aikai.”—2 Timoteo 3:1-5.
Ko aki ngkanne kakoauaa ae ti a roko ngkai n “taai aika kamamate”?
Ko a tia ni karaua raoi n tirotiroi aroia aomata ngkai bwa e riao aroia n tangiriia i bon irouia, n tangira te mwane, ao ni kairaki aroia n te nanorieta?
Antai ae na kakewea te koaua ae e a onrake te aonnaba aei irouia aomata aika a imanono n tangira karaoan oin nanoia, ma a babanga ni kakaitau, a nanomatoa, ao a aki kakaonimaki?
Ko a tia n ataia ae e rangi ni korakora rikiraken te karitei nakoia kaaro n ikotaki naba ma akean te tangira, tiaki tii n taabo tabeua, ma ni kabutaa te aonnaba?
Akea te nanououa bwa ko a bae n tia n ataia ae ti a mena ngkai n te aonnaba ae korakora iai tangiran te kakukurei, ma e karako tangiran te raoiroi. Akanne aroaro aika a na bati ni bwabwainaki ni “boong aika kaitira,” aika kabwarabwaraki n te Baibara.
Te koaua bwa a kainnanoaki kakoaua riki tabeua bwa e aonga ni kona n ataaki bwa taai raa aika ti a mena ngkai i nanoia? E a kaman taekinna naba Iesu bwa n te tai aei ao e na tataekinaki iai euangkerion ana Tautaeka n Uea te Atua i aonnaba ni kabane. (Mataio 24:14) E kaakaraoaki aei ngkai ke e aki?
Te Taua-n-Tantani, bon te maekatin ae boto i aon te Baibara are e kamanenaki ibukin katanoatan euangkerion ana Tautaeka n Uea Iehova, ao e boboretiaki n taetae aika a mwaiti riki nakon maekatin ni kabane aika boboretiaki.
Ni katoa ririki a kabanea te mwaiti n aoa ae raka i aon teuana te birion, Ana tia Kakoaua Iehova, n tataekina rongorongon ana Tautaeka n Uea te Atua nakoia aomata.
A boboretiaki booki aika kabwarabwaraa te Baibara irouia Ana tia Kakoaua Iehova n taetae aika 400 tabun mwaitiia, n ikotaki naba ma taetae aika kabonganaki n aaba aika raroa nako aika tii tabeman kaaiia. A a tia Ana tia Kakoaua Iehova ni karokoa te rongorongo ae raoiroi irouia botannaomata ni kabane; a a tia naba n tataekina te rongorongo ae raoiroi n aaba ao aono aika mwaiti ake a aki rangi ni mwannanoaki irouia tautaeka n te aonnaba ibukina bwa a rangi n uarereke. A waakina aia babaire ibukin te katoa tai ni botaki n reirei n te Baibara n angiin aaba.
E a tabe n tataekinaki te rongorongo ae raoiroi ibukin ana Tautaeka n Uea te Atua, i aonnaba ni bane ngkai, ma tiaki ibukin karekean rairan nanoia aomata nako, ma bon te bwai ni kaotioti nakoia. A anganaki ngkai aia tai aomata n taabo nako, bwa a na kaotii nanoia ni mutiakina Teuare karika karawa ma aonnaba, ma ni karinei ana tua, ao ni kaotiota te tangira nakoia raoia n aomata.—Ruka 10:25-27; Te Kaotioti 4:11.
N te tai ae e a kaan roko ngkai, e nang kamwawaia aomata aika buakaka mai aon te aba ana Tautaeka n Uea te Atua, ao e nang karaoia bwa te baretaiti ni kabutaa.—Ruka 23:43.
[Bwaoki n iteraniba 6]
Kaitirani Bongin Tera?
Tiaki kaitira ni bong ibukin maiuia te botannaomata, bwa e taekinaki n te Baibara bwa te koraki ake a kaakaraoa nanon te Atua, a na kaantaningaa te maiu n aki toki.—Ioane 3:16, 36; 1 Ioane 2:17.
Tiaki naba kaitirani bongin te aonnaba. E beritanna te Atua n ana Taeka bwa e na maekanaki n aki toki te aonnaba.—Taian Areru 37:29; 104:5; Itaia 45:18.
Ma boong aika kaitira aikai, boni kabanean bongin te waaki i aon te aba ae ngkai, are e taabangaki iai te iowawa ae tiritiri ao te bangaaomata, ao tokiia naba aomata aika tangira te waaki aei.—Taeka N Rabakau 2:21, 22.
[Bwaoki/Taamnei n iteraniba 7]
Te Koaua bwa te Baibara bon Ana Taeka te Atua?
A kokorei taeka aika kangai burabeti n te Baibara: “E kangai ana taeka Iehova.” (Itaia 43:14; Ieremia 2:2) Iesu Kristo are Natin te Atua e katuruturua naba, bwa ‘tiaki mairouna taeka ake e atongi.’ (Ioane 14:10) E kamataataa te Baibara ni kangai: “E anganaki te aba te Baibara ni kabanea iroun Tamnein te Atua.”—2 Timoteo 3:16.
E ribootinaki man te United Bible Societies bwa e boretiaki te Baibara n taetae aika raka i aon 2,200 mwaitiia, ao akea riki te boki teuana are boretiaki n aron anne. Akea naba te boki ae e a tia n tibwatibwaki n te mwaiti ae rangi ni korakora ae raka i aon aua te birion. Tiaki ngaia anne te bwai ae ko kaantaningaia n te rongorongo ae roko mairoun te Atua ibukia aomata ni kabane?
Nora te boki ae The Bible—God’s Word or Man’s? ae boretiaki irouia Ana tia Kakoaua Iehova, ibukin kabwarabwara riki tabeua aika a na kamataataa raoi bwa e boni kairaki korean te Baibara iroun te Atua.
Ko na kakabwaiaki ngkana ko wareka te Baibara ma ni kakoauaa raoi bwa bon ana Taeka te Atua.
[Bwaoki/Taamnei n iteraniba 8]
Tera Ana Tautaeka n Uea te Atua?
Bon te tautaeka ae kaokoro ae e mena i karawa, ae e waakina ana kairiri te Atua ni koaua ae Iehova are te tia Karika karawa ma aonnaba.—Ieremia 10:10, 12.
E kaotaki n te Baibara bwa e a tia te Atua n angan Iesu Kristo te mwaaka ni kairiri iai. (Te Kaotioti 11:15) Ngke e mena i aon te aba Iesu, ao e kaotiotia bwa e a kaman anganaki mwaakana ae korakora mairoun te Atua, are e kona iai ni katoka te angibuaka, ni katoki aoraki nako, ao ni kautiia naba maate. (Mataio 9:2-8; Mareko 4:37-41; Ioane 11:11-44) E a kaman taetae ni burabetinaki n te Baibara bwa e na anganna te Atua “te tautaeka, ma te neboaki, ma ueana, ba a aonga ni bane natanaomata, ma botanaomata, ma taian taetae, n toro irouna.” (Taniera 7:13, 14) E aranaki te tautaeka anne bwa te Tautaeka n Uea i karawa; ao e bon tautaeka ngkai mai karawa Iesu Kristo.
[Taamnei n iteraniba 7]
Tataekinan te rongorongo ae raoiroi ni katobibia te aonnaba