Ti Na Kanga Ni Kaitaraa Namakinan Te Bwarannano
● E ngurengure ni kangai Ataba: “E boni matebuaka kaitiakan nanou i rou, ma tebokani baiu n aki bure; ba I ororeaki ni kabongnga, ao e reke kaiu n te ingabong ae koraki.”—Taian Areru 73:13, 14.
● E ikenrawa ni kangai Baruka: “I kananoanga ngkai! ba E raona marakiu Iehova n te nanokawaki; I kua n ikenrawau, ao e aki reke te motirawa i rou.”—Ieremia 45:3.
● E baebaeti ni kangai Nei Naomi: “E arona te aro ae bati ni maai nako iu Teuare Moan te Mwaka. I oti nako ngke I on, ao E a manga kaokai Iehova n akea au bwai: bukin tera ngkai kam aranai ba Naomi, ngkae E kaotiota arou n ekai nako, ao E karawawataai Teuare Moan te mwaaka?”—Ruta 1:20, 21.
N TE BAIBARA a mwaiti rongorongoia taan taromauria Iehova, aika a taonaki n taai tabetai n namakinan te bwarannano. Ni koauana, ibukin aki-kororaoira, ti bane n nanamakina anne n taai tabetai. Tao tabeman i buakora a kai namakina riki te bwarannano—ae tao e irianaki n namakinan ae a kananoanga—nakoia riki ake tabeman, ibukina bwa tao iai bwaai aika rangi ni kananokawaki ake a a tia n riki nakoia.
Ngkana a aki kaetaki iango aikai, a kona ngkanne n uruana am iraorao ma aomata tabemwaang ao bon i marenam naba ma Iehova ae te Atua. Te aine ae te Kristian temanna ae e roroko irouna namakinan ae e kananoanga, e kaota ae kangai: “I a tia ni karau taeka ibukin kaoau nakon taiani botaki n iraorao aika mwaiti, ibukina bwa I taku i bon irou bwa e aki tau arou n iraorao ma kaain te ekaretia.” Ai korakora ra te kabuanibwai nakon te aomata ae e kona n riki man aeka n namakin aikai! Ko na kanga ngkoe ni kaitarai?
Kaania Riki Iehova
N te ka 73 n Areru, Ataba e karaua raoi ni korea taekan mangaon ana iango. Ngke e kabotaua aroni maiuna ma nakoraoin maiuia akana buakaka, e a bon taonaki iai n te bakantang. E noria bwa aomata ake a aki tangira te Atua, a nanorieta ao a tiritiri, ma titeboo ma ae a aki katuaeakaki iai. E kaota naba nanokokorakina Ataba ibukin bonganan maiuakinan te aroaro ni maiu ae eti irouna.—Taian Areru 73:3-9, 13, 14.
Ko a tia ngkoe n noria bwa a tara n nakoraoi aroni maiuia aomata aika buakaka ake a kamoamoa n aroia anne, n aron are e noria Ataba? E a kanga Ataba n tokanikai i aon namakinan te bwarannano irouna? E reitia ni kangai: “Ngke I iangoa arou n ata te baei, ao I bati n rawawata iai; ni karokoa rinu n uman te Atua ae tabu, ma iangoan tokiia i rou.” (Taian Areru 73:16, 17) E toua te mwaneka ae raoiroi Ataba ngke e kawara Iehova n te tataro. N taeka aika kabonganaki rimwi riki iroun te abotoro Bauro, Ataba e taona “te aomata ae bon te aro n aomata” are i nanona, n te aro are e a manga kamaiua ‘te aomata ae bon iai tangiran bwaai n taamnei’ irouna. Ngke e kaboraoa ana taratara ma tangiran bwaai n taamnei, ao e a ota iai bwa Iehova e ribaa te buakaka ao e na kareke kaiia akana buakaka n te tai ae riai. —1 I-Korinto 2:14, 15.
Ai kakawaki ra ngkai ae ko na kariaia te Baibara bwa e na buokiko ni kaatuua riki am iango i aon koaua aika kaineti ma te maiu aei! E kauringira Iehova bwa e aki mataki n aron noran aia mwakuri aomata aika buakaka. E reirei ni kangai te Baibara: “Kam na tai burebureaki; E aki konaki ni mamanaki te Atua: ba te bae e unikia te aomata, ao e na manga anaa naba uaana. . . . Ma a na tai toki nanora ni kakaraoa ae raoiroi.” (I-Karatia 6:7-9) Iehova e na kakia taani kakaraoa ae buakaka “n taabo aika maranran”; e na “kabwakaia nakon te uruaki.” (Taian Areru 73:18) E na boni bae n tokanikai ana kaeti taeka ae riai te Atua.
Te botumwaaka n ira te babaire ibukin karekean te marike n taamnei n ana taibora Iehova ao te iraorao ae raoiroi ma ana aomata te Atua, a na buokiko ni kamatoa riki am onimaki, ma n tokanikai i aon namakinan te bwarannano ao iango ni kabane aika kabononano iroum. (Ebera 10:25) N ai aron Ataba, ngkana ko kaaniko ma te Atua, ko na namakina boutokoam n te tangira mairouna. E reitia ni kangai Ataba: “Ma I boni memena naba i Roum: Ko tautaua ataiu. Ane Ko na kairirai n am taeka n reirei, ao rimwi Ko ma mwaneai nakon te neboaki.” (Taian Areru 73:23, 24) Te Kristian temanna ae e karaoaki te ribuaka nakoina irouia taan tararuaia ngke e uarereke, e reke reireiana n taeka n rabakau akanne. “Te teimatoa n itenatena ma te ekaretia,” e taku, “e kaota nakoiu te maiu ae kaokoro. I noria raoi bwa unimwaane ni Kristian a tatangira, ao tiaki bureitiman ngaiia ma bon taani kawakina te nanai.” Eng, unimwaane ni Kristian aika nanoanga a karaoa te mwakuri ae moan te kainnanoaki ni buokiia aomata n totokoa rorokon taian namakin irouia aika a kona n urua nanoia.—Itaia 32:1, 2; 1 I-Tetaronike 2:7, 8.
Butimwaea Ana Reirei Iehova
Baruka ae ana tia koroboki Ieremia are te burabeti, e ikenrawa ni korakoran rawawatan nanona i nanon ana tai ni karaoa mwiokoana. Ma e ngae n anne, e akoi Iehova ngke e kaira ana iango Baruka bwa e na atai koaua aika kaineti ma te maiu aei. “Ao ko ukoukori baika kakanato ba am bwai? Tai ukoukori: ba noria, N na karoko kaai i aoia aomata ni kabaneia, bon ana taeka Iehova: ma N na anganiko maium ba kaanga konam n taabo ni kabane ake ko na nako iai.”—Ieremia 45:2-5.
Iehova e karaua ni kamataata raoi bwa e bwara nanon Baruka ibukina bwa e tabe ma iangoan katokan oin nanona ni bwaai ake e tangiri. E aki kona n rau nanon Baruka ni mwiokoana iroun te Atua, ngkana e kataia naba n ukoukori baika kakannato ibukina. Ko kona naba n noria bwa te mwaneka teuana ae rangi ni kakawaki ibukin karekean te tokanikai i aon te bwarannano, boni kararoan katabetabean nanom ni bwaai aika mwaiti, ao namakinan te mweeraoi ae e reke n te raunnano are mairoun te Atua.—I-Biribi 4:6, 7.
Te aine ae e a tia ni mate buna ae Nei Naomi e aki kariaia rawawatan nanona bwa e na kairia ni kakerikakia mai buakoia aomata ngke e mena i Moaba ni maten buna ao natina mwaane aika uoman. Ma e oti bwa e namakina te nanobuaka i nanon tabeua te tai, ni kaineti ma arona ao aroia buia natina aika uoman. E kangai Nei Naomi ngke e a kanakoia: “I bati n nanokawaki i bukimi, ba e a oti nako bain Iehova n ekai nako.” Ao ngke e roko i Betereem, e a manga imanono ni kangai: “Tai aranai ba Nei Naomi, [Nei Karewe] kam na aranai ba Nei Mara [Nei Maai] ba E arona te aro ae bati ni maai nako iu Teuare Moan te Mwaka.”—Ruta 1:13, 20.
Ma e aki kerikaki Nei Naomi mai matan Iehova ke ana aomata, n te aro are e kaokoroa n tanginiweneia mateia ana koraki. Ngke e mena i Moaba, e ongora ae “E kawariia ana aomata Iehova n angania te amarake.” (Ruta 1:6) E ota raoi bwa te tabo ae moanibaan te raoiroi ae e na mena iai, bon rarikia ana aomata Iehova. A uaia n airi n oki rikaki nako Iuta Nei Naomi ma Nei Ruta ae bun natina, ao e rabakau ni kaira Nei Ruta n aroarona ae e na karaoia nakon ana buu ae Boati, are teuare e riai ni katunaaki ma ngaia i aan te Tua.
N aron anne, n taai aikai, aomata aika kakaonimaki ake e a mate buia, a tokanikai i aon rawawatan nanoia iai n te aro are a katabetabeia ni mwamwakuri i nanon te ekaretia ni Kristian. N ai aron Nei Naomi, a teimatoa ni mutiakin bwaai n taamnei ma ni wareware n ana Taeka te Atua ni katoa bong.
Kakabwaia Aika A Nako man Kamanenan te Rabakau Mairoun te Atua
Rongorongo man te Baibara aikai a kaota aron te aomata ni kona ni kaitaraa namakinan te bwarannano. Ataba e kakaaea buokana n ana uma Iehova are tabu, ao e taotaona nanona ni kakaantaninga ana mwakuri Iehova. E butimwaea reireiana Baruka ao e rawa nakon anaakin nanona ni kaubwain te aonnaba aika katabetabea te iango. E mwamwakuri Nei Naomi i buakoia ana aomata Iehova, ao e katauraoa te ateiaine ae Nei Ruta ibukin mwiokoana ni kaineti ma taromaurian te Atua ni koaua.—1 Korinto 4:7; I-Karatia 5:26; 6:4.
Ko kona naba n tokanikai i aon te bwarannano ao iango riki tabeua aika kabononano ngkana ko iaiangoi taian tokanikai ake e a tia Iehova n angania ana aomata tabeman, ke ana botaki ae bwanin. Iaiangoa naba aron ana mwakuri n tangira Iehova ae te kabanea n raoiroi, are katauraoan te kaboomwi ibukim. Kakukureiko n te itangitangiri ni koaua ae mena irouia kaain te botaki n itaritari ni Kristian. Kabotoa am iango i aon maium n ana aonnaba te Atua ae boou ae nang roko ngkai. Ao ngkanne, ko kona ni kangai naba n aron are e taekinna Ataba: “Ma e raoiroi i rou te kaania te Atua: I rinea te Uea ae Iehova ba neu ni kamaiu, ba I aonga n tataekin am makuri ni kabane.”—Taian Areru 73:28.